“Beberuare 27–Maati 5. Mataio 8; Mareko 2–4; Ruka 7: ‘E Kamaiuko Am Onimaki,’” Nakomai, Iriirai—Ibukiia Aomata n Tatabemaniia ao Utu: Te Nu Tetemanti 2023 (2022)
“Beberuare 27–Maati 5. Mataio 8; Mareko 2–4; Ruka 7,” Nakomai, Iriirai—Ibukiia Aomata n Tatabemaniia ao Utu: 2023
Beberuare 27–Maati 5
Mataio 8; Mareko 2–4; Ruka 7
“E Kamaiuko Am Onimaki”
Taratara raoi n aki kawaekoaa am kamatebwai ni koroboki aika tabu. Anaa am tai n iango ma te tataromwaaka, e ngae ngke e ataaki bwa e aki reke am tai ni wareki taian kibu. Taai aikai ibukin iangoana raoi e na kairiko ni karekea oin am kaotioti.
Korei Am Namakin
Teuana mai buakon rongorongo ae rangi ni matata n te Nu Tetemanti bwa Iesu Kristo bon te tia kamarurung. Karakinan te Tia Kamaiu ngke e kamarurungiia aomata aika a mwaiti ake a aoraki ao ake a rootaki—mairoun te aine are e ituaki n te biiua nakon natin te aine ae mate buuna. Bukin tera ngkai e katuruturuaki aei iaon te kamarurung n te rabwata? Tera rongorongo ae na konaa reke ikanne ibukira n taian kakai aikai? Ni koauana te rongorongo teuana ae kaotaki raoi bwa Iesu Kristo bon Natin te Atua, ma mwakana iaon bwaai ni kabane, ni ikotaki ma marakira n rabwata ao aki kororaoira. Ma nanona riki teuana ae kuneaki n Ana taeka nakoia taan koroboki ake a nanououa: “Bwa kam aonga n ataia bwa e kona Natin te aomata ni kabwarai buure i aon te aba” (Mareko 2:10). Ngkana ko wareka taekan te aomata ae matakii ke te rebera ae kamaiuaki—ko konaa ni iangoa taekan te kamaeu—n te tamnei ao n te rabwata—are ko kona ni karekea mairoun te Tia Kamaiu ao n ongo ngke E kangai nakoim, “E kamaiuko am onimaki” (Ruka 7:50).
Iango ibukin te Kamatebwai i bon Iroum ni Koroboki aika Tabu
E konaa te Tia Kamaiu kamarurungi mamaara ao aoraki.
Mwakoro aika tabeua aikai a koreaki inanona mwaitin taian kakai n ana mwakuri ni kamarurung te Tia Kamaiu ake e karaoi. Ngkai ko kamatebwai mwakuri ni kamarurung aikai, kakaei rongorongo aika a na kona n reke ibukim. Ko na kona ni bon titirakiniko: Tera ae reiakinaki n te rongorongo aio ibukin te onimaki iroun Iesu Kristo? Tera te reirei man te rongorongo iaon te Tia Kamaiu? Tera ae e tangiria te Uea bwa nna reiakinna man te kakai aei? Aikai tabeua katoto, ma a bon mwaiti riki:
-
Te rebera (Mataio 8:1–4)
-
Ana toro mataniwin ae tebubua (Mataio 8:5-13; Ruka 7:1-10)
-
Tinan buun Betero (Mataio 8:14–15)
-
Te mwaane ae aoraki ae nakibaina (Mareko 2:1–12)
-
Te mwaane ae mate baina (Mareko 3:1–5)
-
Natin te aine ae mate buuna ae kaain Nain (Ruka 7:11–16)
Taraa naba David A. Bednar, “Accepting the Lord’s Will and Timing,” Riaona, Aokati. 2016, 17–23; Neil L. Andersen, “Ikoaki,” Riaona, Nob. 2018, 83–86.
E aki roko Iesu Kristo bwa e na kabuakakaia taan bure ma e na kamaiuia.
Ngkai ko wareki kiibu aikai n taekan ana reitaki Iesu ma taan koroboki ao Baritaio, ko na bae n iangoia ngkana ko nooriko inanon taian rongorongo aikai. N aron te katoto, am iango ma am mwakuri ti te arona ma akana iroun Timon te Baritaio? Ko na kanga ni kabwarabwara te kaokoro n aron ana taratara Iesu ibukiia taan bure ma aron ana taratara te Baritaio n aron Timon? Iangoia bwa a kanga aia namakin nakanne ngke a uotakirikaaki n te bure ao a mena irarikin te Tia Kamaiu. Tera aia namakin ngkana a mena irarikim?
Ko kona iangoia raoinaba bwa ko na kanga n riki n ai aron te aine are e kabwarabwaraaki n Ruka 7:36–50. Nningai ae ko a tia iai n namakina te maraunnano ao te nanoanga are e kaotia te Tia Kamaiu nakon neienne? Tera ae ko reiakinaki man ana katoto neienne n te onimaki, te tangira , ao te nanorinano?
Taraa naba Ioane 3:17; Ruka 9:51–56; Dieter F. Uchtdorf, “The Gift of Grace,” Riaona, Meei 2015, 107–10.
Mataio 8:18–22; Mareko 3:31–35
Te riki bwa a na reirei Iesu Kristo nanona I karimoa moa inanon maiu.
Ni kiibu aikai, e reirei Iesu bwa ngkana ko na riki bwa Ana reirei e kainnaoira bwa ti na karimoa moa inanon maiura, e ngae ngkana n taai tabetai akanne e nanonaki bwa ti riai n anga karea n ara bwai tabeua aika a kakawaki iroura. Ngkai ko kamatebwai karaki aikai, iangoiko bwa kanga ana reirei. Bukin tera ngkai a riai ana reirei ni karimoa moa te Tia Kamaiu? Tera ae ko riai ni katokia bwa ko aonga ni karimoa moa Iesu? (Taraa naba Ruka 9:57–62.)
Mataio 8:23–27; Mareko 4:35–41
Iai mwaakan Iesu Kristo n uota te rau ribuakon angibuakan te maiu.
Ko a tia n namakina aia namakinna ana reirei Iesu ngkoa n tain te angibuaka i taari—n noori naao ni kaona nanon te booti n titiraki, “Te Tia Reirei, ko aki mutiakini matera?”
N Mareko 4:35–41, ko na kunei aua titiraki. Korea teuana imwiin teuana, ao iangoia raoi bwa tera reiakinam ni kaitarai kangangan te maiu n am onimaki iroun Iesu Kristo. E kanga te Tia Kamaiu ni uota te rau nakon taian angibuaka inanon maium?
Taraa naba Lisa L. Harkness, “Raoi, Bwaka,” Riaona, Nob. 2020, 80–82.
Man te Maaku nakon te Onimaki, iroun Howard Lyon
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Mataio 8; Mareko 2–4; Ruka 7.Iangoia korei ni karinani taian kakai ake a kabwarabwaraaki inanon mwakoro aikai. Kataia kakaei ke korei tamnein tabeua mai buakona (taraa te Gospel Art Book ke ChurchofJesusChrist.org). A kona kaain am utu n tatabemaniia ni kabonganai tamnei ni karakina taekan teuana te kakai ao n tibwaua te bwai are a reiakinaki mai iai. Ko kona n tibwauai tabeua katooto n taian kakai ake ko a tia n noori ke ni wareka rongorongona.
Tarai naba witeo “Widow of Nain” and “Calming the Tempest” (ChurchofJesusChrist.org).
-
Mataio 8:5–13; Ruka 7:1–10.Tera rongorongon ana onimaki Mataniwin ae tebubua are e rootaki iai nanon Iesu? Ti na kanga ni kaota ara onimaki n ai aron anne iroun Iesu Kristo?
-
Mareko 2:1–12.“Mwakoro 23: Te Mwaane are Aki Kona n Nakonako” (n Karaki man te Nu Tetemanti, 57–58, ke tamnei ake a irekereke mangaia iaon ChurchofJesusChrist.org) a kona ni buoka am maroro ma am utu Mareko 2:1–12. (Taraa naba te witeo “Jesus Forgives Sins and Heals a Man Stricken with Palsy” on ChurchofJesusChrist.org.) Ti kanga n riki n aroia raoraon te mwaane are e aki kona n nakonako? Antai te aekaki n rao anne nakoira?
-
Mareko 4:35–41.E kona te karaki aio ni buokiia kaain am utu ngkana a namakina te maaku? Tao a kona ni wareka te kibu 39 ao n tibwauai aia taneiai ngke a buokaki iroun te Tia Kamaiu ao n namakina te rau.
A na kona ni kukurei ataei bwa aongkoa are a mena inanon te booti n tain buakan taari ao temanna e tabe ni wareka Mareko 4:35–38. Ngkanne, ngkana temanna e wareka te kibu 39, a na iangoia bwa aongkoa are a mena inanon te booti iaon taari ae raoi. Kam kona naba ni kaai n anenea te kuna are taekan kuneakin te rau iroun te Tia Kamaiu, n aron “Master, the Tempest Is Raging” (Anene n Taromauri, nambwa. 105). Tera taekan te anene ae e reireiniira taekan te rau are e anga Iesu?
Ibukin iango riki tabeua ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “Master, the Tempest Is Raging,” Anene n Taromauri, nambwa. 105.
Kanakoraoan Ara Anga reirei
Tatauraoi ao ni kai reke. Tabeua taai aika a nakoraoi ibukin te reirei a moanaki man titiraki ma tabeaianga i nanoia kaain te utu. Kaotia nakoia kaain am utu rinanon am taeka ma am mwakuri bwa ko ingainga n ongora irouia. (Taraa Reirei n Ana Kawai te Tia Kamaiu, 16.)
Kristo ao te Mwaane ae Nakibaina,, iroun J. Kirk Richards