Maati 27–Eberi 2

Mataio 14; Mareko 6; Ioane 5–6

“Tai Maaku”

Ngkai ko katauraoi n reirei man Mataio 14; Mareko 6; ao Ioane 5–6, tarai rongorongo ake a na kaineti nakon maiuia ataei ake ko reireiniia. Tera n am iango ae e na buokiia ni mataata iaon rongorongo aikai? Te kabwarabwara aei e na anganiko tabeua iango.

Kaunga te Tibwatibwa

Kaota tamnein Iesu ngke e nakonako iaon te ran (taraa te kabwarabwara n te wiiki aei n Nakomai, Iriirai—Ibukiia Aomata n Tabemaniia ao Utu ke Gospel Art Book, nambwa. 43), ao tuangiia ataei bwa a na tibwa te bwai are ataia n te karaki.

Reirei te Reirei: Ataei aika a Uarereke Riki

Ioane 5:1–9

Iesu Kristo e ataa te bwai ae I kainanoia ao E kona ni buokai.

Iangoa rongorongon Iesu ngke e kamarurunga te mwaane irarikin nein Beteteta. Ko na kanga ni buokiia ataei n noria bwa tera ae e reirei iaon te karaki n rongorongon ana akoi Iesu, ana tangira, ao anuana riki ake tabeua?

Waaki ni Kakukurei aika a Kona ni Karaoaki

• Kabongana te tamnei Christ Healing the Sick at Bethesda (Gospel Art Book, nambwa 42) ni karakina nakoia ataei te karaki inanon Ioane 5: 1–9. Ke kaota te witeo “Jesus Heals a Man on the Sabbath” (ChurchofJesusChrist.org). Tuangiia ataei bwa a na iangoia ae aongkoa ngaiia te aomata are e kamarurungaki iroun Iesu. E na kanga aia namakin ngke Iesu e kamarurungiia?

• Tuangiia ataei bwa a na aran tabeua bwaai aika a matoatoa nakoia ke ae e karikiia bwa a na nanokawaki. Tuangiia taekan ae ngke ko karekea buokam inanon maium mai iroun te Tia Kamaiu inanon taai ni kataaki. Kakoaua ae Iesu e atai ni kabane ara kangaanga ao E tangiria ni buokiira.

Mataio 14:13–21

I iriira ana banna ni katooto Iesu ngkana I akoi nakoia tabeman.

Teuana te kawai ae e kaota ana tangira Iesu bon man kamarakeakia taan Iriiria ngke a bora ni baki. Ko na kanga ni buokiia ataei n reiakina ae a na buokiia aomata n aron are e karaoia Iesu?

Waaki ni Kakukurei aika a Kona ni Karaoaki

• Kaota tamnein te bwaene ma tabeua kariki nakoia ataei ngkai ko karakina te rongorongon ni Mataio 14:13–21. Kamataata bwa e ngae ngke e kataia Iesu ni kakaea te tabo ae na tii ngaia iai, aomata a tangiria bwa a na mena Irarikina. Tibwaa motin te karaki ma ataei, ao tuangiia bwa a na kakauongo bwa tera ae e karaoia Iesu ni kaota te akoi ao te tangira nakoia aomata.

• Tuangiia ataei bwa a na tibwai kawai ngke tabeman aomata a tia ni kaota te akoi nakoia. Ngkanne buokiia bwa a na iangoi bwaai ake a kona ni karaoi n te wiiki aei bwa a na kaota te akoi nakoia tabeman. N aia kaeka ake a aanga, korea tamnein te mwakoro ni kariki ke te ika iaon te burakibooti. Tuangiia ataei bwa ngkana a karaoi bwaai aikai, a iriira iai ana banna ni katooto Iesu are e kateia ngke E kamwarakeia nimaua te nga te aomata are a bora ni baki.

Mataio 14:22–33

Te Onimaki iroun Iesu Kristo e kona ni buokai bwa n na aki maaku.

Betero e kaota ana onimaki ae korakora ngke e nakonako iaon te ran nakon Iesu. Tera te reirei n aei ibukiia ataei n te karaki aei?

Waaki ni Kakukurei aika a Kona ni Karaoaki

• Kaota te tamnei inanon te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu (tara naba Gospel Art Book, nambwa 43) ngkai ko karakina te rongorongo man Mataio 14:22–33 n oin am taeka. Iangoia ni kabongana te iteraniba ibukin waaki ni kakukurei n te wiiki aei ni buokiia ataei ni karakina te karaki nakoim. Ko kona naba n uota te bora n ran ao kaoiia ataei bwa a na iangoia ae aongkoa a “nakonako” ni karaoia n taboni baia iaon te ran.

• Kaota te witeo “Wherefore Didst Thou Doubt?” (ChurchofJesusChrist.org). ao titirakiniia ataei bwa bukin tera e maaku Betero. Ngkanne tuangiia bwa a na taekina te tai are ngke a namakina ae a maaku ao n tibwaia bwa tera ae e buokiia. Buokiia n noria ae te onimaki iroun Iesu Kristo e buokiira n tokanikai iaon te maaku.

Reirei te Reirei: Ataei aika a Ikawai Riki

Ioane 5:17–47

Iesu Kristo e reireinai taekan Tamara are i Karawa.

E kanga ana reirei Iesu iaon Tamana ni buokiia ataei n reiakina aron Tamara are i Karawa?

Waaki ni Kakukurei aika a Kona ni Karaoaki

• Karaoi uoua babati ni kaati aika a itoatoa ma taekaia ae titebo ae e kabonganai Iesu n reirei iaon Tamara are i Karawa n Ioane 5, n aron te tangira, te maiu, ao te mwakuri (taraa Ionane 5:20, 26, 36). Kabaraaki taian kaati, ao tuangiia ataei bwa a na kakaei aika titebo taekaia ngkai a ietii uoua te kaati n teuana te tai. Ngkana a reke aika titebo, wareka te kibu are iai iaon te taeka anne, ao titirakiniia ataei bwa tera ae e reireiniira te taeka anne iaon Tamara are i Karawa.

• Tuangiia ataei bwa a na wareka Ioane 5:30 ao kabwanina te taeka aei: “Bwa I aki ukoukora tauan au taeka, ma …” E kanga Iesu Kristo ni karaoa nanon Tamana are i Karawa? Ti na kanga ni karaoa nanon Tamara are i Karawa?

Man te kakai Iesu e kamwarakeia nimaua te nga te aomata Iesu man nimaua te mwakoro ni kariki ao uoman te ika.

Ioane 6:5–14

Au angabwai ae uarereke e kona ni karika te bitaki.

Bon te kairake n ataeinimwaane ae e katauraoa te kariki ao te ika are e kabongana Iesu ni kamwarakeia iai nimaua te nga te aomata. Ko na kanga ni buokiia ataei ake ko reireiniia n nora ae a kona ni anga ae a konaa nakon ana mwakuri te Uea?

Waaki ni Kakukurei aika a Kona ni Karaoaki

• Buokiia ataei n iangoia bwa tao kanga mwaitira te aomata ae nimaua te ngaa. A na aekakira aron kamwarakeaia te mwaiti n aomata anne n ti nimaua te mwakoro ni kariki ao uoman te ika?

• Kaoa te ataei temanna ni karakina te karaki iaon kamwarakeaia aomata ae nimaua te nga mwaitia n oin ana taeka. Katuruturua ae bon te kairake n ataeinimwaane ae e katauraoa te kariki ao te ika are e kabongana Iesu ni karaoa iai te kakai aio. Ti na kanga n riki n aron te ataeinimwaane are e kabwarabwaraaki n Ioane 6:9? Kaoiia ataei bwa a na korea tamnein mwakoro ni kariki ao te ika iaon te beeba ao kaoiia bwa a na korea iaona tabeua bwaai ake a kona n anga nakon te Uea ni buoka Ana mwakuri.

• Anganiia ataei te kamwaninga ae a na karaoia ae bebete. Tera ae e na riki ngkana teuana mai ibuakon te bwai ni kamwaninga e bua? Kabwarabwaraa bwa ngaira kanga bon aekan mwakoron nako te bwai te kamwaninga—ti bane ni kakawaki, ao ti bane ni kainanoira n tatabemaniira nako. Buokiia ataei n taekina bukin ae a kakawaki inanon aia utu, aia kiraati n te Moanrinan, n ana utu te Atua, ao kurubu riki tabeua.

Mataio 14:22–33

Te Onimaki iroun Iesu Kristo e kona ni buokai bwa n na aki maaku.

Te onimaki ao te maaku e korakora kakawakina iaon karakinan Iesu ao Betero ngke a nakonako iaon taari. Tera ae ti kona n reiakinna ataei man te rongorongo aei?

Waaki ni Kakukurei aika a Kona ni Karaoaki

• Kaota te tamnein inanon te kabwarabwara n te wiiki aei inanon Nakomai, Irirai—Ibukiia Aomata n Tatabemaniia ao Utu; (taraa naba Gospel Art Book, nambwa 43). Tuangiia ataei bwa a na kakaei kibu n taeka inanon Mataio 14:22–33 are e kabwarabwara te tamnei.

• Tuangiia ataei bwa ana kakaei kanikina n te onimaki ao kanikina n te maaku ngkai a wareka Mataio 14:22–33. Ko kona ni kaota naba te witeo “Wherefore Didst Thou Doubt?” (ChurchofJesusChrist.org). Tera ae nanonaki ni karekea te onimaki iroun Iesu Kristo? Buokiia ataei n iangoi taai are ngke aia onimaki e buokiia n tokanikai iaon te maaku.

• Tuangiia ataei bwa a na iangoia ae aongkoa a mena ikekei ao iai aia bwai n rawetamnei ngke Iesu ao Betero a nanonako iaon taari. E ngaa iai te tai ae a na rawea tamneina ao bukin tera? Tuangiia bwa a na ukora Mataio 14:22–33 ibukin taian iango. Kaoiia bwa a na korea tamnein te tai are a rineia n rawea tamneina, tibwa aia tamnei, ao ni kabwarabwara bwa bukin tera a rinea te tai anne.

Kaungaa te Kamatebwai n te Mweenga

Ngkana a tia ataei ni kabwanina karaoan bwaai ake inanon te iteraniba ibukin waaki ni kakukurei n te wiiki aei, kaoiia bwa a na kabongana n reireiniia aia utu te bwai are a reiakinna n te kiraati. Ke anganiia kaobiin te iteraniba bwa a na kabwaninna ma aia utu ni mweengaia.

Kanakoraoan Ara Angareirei

Kaungaa te tibwatibwa. Titirakiniia ataei ibukin aia iango, namakin ao aia tataneiai. Ko na kunea ae e na kaman iai aia nonori ae e mangori ma e nano.