“Tsib Hlis Ntuj 8–14. Mathais 19–20; Malakaus 10; Lukas 18: ‘Tseem Tshuav Yam Twg uas Kuv Tsis Tau Ua Thiab?,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Tsib Hlis Ntuj 8–14. Mathais 19–20; Malakaus 10; Lukas 18,” Los, Nrog Kuv Mus—Rau Ib Leeg thiab Tsev Neeg: 2023
Tsib Hlis Ntuj 8–14
Mathais 19–20; Malakaus 10; Lukas 18
“Tseem Tshuav Yam Twg uas Kuv Tsis Tau Ua Thiab?”
Nyeem thiab xav txog Mathais 19–20; Malakaus 10; thiab Lukas 18, es tsom ntsoov rau tej kev tshoov siab uas koj txais tau. Sau ntawv txog tej kev tshoov siab ntawd, thiab txiav txim siab tias koj yuav ua li cas.
Sau Ntawv txog Koj tej Kev Tshoov Siab
Yog tias koj muaj cib fim nug tus Cawm Seej ib lo lus, ces koj yuav hais li cas? Thaum ib tug tub hluas nplua nuj ntsib tus Cawm Seej, nws nug hais tias, “Yam twg yog yam zoo uas kuv yuav tsum ua, kuv thiaj tau txoj sia ntev dhawv mus ib txhis?” (Mathais 19:16). Tus Cawm Seej txoj kev teb twb qhia tias Nws zoo siab txog tej yam zoo uas tus tub hluas tau ua lawm thiab xav kom nws ua ntxiv. Thaum peb xav txog qhov uas peb muaj peev xwm txais tau txoj sia nyob mus ib txhis, tej zaum peb twb xav seb puas tshuav tej yam uas peb yuav tsum ua ntxiv thiab. Thaum peb thov li no hais tias, “Tseem tshuav yam twg uas kuv tsis tau ua thiab?” (Mathais 19:20), tus Tswv txawj teb kom zoo rau peb tus kheej ib yam li Nws tau teb tus tub hluas nplua nuj. Tus Tswv hais kom peb ua dab tsi los xij, thaum peb ua raws li Nws tau hais peb yeej yuav tsum tso siab rau Nws tshaj peb tso siab rau peb txoj kev ncaj ncees (saib Lukas 18:9–14) thiab peb yuav tsum “txais yuav Vajtswv lub [nceeg vaj] ib yam li cov me nyuam yaus no” (Lukas 18:17; kuj saib 3 Nifais 9:22).
Tej lub Tswv Yim Kawm Vaj Lug Kub ntawm Yus Ib Leeg
Mathais 19:3–9; Malakaus 10:2–12
Vajtswv pom zoo rau kev sib yuav ntawm ib tug txiv neej thiab ib tug poj niam.
Tus Cawm Seej thiab cov Falixais txoj kev sib tham no yog ib zug thaum tus Cawm Seej tau qhia txog kev sib yuav. Tom qab koj nyeem Mathais 19:3–9 thiab Malakaus 10:2–12, sau ntawv txog tej kab lus uas koj xav tias yog lub ntsiab ntawm tus Tswv txoj kev xav txog kev sib yuav. Ces kawm ntxiv los ntawm cov ntaub ntawv pab nyob hauv “Marriage” (Gospel Topics, topics.ChurchofJesusChrist.org), thiab sau tej lus ntxiv rau koj zaj lus. Koj txoj kev paub txog Leej Txiv txoj hau kev cawm seej ua rau koj xav li cas txog kev sib yuav?
Mathais 19:3–9; Malakaus 10:2–12.
Yexus puas tau qhia tias yeej tsis tsim nyog sib nrauj los yog cov neeg uas tau sib nrauj yuav tsum tsis txhob sib yuav ntxiv?
Thaum nws hais lus txog kev sib nrauj, Thawj Tswj Hwm Dallin H. Oaks qhia tias Leej Txiv Saum Ntuj Ceeb Tsheej xav kom peb sib yuav tas mus ib txhis. Tiam sis, Vajtswv kuj to taub tias tej lub sij hawm yuav tsum sib nrauj. Thawj Tswj Hwm Oaks piav tias tus Tswv “cia cov neeg uas tau sib nrauj lawm yuav lwm tus es tsis ua txhaum kev tsim txiaj raws li qhia hauv txoj kev cai siab dua. Yog ib tug mej zeej uas sib nrauj lawm tsis tau ua txhaum loj heev, nws tseem yuav tsim nyog txais tau ib daim ntawv tso cai nkag tuam tsev raws li tej kev cai tsim nyog uas lwm tus mej zeej yuav tsum coj” (“Divorce,” Liahona, Tsib Hlis Ntuj 2007, 70).
Mathais 19:16–22; Malakaus 10:17–22; Lukas 18:18–23
Yog kuv thov tus Tswv, Nws yuav qhia kuv tias kuv yuav tsum ua dab tsi koj tau txoj sia nyob mus ib txhis.
Zaj lus txog tus tub hluas nplua nuj yeej ua rau txhua tus xav tsis thoob, tsis hais tus thwj tim uas rau siab tas nws lub neej los yog. Thaum koj nyeem Malakaus 10:17–22, koj pom dab tsi uas qhia txog tus tub hluas no txoj kev rau siab ntseeg thiab txoj kev cia siab tiag? Tus Tswv xav li cas txog tus tub hluas no?
Tej zaum zaj no yuav ua rau koj nug tias, “Tseem tshuav yam twg uas kuv tsis tau ua thiab?” (Mathais 19:20). Tus Tswv pab peb li cas thaum tseem tshuav tej yam uas peb tsis tau ua? (saib Ethaws 12:27). Peb yuav ua li cas kom npaj siab txais Nws tej lus ntuas thiab txoj kev pab thaum peb xav ua zoo dua?
Kuj saib Larry R. Lawrence, “Tseem Tshuav Yam Twg uas Kuv Tsis Tau Ua Thiab?,” Liahona, Kaum Ib Hlis Ntuj 2015, 33–35; S. Mark Palmer, “Then Jesus Beholding Him Loved Him,” Liahona, Tsib Hlis Ntuj 2017, 114–16.
Txhua leej txhua tus txais tau txoj koob hmoov uas yog txoj sia nyob mus ib txhis, tsis hais lawv lees yuav txoj moo zoo thaum twg los yog.
Koj puas xav tias cov tub zog nyob hauv lub vaj txiv hmab zoo li koj? Koj kawm dab tsi txog koj tus kheej nyob hauv tej nqe vaj lug kub no? Tej zaum Txwj Laug Jeffrey R. Holland zaj lus “The Laborers in the Vineyard” (Liahona, Tsib Hlis Ntuj 2012, 31–33) yuav pab koj paub koj yuav siv zaj lus piv txwv no li cas. Tus Ntsuj Plig tshoov koj lub siab ua dab tsi ntxiv?
Tus Neeg Sau Se uas Hloov Siab Lees Txim thiab tus Falixais uas Xav Zoo txog Nws tus Kheej Nyob hauv lub Tuam Tsev, los ntawm Frank Adams
Kuv yuav tsum tso siab rau Vajtswv txoj kev hlub tshua, tsis txhob tso siab rau kuv txoj kev ncaj ncees.
Koj yuav hais li cas yog koj hais lub ntsiab ntawm ob zag lus thov Vajtswv nyob hauv zaj lus piv txwv no? Cia li xav txog qhov uas koj yuav ua li cas kom ua zoo li tus neeg sau se nyob hauv zaj dab neeg no thiab tsis txhob ua li tus Falixais.
Kuj saib Filipis 4:11–13; Amas 31:12–23; 32:12–16.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Malakaus 10:13–16; Lukas 18:15–17.Kom pab nej tsev neeg xav txog zaj lus nyob hauv tej nqe no, tej zaum nej yuav xav hu nkauj ua ke, xws li hu zaj nkauj “I Think When I Read That Sweet Story” (Children’s Songbook, 56). Yuav zoo li cas yog tias nej nyob nrog cov me nyuam uas Yexus tau foom koob hmoov? Cov lus no “txais yuav Vajtswv lub [nceeg vaj] ib yam li cov me nyuam yaus no” txhais li cas? (Malakaus 10:15).
-
Malakaus 10:23–27.Qhov uas yus muaj nyiaj txiag thiab qhov uas yus cia siab rau nyiaj txiag txawv li cas? (saib Malakaus 10:23–24). Thaum nej nyeem nqe 27, tej zaum nej yuav xav qhia txog Joseph Smith Kev Txhais: “Thaum neeg cia siab rau nyiaj txiag, ua tsis taus; tiam sis cov neeg uas cia siab rau Vajtswv thiab tso txhua yam tseg kom ua raws li kuv hais, lawv ua taus vim cov neeg zoo li no yeej ua taus txhua yam” (Joseph Smith Kev Txhais, Malakaus 10:26 [nyob hauv Malakaus 10:27, lub cim nram qab a]). Peb tsev neeg ua li cas kom qhia tias peb cia siab rau Vajtswv ntau dua li peb cia siab rau tej khoom xwb?
-
Mathais 20:1–16.Kom pab qhia tej ntsiab cai nyob hauv Mathais 20:1–16, tej zaum nej yuav xav ua ib txoj kev sib tw, xws li txoj kev sib tw khiav. Tom qab txhua tus tau sib tw tas lawm, muab nqi zog ib yam rau txhua leej txhua tus, pib muab rau tus uas swb tas lawm, mus txog thaum muab rau tus uas yeej lawm. Qhov no qhia dab tsi rau peb txog cov uas txais tau cov koob hmoov ntawm txoj sia nyob mus ib txhis raws li Leej Txiv Saum Ntuj Ceeb Tsheej txoj hau kev?
-
Mathais 20:25–28; Malakaus 10:42–45.Cov lus “yog nej cov leej twg xav ua tus thawj, tus ntawd yuav tsum ua nej tus qhev”txhais li cas? (Mathais 20:27). Yexus Khetos tau ua li cas kom coj yam ntxwv txog lub ntsiab cai no? Peb yuav ua li cas kom coj raws li Nws tus yam ntxwv nyob hauv peb tsev neeg, peb pawg ntseeg los sis ceg ntseeg, thiab peb zej zog?
-
Lukas 18:1–14.Peb kawm dab tsi txog kev thov Vajtswv los ntawm ob zag lus piv txwv hauv tej nqe no?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Me Tub Me Ntxhais, Vajtswv Nyob Ze,” Cov Nkauj Qhuas Vajtswv, zaj 34.
Kev Kawm Zoo Dua Ntxiv ntawm Yus Ib Leeg
Nrhiav ib lub sij hawm uas zoo rau koj kawm vaj lug kub. Lub sij hawm yooj yim tshaj rau koj kawm vaj lug kub yog thaum twg tsis muaj dab tsi cuam tshuam. Nrhiav ib lub sij hawm uas zoo rau koj kawm vaj lug kub, thiab ua zoo npaum li koj ua tau kom kawm thaum lub sij hawm ntawd txhua hnub.
Khetos thiab tus Nom Tswv Hluas, los ntawm Heinrich Hofmann