Rooj Mov Kawg

Nco Ntsoov Kuv, los ntawm Walter Rane

Tsib Hlis Ntuj 29–Rau Hli Ntuj 4

Mathais 26; Malakaus 14; Yauhas 13

“Nco Ntsoov Kuv”

Thaum koj nyeem txog tej xwm txheej uas tau piav txog nyob hauv Mathais 26; Malakaus 14; thiab Yauhas 13, tsom ntsoov rau tej kev tshoov siab uas koj txais, qhov tseem ceeb yog tej yam uas pab txhawb nqa koj txoj kev ntseeg Yexus Khetos thiab koj txoj kev rau siab coj raws li Nws.

Sau Ntawv txog Koj tej Kev Tshoov Siab

Hnub ua ntej Nws tuag, Yexus tau muab ib yam rau Nws cov thwj tim kom lawv nco ntsoov Nws. Nws “txawm muab ib lub ncuav los thiab ua Vajtswv tsaug, nws muab lub ncuav ntawd ntais cev rau cov thwj tim thiab hais tias, Lub ncuav no yog kuv lub cev, nej cia li txais mus noj. Tom qab ntawd Yexus muab ib khob cawv txiv hmab los, thiab ua Vajtswv tsaug, nws muab khob cawv txiv hmab ntawd cev rau lawv thiab hais tias, Nej cia li haus kom tag nrho; vim no yog kuv cov ntshav” (Mathais 26:26–28).

Twb muaj li no 2,000 xyoos tas los, nyob hauv ib qhov chaw uas peb feem coob yuav tsis pom ib zaug li, es Nws hais ib yam lus uas peb feem coob tsis to taub. Tiam sis, txhua Hnub Caiv nyob hauv peb qhov chaw sib ntsib, cov uas tuav lub pov thawj hwj, cov uas tau kev tso cai ua tej yam los ntawm Yexus Khetos lub npe, lawv ua qhov uas Nws tau ua dhau los. Lawv foom koob hmoov rau cov mov mog thiab cov dej thiab muab rau peb txhua tus, uas yog Nws cov thwj tim. Yeej yog ib yam yooj yim—puas muaj ib yam dab tsi uas yooj yim tshaj kev noj mov thiab haus dej? Tiam sis cov mov mog thiab cov dej ntawd yeej dawb ceev heev vim tej no pab peb nco txog Nws. Qhov uas peb ua li no qhia tias “Kuv yeej yuav nco ntsoov Nws”—tsis yog hais tias, “Kuv yuav nco txog tej yam kuv nyeem txog Nws tej lus qhia thiab lub neej” xwb. Tiam sis, peb hais tias, “Kuv yeej yuav nco ntsoov qhov uas Nws tau ua kom pab kuv.” “Kuv yeej yuav nco ntsoov tias Nws tau cawm kuv dim thaum kuv qw nrov kom Nws pab kuv.” Thiab “Kuv yeej yuav nco txog Nws txoj kev cog lus rau kuv thiab kuv txoj kev cog lus rau Nws—txoj kev khi lus uas wb tau khi lawm.”

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 26:6–13; Malakaus 14:3–9

“Tus poj niam no … muab roj tsw qab hliv rau kuv lub cev, twb yog nws tu kuv lub cev tseg rau hnub uas faus kuv.”

Thaum tus poj niam hauv tej nqe vaj lug kub no tau txo hwj chim teev tiam tus Tswv, nws qhia tias nws paub Yexus yog leej twg thiab Yexus tab tom yuav ua dab tsi (saib Mathais 26:12). Koj xav tias yog vim li cas tej yam nws ua muaj nqis rau tus Cawm Seej heev? (saib nqe 13). Koj xav li cas txog tus poj niam no thiab nws txoj kev ntseeg? Cia li xav seb koj yuav ua li cas kom coj raws li nws tus yam ntxwv.

Kuj saib Yauhas 12:1–8.

Mathais 26:20–22; Malakaus 14:17–19

“Tus Tswv, puas yog kuv?”

Koj kawm dab tsi txog cov thwj tim thaum lawv nug tus Tswv li no nyob hauv tej nqe no? Koj xav tias yog vim li cas lawv nug li ntawd? Xav seb koj yuav nug tus Tswv li cas, “Puas yog kuv?”

Kuj saib Dieter F. Uchtdorf, “Lord, Is It I?,” Liahona, Kaum Ib Hlis Ntuj 2014, 56–59.

Mathais 26:26–29; Malakaus 14:22–25

Kev txais lub cim nco txog yog ib lub cib fim kom nco txog tus Cawm Seej.

Thaum tus Cawm Seej tau qhia lub cim nco txog rau Nws cov thwj tim, koj xav seb lawv tau xav li cas hauv lawv lub siab? Cia li xav txog qhov no thaum kom nyeem nyob hauv Mathais 26:26–29 thiab Malakaus 14:22–25. Koj xav seb Yexus tau xaiv qhov no kom peb thiaj li nco txog Nws? Tej zaum koj yuav xav txog tej lub sij hawm thaum koj tau txais lub cim nco txog. Puas muaj ib yam dab tsi uas koj ua tau kom lub sij hawm ntawd dawb ceev thiab muaj nqis tshaj?

Tom qab koj nyeem thiab xav txog tej nqe no, tej zaum koj yuav xav sau ntawv txog tej yam uas koj tau txais kev tshoov siab kom koj nco txog tus Cawm Seej. Tej zaum koj yuav xav rov qab kawm txog tej yam no lwm zaus thaum koj txais lub cim nco txog. Tej zaum koj yuav xav rov qab kawm tej no lwm lub sij hawm thiab, kom “nco ntsoov Nws” (Maulaunais 4:3).

Kuj saib Lukas 22:7–39; 3 Nifais 18:1–13; Lus Qhuab Qhia thiab Kev Khi Lus 20:76–79; Phau Qhia txog Vaj Lug Kub, “Cim Nco Txog,” topics.ChurchofJesusChrist.org; “Always Remember Him” (video), ChurchofJesusChrist.org.

Yauhas 13:1–17

Tus Cawm Seej yog tus uas coj yam ntxwv rau peb xyaum thaum Nws txo hwj chim pab lwm tus.

Nyob hauv Yexus lub caij nyoog, kev ntxuav lwm tus txhais ko taw yeej yog ib txoj hauj lwm rau cov tub qhe ua, tsis yog cov thawj coj. Tiam sis Yexus tau xav kom nws cov thwj tim xav txawv txog txoj kev coj lwm tus thiab txoj kev pab lwm tus. Koj kawm dab tsi los ntawm tus Cawm Seej tej lus thiab tej yam Nws ua nyob hauv Yauhas 13:1–17? Nyob hauv koj txoj kab lig kev cai, kev ntxuav lwm tus txhais ko taw ntshe tsis yog ib txoj kev zoo kom pab lwm tus. Tiam sis xav seb koj yuav ua li cas kom coj raws li tus Cawm Seej tus yam ntxwv txog kev txo hwj chim pab lwm tus.

Tej zaum koj yuav xav pom tej yam uas Yexus paub thiab xav thau lub sij hawm dawb ceev nrog Nws cov Thwj Tim (saib nqe 1 and 3). Tej lub tswv yim no pab koj li cas kom to taub txog tus Cawm Seej?

Kuj saib Lukas 22:24–27.

Yauhas 13:34–35

Qhov uas kuv hlub lwm tus yog ib lub cim uas kuv yog ib tug thwj tim tseeb ntawm Yexus Khetos.

Ua ntej no, Yexus tau hais ib lo lus txib kom “hlub nej tej kwv tij zej zog ib yam li nej hlub nej lub cev” (Mathais 22:39). Tam sim no Nws tau muab “ib txoj kev cai tshiab.” Koj xav li cas txog lub ntsiab ntawm kev hlub lwm tus ib yam li Yexus hlub koj? (saib Yauhas 13:34).

Tej zaum koj yuav xav paub seb lwm tus neeg ho paub li cas tias koj yog Yexus Khetos ib tug thwj tim. Koj yuav ua li cas kom lub hauv paus ntawm koj txoj kev ntseeg Khetos yog kev hlub lwm tus?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 26:26–29; Malakaus 14:22–25.Nej tsev neeg xav li cas txhua lub lim tiam thaum nej txais lub cim nco txog? Tom qab nej nyeem txog thawj zaug tau txais lub cim nco txog tej zaum nej yuav xav sib tham txog qhov uas vim li cas lub cim nco txog tseem ceeb heev thiab yuav ua li cas kom lub sij hawm ntawd muaj nqis heev. Xav seb nej puas muab daim duab Kev Muab lub Cim Nco Txog (Phau Duab txog Txoj Moo Zoo, naj npawb 108) thiab qhia tej lub tswv yim txog tej yam nej ua tau ua ntej, tom qab, thiab thaum nej txais lub cim nco txog.

poj niam txais lub cim nco txog

Lub cim nco txog pab peb nco txog Yexus Khetos.

Mathais 26:30.Xav seb neb puas hu ib zaj nkauj qhuas Vajtswv, ib yam li Yexus thiab Nws cov Thwj Tim tau ua—tej zaum yog ib zaj nkauj qhuas Vajtswv ua ntej txais lub cim nco txog. Qhov uas Yexus thiab Nws cov Thwj Tim tau hu ib zaj nkauj qhuas Vajtswv thaum ntawd tau pab lawv li cas? Cov nkauj qhuas Vajtswv pab peb li cas?

Yauhas 13:1–17.Tej zaum nej yuav xav muab daim duab hauv qhov kawg ntawm zaj no rau nej tsev neeg saib thaum nej nyeem tej nqe no. Tus Cawm Seej tau qhia tej yam tseeb twg los ntawm tej yam Nws tau ua? Tej yam twg hauv daim duab no yuav pab peb li cas kom to taub tej yam tseeb no? Tej zaum nej tsev neeg yuav xav qhia tias qhov uas lawv tau ua raws li tej lus tseeb no ua rau lawv txais tau kev zoo siab heev (saib Yauhas 13:17).

Yauhas 13:34–35.Tom qab nej nyeem tej nqe no, tej zaum nej yuav xav sib tham ua kev txog qhov uas vim li cas lwm tus neeg yuav paub tias nej yog Yexus Khetos cov thwj tim. Tus Cawm Seej xav kom lwm tus xav li cas txog cov uas coj raws li Nws? Hais kom nej tsev neeg sib tham txog cov neeg uas hlub lwm tus heev neeg thiaj li paub tias lawv yog Yexus Khetos cov thwj tim tseeb. Tej zaum nej kuj yuav xav sib tham txog tej yam nej tsev neeg ua tau kom sib hlub.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Love One Another,” Children’s Songbook, 136–37.)

Kev Kawm Zoo Dua Ntxiv ntawm Yus Ib Leeg

Cia li xav txog tej yam koj kawm. Cov vaj lug kub muaj lub ntsiab ntawm sab ntsuj plig uas tej zaum peb yuav tsis kawm yog tias peb lam nyeem, zoo li peb nyeem lwm yam. Tsis txhob rawm nyeem txhua tshooj kom tas. Siv sij hawm xav xav seb koj nyeem dab tsi.

Yexus ntxuav cov thwj tim ko taw

Tus Hlob Tshaj Plaws hauv lub Nceeg Vaj, los ntawm J. Kirk Richards