Eberi 3–9

Itita

“Te Rua ni Mate, E Nga Am Tokanikai?”

Ngkai ko wareki taian kakoaua ibukin Mangautin te Ti Kamaiu n te kamataata aio, korei namakin ake a roko nakoim mairoun te Tamnei ae Raoiroi.

Korei Am Namakin

Ni kabanean wiikin maiun te Tia Kamaiu, angiia Iutaia ake a mena Irarikina a ira aron waakin katein te Tua are te Riao. A katauraoa te amwarake, a anene, ao bootaki ni kabane bwa n kauringa aron kainaomataakia te bata are Iteraera man te aro n tauronaki irouia I-Aikibuta. A ongora utu ni karakinaia anera ake taan tiritiri ake a riaoi mweengaia aia bakatibu ake a kanikinaei aon aia mataroa n raraan te tibuteteei. Ribuakon katabu aika moan te kakukurei aikai ni kanikinaean te kainaomataaki, bon tii tabeman ae a ataia bwa Iesu Kristo, ana Tibuteteei te Atua, e na kainaomataia man te tautoronaki n te bure ao n te mate—rinanon karawawatakin, matena, ao Mangautina. N aron naba anne, iai naba koraki ake a kinaa Iesu ae aia Tia Kamaiu are e taekinaki n te berita, te Tia Kamaiuia ae akea tokina. Man te tai ni karokoa te tai aei, ana reirei Iesu Kristo a kaota aia kakoaua nako aonaaba ni kabane “ba e mate Kristo i bukin ara bure … ao ba e taunaki, ao ba e a manga uti n te kateni bong” (1 I-Korinto 15:3–4).

Iango ibukin te Kamatebwai i bon Iroum ni Koroboki aika Tabu

Mataio 21–28

Iesu Kristo e kamaiuai man te bure ao te mate, e kakorakoraai inanon mamaarau, ao ni karaua nanou inanon kataakiu.

Teuana te kawai ni katurui ara taratara iaon kakabwaia n ana Mwakuri ni Kamaiu te Tia Kamaiu n te wiiki aio ti na kabonganai ara tai ni katoa bong ni wareka taekan kabanean wiikin maiun Iesu (bairean te tai iaon te wareware ae na karaoaki n aron aikai). Tera ae ko karekea inanon mwakoro aikai are a buokiiko n namakina ana tangira te Tia Kamaiu? Iangoia raoi tera ae a reiakinaki ni mwakoro aikai bwa E kanga ni kamaiuko man te bure, te mate, kataaki, ao te mamaara. Ko kanga ni kamwakura am onimaki n Mwaakana ni kamaiuko?

• Te Tabati: Rokon Iesu i Ierutarem ma te Tokanikai(Mataio 21:6–11)

• Moanibong: Kaitiakan te Tembora (Mataio 21:12–16)

• Kauabong: E angareirei i Ierutarem (Mataio 21–23)

• Katenibong: E reitinako n angareirei (Mataio 24–25)

• Kaabong: Te Toa are te Riao ao Karawawatakin Kristo n te Nne n Aroka are i Ketetemwane (Mataio 26)

• Kanimabong: Kataakina, Taurakina n te Kaibangaki, ao taunakina (Mataio 27:1–61)

• Kaonobong: E wene rabwatan Kristo n te nne ni mate (Mataio 27:62–66) ngke E mwakuri n te aonaaba n tamnei (Reirei ao Berita aika Tabu 138)

• Tabati: Waeraken Iesu Kristo nako Karawa ao kaotina nakoia Ana reirei (Mataio 28:1–10)

Taraa naba Easter.ComeuntoChrist.org.

Taurakina iaon te Kaibangaki, iroun Louise Parker

Mataio 28:1–10; Ruka 24:13–35; Ioane 20:19–29; 1 I-Korinto 15:1–8, 55

A mwaiti taan kakoaua ae a kakoaua Mangautin Iesu Kristo.

Iangoia e na aekakira taraakin aio irouia reirei ngkai a tabe ni matakuakina Iesu ngkae e kaenaenaaki, bwainikirinaki, ao n tauraki iaon te kaibangaki. A tia ni kakoaua mwaakana, a namakina koauan ana reirei, ao iai aia onimaki bwa bon ngaia Natin te Atua. Kakoauan matena e bon karika nanokawakiia Ana reirei ao n namakina te mangaongao. Ma n te tai ae waekoa ao a riki bwa taan kakoaua n korakoran te kakai ibukin Mangautina.

Tera ae ko reiakinaki n rongorongoia koraki ake a kakoaua bwa e a tia n Uti te Tia Kamaiu? Maakena ana taneiei temanna ni Mataio 28:1–10; Ruka 24:13–35; Ioane 20:19–29; ao 1 I-Korinto 15:1–8, 55. (Tabeman taan kakoaua ibukin Kristo are e a tia n uti e kona ni kuneaki n 3 Nibwaai 11; Moomon 1:15; Ita 12:38–39; Reirei ao Berita aika Tabu 76:19–24; 110:1–10; ao Iotebwa Timiti—Rongorongo 1:15–17.) Tera ae anaaki nanom iai n aia koaua taan kakoaua aikai? Imwiin Mangautin te Tia Kamaiu, tabeman a uti naba ao a kaoti nakoia aika a mwaiti (taraa Mataio 27:52–53; 3 Nibwaa 23:9). E kanga am onimaki iroun te Tia Kamaiu ao te berita ibukin te mangauti n roota arom maium?

Taraa naba “Jesus Is Resurrected,” “The Risen Lord Appears to the Apostles,” “Blessed Are They That Have Not Seen, and Yet Have Believed” (witeo), ChurchofJesusChrist.org.

1 Betero 1:3–11

Iesu Kristo e anganai te kantaninga ao te kimwareirei.

Tera taeka ao kibuntaeka n 1 Betero 1:3–11 ae anganiko te kantaninga ibukin Iesu Kristo? Nningai ae ko a tia n namakina te kantaninga anne?

E kakoaua Unimwaane Gerrit W. Gong bwa te Mangauti “e anga te kantaninga nakoia ake a tia ni bua baia ma waeia, ake a tia ni bua aia konabwai n taratara, ni kakauongo, n nakonako, ke naake a bua aia iango ibukin aoraki aika korakora, aorakin te iango, ke aki toamaun rabwataia tabeua. E kuneira. E kamarurungiira. … [Ao riki,] ibukin te Atua i bon Irouna e karaoa te mwakuri ni kamaiu ibukin buren aonnaba’ [Aramwa 42:15], … E kona, ma te nanoanga, ni buokiira ni kaineti ma mamaarara. … Ti raira nanora ao ti karaoa ara kabanea ni kona. E katotobira n aki toki ‘ni bain ana tangira.’ [2 Nibwaai 1:15]” (“Otanna ao Areruia—Iesu Kristo ae Maiu: Te Kabanea ni Kakaawaki ni Kaokan Bwai ao Itita,” Riaona, Meei 2020, 54).

Taraa naba Aramwa 27:28; 36:1–24; 3 Nibwaai 9:11–17; Moronaai 7:40–41.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

ComeuntoChrist.org.Easter.ComeuntoChrist.org iai inanona bairean te tai ao kabwarabwaraakin baike a riki n te bong koraki ni kabanean wiikin maiun te Tia Kamaiu. Ni katoa bongin te wiiki, a kona kaain am utu ni manga rinanoi kabwarabwara aikai n taraia bwa tera are e karaoia te Tia Kamaiu n te bong anne, ke ko kona ni wareka Ana kabanea ni wiiki inanon koroboki aika tabu n ami utu (taraa rinan ake a koreaki ake a rineaki inanon “Iango ibukin Kamatebwaian Koroboki aika tabu I Bon Iroum” akana ieta).

Anene n Taromauri ao Aia Boki n Anene Ataei.Iangoia ni bane n anenea taekan ana Mwakuri ni Kamaiu te Tia Kamaiu ao Mangautina inanon te wiiki, n raonaki ma tabeua ake ko aki rangi n atai. (Taraa te baa ibukin atuun rongorongon Anene n Taromauri ke Aia Boki n Anene Ataei, iaan atuun rongorongo n aron “Mwakuri ni Kamaiu,” “Itita,” ke “Mangauti.”) Ni buokiia kaain te utu n reiakin taian anene, ko kona ni kaota te tamnei are e nako ma taekana.

“Iesu Kristo” bwai aika ikotaki n te Gospel Library.Atuun bwai aika ikotaki n te Gospel Library “Iesu Kristo” ni ikotaki ma witeo, korotamnei, ao katangitang ake a na kona ni buokiia am utu ni bukamarua Utin te Tia Kamaiu n te Itita aio.

“Te Kristo Ae Maiu: Aia Koaua Abotoro.”N am utu, wareka “Te Kristo Ae Maiu: Aia Koaua Abotoro” (ChurchofJesusChrist.org). Kaoia kaain te utu temanna ma temanna bwa a na rinea te rongorongo n te Itita man te kakoaua aio ao n tibwauaia ma tabeman. Te katooto, ko kona ni karaoi taian boutita ni katokai iaon bwain reitaki n te intanete, iaon am mataroa n rinnako, ke inanon mweengam.

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Iesu e a Tia n Uti,” Aia Boki n Anene Ataei, 70.

Kanakoraoan Am Kamatebwai

Katei kouru aika a kona ni kanakoraoaki. Kabanean tabeua te miniti n te bongina ni kamatebwaii booki aika tabu e kona ni kakabwaiaa maium. Motinnanoia ni kamatebwai ni katoa bong, kakaea te anga are ko na kauringko ibukin am motinnano, ao karaoa am kabanea n tamaroa ni waakinna nako. Ngkana ko mwaninga, tai kabwara nanom. Manga waakinna riki.

Ketetemwane, iroun Adam Abram