“Maati 13–19. Mataio 11–12; Ruka 11: ‘Na Motiki Rawami,’” Nakomai, Iriirai Ibukiia Aomata n Tatabemaniia ao Utu: Te Nu Tetemanti 2023 (2022)
“Maati 13–19. Mataio 11–12; Ruka 11,” Nakomai, Iriirai–Ibukiia Aomata n Tatabemaniia ao Utu: 2023
Tai Maaku,, iroun Michael Malm
Maati 13–19
Mataio 11– 12; Ruka 11
“Na Motiki Rawami”
Beretitenti Dallin H. Oaks e reirei: “Koroboki aika tabu, ake bon taian kaotioti n taai ake ngkoa, aki kona ni mataata n akean butimwaena nakon kaotioti ni boong aikai. … Kamatebwaian koroboki aika tabu e anganiia mwaane ao aine te konaa ni karekei taian kaotioti” (“Scripture Reading and Revelation,” Ensign, Tianuare. 1995, 7).
Korei Am Namakin
N anga aika mwaiti, Baritaio ao taan koroboki a tia ni karaoi taromaurian Iehova bwa te karawawata. A aki toki ni katerei tuua aika matoa n riaon koaua ae akea tokia. Tuua iaon te bong ae te Tabati, are e nanonaki bwa te bong ni motirawa, are ngaiia bon te rawawata nakoia.
Ao ngkanne, Iehova bon Ngaia e roko ibuakoia Ana aomata. E reireiniia bwa te kantaninga ni koaua n taekan te aro bon tiaki karaoan te karawawata ma e na kabebeteia. E reirei bwa te Atua e anganiira tuua, n ikotaki ma teuana are kawakinan te Tabati, n aki karawawataira ma ni kakabwaiaira. Eng, te kawai nakon te Atua e bon eti ao irariki, ma te Uea e roko ni katanoata are ti na aki kainanoia n nakonako n tii ngaira. “Bane mai Nakoiu,”E bubuti. Ana kakao, nakoia ni kabane ake a namakina te “kua ao rawawata” ke aroia nako, teei Irarikina, ni kabaeira ma Ngaia, ao n tibwai rawawatara ma Ngaia. A na berita are “E na reke i roumi iai motikan rawan tamneimi.” Kabotaui nakon am iango—kataia ni waaki n tii ngkoe ke ni katine iaon babaire ibukin katokaan kanganga aika waaki iaon te aba—“e aoraoi Amou, ao e bebete [Uotau].” (Mataio 11:28–30.)
Iango ibukin te Kamatebwai i bon Iroum ni Koroboki aika Tabu
Iesu Kristo e na anganai motirawau ngkai I katine Irouna.
Ti bane ni uoti rawawatara—tabeua man oin ara bure ao kairuara, tabeua e riki man aia rinerine tabeman, ao tabeua tiaki aia kairua aomata ma kanga ai bon mwakoron te maiu n te aonaaba. N aki tabe bwa tera bukin ara ikakorakora, Iesu e bubutiira bwa ti na Nakoina n te aro are E na kona ni buokiira ni uota uotara ma te bebete (taraa naba Motiaea 24). Unimwaane David A. Bednar e reirei , “Karaoan ao kawakinan berita aika tabu e ikotiira ao katiteuanaira ma Iesu Kristo” (“Bear Up Their Burdens with Ease,” Riaona, Meei 2014, 88). Iangoa te rongorongo aei, iangoi raoi titiraki n aron akana imwiina ni kamataata raoi ana taeka te Tia Kamaiu ni kiibu aikai: E kanga au berita aika tabu n amoai nakon te Tia Kamaiu? Tera ae N na karaoia n roko nakon Kristo? N te anga raa ae amon te Tia Kamaiu e aoraoi ao Uotana e beebete?
Tera tabeua titiraki are e roko n am iango ngke ko wareware? Korei, ao kakaei rekeia n te wiiki aei inanon koroboki aika tabu ao aia taeka burabeti. Ko na konaa ni kunei reken am titiraki n ana rongorongo Unimwaane David A. Bednar are e taekinaki ieta.
Taraa naba John A. McCune, “Nakomai nakon Kristo—Te Maiu n aroia Aika Itiaki ni Boong Aika Katira,” Riaona, Meei 2020, 36–38; Lawrence E. Corbridge, “The Way,” Riaona, Nob. 2008, 34–36.
Abotoro a Kang Uita n te Tabati, iroun James Tissot
“Karaoa ae raoiroi n te Tabati.”
Aia reirei Baritaio a kaokoro ma ana reirei te Tia Kamaiu ni kawai aika mwaitii, riki aron kawakinan te bong ae te Tabati. Ngkana ko wareka Mataio 12:1–13, ko na iangoia bwa a uara aroarom ao am mwakuri ni kaineti nakon te Tabati n ana reirei Iesu Kristo. Ni karaoan aio, ko kona n iangoi raoi rongorongo n aron aikai:
-
“I tangira te nanoanga, ao I aki tangira te anga karea” (kibu 7; taraa Otea 6:6).
-
“Bwa Uean te Tabati Natin te Aomata” (kibu 8).
-
“Bon te tua karaoan ae raoiroi n te Tabati” (kibu 12).
E kanga reirei aikai ni karika te kawai nakon am nonori nakon te Tabati?
Taraa naba Mareko 2:23–3:5; Atuun te Euangkerio, “Te Bong ae te Tabati,” topics.ChurchofJesusChrist.org.
Mataio 12:34–37; Mareko 11:33–44
Au taeka ao mwakuri e katerea bwa tera are e mena inanou.
Teuana mai ibuakon burebureaia Baritaio iroun te Tia Kamaiu bon are a kaotia n taraaia bwa a raoiroi ma nanoia aki itiaki. Ngkana kam kamatebwaia ana kauring te Tia Kamaiu nakoia Baritaio ni Mataio 12:34–37 ao Ruka 11:33–44, iangoa te reitaki n nanora ao ara mwakuri. Tera ae kananonaki n te kibuntaeka ae “kaubwain te nano ae tamaroa” i bon iroum? (Mataio 12:35). E na kanga ara taeka ni karaoiroira ke ni kabuakakaira (taraa Mataio 12:37). Tera nanon ae a riai ni tii “teuana” matam? (Ruka 11:34). Iangoia raoi bwa ko na kanga n “ota rabwatam” (Luke 11:36) rinanon mwaakan te Tia Kamaiu.
Taraa naba Aramwa 12:12–14; Reirei ao Berita aika Tabu 88:67–68.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Mataio 11:28–30.Ko konaa ni buokiia am utu bwa ana katamneia ana reirei te Tia Kamaiu ni kiibu aikai ao ni kairuoruo ni kataia ni katika te bwai ae tinebu i bon irouia moa ao imwina ana manga buokaki n katikia riki. Tera tabeua rawawatara aika ti uouoti? Tera ae e nanonaki n ae ti na katoka amon Kristo iaora? Te tamnei ae mena n tokin te kabwarabwara aei e kona ni buokiko n tuangko bwa tera te amo.
-
Mataio 12:10–13.Ngkana ko wareka taekan Iesu ni kamaiua te mwaane n te Tabati, am utu a kona ni marooro iaona bwa e na kanga ni “bwanin kamaiuara” iroun te Tia Kamaiu. E na kanga n riki te Tabati bwa te bong ni kamaiu ibukira?
Ni kaungaaki n ana katooto te Tia Kamaiu inanon kiibu aikai, am utuu a kona ni karinani kawai ake kam kona ni “karaoia raoi n te Tabati” (kibu 12). Kakoaua raoi bwa ko karinii naba taai ni buokiia taberman. E na kona n ibuobuoki kawakinan baike ko karinanii ao n manga okiria nakon Tabati ake imwiina.
-
Ruka 11:33–36.Iangoia bwa ko na kanga n reireiniia am utu bwa tera e nanonaki n ngkana ti a “onrake n te ota” (kiibu 34, 36). Ana kona n ibuobuoki bwaai n am angareirei? Kam kona naba ni marooroakin kawai ake a na uota otan te Tia Kamaiu nakon maiura, mweengara, ao te aonaaba. Ibukin iango, taraa te witeo “Te Ota are Ota inanon te Roo,” ChurchofJesusChrist.org.
-
Ruka 11:37–44.Tao e na kona am utu ni marooroakin kiibu aikai ngkana a bootaki n teboki bwain amwarake. Ko kona n maroroakina bwa bukin tera kai te iango ae aki raoiroi tebokan tinanikun bwaai amwarake n aron boora ao mangko. Ko kona ngkanne ni kairekerekea aio nakon kainanoan te riki n raoiroi tiaki tii man kaotinakoan ara mwakuri ma inanon naba ara iango ao namakin.
Ibukin iango riki tabeua ibukin reireiaia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “How Gentle God’s Commands,” Anene n Taromauri, nambwa. 125.
Kanakoraoan Am Kamatebwai I Bon Iroum
Karaoia n Taainako. E na iai boong ae ngkana ko kamatebwai koroboki aika tabu e na taraa ni kangaanga riki ke karako ana mwakuri nakon are ko kantaningaia. Tai kabwara nanom. Unimwaane David A. Bednar e reireinira “Ngaia are teimatoara ni karaoi bwaai aika uarereke a kona ni karekei mwiia n tamnei aika kakawaki” (“More Diligent and Concerned at Home,” Riaona, Nob. 2009, 20).
“Amoa amou i aomi, ao reirei i Rou; bwa I nimamanei ao I nanorinano: ao e na reke i roumi iai motikan rawaia tamneimi”(Mataio 11:29). Rawetamnei © iStockphoto.com/wbritten