Maati 6–12

Mataio 9-10; Mareko 5; Ruka 9

“E Kanakoia ana ReireiTengauni ma Uoman Iesu”

Iango ibukin te kamatebwai n te kamatata aio a karaoakii ibukin karekean buokam ake a kaineti nakoim inanon koroboki aika tabu. E ngae n anne, a riai n aki, oneamwiin te kaotioti ae onoti ae ko na kona ni karekea bwa tera karaki aika kona kamatebwai ke ko na kanga ni kamatebwaia.

Korei Am Namakin

Rongorongon ana kamaeu ni kakai Iesu e waekoa ni butanako. A iriiria aomata aika bati, ni kantaninga reken te kamarurungaki man aorakiia. Ma ngke e taraia aomata aika a bati aikai te Tia Kamaiu, E noora riki ae mwaiti nakon aorakin rabwataia. Ni kaonaki n te nanoanga, E nooria, “tibu aika akea te tia kawakinia” (Mataio 9:36). “E boni karuonako te tai,” E taekina ana nonori, “ma a karako taani mwakuri” (Mataio 9:37). Ngaia are E weteia ana Abotoro ake tengaun ma uoman, “e angania te mwaka,” ao e kanakoia bwa a na reirei ao n ibuobuoki “nakoia tibu ake a bua ake ana utu Iteraera” (Mataio 10:1, 6). N te bong aio kainnanoia riki taani mwakuri ni beku ibukiiia natin Tamara are i Karawa e rangi ni korakora. E teimatoa n iai Abotoro ake Tengaun ma uoman, ma a mwaiti riki ana reirei Iesu Kristo nakon are mai imwaina—aomata ake a kona n taetaekina te euangkerio ni kabuta te aonaaba, “E a kan roko uean te Atua” (Mataio 10:7).

Iango ibukin te Kamatebwai i bon Iroum ni Koroboki aika Tabu

Mataio 9:18–26; Mareko 5:22–43

“Tai maku, ko na tii kakoaua.”

Ngke Iairo e moan bubutiia Iesu bwa e na kamaiua natina te aine, are “e a kani mate,” e waekoa n taetae Iairo ma te kakantaninga: “Ko na nako mai ni kaki baim i aona, … bwa e aonga ni maiu” (Mareko 5:23). Ma ngke a nako, ao te tia uarongorongo e tuanga Iairo bwa e a rangi n oimwi: “E a mate natim te aine: ko aera ngkai ko nanoa riki te tia Reirei?” (te kibu 35). N aron naba anne, e na taraa n rangi n oimwi naba ibukin te aine are e kabwarabwaraaki n Mareko 5:25–34, are e nraara inanon te maan ae 12 te ririki.

Ngkai ko wareki rongorongo aikai, ko na bae n iangoi bwaai ake a kainnanoa kamarurungaia inanon maium ke ni maiuia am utu—n raonaki ma bwaai ake a“kani mate” ke a oimwi ibukin te kamarurungaki. Tera ae anaaki nanom iai ni kaotan te onimaki inanon taian karaki aikai? Ataa naba te bwai are e taekinna Iesu nakon te aine ao nakon Iairo. Tera ae ko namakinna bwa E taekinna nakoim?

Taraa naba Ruka 8:41–56; Russell M. Nelson, “Drawing the Power of Jesus Christ into Our Lives,” Riaona, Meei 2017, 39–42; Teachings of Presidents of the Church: Gordon B. Hinckley (2016), 333–42.

Onimakina te Uea, iroun Liz Lemon Swindle

Mataio 10; Ruka 9:1–6

Te Uea e anganiia ana toro te mwaaka ni karaoa Ana mwakuri.

Kaetieti ake e anga Iesu n Mataio 10 nakoia Ana Abotoro a bon kaineti naba nakoira, ibukina bwa bane iai tabera n ana mwakuri te Uea. Tera te mwaaka are e anga Kristo nakoia Ana Abotoro ni buokiia ni kakoroa nanon aia mwakuri? Ko na kanga ni karekea mwaakana n te mwakuri are ko weteaki bwa ko na karaoia? (taraa 2 I-Korinto 6:1–10; Reirei ao Berita aika Tabu 121:34–46).

Ngkai ko wareka te mwakuri are e anga Kristo nakoia Ana Abotoro, ko na konaa ni karekea te namakin ibukin te mwakuri are e tangiria te Uea bwa ko na karaoia. Te tiata aron ae imwina aei e kona ni buokiko ni baronga am iango:

Mataio 10	Namakin ake I karekei
Te Tia Kamaiu e angania ana reirei te mwaka.	Te Atua e anganai te mwaaka are I kainnanoia ni karaoa au mwakuri.

Taraa naba Mareko 6:7–13; Taekan te Onimaki 1:6; Bible Dictionary, “Abotoro”; “Jesus Calls Twelve Apostles to Preach and Bless Others” (witeo), ChurchofJesusChrist.org.

Mataio 10:17–20

Ngkana I mena n ana mwakuri te Uea, E na kaungaai n te bwai are n na taekinna.

Te Uea e a kaman nooria Ana reirei bwa a na bwainikirinaki ao ni kataaki n aia onimaki—bon titebo ma are a na rinanona reirei ni boong aikai. Ma E berita nakoia ana reirei bwa a na ataia bwa a na tuangaki iroun te Tamnei te bwai ae a na taekinna. Ko a tia ni karekei taneiai ngke te berita ae mairoun te Atua e koro bukina inanon maium, tao ngke ko kaota am koaua, anga te kakabwaia, ke n am maroro ma temanna? Iangoia tibwaua am taneiai ma am utu ae ko tangiria ke korei inanon am boki ae ko kawakina iai rongorongom. Tera am namakin ae kairiko bwa ko na karaoia bwa ko aonga n tainako ni karekei riki taneiai n aron aikai?

Taraa naba Ruka 12:11–12; Reirei ao Berita aika Tabu 84:85.

Mataio 10:34–39

Tera ae nanonna Iesu man “I aki roko bwa N na uota te raoi, ma I roko bwa N na uota te kabang”?

E reirei Unimwaane D. Todd Christofferson: “Iai au onimaki bwa tabeman mai ibuakomi kam a tia n aki butimwaeaki ao ni kabaneaki iroun tamami ma tinami, tarim ma mwaanem ngkai ko butimwaea ana euangkerio Iesu Kristo ao n rin inanon Ana berita ae tabu. N te anga teuana ma teuana, am tangira ae koro arona ibukin Kristo e kainnanoa am anganano ibukin am reitaki ae e babane nanom nako iai, ao a bwaro ranin matam ibukina. Ma n am tangira ae akea kabwakana, ko teimatoa n nene iaan te kaibangaki aio, ni kaotia ae ko aki mamaa iroun Natin te Atua” (“Finding Your Life,” Ensign, Maa. 2016, 28).

Am anganano aio ni katokii am reitaki ae bane nanom nako iai bwa ko na ira te Tia Kamaiu e airi ma te berita bwa “ane e kabua maiuna ibukiu ao e na bon karekea” (Mataio 10:39).

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Mareko 5:22–43.Ngkai a kaai ni wareka te karaki aio am utu, ko na bae moa n toki ao n titirakiniia kaain am utu e kanga aron aia namakin ngke arona bwa ngaiia Iairo, te aine, ke tabeman aomata inanon te karaki aio. Ko kona naba ni kaoti tamnein te karaki, n aron akana inanon te kamatata aio. A kanga tamnei aikai ni kaota aia onimaki aomata inanon karaki aikai? (Tarai naba witeo “Jesus Raises the Daughter of Jairus” and “Jesus Heals a Woman of Faith” on ChurchofJesusChrist.org.) Ko kona naba n iangoi tabeua kanganga ake a kaitara ma ngaai am utu. Ko na kanga ni kamwakura Ana taeka, “Tai maku, ko na tii onimaki”? (Mareko 5:36).

Mataio 10:39; Ruka 9:23–26.Tera ae nanonaki n “kabua” maiura ao ni “karekea”? (Mataio 10:39). Tao a kona kaain am utu n tibwaua aia taneiai are e kaota ana reirei Iesu inanon kiibu aikai.

Mataio 10:40.Aekakira aron am waaki ma am utu ni karekean ao n irakin aia reirei Abotoro ni boong aikai? E kanga ara ongotaeka nakon aia reirei ni kaniira riki nakon Iesu Kristo?

Ruka 9:61–62.Tera ae nanonaki n ane katoka baina i aon te barau n taua n tanrikaaki? Bukin tera ngkai te anua aio e karaoa ae ti aki tau n uean te Atua?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “When Faith Endures,” Anene n Taromauri, nambwa. 128.

Kanakoraoan Am Kamatebwai

Kakauongo nakon te Tamnei. N am tai ni kamatebwai, kaonota am taratara nakon am iango ao am namakin (taraa Reirei ao Berita aika Tabu 8:2–3), e ngae ngke kanga teina aki irekereke ma am wareware. Namakin ao iango akanne tao bon bwaai aika e tangiria te Atua bwa ko na atai ao ni karaoi.

Talitha Cumi, iroun Eva Koleva Timothy