“Tsib Hlis Ntuj 22–28. Joseph Smith—Mathais 1; Mathais 24–25; Malakaus 12–13; Lukas 21: ‘Thaum Neeg Leej Tub Yuav Los,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Tsib Hlis Ntuj 22–28. Joseph Smith—Mathais 1; Mathais 24–25; Malakaus 12–13; Lukas 21,” Los, Nrog Kuv Mus—Rau Ib Leeg thiab Tsev Neeg: 2023
Txoj Kev Los Zaum Ob, los ntawm Harry Anderson
Tsib Hlis Ntuj 22–28
Joseph Smith—Mathais 1; Mathais 24–25; Malakaus 12–13; Lukas 21
“Thaum Neeg Leej Tub Yuav Los”
Thaum koj nyeem Joseph Smith—Mathais 1; Mathais 24–25; Malakaus 12–13; thiab Lukas 21, tej zaum koj yuav xav nug tias, “Tej tshooj no qhia dab tsi rau kuv? rau kuv tsev neeg? qhia dab tsi txog txoj hauj lwm uas Vajtswv hu kuv ua?”
Sau Ntawv txog Koj tej Kev Tshoov Siab
Ntshe Yexus cov thwj tim xav tsis thoob thaum lawv hnov Nws tej lus qhia txog tej uas yuav muaj los yav tom ntej: Yeluxalees lub tuam tsev, uas yog lub plawv ntawm cov neeg Yudais kab lig kev cai, yuav raug puas tsuaj mus kom “tej pob zeb uas muab sib dhos ua ke ntawd txhua lub yuav pluam nyias nyob nyias tas huv tib si.” Cov thwj tim yeej xav paub ntxiv. “Qhia peb thaum twg mam li muaj tej uas koj tau hais?” lawv nug. “Thiab saib dab tsi yog lub cim ntawm koj txoj kev los?” (Joseph Smith—Mathais 1:2–4). Tus Cawm Seej tej lus teb qhia tias qhov uas Yeluxalees yuav raug puas tsuaj mus—es twb muaj li ntawd thaum xyoo 70 tom qab Yexus tuag—ntshe yuav tsis loj npaum li tej lub cim uas muaj thaum Nws yuav los nyob hauv hnub nyoog kawg. Tej yam uas peb xav tias yeej ruaj khov dua li lub tuam tsev nyob hauv Yeluxalees ntshe yuav ploj mus—lub hnub, lub hli, cov hnub qub, tej teb chaws, thiab dej hiav txwv. Lub “hwj chim nyob saum nruab ntug yuav ua zog koog” thiab (Joseph Smith—Mathais 1:33). Yog peb txawj xav ntawm sab ntsuj plig, ces txoj kev ntxhov hnyo yuav qhia kom peb tso siab rau ib yam uas ruaj khov mus ib txhis. Zoo li Yexus tau cog lus tias, “Lub ntuj thiab lub ntiaj teb yuav ploj mus, tiam sis kuv tej lus yuav tsis muaj ib los poob li. … Thiab tus uas khaws kuv txoj lus cia, yuav tsis raug dag ntxias” (Joseph Smith—Mathais 1:35, 37).
Tej lub Tswv Yim Kawm Vaj Lug Kub ntawm Yus Ib Leeg
Joseph Smith—Mathais yog dab tsi?
Joseph Smith—Mathais, uas yog ib phau nyob hauv phau Lub Hlaws uas Muaj Nqis Heev, yog Joseph Smith Kev Txhais nqe kawg ntawm Mathais 23 thiab tag nrho tshooj Mathais 24. Joseph Smith tej kev kho tej no yeej tau muab tej yam tseeb txum tim rov qab los, tej lus tseeb uas twb ploj mus lawm. Nqe 12–21 hais txog Yeluxalees txoj kev raug puas tsuaj puag thaum ub; nqe 21–55 muaj cov yaj saub tej lus qhia txog tej uas yuav muaj nyob rau hauv hnub nyoog kawg.
Joseph Smith—Mathais 1:21–37; Malakaus 13:21–37; Lukas 21:25–38
Tej lus qhia txog tus Cawm Seej txoj Kev Los Zaum Ob yuav pab kuv muaj kev ntseeg thaum kuv xav txog yav tom ntej.
Yeej ua rau peb nyuaj saib txhawj xeeb thaum xav txog tej xwm txheej uas yuav muaj ua ntej Yexus Khetos txoj Kev Los Zaum Ob. Tiam sis thaum Yexus tau hais txog tej uas yuav muaj los yav tom ntej no, Nws tau qhia Nws cov thwj tim kom “tsis txhob nyuaj siab” (Joseph Smith—Mathais 1:23). Yuav ua li cas kom “tsis txhob nyuaj siab” thaum koj hnov txog av qeeg, kev ua tsov ua rog, kev dag ntxias, thiab kev tshaib kev nqhis? Cia li xav txog txoj lus nug no thaum koj nyeem tej nqe no. Cia li sau lub cim rau tej lus uas nplij koj lub siab.
Kuj saib Phau Qhia txog Vaj Lug Kub, “Yexus Khetos txoj Kev Los Zaum Ob,” topics.ChurchofJesusChrist.org.
Joseph Smith—Mathais 1:26–27, 38–55; Mathais 25:1–13; Lukas 21:29–36
Kuv yeej yuav tsum npaj siab rau tus Cawm Seej txoj Kev Los Zaum Ob.
Vajtswv tsis tau qhia kom “paub hnub twg thiab lub sij hawm twg” neeg Leej Tub yuav los (Mathais 25:13). Tiam sis Nws tsis xav kom txog hnub ntawd es peb “tsis ceev faj” (Lukas 21:34), yog li ntawd Nws tau qhia peb kom paub ua li cas npaj ua ntej.
Thaum koj nyeem tej nqe no, xav txog tej zaj lus piv txwv thiab lwm yam uas tus Cawm Seej tau siv kom qhia peb npaj siab tas mus li rau Nws txoj Kev Los Zaum Ob. Koj kawm dab tsi los ntawm tej kab lus ntawd? Koj txais kev tshoov siab kom koj ua dab tsi?
Tej zaum koj yuav xav seb tus Cawm Seej xav kom koj ua li cas pab npaj neeg ntiaj teb rau Nws txoj Kev Los Zaum Ob. Koj xav tias koj yuav tsum ua li cas kom npaj txais tus Cawm Seej thaum Nws los? Tej zaum Txwj Laug D. Todd Christofferson zaj lus “Npaj rau tus Tswv txoj Kev Rov Qab Los” (Liahona, Tsib Hlis Ntuj 2019, 81–84) yuav pab koj xav txog qhov no.
Kuj saib Russell M. Nelson, “Muaj Kev Ntseeg Mus rau Yav Tom Ntej,” Liahona, Kaum Ib Hlis Ntuj 2020, 73–76.
Leej Txiv Saum Ntuj Ceeb Tsheej xav kom kuv siv Nws tej txiaj ntsim raws li kev txawj ntse.
Nyob hauv tus Cawm Seej zaj lus piv txwv, ib qhov “talent”yog ib chob nyiaj. Tiam sis zaj lus piv txwv txog chob nyiaj tshoov peb lub siab kom xav txog qhov uas peb siv peb cov koob hmoov twg los xij, tsis yog peb txoj kev siv nyiaj xwb. Tom qab koj nyeem zaj lus piv txwv no, tej zaum koj yuav xav sau ntawv txog cov koob hmoov thiab tej kev lav ris uas Leej Txiv Saum Ntuj Ceeb Tsheej tau muab rau koj. Nws xav kom koj ua dab tsi nrog cov koob hmoov no? Koj yuav ua li cas kom muaj tswv yim ntxiv thaum koj siv tej txiaj ntsim no?
Thaum kuv ua hauj lwm pab lwm tus, kuv ua hauj lwm pab Vajtswv.
Yog koj xav paub seb tus Tswv yuav txiav txim rau koj lub neej, cia li nyeem zaj lus piv txwv txog cov yaj thiab cov tshis. Koj xav seb yog vim li cas kev saib xyuas cov uas xav tau kev pab yuav pab koj npaj txais tau Vajtswv lub nceeg vaj ua koj tug?
Zaj lus piv txwv no puas zoo li ob zag lus piv txwv nyob hauv Mathais 25? Peb zag lus no muaj dab tsi uas sib thooj?
Kuj saib Mauxiyas 2:17; 5:13.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Joseph Smith—Mathais.Kom pab nej tsev neeg kawm tshooj no, caw lawv nrhiav tus Cawm Seej tej lus qhia txog tej yam peb ua tau kom npaj rau Nws txoj Kev Los Zaum Ob (saib, ua piv txwv, nqe 22–23, 29–30, 37, 46–48). Peb yuav ua li cas kom ua raws li tej lus ntuas no? Tej zaum nej tsev neeg yuav nyiam hu zaj nkauj “When He Comes Again” (Children’s Songbook, 82–83) thiab kos duab txog tej yam lawv xav tias tus Cawm Seej txoj Kev Los Zaum Ob yuav zoo li cas.
-
Joseph Smith—Mathais 1:22, 37.Qhov uas peb khaws Vajtswv txoj lus cia txhais li cas? Peb yuav ua li cas kom ua li no peb tus kheej thiab nrog peb tsev neeg ua ke? Qhov uas peb ua li no yuav pab peb li cas kom txhob raug ntxias?
-
Mathais 25:1–13.Tej zaum nej yuav xav siv daim duab txog kaum tus hluas nkauj uas nrog zaj lus no kom pab nej sib tham txog Mathais 25:1–13. Muaj tej yam twg hauv daim duab no uas tau hais nyob hauv tej nqe no?
Tej zaum nej yuav xav txiav ntawv kom zoo li tej teev roj thiab muab zais cia nyob hauv koj lub tsev. Tej zaum nej yuav xav muab tej teev no lo rau tej khoom xws li phau vaj lug kub los sis ib daim duab txog lub tuam tsev. Thaum twg nej tsev neeg nrhiav tau tej teev roj no, tej zaum nej yuav xav sib tham txog qhov uas tej no yuav pab peb npaj li cas rau txoj Kev Los Zaum Ob.
-
Malakaus 12:38–44; Lukas 21:1–4.Tej nqe no qhia dab tsi rau peb txog qhov uas tus Cawm Seej saib tej yam uas peb muab rau Nws zoo li cas? Qhia nej tsev neeg paub them ib feem kaum thiab nyiaj yoo mov rau tus Tswv. Tej kev tiam no yuav pab li cas kom txhawb nqa Vajtswv lub nceeg vaj? Peb yuav ua li cas kom “muab hlo” txhua yam peb muaj rau tus Tswv? (Malakaus 12:44).
Tus Poj Ntsuam lub Txiaj Toog, los ntawm Sandra Rast
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “When He Comes Again,” Children’s Songbook, 82–83.
Kev Kawm Zoo Dua Ntxiv ntawm Yus Ib Leeg
Npaj chaw rau koj kawm. “Qhov chaw uas peb nyob yeej hloov tau peb txoj kev txawj kawm thiab hnov qhov tseeb” (Teaching in the Savior’s Way, 15). Sim nrhiav ib qho chaw rau koj kawm vaj lug kub uas yuav pab koj hnov tus Vaj Ntsuj Plig Dawb Huv tej kev tshoov siab. Cov nkauj thiab cov duab zoo kuj yuav pab yus hnov tau tus Ntsuj Plig.
Tsib tug Muaj Tswv Yim, los ntawm Walter Rane