Ana Boki Moomon

1 Ao ngkai, Ngai ae Moomon, I a koroi reekoti n bwaai ake I a tia n noori ma n ongo, ao I aranna bwa Ana Boki Moomon.

2 Ao n te tai are Amaron e karabai iai taian reekoti iroun te Uea, e roko nakoiu, (ngke tao tebwina au ririki, ao I a moanna n reireinaki n aron reiakinaia au botanaomata) ao e taku Amaron nakoiu: I nooria bwa te teei ngkoe ae ko taua ma nanom n aroarom, ao ko bon waekoa naba n oota ni bwaai nako;

3 Ngaia are ngkana e a kaan uabwi ma aua am ririki I tangiria bwa ko na uringi bwaai ake ko a tia n noori ni kaineti ma te botanaomata aio; ao ngkana e a kaan am ririki anne, ao nakon te aba are Antam, nakon te tabuki are e na aranaki bwa Tiem; ao ikanne are I a tia iai n taunii koroboki ake a tabu iroun te Uea ake a kaineti ma te botanaomata aio.

4 Ao nooria, ko na anaa ana bwaatua Nibwaai nakoim ao ake nikirana ko na katikui n te tabo are a mena iai; ao ko na koroi iaon ana bwaatua Nibwaai bwaai ni kabane ake ko noori ni kaineti ma te botanaomata aio.

5 Ao Ngai, Moomon, ngkai bon kanoan Nibwaai, (ao aran Tamau bon Moomon) I uring taeka ake e tuangai Amaron.

6 Ao e a koro bukina bwa ngke, e a kaan tebwi ma teuana au ririki, I a uotaki nako iroun tamau nakon te aba are e mena i meang, nakon naba te aba are Taraemera.

7 E a bon kaonaki aon te aba n taian kateitei, ao a mwaiti aomata n te aro ae kanga mwaitin tanon taari.

8 Ao e a koro bukina bwa n te ririki aei ao bon iai te buaka imarenaia Nibwaite, ake bon Nibwaite, ao Iakobwaite ao Iotebwaite ao Tioramwaite; ao te buaka aei bon imarenaia Nibwaite, ao Reimwanaite ao Remueraite ao Itimaeraite.

9 Ngkai Reimwanaite ao Remueraite ao Itimaeraite a bon aranaki bwa Reimwanaite, ao botaki aika uoua aikai bon Nibwaite ao Reimwanaite.

10 Ao e a koro bukina bwa e a waaki te buaka imarenaia n tian Taraemera, i rarikin ranin Tiitan

11 Ao e a koro bukina bwa a ikotiia Nibwaite ae te mwaiti ae korakora ni mwaane, n te aro are e a mwaiti riki nakon te ware ae tenibwi te ngaa. Ao e a koro bukina bwa a bon karekea n te ririki naba aei buaka tabeua ake a tokanikai iai Nibwaite i aoia Reimwanaite ao a tiringia aika a mwaiti.

12 Ao e a koro bukina bwa Reimwanaite a katoka aia baire, ao e reke te rau n te aba; ao e tiku te aba n rau i nanon te maan ae aua te ririki, ao bon akea kawawaean te raraa.

13 Ma e teimatoa te buakaka iaon te aba ni kabuta, n te aro are te Uea e a uotia nako ana reirei ake moan te tangiraki irouna, ao a toki mwakuri ni kakai ao ni katoki aoraki ibukin buakakaia aomata.

14 Ao bon akea bwaai n tituaraoi mai iroun te Uea, ao e a bon aki roko te Tamnei are e Raoiroi i aoia aomata, ibukin buakakaia ma aia kakewekewe.

15 Ao Ngai, bon tebwi ma nimaua au ririki ao kanga e reke irou te aro ae I taataua ma nanou, ngaia are I bon kawaraki iroun te Uea, ao I katoonga ma n ataa ana raoiroi Iesu.

16 Ao I bon waaki ni kabwarabwara nakoia te botanaomata aio, ma e bon in wiiu, ao I bon tabuaki bwa N na kabwarabwara nakoia; bwa nooria bon nanoia ni kaitara Atuaia ao a uotaki nako ana reirei ake a moan te tangiraki man te aba, ibukin buakakaia.

17 Ma I bon tiku i buakoia, ma I bon tabuaki bwa N na kabwarabwara nakoia, ibukin matoatoan nanoia; ao ibukin matoatoan nanoia ao e bon karekeaki kaain te aba ibukiia.

18 Ao ana taan iraa Kateanton, ake a mena i buakoia Reimwanaite, a bon kaona te aba ma te kakamaku, n te aro are kaain te aba a bon karabai kaubwaia i aan tano; ao a bon kai mwarua ibukina bwa te Uea e karekea kain te aba, ngaia are aki kona n tauii, ke ni kaawakin riki.

19 Ao e a koro bukina bwa bon iai taan kakaraoi, ao taan tabunea, ma waaki n tabunea; ao e roko mwaakan teuare e buakaka iaon te aba ni kabuta, n te aro are a koro iai bukin ana taeka Abinataai ni kabane, ao Tamuera are te Reimwanaite ni kabane.