txiv neej nyob hauv tus ntoo thaum Yexus tab tom los

Xakhais nyob hauv the Sycamore Tree, los ntawm Yakaunpaus Tissot

Tsib Hlis Ntuj 15–21

Mathais 21–23; Malakaus 11; Lukas 19–20; Yauhas 12

“Koj Saib, Koj tus Vaj Ntxwv Tab Tom Los”

Ua ntej koj nyeem tej lus tswv yim nyob hauv tus txheej txheem qhia no, cia li nyeem Mathais 21–23; Malakaus 11; Lukas 19–20; thiab Yauhas 12. Cia li sau ntawv txog tej kev tshoov siab uas koj qhia tau koj tsev neeg los sis nyob hauv lub Koom Txoos tej chav kawm.

Sau Ntawv txog Koj tej Kev Tshoov Siab

Tus Cawm Seej tshaib plab tom qab Nws taug kev los ntawm Npethanis mus rau Yeluxalees, thiab Nws pom ib tsob txiv ncuav pias uas xav tias tej zaum yuav noj tau. Tiam sis thaum Yexus mus saib tsob ntoo, Nws pom tias tsis muaj txiv li (saib Mathais 21:17–20; Malakaus 11:12–14, 20). Tsob txiv ncuas piav yeej zoo li cov thawj coj siab dag nyob hauv Yeluxalees; lawv tej lus qhia uas tsis muaj nqis thiab txoj kev ua dawb huv kom txhua tus pom xwb yeej tsis ua rau lawv tau noj tau haus ntawm sab ntsuj plig. Cov Falixais thiab cov xib hwb qhia kev cai ua rau lwm tus xav tias lawv twb coj raws li lus txib ntau heev tiam sis lawv tsis tau ua raws li ob txoj lus txib tseem ceeb tshaj plaws: kom hlub Vajtswv thiab hlub neeg zej zog ib yam li lawv lub cev (saib Mathais 22:34–40; 23:23).

Tiam sis, cov neeg coob twb pom tias muaj tej yam zoo uas los ntawm Yexus tej lus qhia. Thaum Nws tuaj txog Yeluxalees, lawv tau muab nplooj ntoo txiav kom pua Nws txoj kev, vim lawv zoo siab tau muaj raws li cov yaj saub puag thaum ub hais tias, “Nej tus Vaj Ntxwv tab tom los” (Xakhaliyas 9:9). Thaum koj nyeem lub lim tiam no, cia li xav txog tej yam zoo uas los ntawm tus Cawm Seej tej lus qhia thiab Nws txoj kev theej txhoj nyob hauv koj lub neej thiab koj yuav ua li cas kom “tawg paj txi txiv ntau” (Yauhas 12:24).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lukas 19:1–10

Tus Tswv tsis txiav txim raws li lub cev ntaj ntsuag tiam sis Nws txiav txim raws li neeg lub siab.

Nyob hauv Yexus lub caij nyoog, tib neeg coob xav tias cov neeg sau se muaj lub siab tsis ncaj thiab nyiag lawv cov nyiaj. Yog li ntawd vim Xakhais, tus thawj sau se, nplua nuj heev, tej zaum tib neeg xav phem txog nws ntxiv. Tiam sis Yexus tau saib Xakhais lub siab. Lukas 19:1–10 qhia dab tsi txog Xakhais lub siab? Tej zaum koj yuav xav sau ntawv txog tej lus hauv tej nqe no uas piav tias Xakhais tau ua dab tsi kom teev tiam tus Cawm Seej. Koj lub siab xav tau dab tsi? Koj ua dab tsi kom nrhiav tus Cawm Seej, ib yam li Xakhais tau ua?

Kuj saib Lus Qhuab Qhia thiab Kev Khi Lus 137:9.

Mathais 23; Lukas 20:45–47

Yexus rau txim rau cov uas siab dag.

Tus Cawm Seej txoj kev sib tham nrog cov xib hwb qhia kev cai thiab cov Falixais yeej tsis zoo li thaum Nws nrog Xakhais tham. Ib yam li Thawj Tswj Hwm Dieter F. Uchtdorf piav hais tias, “[Yexus] yeej npau taws rau cov neeg siab dag xws li cov xib hwb qhia Vajtswv txoj kev cai, cov Falixais, thiab cov neeg Xadukais—cov uas ua zoo li lawv ncaj ncees kom lwm tus qhuas lawv, kom muaj npe thiab tau nyiaj ntawm lub ntiaj teb, tiam sis lawv tsim txom cov neeg uas tsim nyog lawv yuav foom koob hmoov” (“On Being Genuine,” Liahona, Tsib Hlis Ntuj 2015, 81).

Nyob hauv Mathais 23, tus Cawm Seej tau hais ob peb lo lus piv txwv kom piav txog kev ua siab dag. Xav seb koj puas sau ntawv txog tej lus piv txwv no thiab sim seb tej lus no qhia dab tsi txog kev ua siab dag. Kev ua siab dag thiab tib neeg txhua tus txoj kev qaug zog ob qho no txawv li cas thaum peb sim ua raws li txoj moo zoo? Koj txais kev tshoov siab ua dab tsi ntxiv kom ua raws li tus Cawm Seej tej lus qhia?

Kuj saib Bible Dictionary, “Hypocrite.”

Mathais 21:1–11; Malakaus 11:1–11; Lukas 19:29–44; Yauhas 12:1–8, 12–16

Yexus Khetos yog kuv tus Vaj Ntxwv.

Thaum Yexus los txog Yeluxalees ob peb hnub ua ntej Nws yuav ua Nws txoj Kev Theej Txhoj, cov uas saib Nws yog lawv tus Vaj Ntxwv tau teev tiam Nws thaum lawv pleev roj rau Nws, muab ris tsho thiab nplooj ntoos loj pua Nws txoj kev mus rau hauv Yeluxalees, thiab qw nrov qhuas Nws. Xav txog qhov uas cov ntawv no yuav pab koj li cas kom koj to taub tej xwm txheej no, uas pib hauv lub lim tiam kawg ntawm tus Cawm Seej lub neej.

• Kev pleev roj rau ib tug vaj ntxwv puag thaum ub: 2 Vaj Ntxwv 9:1–6, 13

• Cov yaj saub puag thaum ub hais txog kev ua koob tsheej thaum nkag los hauv nroog: Xakhaliyas 9:9

• Lub ntsiab txog lo lus hauxanas: “Hauxanas” nyob hauv Phau Qhia txog Vaj Lug Kub (scriptures.ChurchofJesusChrist.org)

• Cov yaj saub tej lus qhia txog tus Cawm Seej txoj kev rov los: Tshwm Sim 7:9–12

Koj yuav ua li cas kom hwm thiab txais yuav tus Cawm Seej los ua koj tus Tswv thiab Vaj Ntxwv?

Kuj saib Gerrit W. Gong, “Hauxanas thiab Haleluyas—Yexus Khetos uas Muaj txoj Sia Nyob: Lub Plawv ntawm txoj Kev Txum Tim Rov Qab Los thiab lub Caij Easter,” Liahona, Tsib Hlis Ntuj 2020, 52–55; “The Lord’s Triumphal Entry into Jerusalem” (video), ChurchofJesusChrist.org.

Mathais 22:34–40

Ob txoj lus txib tseem ceeb tshaj plaws yog kev hlub Vajtswv thiab kev hlub lwm tus ib yam li yus hlub yus lub cev.

Yog koj xav tias koj txhawj xeeb dhau thaum koj sim coj raws li Yexus Khetos hais, tus Cawm Seej tej lus Nws hais rau tus kws lij choj nyob hauv Mathais 22 yuav pab koj tsom ntsoov rau koj txoj kev ua ib tug thwj tim. Nov yog ib txoj kev ua li no: Sau ntawv txog tus Tswv tej lus txib. Txhua yam uas koj sau ntawv txog puas muaj lub ntsiab zoo li ob txoj lus txib tseem ceeb no? Qhov uas koj tsom ntsoov rau ob txoj lus txib tseem ceeb no yuav pab koj li cas kom ua raws li lwm lo lus txib?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 21:12–14.Yexus tej lus thiab tej yam Nws ua nyob hauv Mathais 21:12–14 show qhia dab tsi txog Nws txoj kev xav txog lub tuam tsev? Peb yuav ua dab tsi kom qhia tias peb xav li cas txog lub tuam tsev? Peb yuav muab tej yam twg “ntiab” tawm (nqe 12) ntawm peb lub neej kom peb lub tsev yuav zoo li lub tuam tsev? Xav seb nej puas yuav hu ib zaj nkauj txog lub tuam tsev “I Love to See the Temple” (Children’s Songbook, 95).

Mathais 21:28–32.Tej yam twg los ntawm zaj lus piv txwv txog tus txiv neej uas muaj ob tug tub yuav pab nej tsev neeg? Piv txwv hais tias, tej zaum nej yuav xav siv zaj dab neeg no kom sib tham txog qhov uas kev mloog lus thiab kev hloov siab lees txim tseem ceeb npaum li cas. Tej zaum nej tsev neeg yuav xav sau ib zaj lus ua yeeb yam txog zaj lus piv txwv no.

Mathais 22:15–22; Lukas 20:21–26.Tej zaum cov me nyuam yuav nyiam ua tej lub npib nyiaj uas muaj Yexus “lub ntsej muag thiab lub npe” txaug rau. Tej zaum lawv yuav xav sau tej “yam uas yog Vajtswv li” uas peb pub tau rau Nws (Mathais 22:21) nyob rau ntawm lub npib nyiaj. Tej zaum nej kuj yuav xav sib tham txog qhov uas peb yuav tsum muaj tus Cawm Seej “lub ntsej muag thiab lub npe” txaug rau peb (Mathais 22:20; kuj saib Mauxiyas 5:8; Amas 5:14).

Yauhas 12:1–8.Maivliag tau ua li cas kom qhia tias Nws hlub tus Cawm Seej? Peb yuav ua li cas kom qhia tias peb hlub Nws?

tus poj niam muab nws cov plaub hau so Yexus ko taw

Kev So Yexus Ko Taw, los ntawm Brian Call

Yauhas 12:42–43.Peb raug dab tsi hauv peb lub sawm fem uas ua rau peb tsis xav qhia tias peb ntseeg Yexus Khetos? Yog xav kawm txog cov neeg uas tsis tau ua raws li lwm tus hais, saib Daniyees 1:3–20; 3; 6; Yauhas 7:45–53; 9:1–38; thiab Mauxiyas 17:1–4. Peb yuav ua li cas kom saib lwm tus rau nqi thaum lawv hais txog los yog tiv thaiv lawv txoj kev ntseeg ntuj?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Zoo Siab, tus Tswv Tswj Kav!,” Cov Nkauj Qhuas Vajtswv, zaj 19.

Kev Qhia Zoo Dua Ntxiv

Siv cov duab kom qhia nej tsev neeg. “Txoj Moo Zoo Pawg Duab thiab Cov Duab txog Txoj Moo Zoo nyob hauv ChurchofJesusChrist.org muaj duab thiab cov video ntau uas pab tau [nej tsev neeg] xav txog tej lub ntsiab los yog tej xwm txheej” (Teaching in the Savior’s Way, 22).

Kev ua koob tsheej thaum Yexus nkag los hauv nroog

Kev Ua Koob Tsheej Nkag Los hauv Nroog, los ntawm Walter Rane