Maati 20–26

Mataio 13; Ruka 8; 13

“Ane Iai Taningana n Ongo, Ao Ke E Ongo”

Ngkana ko wareka Mataio 13 ao Ruka 8; 13, iangoia bwa ko na kanga ni katauraoiko n “ongo” ao ni butimwaea ana reirei te Tia Kamaiu inanon taian kaikonaki aikai. Tera ae ko na karaoia ni kamwakuri reirei aikai inanon maium?

Korei Am Namakin

Tabeua man ana reirei te Tia Kamaiu aika moan ururingaki bon karaki aika beebete a aranaki bwa taian kaikonaki. Bon tiaki tii karaki aikai kakaongora man kimototo iaon bwaai ma taai aika onoti. A bwanin koaua inanoia n taekan abanuean te Atua ibukiia koraki ake a tauraoi tamneia. Teuana mai ibuakon kaikonaki ake a koreaki n te Nu Tetemanti—te kaikonaki iaon te tia ununiki (taraa Mataio 13:3–23)—e kaoiira bwa ti na tarai tauraoira ni butimwaea ana taeka te Atua. “Bwa ane iai ana bwai e na anganaki,” Iesu e katanoata “e na anganaki nakoina, ao e na kabatiaki riki” (Ana Rairairi Iotebwa Timiti, Mataio 13:10 [n Mataio 13:12, bwaai aika ana taraaki inano a]). Ngaia n ara kakatauraoi ibukin kamatebwaian ana kaikonaki te Tia Kamaiu—ke Ana reirei nako—te tabo ni moan waaki ae tamaroa bon tarakin nanora ao anganakin ana taeka te Atua te “tano ae raoiroi” (Mataio 13:8) n te aro bwa e na bwebwerake, maiureirei, uee, ao anga uaana ae mwaiti are a na kakabwaiaira ao ara utu.

Iango ibukin te Kamatebwai i bon Iroum ni Koroboki aika Tabu

Mataio 13:3–23; Ruka 8:4–15; 13:6–9

Nanou e riai n tauraoi ni butimwaea ana taeka te Atua.

Bukin tera ngkai n tabetai nanora a kai butimwaea te koaua, ao n taai tabetai ti a manga kaririaki n totokoia? Warekan te kaikonaki are taekan te tia ununiki e kona ni katauraoa te tai ae tamaroa ibukin iangona bwa ti na kanga n butimwaea te koaua mairoun te Uea. E kona n ibuobuoki katooan kiibu 3–8 ni Mataio 13 ma kabwaraana are katauraoaki n kiibu 18–23. Tera ae ko kona ni karaoia n ribana te “tano ae raoiroi” i bon iroum? Tera bwaai ake ana riki bwa tabeua “akanta” are a na tukiko man ongoraam ni koaua ao n toua mwiin ana taeka te Atua? Kam na kanga n tokanikai iaon “akanta”? aikai?

Am kamatebwai n te kaikonaki aei e kona ni kaira aron warekan te kaikonaki n Ruka 13:6–9. Tera te “uaanikai” are e ukoria te Uea mai iroura? Ti na kanga n ribana aontano n te aro bwa e na “kariki uaa”?

Taraa naba Motiaea 2:9; Aramwa 12:10–11; 32:28–43; Dallin H. Oaks, “Te Kaikona Iaon te Tia Ununiki,” Riaona, Meei 2015, 32–35.

Mataio 13:24–35, 44–52; Ruka 13:18–21

Ana kaikonaki Iesu e buokai ni kaotaai rikiraken ao tokin kawain Ana Ekaretia.

Te Burabeti Iotebwa Timiti e reirei bwa kaikonaki inanon Mataio 13 a kabwarabwara rikiraken ao tokin kawain te Ekaretia ni boong aika kaitira. Ko riai ni manga kaoka ana taeka te Burabeti n Ana Reirei Beretitenti n te Ekaretia Iotebwa Timiti (2007), 293–303, ngkai ko iangoia bwa tera ae a reireiniko kaikonaki ake imwina ibukin taekan ana Ekaretia te Uea:

• Te uita ao te titania (13:24–30, 36–43)

• Uaan te Makeke(13:31–32)

• Te bwai ni kariki (13:33)

• Te kaubwai ae karabaaki ao te momi ae bati boona (13:44–46)

• Te karaun (13:47–50)

• Te aomata ae iai batana (13:52)

Imwiin iangoan kaikonaki aikai, tera ae ko namakinna bwa e kaungako n ira riki bwaninin karaoan ana mwakuri Kristo n ana Ekaretia ni boong ni kaitira?

Taraa Bwai ni Kairi nakon Koroboki aika Tabu, “Kingdom of God or Kingdom of Heaven,” “Kaikona,” scriptures.ChurchofJesusChrist.org.

Ana euangkerio Iesu Kristo bon te “momi ae bati boona” (Mataio 13:46).

Mataio 13:24–30, 36–43

Aika raraoi a na rikirake ibuakoia aika buakaka ni karokoa tokin te aonaaba.

Teuana te kawai n iangoa nanon te kaikonaki aei bon korean tamneina ao kanimwan kabwarabwarana man Mataio 13:36–43 ao Reirei ao Berita aika Tabu 86:1–7. Te titania bon te “uteute ae boitin, ngkana, e roko n te taninga, bon ti tebo taraana nakon te uita” (Bible Dictionary, “Titania”). Tera taian koaua n te kaikonaki aei are e kaungako bwa kona kakaonimaki n aki tabe ma buakakan te aonaaba?

Ruka 8:1–3

N anga raa ae “aine tabeman” a ibuobuoki nakon te Tia Kamaiu?

“Ana reirei aika aine a mwananga ma Iesu ao te Tengaun ma Uoman n reiakinaki mairoun [Iesu] n te maiu n tamnei ao ni beku Irouna n te tai ae uarereke. … N reitan karekean ana mwakuri niibuobuoki Iesu—rongorongo aika raoiroi aika man Ana euangkerio ao kakabwaia man Mwaakana ni kamaiu—aine aikai a ibuobuoki Nakoina, n anga nanoia ao aia tangira” (Daughters in My Kingdom [2017], 4). Aine ake a ira te Tia Kamaiu a kaota naba aia koaua Ibukina ae korakora (taraa Linda K. Burton, “Certain Women,” Riaona, Meei 2017, 12–15).

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Mataio 13.Ngkana kaain am utu a wareka ana kaikonaki te Tia Kamaiu, a na bon konaa ni kukurei n iangoi oin aia kaikonaki are e reirei koaua ae ti te arona n taekan abanuean karawa (te Ekaretia), kabonganai bwaai ke aroaro are ti tebo nakoia.

Mataio 13:3–23; Ruka 8:4–15.Imwin warekan te kaikonaki iaon te tia ununiki n ikotaki, am utu a na kona ni marooroakin titiraki n aron aikai: Tera ae e na karaoa ara “tano” (nanora) “ririba” ke “karabaaki” te taeka? Ti na kangaa ni kakoaua bwa ara tano e raoiroi ao ni uaana?

Ngkana iai ami ataei aika uarereke n ami utu, e na bon kaunga kaoaia kaain te utu ni mwakurii kawai aika kakaokoro ni katauraoi naano n ongoraea ana taeka te Atua ao tabeman kaain te utu a na keeti bwa tera ae a karaoia.

Mataio 13:13–16.Ko na kanga ni buokiia kain am utu bwa a na oota n kakawakin nanoia bwa e na kukurei ni butimwaea ana taeka Kristo? Ni kaota aron “taninga [ake] aki konaa n ongo,” kam kona n rabuni taningan temana kaain te utu ngkana ko wareware ni karaurau Mataio 13:13–16. Mwaitira ae e oota iai kaain te utu are rabunaki taningana man kiibu aikane? Tera kawai ake ana kona ni kauki matara, taningara, ao nanora nakon ana taeka te Atua?

Mataio 13:44–46.Tera ae titebo aroia mwaane ake uoman n taian kaikonaki aikai? Tera riki reitan bwaai ake ti riai ni karaoi n tatabemaniira ao n ara utu ni moanibwaia abanuean te Atua inanon maiura?

Ruka 13:11–17.Iai kaain am utu ake a tia n rinanon taaiare a namakina te aki konaa ni [uotiia] rake” irouia? Iai riki temanna ae ti ataia are e namakina te aekaki aei? Ti na kangaa n ibuobuoki? E kanga te Tia Kamaiu n “kamwawaira ” man mamaran rabwatara?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “We Are Sowing,” Anene n Taromauri, nambwa. 216.

Kanakoraoan Ara Anga reirei

Kamatenanoa te kibu. Rinea te kibu man booki aika tabu ae na uaana nakon am utu, ao kaoiia kaain am utu bwa ana kamatenanoa. E reirei Unimwaane Richard G. Scott, “Te kibu ae kamatenanoaki e riki bwa te rao ae teimatoa are e aki kamamaraaki ma kanoan te tai” (“Mwaakan Koroboki Aika Tabu,” Riaona, Nobembwa 2011, 6).

Kaikonakan te Tia Ununiki, iroun George Soper