Tai Maaku, iroun Michael Malm

Maati 13–19

Mataio 11–12; Ruka 11

“N na Motiki Rawami”

Iango ibukin te anga reirei n te kanoa n reirei e karaoaki bwa ko na karioi oin am iango. Tai maaku ni bitii nakon kainnanoia am ataei.

Kaungaa te Tibwatibwa

Kaungaia ataei bwa a na tibwa aroia n neboa te Uea n te Taabati.

Reirei te Reirei: Ataei aika a Uarereke Riki

Mataio 11:28–30

E na buokai Iesu ngkana I kaaniia.

Ataei a na karekea te rau ngkai a ataia bwa e na buokiia Iesu n rawawataia ngkana a kaaniia.

Waaki ni Kakukurei aika a Kona ni Karaoaki

• Wareka Mataio 11:28–30, ao kaota tamnein kao mwaane aika tii teuana amoia te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu. Tuangiia ataei bwa a na kotea te kao mwaane ma te kai n toma. Kabwarabwara bwa kao mwaane aika amoaki a kona n katika te rawawata ae mwaiti riki nakon are ngkana tii temanna. Kaota am koaua bwa ngkana ti nanokawaki, raraoma, maroaa, ti kona n kaania Iesu ao E na buokiira.

• Tuanga te ataei bwa e na tabeka te bwai ae tinebu. Ngkana e aki kona, buokia. E kanga ni buokiira Iesu ni karaoi bwaai aika matoatoa? Taekina rongorongon am taneiai ngke ko namakina iai Iesu bwa e buokiko ni karaoa te bwai ae matoatoa, ao tuangiia ataei bwa a na tibwauai rongorongoia.

Mataio 12:1–13

I kona n tabua te bong ae te Taabati.

Tera kawai aika kaunga ae kona n reireiniia ataei taekan te bong ae te Taabati ao bukin tera kai ti tabuia?

Waaki ni Kakukurei aika a Kona ni Karaoaki

• Wareka Mataio 12:10–13 ni kabaibati. Kaoiia ataei bwa a na teirake ao ni manga tekateka ni katoa tai ngkana ko taekina “Taabati,” ao kaokioka te botantaeka ae kangai “E [tamaroa] karaoan ae raoiroi n te bong ae te taabati” (Mataio 12:12). Tera nanon aei irouia?

• Kaota te karenta nakoia ataei, ao karana te bong ae te Taabati. Tera ae ti karaoi ni bongin te wiiki ake imwiina? Tera ae ti kona ni karaoia n te Taabati bwa e na okoro ma boong ake tabeua? (taraa Itaia 58:13–14).

• Tuangiia ataei bwa a na korei tamnein bwaai aika a kona ni karaoi n te Taabati (taraa te iteraniba ibukin te waaki ni kakukurei n te wiiki aei).

• Kaoiia ataei bwa a na roko ma aia kai ake a na uringi iai kawai ni katauraoi imwain te Taabati ngkai a anenea te kuna ae “Saturday” (Aia Boki n Anene Ataei, 196).

• Korea tamnein te mata, taninga, te wii, ao te bai n te burakibooti. Tuangiia ataei bwa a na tuangko bwa tera mwakoron rabwatara aika a kona n tabua te bong ae te Taabati.

Ruka 11:11–13

Tamara are i Karawa e anganiira bwaintangira aika raoiroi.

Ana reirei te Tia Kamaiu n Ruka 11:11–13 e kona ni buokiia am ataei ni kamatataia bwa Tamara are i Karawa e tangiriia ao e tangiria ni kakabwaiaia.

Waaki ni Kakukurei aika a Kona ni Karaoaki

• Kabongana te bwai ni kabwarabwara ana reirei te Tia Kamaiu n Ruka 11:11–13. Te katooto, ko kona n kamena te atibu inanon baekin te kariki ke ni karina tamnein te tikaobian inanon nnen te bunimoa. Tuangiia ataei bwa a na keetinna bwa tera kanoana, ao imwina kaotia nakoia. Tuangiia bwa a na onea mwiin te atibu ke te tamnei ma te mwakoro ni kariki ke te bunnimoa. Wareka Ruka 11:11–13, ao tibwaua am koaua bwa Tamara are i Karawa e tangiriira, e kaekai ara tataro, ao e anganiira kakabwaia aika bati rinanon Tamneina.

• Bootaki anenea te kuna ae taekina ana tangira te Atua, n aron “My Heavenly Father Loves Me” (Aia Boki n Anene Ataei, 228–29). Tera ana bwaintangira ae E a tia n anganira? Tuangiia ataei bwa a na korei tamnein aia kakabwaia mairoun Tamara are i Karawa ake a kaitau iai.

Reirei te Reirei: Ataei aika a Ikawai Riki

Mataio 11:28–30

E na buokai Iesu ngkana I kaaniia.

Ko na kanga ni buokiia ataei n oota bwa te Tia Kamaiu e na motiki rawaia man kakaewenakoaia ngkana a kaaniia?

Waaki ni Kakukurei aika a Kona ni Karaoaki

• Kaoiia ataei bwa a na tibwa te tai are a raraoma iai ke n aki rau iai n te bwai teuana. Kaoiia bwa a na kamatebwaia Mataio 11:28–30 ni kakaei reirei are a kona ni buokiia n taai aikai. E kanga te Tia Kamaiu n “anga[nira] te motirawa”? (kibu 28).

• Kaoiia ataei bwa a na korei tamnein bwaai ake a karaoi ni kaaniia Iesu ao n reirei Irouna.

• Buokiia ataei ni kamatenanoa te kaaua n taekan te onimaki. Maroro ma ngaiia bwa tera aia ibuobuoki moan reirei ao otenanti n te euangkerio ni buokiira ni butimwaea ana kakao Iesu ae kangai, “Bane mai nako Iu” (Mataio 11:28).

Mataio 12:1–13

Te Taabati bon te bong ni karaoi mwakuri aikaa raoiroi are e na uotai ni kaaniiai riki ma te Atua.

Ataei ake ko reireiniia a na kakorakoraaki ngkana ko kamataatai bongan ao kakabwaia man kawakinan te bong ae te Tabaati.

Waaki ni Kakukurei aika a Kona ni Karaoaki

• Kaoa te ataei bwa e na riki bwa ao ngkoa te mwaane are e kamaoaki baina iroun te Tia Kamaiu (taraa Mataio 12:10–13). E kona temanna te ataei n titiraki bwa tera ana namakin.

• Bootaki wareka Mataio 12:12. Tera bwaai aika tamaroa aika ti kona ni karaoi n te Taabati? Tuangiia ataei bwa a na korei aia iango n te iteraniba ibukin te mwakuri ni kauring, a korekoreia, ao ni kataia ni manga kaokia n arona.

• Karabai tabeua tamneia aomata aika a karaoa ae raoiroi are a kaota iai aia tangira ibukin Tamara are i Karawa n te bong ae te Taabati. Tuangiia ataei bwa a na kakaei tamnei akanne ao n tibwaia bwa n te aro raa ae mwakuri ake a koreaki n taian tamnei a kaota ara tangira nakon te Atua.

Ana Reirei Iesu Amwarake n te Wiita n te Taabati, iroun James Tissot

Ruka 11:37–42

Au mwakuri ma nanou a riai n uaia n itiaki.

E reirei te Tia Kamaiu bwa e aki tau taraakira bwa ti raoiroi nakoia tabemwaang. Ara iango, namakin, ao ara mwakuri aika aki noraki a riai naba n itiaki.

Waaki ni Kakukurei aika a Kona ni Karaoaki

• Ni kabwarabwarai reirei man kiibu aikai, kaota te mwangko ke te turumwa nakoia ataei ae e itiaki tinanikuna ma e bareka nanona. Buokiia iangoa taraan “tinanikun te mwangko” bwa e tei ibukin tera. Ao tera ae e tei ibukin “nanon te mwangko”? Bukin tera ae kakawaki bwa e na itiaki tinanikuna ao nanona?

• Bootaki wareki kiibu tabeua ake a kamataata te raoiraoi i nanora ao n ara mwakuri—te katooto, Taian Areru 24:3–5; Mataio 15:7–8; Moronaai 7:6–9. Marorokinna bwa bukin tera ngkai te Uea e tangira nanora ma ara mwakuri aika aki noraki bwa a na itiaki.

Kaungaa te Kamatebwai n te Mweenga

Kaoiia ataei bwa a na tibwai ma aia utu iango ni kawakina te bong ae te Taabati.

Kanakoraoan Ara Anga reirei

Tabeki Titiraki. “Te titiraki ae kaoia ataein te reirei bwa a na taekina reirein te euangkerio n oin aia taeka—riki ni moan te kiraati—e na buokiko n ataia bwa mwaitira am tai ae ko riai ni kabanea ibukin reiakinan te reirei anne” (Reirei n Ana Kawai te Tia Kamaiu, 32).