Te I-Tamaria ae Raoiroi, iroun Dan Burr

Eberi 17–23

Mataio 18; Ruka 10

“Tera Ae Na Karaoia Bwa e Aonga n Reke Irou te Maiu ae Akea Tokina?”

Tera te koaua man Mataio 18 ao Ruka 10 ae a riai n reiakinna ataei? Kakauongo nakon ana wirikiriki te Tamnei ae Raoiroi ngkai ko wareki mwakoro aikai. Nakomai, Iriirai—Ibukiia Aomata n Tatabemaniia ao Utu e kona ni buokiko ni kaira am kamatebwai, ao te kabwarabwara aei e kona n anganiko iango ibukin te anga reirei.

Kaunga te Tibwatibwa

Tuangiia ataei bwa a na tibwa te bwai are a tia n reiakinna iaon Iesu Kristo ni mweengaia ke n te Moanrinan.

Reirei te Reirei: Ataei aika a Uarereke Riki

Mataio 18:21–35

I riai n tainako ni kabwarai aia bure aomata.

Ngkai ko wareka Mataio 18:21–35, iangoi oin am taneiai iaon te kabwarabure ao tera ae a kainanoia ataei n ataia iaon te reirei aei.

Waaki ni Kakukurei aika a Kona ni Karaoaki

• Taekina te kaikonaki iaon te toro ae buakaka (taraa Mataio 18:23–35). Kamataata bwa ngkana te aomata temanna e aki akoi ke n aki karaoa ae eti, ti na bon namakina te un ke te nanokawaki moa. Ma te kabwarabure nanona bwa ti kona n namakina manga te rauu. Ngkana ti kabwara ana bure te aomata, ti motikia bwa ti na aki manga un irouia. (Buokiia ataei bwa a na mataata bwa ngkana temanna e aki akoi ke n aki karaoa ae eti nakoia, a riai n tuangiia aia karo ke te ikawai temanna ae e onimakinaki ibukin buokaia.)

• Korea I kabwara am bure iaon te burakibooti, ao tuangia ataei bwa taeka aikai a kona ni bita te tai ae kananokawaki nakon te kukurei. Korea tamnein te ubu ae nanokawaki iaon te burakibooti, ao tibwai tabeua katooto iaoia ataei aika a ikakabwarabure imarenaia. Imwiin taekinan katooto n tatabeua nako, kaoa temana te ataei ni bita te ubu are e nanokawaki nakon ae e kukurei.

• Anene ma ataei n te anene ae taekan te kabwarabure, n aron “Help Me, Dear Father” (Aia Boki n Anene Ataei, 99). Tibwaua am kakoaua bwa Tamara are i Karawa e na buokiira ni kabwarai aia bure aomata tabeman.

Ruka 10:25–37

E reireinai Iesu bwa N na noriia aomata bwa kain rarikiu ao n tangiriia.

Te kaikonaki iaon te I-Tamaria ae tamaroa e kona ni kaotia nakoia ataei bwa antai kaain rarikiu ao ti na kanga n reitaki ma ngaiia. Iangoi kawai ake ko kona iai ni buokiia ataei n “nako, ao karaoia … naba” (Ruka 10:37).

Waaki ni Kakukurei aika a Kona ni Karaoaki

• Titirakiniia ataei n tatabemaniia, “Antai kaain rarikim?” Kakimototoa taekinan te rongorongo are n Ruka 10:25–37, ao tibwa ana kaeka Iesu nakon te titiraki anne. Tera ae a reireia Iesu bwa e na kanga aron reitakira ma kaain rarikira?

• Wareka Ruka 10:25–37 ngkai ataei a katea kain te kaikonaki iaon te I-Tamaria ae raoiroi. Buokiia bwa a na iangoi kawai ae a kona iai n riki kaanga ai aron te I-Tamaria ae raoiroi man kaotakin te tangira ao te akoi nakoia tabeman.

• Korei tabeua katooto n te bwai ae riki ngke te aomata temanna e kainanoa buokana, ao karabai beeba inanon te ru. Taungiia ataei bwa a na kakaea te beeba. Wareka te bwai are e taekinaki n te beeba, ao kaoiia ataei bwa a na tibwaia bwa a na kanga ni kaota te akoi nakon te aomata are e riki anne nakoina.

• Anene ma ataei te anene iaon taekan te akoi, n aron “Jesus Said Love Everyone” ke “Kindness Begins with Me” (Aia Boki n Anene Ataei, 61, 145). Buokiia ataei n iangoi tabeua kawai are a kaota iai te tangira ao te akoi nakoia aomata tabeman. A kona naba ni korea tamneia ngke a karaoi bwaai aikai.

Reirei te Reirei: Ataei aika a Ikawai Riki

Mataio 18:21–35

Tamara are i Karawa e na kabwarai au bure ngkai I kabwarai aia bure aomata tabeman.

Te kaikonaki iaon te toro ae aki nanoanga e kona n riki bwa te kawai ae e na ururingaki n reireiniia ataei bwa Tamara are i Karawa e tangiriira bwa ti na kabwarai aia bure aomata ni kabane.

Waaki ni Kakukurei aika a Kona ni Karaoaki

• Wareka Mataio 18:23–35 ma ataei. Kabwarabwaraa bwa te kiing ke te uea e tei ibukin Tamara are i Karawa, ao te toro e tei ibukira, ao te toro are temanna e tei ibukiia naake a karaoa ae e kairua nakoira. Titirakiniia ataei te titiraki n aron “Tera ae e reirei iaona te karaki aei bwa e kanga arora n reitaki ma aomata tabeman? Ningai ae ko kunea iai bwa e kangaanga kabwaraan ana bure te aomata temanna? Ko kanga ni kanakoi aekaki n namakin aika a kamaraki akanne? Ningai ae ko kainanoa iai kabwaraan am bure ibukin karaoan te rinerine ae kairua?”

• Kaota te witeo “Forgive Every One Their Trespasses: The Parable of the Uncerciful Servant” (ChurchofJesusChrist.org) ni buokiia ataei ni katamneia te kaikonaki aei.

• Korea iaon te burakibooti karaoakin te numera n te kamwaiti 70 x 7ao buokiia ataei ni kakaea rekena. Tuanga temann bwa e na wareka Mataio 18:21–22, ao kamataataa bwa Iesu e kabongana te nambwa aei n reireiniira bwa ti riai n tainako ni kakabwarabure.

• Tuangiia ataei bwa a na buokiko ni iangoi tabeua bwaai aika riki are te aomata temanna e kainanoia ni kabwara ana bure temanna. Kaoiia ataei bwa a na karaoa te kaotioti bwa a na kangaa ni kaota te kabwarabure ngkana a rinanon te waaki anne.

• Anene ma ataei n te anene ae taekan te kabwarabure, n aron “Help Me, Dear Father” (Aia Boki n Anene Ataei, 99). Buokiia ataei bwa a na mataata bwa tera ae e reireiniira te anene anne iaon kabwaraan aia bure aomata tabeman.

Ruka 10:30–37

I kona n tangira ao ni buokiia tabeman, riki naake a kainano.

Iangoi taai inanon maium ngke temanna e a tia n riki bwa te “I-Tamaria ae raoiroi” nakoim. Ko na kanga ni kaungaia ataei bwa a na riki bwa te “I-Tamaria ae raoiroi” nakoia tabeman?

Waaki ni Kakukurei aika a Kona ni Karaoaki

• Anganiia tabeia ataei n tatabemaniia bwa a na karaurau ni wareka mwakoron te kaikonaki iaon te I-Tamaria ae raoiroi. Kaoiia ataei bwa a na taekina te mwakoro are a warekia iaon te kaikonaki n aron baireana raoi n te bwai are e riki.

• Kabwarabwaraa nakoia ataei bwa Iutaia a kairiribai ma I-Tamaria n te aro are ngkana a mwananga mai Ierutarem nako Kariraia, a na bae n riaoa Tamaria bwa aonga n aki kaitiboo ma kaain Tamaria. Ni kamataataa raoi te waaki aei, kaota te Mwabe 1 “Physical Map of the Holy Land.” Bukin tera Iesu e kabongana te I-Tamaria bwa te katooto iaon te akoi n te kaikonaki aei? Tera ae reireiniira te karaki aei iaon buokaia aomata tabeman ake a kainano? (Taraa naba Motiaea 4:16–22.)

• Tuangiia ataei bwa a na tibwa aia taneiai ngke temanna te aomata e riki bwa ai aron te I-Tamaria ae raoiroi nakoia.

• Kaewenakoia ataei bwa a na katea aia kouru bwa a na riki bwa te I-Tamaria ae raoiroi n te wiiki aei. Tao ko na titirakiniia ngkana a ataa temanna ae e aoraki ke n tiku n ti ngaia ke temanna ae e tuai man roroko nakon te taromauri. Tuangiia ataei bwa a na kanga ni buoka te aomata anne. Buokiia ataei ni mataata bwa e kanga buokaia tabeman ni buokiia ni kawakin berita ake a tia ni karaoi n te bwabetito (taraa Motiaea 18:8–10).

Kaungaa te Kamatebwai n te Mweenga

Kaoiia ataei bwa a na tibwaia ma aia utu te bwai are a baireia bwa a na karaoia n rangi ni kakabwarabure riki ke n riki n aron te I-Tamaria ae raoiroi n te wiiki aei.

Kanakoraoan Ara Anga reirei

Reireiniia ataei bwa a na korea aia namakin. Ngkana a kona ataei n reiakina anuaia ae a na kokorei baike a roko n aia namakin, e na buokiia ni kinaa ao ni iriira te Tamnei. Ataei a kona ni korei mwiin aia namakin man makenan koroboki aika a tabu, korean tamnei, ao ni korei baika a bebete taekaia n te tienoro.