txiv neej khawm nws tus tub

Tus Tub Ua Txhaum, los ntawm Liz Lemon Swindle

Tsib Hlis Ntuj 1–7

Lukas 12–17; Yauhas 11

“Nej Cia Li nrog Kuv Zoo Siab, Rau Qhov Kuv Twb Mus Nrhiav Tau Kuv tus Yaj uas Ploj Lawm”

Thaum koj nyeem Lukas 12–17 thiab Yauhas 11, thov Vajtswv seb Leej Txiv Saum Ntuj Ceeb Tsheej xav kom koj paub thiab ua dab tsi. Koj txoj kev kawm tej tshooj no yuav qhib koj lub siab rau tej zaj uas muaj lub ntsiab rau koj.

Sau Ntawv txog Koj tej Kev Tshoov Siab

Ntau zaus, 99 feem 100 los yeej suav tias yog ib yam zoo heev—tiam sis tsis yog li ntawd thaum peb suav Vajtswv cov me nyuam uas Nws hlub (saib Lus Qhuab Qhia thiab Kev Khi Lus 18:10). Yog li ntawd, tsim nyog uas peb mus txhua qhov txhia chaw nrhiav ib tug neeg “kom tau” (Lukas 15:4), ib yam li tus Cawm Seej qhia nyob hauv zaj lus piv txwv txog tus yaj uas ploj lawm. Ces peb yuav zoo siab kawg, vim “yog ib tug neeg txhaum tso nws tej kev txhaum tseg lawm, cov tim tswv ceeb tsheej yuav zoo siab rau tus ntawd heev dua li zoo siab rau cuaj caum cuaj tug uas lawv khav hais tias, lawv yog neeg ncaj ncees” (Lukas 15:7). Yog koj xav tias qhov no tsis ncaj, ces yuav pab koj thaum koj nco qab tias, yeej tsis muaj ib tug neeg uas “yog neeg ncaj ncees.” Peb txhua tus xav kom ib tug neeg cawm peb dim. Thiab peb txhua tus yeej muaj peev xwm koom tes cawm lwm tus dim, thiab muaj kev zoo siab kawg rau txhua tus uas tau txais kev cawm seej (saib Lus Qhuab Qhia thiab Kev Khi Lus 18:15–16).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lukas 12; 14–16

Kuv tau koob hmoov thaum kuv cia siab rau tej yam uas nyob mus ib txhis li.

Vim li cas Vajtswv yuav hais tias ib tug neeg uas khwv ua hauj lwm zoo uas tau ua tej lub txhab ntau heev thiab ntim nws tej qoob loo yog “ib tug neeg ruam”? (saib Lukas 12:16–21). Nyob hauv tej tshooj hauv phau Lukas, tus Cawm Seej qhia ob peb zaj lus piv txwv uas yuav peb peb cia siab rau txoj sia nyob mus ib txhis thiab txhob xav txog lub ntiaj teb no xwb. Twb sau txog ob peb zaj lus piv txwv ntawm no. Koj xav tias txhua zaj no muaj lub ntsiab dab tsi? Koj xav tias tus Tswv qhia dab tsi rau koj?

• Tus neeg nplua nuj uas tsis muaj tswv yim (Lukas 12:13–21)

• Rooj mov loj (Lukas 14:12–24)

• Tus tub ua txhaum (Lukas 15:11–32)

• Tus neeg saib xyuas uas coj tsis ncaj (Lukas 16:1–12)

• Tus neeg nplua nuj thiab Laxalaus (Lukas 16:19–31)

Kuj saib Mathais 6:19–34; 2 Nifais 9:30; Lus Qhuab Qhia thiab Kev Khi Lus 25:10.

Lukas 15

Leej Txiv Saum Ntuj Ceeb Tsheej xyiv fab thaum nrhiav tau cov neeg uas ploj lawm.

Thaum koj nyeem tej zaj lus piv txwv uas Yexus qhia hauv Lukas 15, koj kawm dab tsi txog qhov uas Leej Txiv Saum Ntuj Ceeb Tsheej xav li cas txog cov uas tau ua txhaum los yog tau “ploj” lawm? Ib tug thawj coj txog sab ntsuj plig—los sis peb txhua tus—yuav tsum xav li cas txog lawv? Xav seb cov Falixais thiab cov xib hwb qhia Vajtswv tej kev cai tau teb tej lus nug no (saib Lukas 15:1–2). Yexus tej lus teb los koj nrhiav tau hauv peb zag lus piv txwv nyob hauv Lukas 15. Thaum koj nyeem, cia li xav seb Yexus qhia dab tsi rau cov xib hwb thiab cov Falixais thaum Nws hais tej zaj lus piv txwv no.

Tej zaum koj yuav xav sau ntawv txog tej yam twg zoo ib yam thiab tej yam twg sib txawv nyob hauv tej zaj lus piv txwv no. Piv txwv hais tias, tej zaum koj yuav xav kawm tias hauv txhua zaj lus piv txwv dab tsi tau ploj lawm, vim li cas tau xiam, ua li cas nrhiav tau, thiab cov neeg xav li cas thaum nrhiav tau lawm. Yexus hais li cas rau cov uas tau “ploj”—tsis hais cov uas xav tias lawv tsis poob zoo? Nws hais li cas rau cov neeg uas nrhiav cov neeg uas ploj lawm?

Kuj saib Lus Qhuab Qhia thiab Kev Khi Lus 18:10–16; Jeffrey R. Holland, “The Other Prodigal,” Ensign, Tsib Hlis Ntuj 2002, 62–64.

tus poj niam nrhiav ib lub npib nyiaj

Npib Nyiaj uas Xiam Lawm, los ntawm James Tissot

Lukas 16:1–12

Yexus Khetos xav qhia dab tsi rau peb nyob hauv zaj lus piv txwv txog tus saib xyuas uas tsis ncaj?

Txwj Laug James E. Talmage piav ib yam uas peb kawm tau los ntawm zaj lus piv txwv no: “Rau siab ntso mus; vim hnub uas nej siv tau nej cov nyiaj txiag hauv lub ntiaj teb no yuav dhau mus sai heev. Kawm los ntawm cov uas tsis ncaj thiab cov phem; yog tias lawv ntse heev lawv thiaj li tau noj tau haus rau yav tom ntej uas lawv xav txog, ces nej haj yam yuav tsum khaws tej yam kom tau noj tau haus rau nej txoj sia nyob mus ib txhis! Yog nej tsis tau kawm kom muaj tswv yim thaum nej siv ‘tej nyiaj hauv ntiaj teb,’ ces ua cas Vajtswv yuav tso siab rau nej thaum nej muaj kev nplua nuj uas kav ib txhis? (Jesus the Christ [1916], 464). Nej kawm dab tsi ntxiv los ntawm zaj lus piv txwv no?

Lukas 17:11–19

Kev ris Vajtswv txiaj rau kuv cov koob hmoov yuav pab kuv nyob ze Vajtswv dua ntxiv.

Yog tias koj yog ib tug ntawm kaum tus neeg mob ruas, koj puas xav tias koj yuav rov qab los ua tus Cawm Seej tsaug? Tus neeg mob ruas uas rov qab los hais ua tsaug tau cov koob hmoov twg?

Tej zaum koj yuav xav nco txog tus Cawm Seej tej lus, “Koj txoj kev ntseeg tau ua rau koj huv lawm” (nqe 19). Raws li koj xav, kev ris txiaj thiab kev ntseeg sib txheeb li cas? Ob qho no pab peb li cas kom ua neeg zoo tag nrho? Qhov video “President Russell M. Nelson on the Healing Power of Gratitude” (ChurchofJesusChrist.org) yuav pab koj xav txog tej lus nug no.

Kuj saib Dale G. Renlund, “Xav txog Vajtswv txoj Kev Zoo thiab txoj Kev Tshav Ntuj,” Liahona, Tsib Hlis Ntuj 2020, 41–44.

Yauhas 11:1–46

Yexus Khetos yog tus uas tau Sawv Rov Los thiab yog txoj Sia.

Qhov txuj ci tseem ceeb thaum Yexus muab Laxalaus sawv hauv qhov tuag rov qab los yeej yog qhov pov thawj uas muaj hwj chim heev hais tias Yexus yog Vajtswv Leej Tub tiag tiag thiab Nws yog tus Mexiyas uas tau cog lus tias yuav los. Muaj tej lus twg nyob hauv Yauhas 11:1–46 uas txhawb nqa koj txoj kev ntseeg hais tias Yexus Khetos yog kev sawv rov los “thiab yog txoj sia”? Qhov uas Yexus yog kev sawv rov los “thiab yog txoj sia” muaj nqis dab tsi rau koj?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lukas 15:1–10.Nej tsev neeg puas to taub zoo li cas thaum yus ploj ib yam dab tsi—los sis zoo li cas thaum twg yus poob zoo? Yog nej sib tham txog tej lub sij hawm no ces tej zaum yuav pab nej pib sib tham txog ob zag lus piv txwv txog tus yaj uas ploj thiab lub npib nyiaj uas xiam lawm. Los sis tej zaum nej yuav xav ua si kom ib tug mus nkaum thiab lwm tus hauv nej tsev neeg yuav mus nrhiav nws. Vim li cas kev ua si li no yuav pab peb to taub ob zag lus piv txwv no?

Lukas 15:11–32.Peb yuav ua li cas kom zoo li leej txiv hauv zaj dab neeg no thaum twg muaj cov uas peb hlub uas tau poob mus thiab? Peb kawm dab tsi los ntawm tus tub hlob uas yuav pab peb ua neeg zoo li Yexus Khetos? Leej txiv nyob hauv zaj lus piv txwv no zoo li peb Leej Txiv Saum Ntuj Ceeb Tsheej li cas?

Lukas 17:11–19.Kom pab nej tsev neeg siv zaj lus txog kaum tus neeg mob ruas, tej zaum nej yuav xav caw lawv kom ib leeg sau tej tsab ntawv hais ua tsaug rau ib leeg. Nej hu nkauj zaj “Suav Nej cov Koob Hmoov Ntau” (Cov Nkauj Qhuas Vajtswv, zaj 112) ua ke thiab suav cov koob hmoov uas nej tsev neeg tau txais lawm.

Yauhas 11:1–46.Nej tsev neeg saib tau qhov video “Lazarus Is Raised from the Dead” (ChurchofJesusChrist.org) thiab hais lus tim khawv txog Yexus Khetos.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Tus Tswv Yug Yaj Muaj lub Siab Hlub,” Cov Nkauj Qhuas Vajtswv, zaj 221.

Kev Qhia Zoo Dua Ntxiv

Siv dab neeg thiab tej zaj lus piv txwv kom qhia txog tej ntsiab cai ntawm txoj moo zoo. Tus Cawm Seej tau siv dab neeg thiab zaj lus piv txwv kom qhia txog txoj moo zoo tej ntsiab cai. Cia li xav txog tej zaj lus piv txwv thiab dab neeg los ntawm nej lub neej uas yuav ua rau nej tsev neeg to taub zoo txog ib lub ntsiab cai ntawm txoj moo zoo (saib Teaching in the Savior’s Way, 22).

txiv neej txhos caug ua Yexus tsaug

Cuaj Leej Dua Twg Tas Lawm, los ntawm Liz Lemon Swindle