Maati 6–12

Mataio 9–10; Mareko 5; Ruka 9

“E Kanakoia Uaka Tengaun ma Uoman Iesu”

Ngkai ko wareka Mataio 9–10; Mareko 5; ao Ruka 9, ko na karekei taian wirikiriki mai iroun te Tamnei ae Raoiroi. Wirikiriki aikai, ni ikotaki ma are n Nakomai, Iriirai—Ibukiia Aomata n Tatabemaniia ao Utu ao te kamataata n te booki aei a kona naba ni buokiko n am anga reirei.

Kaunga te Tibwatibwa

Kaoiia ataei bwa a na tibwaua te bwai teuana ae a karaoia ni buoka temanna n te wiiki aei. Tera ae e karaoia te Tia Kamaiu ni buokiia aomata?

Reirei te Reirei: Ataei aika a Uarereke Riki

Mataio 9:18–30; Mareko 5:22–43

Iai mwaakan te Atua ni kamarurungai.

Te Tia Kamaiu e aki toki ni kakaota Mwakana ni kamarurungiia naake iai aia onimaki Irouna. Ko kona ni buokiia ataei ake ko reireiniia ni katea aia onimaki ni mwaakan Iesu ni kamarurung.

Waaki ni Kakukurei aika a Kona ni Karaoaki

• Karakina rongorongon natin Iairo te aine (taraa Mareko 5: 22–23, 35–43). N te tabo teuana raoi n te karaki, wareka ana taeka Iesu “I taku nako im, uti” (kibu 41), ao kaoiia ataei bwa a na teirake. Buokia ataei ni mataata ae iai mwaakan Iesu ni kamarurungiia aomata ao n anganiira te maiu ae akea tokina.

• Kaota tamnein te bwai are e riki ni Mataio 9:20–22 ngkai ko wareki kiibu aikai. Buokiia ataei bwa a na kamatenanoa te kibuntaeka “E kamaiuko am onimaki” (kibu 22). Ni karaoan aei, ko kona n anganiia ataei n tatabemaniia te taeka, ao imwiina kariaia ataei bwa a na atonga aia taeka n etin raoi te kibuntaeka ni kaokiokia. E kanga te aine ni kaotia bwa iai ana onimaki iroun Iesu Kristo? Tera ae ti kona ni karaoia ni kaotia bwa iai ara onimaki iroun Kristo?

• Tuangiia ataei bwa a na kamakii mataia ao ni kakauongo ngkai ko wareka Mataio 9:27–30. Ngkana ko wareka rongorongon Iesu ngke e kamarurunga te mwaane are e mataki, kaoiia ataei bwa a na kaurei mataia. Kaoiia ataei bwa a na maroroakinna bwa tera aia namakin ngkana a kamarurungaki iroun Iesu.

• Kabongana te iteraniba n te waaki ni kakukurei n te wiiki aei ni buokiia ataei n reiakina karakin te Tia Kamaiu ngke e kamaiua natin Iairo te aine man te mate.

Kakoaua iroun te Uea, iroun Liz Lemon Swindle

Mataio 10:1–10

Iesu E weteia Abotoro ake Tengaun ma Uoman ao n anganiia te mwaaka ni karaoa Ana mwakuri.

A ataia ataei ake ko reireinia ae iai Abotoro aika Tengaun ma Uoman ni boong aikai? Kona kanga ni kabonganai kiibu aikai n reirei iaon kakawakiia Abotoro inanon taai aikai ao tera ae a weteaki iai bwa a na karaoia?

Waaki ni Kakukurei aika a Kona ni Karaoaki

• Kakimototoa taekinan Mataio 10:1–10 n rangi ni kabebetea. Kamataata bwa Iesu e weteia Abotoro bwa a na Buokia ni katea Ana Ekaretia. Kariaia ataei bwa a na warekiia Abotoro inanon te tamnei Christ Ordaining the Apostles (Gospel Art Book, nambwa 38) ao n te tamnei ae tamneia Abotoro n te Kooram n te Tengaun ma Uoman (taraa ChurchofJesusChrist.org ke iaon rongorongon te maungatabu ni kabuta n te Riaona). Kabwarabwaraa bwa iai ngkai n taai aikai Abotoro aika tengaun ma uoman, n aron naba are n ana tai Iesu. Tibwaua am koaua iaoia ana Abotoro te Uea ao te bwai ae a tibwa tia n reireia.

• Karabai tamneia Abotoro aika ngkai inanon te ru (ibukin tamnei taraa te rongorongo ae ai tibwa ngkai iaon te maungatabu ni kabuta n te Riaona). Kaoiia ataei bwa a na kakaei tamnei, ao tuangiia teutana rongorongoia Abotoro n tatabemaniia (taraa “Meet Today’s Prophets and Apostles” n ChurchofJesusChrist.org).

• Kaoiia ataei bwa a na taua ieta tamneia kaain te Moan Beretitentii ao tamneia kaain te Kooram n Abotoro n te Tengaun ma Uoman. Tuanga temanna te ataei bwa e na kairiia ataei ake tabeman ni katobibia te ru nakon tamnein Iesu. Kaota am koaua bwa burabeti ao abotoro a kairiira nakon Iesu Kristo.

Reirei te Reirei: Ataei aika a Ikawai Riki

Mataio 9:18–30; Mareko 5:22–43

Iai mwaakan te Atua ni kamarurungai.

Warekan rongorongon te Tia Kamaiu ni kamarurungiia aomata e kona ni buokiia ataei ake ko reireiniia ni katea aia onimaki Irouna. Rongorongo aikai a kona naba ni buokiia n namakina Ana mwamwanano ao ana tangira.

Waaki ni Kakukurei aika a Kona ni Karaoaki

• Uaia wareka rongorongon Iesu ngke e kamarurungiia aomata are e kuneaki ni Mataio 9:20–22, 27–30 ao Mareko 5:22–23, 35–43 (ke kaota te witeo “Jesus Heals a Woman of Faith” ao “Jesus Raises the Daughter of Jairus” iaon ChurchofJesusChrist.org). A kanga aomata inanon karaki aikai ni kaota aia onimaki iroun Iesu Kristo? Tera ae ti reiakinna iaon te Tia Kamaiu man karaki aikai?

• Kaoiia ataei bwa a na tibwauai aia taneiai ngke ngaiia ke temanna riki ae a kinaa a karekea te kakabwaia n te nakoanibonga ibukin kamarurungaia aoraki. A kanga ni kamarurungaki ke ni kakabwaiaaki? Kamataata bwa n tabetai te kakai iaon te kamarurungaki bon tiaki nanon te Uea, ma ti bon konaa ni kakabwaiaaki man ana tangira ao ana karaunano.

Mataio 10:1–10

Abotoro ake Tengaun ma Uoman a kona ni reireiai taekan Iesu.

E kanga reiakinaia Abotoro ake Tengaun ma Uoman n ana tai Kristo ni buokiia raoi ataei ni mataata bwa tera ae a kakaraoia Abotoro aika Tengaun ma Uoman ni boong aikai?

Waaki ni Kakukurei aika a Kona ni Karaoaki

• Kaota tamneia Abotoro n ana tai Iesu ao Abotoro n ara tai (taraa Christ Ordaining the Apostles [Gospel Art Book, nambwa 38] ao n te rongorongo are n te maungatabu iaon te Riaona). Tuangiia ataei bwa a na wareka Mataio 10:7 ni kakaea bwa tera ae a kakaraoia Abotoro (taraa naba Ruka 9:1–2, 6; Reirei ao Berita aika Tabu 107:23).

• Kaoiia ataei bwa a na korei iaon te burakiboti araia Abotoro ake a moan rineaki ngkoa n aron are a uringa. Imwiina tuangiia bwa a na korei ni karinanii araia Abotoro aika a maiu ngkai n aron are a uringa. Kariaia bwa a na tuoi aia ara ake a korei ni Mataio 10:2–4 ao n te rongorongo n te maungatabu ae e a tibwa nako Riaona. Ko kona naba n takakarona te takakaro are ataei a na katitebooi araia Abotoro ake ngkai ma tamneia. Tamnei a kona ni kuneaki n ChurchofJesusChrist.org.

• Tabeua te bong imwaain te kiraati, kaoiia tabeman ataei bwa a na roko n tauraoi n tibwa te karaki ae e karakinaki iroun te Abotoro ae maiu (taraa te rongorongo n te Riaona ibukin iango). A kanga Abotoro ni kabonganai karaki ni kakorakoraira bwa ti aonga n riki n ai aron te Tia Kamaiu?

• Tibwai banna ni katooto aika a mwaiti iaon aia kakoaua Abotoro ni boong aikai ma ataei (taraa te rongorongo n te maungatabu ni kabuta ae ai tibwa ngkai ke “The Living Christ: The Testimony of the Apostles” [ChurchofJesusChrist.org]).

• Buokiia ataei bwa a na kamatenanoa ao ni mataatan n Taekan te Onimaki 1:6.

Ruka 9:23–25

Iriirakin Iesu Kristo e kainanoa te anga nano.

Ko na kanga ni buokiia ataei ni mataata bwa tera ae nanonaki ni “kabuaa” maiuia ngkai a iriira te Tia Kamaiu?

Waaki ni Kakukurei aika a Kona ni Karaoaki

• Tuangiia ataei taekan te tai ngke ko anganako te bwai teuana bwa ko aonga ni karekea te bwai ae e tamaroa riki. Kaoia ataei bwa ana tibwai taian katooto ibon iaoia. Imwiina bootaki ni wareka Ruka 9:23–25. Kabwarabwara bwa Iesu e tangiriira bwa ti na anga ma nanora te bwai teuana bwa ti aonga ni iriiria. Ngkai E aki tuangiira ae ti na bon anga maiura, tera te bwai ae E tuangiira bwa ti na anga? (taraa Ana Rairairi Totebwa Timiti, Mataio 16:26 [ni Matthew 16:24, footnote e]).

• Korei ni kamwaitii anuan Kristo iaon taian moti ni beeba ao kaitaraan anua akanne iaon manga tabeua moti ni beeba (n aron te tangira ao te aki iangoiko ibon iroum, te nimamanei, te kamoamoa, ao a bati riki). Korea te taeka maiu ao bua bwa atuun taian taeka iaon te burakibooti, ao kaoiia ataei bwa a na karinani taian anua iaan atuun taeka ake a koreaki. Anganiia ataei te tai bwa a na iangoi tamaroan anua n aron Kristo iaon te burakibooti ao n rinea teuana ae a na karikirakea raoi.

Kaungaa te Kamatebwai n te Mweenga

Kaoiia ataei bwa a na kabongana te iteraniba iaon te waaki ni kakukurei n te wiiki aei n reirei nakoia aia utu iaon ana kamarurung Iesu nakon natin Iairo te aine.

Kanakoraoan Ara Anga reirei

Kaungaa te karinerine. Buokiia ataei bwa a na ataia ae iteran te karinerine ae moan te kakawaki bon ururingan Tamara are i Karawa ao Iesu Kristo. Ko kona ni kauringia ataei bwa a na karinerine rinanon aia anene n aki kaberoro ke ni katanga i wiia een te kuna ke kaotan tamnein Iesu.