Ngai I aki Naba Motika Taekam, iroun Eva Koleva Timothy

Eberi 24–30

Ioane 7–10

“Boni Ngai te tia Kawakin tibu ae Raoiroi”

Ngkai ko wareka Ioane 7–10, ko kona ni karekei namakin mairoun te Tamnei ae Raoiroi ibukin reirei aika a irekereke ma tua inanon mwakoro aikai. Korean am namakin e kona ni buokiko ni bairea te mwakuri iaoia.

Korei Am Namakin

E ngae ngke e roko Iesu Kristo bwa e na uota te “rau nako aonaba [ao] a na akoaki aomata” (Ruka 2:14), e riki “te raure i rouia aomata i Ibukina” (Ioane 7:43). Aomata ake kakoauai rikin bwaai n akea te kaokoro a bon kaokoro naba aia rongorongo bwa antai raoi Iesu. A taku temwangina, “Te aomata ae raoiroi,” ao temwangina a taku, “E burebureia aomata” (Ioane 7:12). Ngke E kamarurunga te mwaane ae matakii n te Tabati, a taku aomata, “Tiaki mairoun te Atua Teuarei, bwa e aki kawakin te Tabati,” ngke temwangina a titiraki, “E na iranna ni kona ni karaoi kakai aikai aron aei te aomata ae buakaka?” (Ioane 9:16). Ma n aki tabe ma taian kamangaongao, naake a ukora te koaua ataa te mwaaka i nanon baina, “bon akea te aomata ae taetae n te aro arei mangkoa” (Ioane 7:46). Ngke a titirakina Iesu Iutaia bwa “ko na kaetia n tuangiira”bon te Kristo ngaia, E anga te reirei are e kona ni buokiira n ataa kaokoron te koaua man te kairua: “A ongo bwanaau au tibu,” E taku, “ao I kinaia, ao a irirai” (Ioane 10:24, 27).

Iango ibukin te Kamatebwai i bon Iroum ni Koroboki aika Tabu

Ioane 7:14–17

Ngkai I maiuakin koaua ake ereirei iai Iesu Kristo, N na kakoauaabwa a bon koaua.

A miimi Iutaia ngkai e rangi ni mwaiti ana atatai Iesu, e ngae ngke bon akea ana reirei (taraa te kibu 15)—tao, n tiaki aanga ake a mwaatai iai. N ana kaeka Iesu, E reirei n te kawai ae kaokoro ibukin ataakin te koaua are e tauraoi nakoia aomata ni kabane, e ngae ngke akea ana reirei ke ni maeuna. Ni kaineti ma Ioane 7:14–17, ko na kanga n ataia bwa te reirei are e anga Iesu e bon koaua? E kanga te waaki aio ni buokiko ni karikirakea am koaua ibukin te euangkerio?

Ioane 8:2–11

Ana nanoanga te Tia Kamaiu e tauraoi nakoia aomata ni kabane.

Ngke e taekina rongorongon ana reitaki Tia Kamaiu ma te aine are e kuneaki ni wenenibure, e taku Unimwaane Dale G. Renlund: “Ni koauana, e bon aki kariaia te wenenibure te Tia Kamaiu. Ma e aki naba kabuakaka te aine. E kaunga bwa e na kanakoraoa maiuna. E kaungaaki nanona bwa e na bitaki ibukina Ana akoi ao ana nanoanga. Ana Rairairi Iotebwa Timiti n te Baibara e kaota koauan mwiin rikina ba te reirei: ‘Ao te aine e kamimitonga te Atua man te aoa anne, ao ni kakoaua arana’ [taraa Ioane 8:11, bwaai aika a na taraaki mai inano c]” (“Our Good Shepherd,” Riaona, Meei 2017, 30).

Nningai ae ko a tia n namakinna bwa kanga ai aron te aine ngke are e karekea te nanoanga ma e aki kabuakakaki iroun te Tia Kamaiu? Nningai ae ko a tia n riki iai bwa kanga ai aroia taan koroboki ao Baritaio, ni kabuakaka ke ao ni motikitaekaia tabeman e ngae ngke tao akea am bure? (taraa Ioane 8:7). Tera riki ae ko kona n reiakinaki man ana kawai teTia Kamaiu n te reitaki ma taan koroboki ao Baritaio ao te aine are e kuneaki ni wenenibure? Tera ae ko reiakinna ibukin ana nanoanga te Tia Kamaeu ngkai ko wareki kiibu aikai?

Taraa naba “Go and Sin No More” (witeo), ChurchofJesusChrist.org.

Ioane 9

Ngkana iai ara onimaki, e konate Atua ni kaotia inanon ara tai ni karawawataki.

Tera ae ko reiakinaki n Ioane 9:1–3 ibukin kanganga ao te karawawataki inanon te maiu? Ngkai ko wareka Ioane 9, iangoia bwa e kanga “ana mwakuri te Atua [ni] kaotaki” ni maiun te mwaane are e bungiaki ni matakii. A kanga ni kaotaki nakoim inanon maium—n ikotaki ma karawawatakim?

Ioane 10:1–30

Iesu Kristo bon te Tia Kawakin Tiibu ae Raoiroi.

E ngae ngke ko aki rang ataa taekan te tibu ao te tia kaawakin tibu, wareka Ioane 10, ike e taku te Tia Kamaiu, “Ngai te tia kawaakin tiibu ae raoiroi,”kona n reireiniko koaua aika a kakawaki Ibukina. Ni kakaei koaua aikai, kakaei kibuntaeka are a kabwarabwara bwa aekakira te tia kaawakin tiibu ae raoiroi imwiina iangoia bwa a kanga kibuntaeka aikanne ni kaineiti nakon te Tia Kamaiu. Aikai tabeua katooto:

• Te kibu 3: “E weteia ana tibu nako n araia, ao e kairia.”

• Te kibu 11: E “anga maiuna ibukia tibu.”

• Te kibu 16: “Ao e na ti teuana te nanai ao ti temanna te tia kaawakin tiibu.”

Aikai tabeua riki titiraki ni buokiko n iangoa raoi te mwakoro aio: E kanga Iesu n riki bwa kanga te mataroa? (taraa kiibu 7–9). E kanga n anganiko “te maiu … n rangi ni kamwaitaki riki”? (te kibu 10). Nningai ae ko namakinna bwa E kinako raoi ae bon ngkoe? (taraa te kibu 14). Ko kanga ni kinaa bwananaan te Tia Kaawakin Tiibu ae Raoiroi (taraa te kibu 27).

Taraa naba Taian Areru 23; Etekiera 34; Aramwa 5:37–39; 3 Nibwaai 15:21–16:5; Gerrit W. Gong, “Te Tia Kawakin Tiibu ae Raoiroi, Ana Tiibutetei te Atua,” Riaona, Meei 2019, 97–101.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Ioane 7:24.Ni buoka am utu bwa a na matata n ana reirei Iesu n Ioane 7:24, Ko kona ni kaota nakoia te bwai are e taraa n tii te arona mai inanona ma e kaokoro mai tinanikuna. Ke a kona kaain am utu n tibwauai aia taneiai ake a reireinaki iai bwa a na aki motikitaeka taekan te aomata mai itinanikuna. Ko kona naba ni korei rinanin anuaia am utu are e aki kona n nooraki n te mata (taraa naba 1 Tamuera 16:7; Thomas S. Monson, “See Others as They May Become,” Riaona, Nob. 2012, 68–71).

Ioane 8:31–36.Tera ae nanonaki n te riki bwa “ana toro te bure”? (taraa naba Moronaai 7:11). Baikara koaua ake e reireiia Iesu ake a kona ni kainaomataira?

Iesu E Kamaiua te Mataki, iroun Carl Heinrich Bloch

Ioane 9.Ko na kanga ni buokiia am utu ni katamneia rongorongon Iesu ngke e kamaiua te mataki n Ioane 9? Kam kona ni katea kain te karaki ni kabane ke kaota te witeo “Jesus Heals a Man Born Blind” (ChurchofJesusChrist.org). Katoka te karaki imarenan tai bwa aonga kaain am utu ni wareki kiibu ake a irekereke ma Ioane 9. Kaoia bwa a na korei reirei ake a reiakin man te rongorongo, n aron ae tera ae nanonaki n te rairaki nakon ana euangkerio Iesu Kristo.

Ioane 10:1–18, 27–29.Ni kairekerekeia am utu n reiakinaki man te kaikonaki ibukin te tia kaawakin tiibu ae raoiroi, titirakina temanna ma temanna bwa a na korei tamnein teuana man baikai: te tia iraa, te mataroa, te tia kaawakin tiibu, te aomata ae mwakuri ae kaboaki (te tia mwakuri ae kaboaki), te kameanti, ao te tiibu. Kaoia bwa a na wareka Ioane 10:1–18, 27–29, ao ngkanne maroroakinna n am utu bwa tera ana reirei te Tia Kamaiu ni baike a koroi tamneia.

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “The Lord Is My Shepherd,” Boki n Anene, nambwa 108.

Kanakoraoan Am Kamatebwai I Bon Iroum

Kakaei taeka ao kibun taeka aika kaunganano. Ngkai ko wareware, te Tamnei e kona n anganiko taeka ao kibuntaeka aika koaua nakon am kakauongo are a na anaa nanom ao ni kaungako ke e taraa n ae te koroboki kanga e koreaki ibukim. Iangoia kawakinikoroboki man taeka ke kibuntaeka are a anaaki nanom iai n Ioane 7–10.

N Aki Manga Bua, iroun Greg K. Olsen