“Eberi 24–30. Ioane 7–10: ‘Ngai te Tia Kawakin Tiibu ae Raoiroi,’” Nakomai, Iriirai—Ibukin te Moanrinan: Nu Tetemanti 2023 (2022)
“Eberi 24–30. Ioane 7–10,” Nakomai, Iriirai—Ibukin te Moanrinan: 2023
Ao N na aki Kabuakakako, iroun Eva Koleva Timothy
Eberi 24–30
Ioane 7–10
“Ngai te Tia Kawakin Tiibu ae Raoiroi”
Ngkae ko wareka Ioane 7–10, iangoia ataei ake ko na reireiniia. Angiin iango ibukiia ataei ake a ikawai riki n te kanoa n reirei aei e kona ni kabebeteaki ibukiia ataei ake a uarereke, ao arona naba anne.
Kaunga te Tibwatibwa
Kauringiia ataei am mwioko nakoia man te reirei are mai mwaina. Tuangiia bwa tera ae a karaoia ni karaoa nanon mwiokoaia.
Reirei te Reirei: Ataei aika a Uarereke Riki
Kawakinan tuua nako e na buokai n atai bwa a bon koaua.
E reirei Iesu bwa ti kona ni karekei ara koaua n koaua ake E taekin ngkana ti maiuakin. Te rau are ti namakinna ngkan ti ongeaba nakon tuua nako e buokiia n ataia bwa a bon koaua. Iangoia bwa tera arom n reirei te koaua aei nakoia am ataei.
Waaki ni Kakukurei aika a Kona ni Karaoaki
-
Kakimototoa Ioane 7:17 n taeka aika a na kona iai n oota ataei. Buokiia bwa a na ataia ae kawakina tuua nako e buokiira bwa ti na kaaniia Iesu Kristo. N aron ae kangai, kam kona n anenea te kuna n aron “Keep the Commandments” ke “Choose the Right Way” (Aia Boki n Anene Ataei, 146–47, 160–61). Tuangiia ataei bwa a na ongora bwa tera kakabwaia aika ti na karekei man kawakinan tuua.
-
Tibwa rongorongom ike ko karekea iai am koaua bwa te tua teuana bon mairoun te Atua ao ko ataa aei man maiukinana, n aron kabwakaan te kabwianibwai ke kabwaraan ana bure te aomata ae aki rau nakoim. Kaoiia ataei bwa a na iangoa te bwai ae riki inanon maiuia ike a ongeaba iai nakon te tua. Tuangiia bwa a tibwaa aia namakin ngke a ongeaba.
-
Tuangiia ataei bwa a na korei tamneia ngke a ongeaba. (Buokiia inanon karekean aia iango.) Kaoiia bwa a na kaotii aia tamnei ibon imarenaia ao ni maroroakina te kukurei are a karekea man kawakin te tua.
E ongeaba Iesu iroun Tamana.
Iesu e karaoi bwaai ake e na kukurei iai Tamana are i Karawa. Ko na kanga ni buokiia ataei n ira Ana katooto?
Waaki ni Kakukurei aika a Kona ni Karaoaki
-
Buokiia ataei bwa a na taekina ana taeka Iesu ibukin Tamara arei Karawa are koreaki n Ioane 8:29: “I kakaraoi bwaai ake e na kukurei iai.” Tuangiia bwa a na tibwai bwaai ake e karaoi Iesu ni kakukureia Tamara are i karawa. Kaotii tabeua tamnei man Boki n Tamnei n te Euangkerio bwa ana karekei iai aia iango.
-
Titirakiniia ataei bwa tera ae e anganiia te kukurei. Ke kaoa temanna ana karo te ataei bwa e na tibwaua rongorongon natina ngke e rang kukurei ke ni kakatonga n ana mwakuri natina. Tera ae ti kona ni karaoia ni kakukurei Tamara arei Karawa? Kaoiia ataei bwa a na korei tamnei ni karaoi mwakuri aikai ao n uoti rikaaki nakon mweengaia bwa te kanuring.
E kinaai man tangirai Iesu.
Te taeka ni kaikonaki are te tia kawakin tiibu ae raoiroi e kona ni buokiia ataei ni mataata bwa a tangiraki iroun Iesu ao e kinaiia.
Waaki ni Kakukurei aika a Kona ni Karaoaki
-
Anga te tamnei nakoia ataei are e tamnein te karaki n te taetae ni kaikonaki n te tia kawakin tiibu ae raoiroi, n aron te tiibu, te tia kawakin tiibu, ke te kameaanti. Rinei tabeua kiibu man Ioane 10:1–16 ao warekii nakoia ataei, ao tuangiia bwa a na katei tamnein baike a ongo mai iroum. Buokiia ataei bwa a na iangoa bwa n te aro raa ae Iesu bon te tia kawakin tiibu. Kaota am koaua bwa e tangiriira te Tia Kamaiu ao e na kairiira nakon mweengana.
-
Kaota tamnein Iesu ao taian tiibu n te kanoa n reirei n te wiiki aei n Nakomai, Iriirai—Ibukiia Aomata n Tatabemaniia ao Utu. Ti kanga n ataia bwa Iesu e tangiriia taian tiibu? Ti kanga n ataia ae taian tiibu a tangira Iesu? Ti na kanga ni kaotia nakon Iesu bwa ti tangiria?
Reirei te Reirei: Ataei aika a Ikawai Riki
Kawakinan tuua nako e na buokai n atai bwa a bon koaua.
Ngkoe ma ataei ake ko reireiniia kam bon tia n karaoi nanon reirein te euangkerio ao n tia n ataia bwa a bon koaua. Ko na kanga n reirei iaon koaua aikai n am anga reirei?
Waaki ni Kakukurei aika a Kona ni Karaoaki
-
Korei kiibu aikai Ioane 7:14–17 n beeba aika a kakaokoro, ao kawenei n aki karinan. Tuangiia ataei bwa a na barongai man te moan nakon te kabane Ioane 7:14–17 ao taraia bwa e eti. Kaoiia ataei bwa a na ikatoatoa ao n tibwaa ootaia ni kiibu ake a rinei ma toaia. E kanga te ongeaba nakon tuua ni buokiia n ataia bwa a bon koaua?
-
Kaotii katooto man kiibu ike a kakabwaiaaki aomata ibukin maiuakin koaua man te euangkerio, n aron Taniera (Taraa Taniera 6) ke Eritabeta (taraa Ruka 1:5–14). Tera kakabwaia aika ti a tia ni karekei man te ongeaba nakon tuua?
-
Tabeua te bong imwaain te kiraati, kaota temanna te ataei bwa e korea rongorongona ike e karekea ana koaua n te tua man maiuakinana. N tain te kiraati, tuanga te ataei bwa e na tibwaa are e koreia.
E na kainaomataai te koaua.
A taku tabeman aomata bwa maiuakinan te euangkerio e taua inaomataia. Ko na kanga ni kabonganaa Ioane 8:31–36 ni buokiia ataei ni mataata bwa maiuakinan te euangkerio e bon kainaomataira?
Waaki ni Kakukurei aika a Kona ni Karaoaki
-
Kaoiia ataei bwa a na wareka Ioane 8:31–36 ao n tibwaa aia iango bwa tera ae nanonaki n te tautoronaki n te bure. Ti kanga ni kainaomataaki man iran ana reirei Iesu?
-
Kaota te roka bwa e na tei ibukin te bure ao te kiing bwa e na tei ibukin koauan te eueangkerio e kainaomataira. N aron ae kangai, ataakin ana mwakuri ni kamaiu te Tia Kamaiu e kona n anganiira te inaomata n raira nanora ao ni karekea kabwaraan ara bure. Ke ataakin Tuan te Mauri e kona n anganiira te kainaomataaki man totokoan baika a kareke.
E reirei Iesu, “E na kainaomatako te koaua” (Ioane 8:32).
Iesu bon te tia kawakinai.
Ngkai ko kamatebwaia te taetae ni kaikonaki ibukin te tia kawakin tiibu ae raoiroi, tarai koaua ake e reirei ibukin ara reitaki ma te Tia Kamaiu. E kanga ataakin baikai ni kakabwaiaia ataeia?
Waaki ni Kakukurei aika a Kona ni Karaoaki
-
Korea te tia kawakin tiibu ae raoiroi ao te tia mwakuri iaon te burakibooti. Kabwarabwara bwa te tia mwakuri bon te aomata ae e karaoa te mwakuri ibukin te mwane. Tuangiia ataei bwa a na karekei baika a kaokoro ake a kunei n Ioane 10:1–18 imarenan te tia kawakin tiibu ao te tia mwakuri. Bukin tera ko riai n ira te tia kawakin tiibu ae raoiroi ao tiaki te tia mwakuri? Bukin tera ngkai Iesu bon ara tia kawakin tiibu?
-
Korea ke kaota tamnein te mataroa. Bootaki wareka Ioane 10:7–9, ao tuangiia ataei n te aro raa ae Iesu bon te mataroa. Ni kaineti ma kibu 9, tera kakabwaia aika e na reke irouia aomata ake a “rinnako” man te mataroa? Ti na kanga n rin te mataroa are e katauroaia Iesu Kristo ibukira?
Kaungaa te Kamatebwai n te Mweenga
Buokiia ataei n iangoa te tua ae a kona n ongeaba nako iai. Tuangiia bwa a na kataia n ongeaba nakon te tua nakon te wiiki ae imwaaia.
Kanakoraoan Ara Anga reirei
Anga titiraki aika a kaunga te nano. Tabeki titiraki ake e na kona ni buokiia ataei ni kaeka mai nanoia. Ao, kaungaia bwa a na tibwauai aia koaua ni koauan te euangkerio. N aron ae kangai, ngkana kam maroroakin tuua, ko kona n tuangiia ataei bwa a na tibwai kakabwaia ake a karekei man kawakin tuua.