Maati 27–Eberi 2

Mataio 14; Mareko 6; Ioane 5–6

“Tai Maku”

Ngkai ko wareka Mataio 14; Mareko 6; ao Ioane 5–6,kakaai koaua ake a uaana nakoim. Ko na bon titirakiniko titiraki n aron “E na kanga rongorongo n mwakoro aikai n irekereke nakoiu?” “Tera taian rongorongo are I kunei ibukin maiu?” ke “Tera are N na tibauaia ma au utu ke ma tabeman?”

Korei Am Namakin

Tera ae e a tia ni kaungaa Betero ni kitana manon ana booti inukan naman Kariraia n tain buakan taari? Tera are e kairia ni kakoaua bwa ngkana Iesu e kona n nakonako iaon te ran, ngaia e na konaa naba? Ti aki kona ni ataia raoi, ma tao Betero e oota n ae Natin te Atua e aki ti roko ni karaoi bwaai aika kamimi ibukia aomata ma e anga naba te mwaaka nakoia aomata n ai aron Betero bwa ana karai bwaai aika kamimi naba. Ana kakao Iesu, n tokin te tai bon, “Nakomai ,ao irirai” (Ruka 18:22). Betero e kariaia te kakao aei ngkoa, ao e a manga kariaia riki teuana te tai, e ngae ngkana e nang kaitara maakuna ao karaoan te bwai ae taraa ni kangaanga. Tao e na aki tuangiira te Uea bwa tina kitana te booti inukan te buaka ke n tibwatibwai ara berena aika aki tau ngkai e ngaa ae kainanoa te amwarake, ma E na kona n tuangiira bwa tina butimwaai kaetieti e ngae ngkana ti aki mataata raoi iai. Tao tera Ana kakao nakoira, ana kona n tabetai n taraa ni kamiimi ke ni kakamaku riki. Ma taian kakai a kona n riki ngkana ngaira, n aron Betero, kamwawai maakura, nanououara, ao ootara ae memere ao man Iriria n te onimaki.

Iango ibukin te Kamatebwai i bon Iroum ni Koroboki aika Tabu

Ioane 5:16–47

E karinea Tamana Iesu Kristo.

Te reitaki imarenan Tamara are i Karawa ao Natina n tatabemaniia nako bon te reitaki ae tabu. Inanon kiibu aikai, Iesu Kristo e anganiira te katooto ibukin iran nanon ara reitaki ma Tamara are i Karawa. Wareka Ioane 5:16–47, ao mwaaken ke tarai taai are e kabonganaki te taeka ae Tama. E kanga te Nati ni karinea te Tama, ao ko na kanga n ira Ana katooto? Tera ae ko reiakinna n ana namakin te Tama ibukin Natina? Tera ae kaungako bwa ko na karaoia ni kakorakora am reitaki ma Tamara are i Karawa?

Taraa naba Ioane 17; Jeffrey R. Holland, “The Grandeur of God,” Riahona, Nob. 2003, 70–73.

Iesu e karaoa te kakai ni kamwarakeia nimaua te ngaa te aomata man nimaua te berena ao uoman te ika.

Mataio 14:15–21; Mareko 6:33–44; Ioane 6:5–14

Te Tia Kamaiu e kona ni karababa au angabwai ae mangori ni katiaa Ana kantaninga.

Ko a tia ni nanamakina te aki tau ni kaitarai kainanom ni kabane—inanon mweengam, n am reitaki, ke n am bobotaki? Ana reirei Iesu a bon bae naba n namakina te aki tau ngke E tuangiia bwa ana kamwarakeia nimaua te ngaa te aomata n tii nimaua te mwakoro ni berena ao uoman ika ake a tauraoi. Ngkana ko wareka taekan te kakai are e riki imwina, iangoia bwa e na kanga te Atua ni kabongana am mwakuri n angabwai ae mangori ni kakabwaiaia koraki ake irarikim. E kanga ni karababa am mwakuri ngkai ko beku Irouna? Iangoa te rongorongo aei mairoun Titita Michelle D. Craig: “Ngkoe ao ngai ti kona n anga are iai iroura nakon Iesu, ao E na kanakoraoa ara mwakuri. Am anganano are ko anga e bon rangi n tau—e ngae ngkana iai kabwakam n aomata ao mamaaram—ngkana ko katan iaan ana nanoanga te Atua” (“Divine Discontent,” Liahona, Nov. 2018, 54).

Mataio 14:22–33; Mareko 6:45–52; Ioane 6:15–21

Iesu Kristo e kaoai bwa nna katikui mwaaku ao au nanououa ao man kamwakura au onimaki Irouna.

Katamneia n ami iango bwaai ake a taekinaki n Mataio 14:22–33; Mareko 6:45–52; ao Ioane 6:15–21. Katamneia bwa kaanga aekakira aia namakin Betero ao abotoro ake tabeman are a tia n namakina. Tera ae ko reiakina ibukin te riki bwa Ana reirei man ana taeka ao mwakuri te Tia Kamaiu inanon kiibu aikai? Tera ae ko reiakinna man ana taeka ao ana mwakuri Betero? (Taraa naba 1 Nibwaai 3:7.) Tera ana kakao te Uea nakoim ae kona karaoia ae titebo ma are te otinako man te booti? Tera ae ko kunea man kiibu aikai are e anganiko te ninikoria ni kamwakura am onimaki iroun Iesu Kristo?

Ioane 6:22–71

Ngkai ngai ana reirei Iesu Kristo, I riai n tatauraoi n kakoaua ao n butimwaea te koaua, e ngae ngkana e bon matoa karaoana.

Ngke e arana Iesu bwa te “berena ni kamaiu” (Ioane 6:48), a mwaiti ake a kunea bwa e “matoa taekinana” (John 6:60). A na kanga ana taeka Betero n Ioane 6:68–69 ni buokiko inanon taai ake ana angareirei te Tia Kamaiu ana taraa ni matoa butimwaeaia ao maiuakinana? Tera ringakin nanom n ana kakoaua Betero? Tera tabeua “taekan te maiu ae akea tokina” (Ioane 6:68) are e buokiko n taua ma nanom n iriira te Tia Kamaiu?

Taraa naba M. Russell Ballard, “To Whom Shall We Go?,” Riahona, Nob. 2016, 90–92.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Mataio 14:15–21.Iangoia bwa ko na kanga ni buokiia am utu ni katamneia bwa mwaitira te berena ao te ika are e na kamwarakeia nimaua te ngaa te aomata. Tera te kakai n Mataio 14:15–21 ae reireiniira taekan te Tia Kamaiu? Iangoa tibauan te taneiai teuana are ko namakinna iai bwa e aki tau te bwai are ko na anga ao te Tia Kamaiu e kamwaita korakoam ni mwakuri.

Mataio 14:22–33.A kona n unga kaain te utu ni manga kaotioti iaon karaki man kiibu aikai. Bukin tera ae ana maaku Ana reire? Bukin tera kai e kona Betero n tokanikai ni maakuna ao ni kitana te booti? E kanga ni kaota ana onimaki e ngae ngke ea moanna n inako? Ti kangaa n taai tabetai ni katootonga Betero?

Ioane 5:1–16.Kaoiia kaain te utu bwa ana tara okiokin te kibun taeka ae “ko kamaiuaki” inanon kiibu aikai. N aanga raa ae kamaiuia aomata iai Iesu Kristo? Ningai ao E kanga ni kamaiuira?

Ioane 6:28–58.Anganiia kaain te utu n tatabemania nako mwakoron te berena bwa ana kanna, ao marorooakin bwaai are ti karekei man te berena ao ai tabeua riki amwarake ake a kamarurung. Ngkanne bane ukori kiibu aikai, man taraia bwa bukin tera kai Iesu Kristo e Aranna bwa te “berena ni kamaiu” (Ioane 6:35). Tera are ea nanonaki ni “kanakin” te berena ni kamaiu? (taraa D. Todd Christofferson, “The Living Bread Which Came Down from Heaven,” Riaona, Nob. 2017, 36–39).

Ibukin iango aika a mwaiti riki ibukin reiakinaia ataei, taraa te kamataata n te wiiki aei n Nakomai, Iriirai—Ibukin te Moanrinan.

Anene aika rineaki: “How Great the Wisdom and the Love,” Anene n Taromauri, nambwa. 195.

Kananakoraoan Am Kamatebwai I Bon Iroum

Ukera oin am atatai. N am kamatebwai i bon iroum ao n te utu, tai tiatianiko nakon ti taian kiibu ake a katauraoaki n te bwai ni kamatata aio. Ena bon iai ana taeka te Uea nakoimi i nanon mwakoro aikai are a aki kaotaki ikai. Tataromwaaka n ukouke ibukiia.

Against the Wind, iroun Liz Lemon Swindle