Te Kauaoki, iroun Harry Anderson

Meei 22–28

Iotebwa Timiti—Mataio 1; Mataio 24–25; Mareko 12–13; Ruka 21

“Bwa ane E na Nako Mai Natin te Aomata”

Iangoia bwa tera ae a kainanoia ataei ake ko reireiniia n reiakinna man Iotebwa Timiti—Mataio 1; Mataio 24–25; Mareko 12–13; Ruka 21. Ko kona ni biti iango ake ibukiia ataei ake a ikawai riki inanon te kabwarabwara aei ibukiia ataei ake a uarereke ao n nakoia naba ake a ikawai.

Kaunga te Tibwatibwa

Uota nakon te kiraati te bwai ae kona n noraki ke te tamnei ae e irekereke ma teuana te kaikonaki ke te karaki n te wareware n te wiiki aei (n aron te oera n tei ibukiia aine ake tengaun ke te koin n tei ibukin tarena ke ana mwane te aine ae mate buuna). Tuangiia ataei bwa a na tibwa te bwai ae a ataia n te kaikonaki ke te karaki.

Reirei te Reirei: Ataei aika a Uarereke Riki

Iotebwa Timiti—Mataio 1:31

Imwaain manga okin Iesu, e na tataekinaki te euangkerio ni kabuta te aonaaba.

Teuana te kanikinaa ae e na waekoa n oki Iesu bwa e a tia Ana euangkerio n tataekinaki ni kabuta te aonaaba. Ataei a kona ni buoka kakoroan nanon te taetae ni burabeti aei man tibwauaan te euangkerio.

Waaki ni Kakukurei aika a Kona ni Karaoaki

• Kaota te mwabe, te aonaaba, ke tamnein te aonaaba (taraa Gospel Art Book, nambwa. 3) ao buokiia ataei n taekina, “Te Euangkerio … e na tataekinaki n te aonaaba ni kabane” (Iotebwa Timiti—Mataio 1:31). Bukin tera te Atua e tangiriia ni kabane Natina bwa a na ongo Ana euangkerio?

• Kaoiia ataei bwa a na mwaati n aki mwaing man aia tabo ngkai kam uaia n anene iaon tibwaakin te euangkerio, n aron “I Want to Be a Missionary Now” ke “Called to Serve” (Aia Boki n Anene Ataei, 168, 174).

• Kaota te witeo “I’ll Go Where You Want Me to Go” (ChurchofJesusChrist.org). Ngkai a mataku ataei, buokiia ni wareki kawai ae a kona iai n tibwa te euangkerio n are a noria n te witeo. Tera riki kawai n tibwa te euangkerio ae a kona ni iangoia?

Te euangkerio e na tataekinaki ni kabuta te aonaaba. Te Tamnei man ana Kariaia te NASA Johnson Space Center

Mataio 25:14–30

I kona ni kabonganai bwai n tangira ake e anganai te Atua.

Ataei aika a uarereke a kunei aia bwaintangira ao aia konabwai. Buokiia bwa a na ataia ae bwaintanira ao konabwai aikai a roko mai iroun Tamara are i Karawa.

Waaki ni Kakukurei aika a Kona ni Karaoaki

• Uoti taian tianti aika rawata ae ko na kabonganai ngkana ko karakina te kaikonaki iaon te tarena, ae kuneaki ni Mataio 25:14–30. Ko kona n tuangiia teniman ataei bwa a na tei ibukiia tooro aika teniman. Kabwarabwaraa bwa n ana tai Iesu, tarena a tei ibukin te mwane, ma n taai aikai tarena e kona n nanonaki bwa ara bwaintangira ao ara konabwai.

• Tuangiia ataei bwa a na atongi kawai ae atia ni buokaki iai irouia aia karo, tariia ke mwaneia, tia reirei, ke raraoia. Tera tarena ae iai irouia aomata aikai ae a buokaki iai ni beku ibukiia tabeman?

• Korei taeka tabeua nakoia ataei n kaotia nakoia n tatabemaniia iaon te bwaintangira ao te konabwai are irouia. N am tai n tibwatibwa ma ataei n tatabemaniia iaon te bwaintangira are ko noria irouia, kaungaia bwa a na karikirakei riki aia bwaintangira ao ni kabonganai ni buokiia tabeman.

Mataio 25:31–46

E tangirai Iesu bwa N na buokiia aomata nako.

Ti beku ibukin Tamara are i Karawa ao Iesu Kristo man buokaia aomata ake i rarikira. Buokiia ataei bwa a na iangoi kawai are a kona iai ni buokiia tabeman.

Waaki ni Kakukurei aika a Kona ni Karaoaki

• Kakimototoa taekan te kaikonaki are n Mwakuri 25:34–46. Buokiia ataei bwa a na oota bwa ngkana ti beku ibukiia aomata, ti bon beku ibukin Iesu.

• Taua ieta tamnein te ataei ma tamnein Iesu ae e karabaaki mai ibukina. Tera ae ti kona ni karaoia ni buoka te ataei aei? Kanakoa tamnein te ataei ao kabwarabwaraa bwa ngkana ti beku ibon imarenara, ti bon beku ibukin Iesu.

• Kaoiia ataei bwa a na korei tamneia ae a buokiia tabeman n te kawai are e kabwarabwaraa te Tia Kamaiu inanon Mataio 25:35–36. Titirakiniia ataei ake tabeman bwa a na ketinna bwa tera ae a koreia.

• Kaoiia ataei bwa a na tibwa aia taneiai ngke temanna e kaota anuan Kristo ni buokiia tabeman ke aia utu.

Reirei te Reirei: Ataei aika a Ikawai Riki

Iotebwa Timiti—Mataio 1:31

Imwaain manga okin Iesu, e na tataekinaki te euangkerio ni kabuta te aonaaba.

A kona ataei ake ko reireiniia ni ibuobuoki ni tataekina te euangkerio nakon te aonaaba ni kabane imwaain manga Kauaokin te Tia Kamaiu.

Waaki ni Kakukurei aika a Kona ni Karaoaki

• Kaoiia ataei bwa a na tibwai kakabwaia ake a tia ni karekei ke a na karekei ibukina bwa a kaaina ana Ekaretia Kristo. Botaki ni wareka Iotebwa Timiti—Mataio 1:31, ao titirakiniia ataei bwa irouia e na kanga te euangkerio ni kakabwaiaia natin te Atua ni katutaa te aonaaba.

• Kaota nakoia ataei mwaben te aonaaba ke abam, ao buokiia bwa a na kaotii tabo tabeua are kaain aia utu ke raraoia a tia n tataekina te euangkerio iai n aia mition.

• Kaoiia ataei tabeman n roko n tauraoi n tibwaia bwa a kangaa kaain aia utu ke aia bakatibu ni butimwaea te euangkerio.

• Tuangiia ataei n tatabemaniia bwa a na korea aran temana ae teuanne ke neienne a kona n taetae nakoina iaon Iesu Kristo ke ni kaoa nakon te taromauri. Tuangiia naba ataei bwa a na korei ni kanrinanii bwaai ake a kona ni karaoi bwa ngaiia mitinare ngkai.

Mataio 25:1–13

Bon tabeu ibukin aron rairakiu nakon Iesu Kristo.

Te kaikonaki ibukiia aine ake tengaun e reireia bwa ti aki kona ni katan ibukin rairakira nakon te Tia Kamaiu mai irouia tabeman. Ko na kanga ni buokiia ataei n ataia ae bon tabeia ibukin oin rairakiia?

Waaki ni Kakukurei aika a Kona ni Karaoaki

• Tuanga temanna te ataei bwa e na roko n tauraoi n tibwaia bwa e kanga teuanne ke neienne n reiakina taekan te kaikonaki iaoia aine ake tengaun ni mweengana n te wiiki aei.

• Korea tamnein te taura nenea iaon te burakibooti, ao korea iaona koaua. Anganiia ataei mwakoro ni beeba aika a karaoaki bwa kanga timtimin te oera, ao tuangiia ataei n tatabemaniia bwa a na korea iaona te bwai are teuanne ke neienne e na karaoia bwa e aonga n rairaki riki nakon te Tia Kamaiu. Kanim tamnein te timtim iaon te burakibooti ni katobibia te taura.

• Kaoiia ataei bwa a na buokiko ni korei rinanin bwaai ake a na karaoi ni katauraoi ibukin te roko ae kakawaki. A kanga bwaai aikai n titebo nakon ke ni kaokoro man taian kawai are ti kona ni katauraoira iai ni maiura n tamnei ibukin Kauaokin te Tia Kamaiu?

• Iaon nimaua mwakoro ni beeba, korei bwaai ake a aki kona n tangoaki. Iaon nimaua riki mwakoro ni beeba, korei bwaai ake a kona n tangoaki. Kamangaoi mwakoro ni beeba, ao tuangiia ataei bwa a na kaeti rinaniia nakon uoua kurubu aikai. Wareka ma ngaiia Mataio 25:1–13. Bukin tera ngkai e kakawaki bwa ti na aki katan iaoia tabeman ibukin oin rairakira nakon Iesu Kristo?

Mataio 25:14–46

N tain te Kabanea ni Motikitaeka, ti na angan te Uea rongorongon maiura.

Imwiin te Mangauti, te Uea e na motiki taekara ni kaineti ma ongeabara nakon Ana tua ao butimwaean Ana anga karea ni kamaiu. Te kaikonaki iaon te tarena ao te kaikonaki iaoia tiibu ao kooti e reireiniira aron te Kabanea ni Motikitaeka aei.

Waaki ni Kakukurei aika a Kona ni Karaoaki

• Kaoiia iteraia kaain te kiraati bwa a na wareka Mataio 25:14–30 ao iteran te kiraati are teuana bwa a na wareka Mataio 25:31–46. Tuangiia kaain te kurubu bwa a na katea kain te kaikonaki ibukiia kaain te kiraati. Tera ae e reireinira te Uea man taian kaikonaki aikai?

• Kaoiia ataei bwa a na wareka Mataio 25:35–36 ni kakauoman ao ni korei ni karinanii bwaai ake a kona ni karaoi ni kaota aia tangira ibukin Iesu Kristo.

Kaungaa te Kamatebwai n te Mweenga

Kaoiia ataei bwa a na tibwaia ma aia utu kawai ake a kona n riki iai n tamaroa bwa mitinare ao ni marooro ma aia utu iaoia aomata ake a kona n tibwa te euangkerio ma ngaiia.

Kanakoraoan Ara Anga reirei

Ongora nako iai ke karaoa kain te karaki. Ibukina bwa ataei a tangirii karaki, kakaei aanga are ko na kairekerekeia iai ni karaki man koroboki aika a tabu ake ko tibwai. A kona n taui tamnei ke bwaai, korea tamnein te karaki, karaoa te kaotioti n te karaki, ke ni buoka karakinan te karaki. Kaokiokia ni karakina te karaki ni buokiia bwa a na kinai kabwarabwara aika a kakawaki ao reirein te euangkerio.