Khetos thiab Philaj

Ecce Homo, los ntawm Antonio Ciseri

Rau Hli Ntuj 19–25

Mathais 27; Malakaus 15; Lukas 23; Yauhas 19

“Tiav Lawm Lauj”

Mathais 27; Malakaus 15; Lukas 23; thiab Yauhas 19 muaj tej lus piav txog lub sij hawm kawg uas tus Cawm Seej ua neej nyob hauv lub ntiaj teb. Nrhiav kev kom to taub txog Nws txoj kev hlub koj thaum koj kawm txog Nws txoj kev txi thiab txoj kev tuag.

Sau Ntawv txog Koj tej Kev Tshoov Siab

Yexus Khetos yeej coj yam ntxwv txog kev hlub thaum nws hais lus thiab ua txhua yam—yog qhov uas tus Thwj Tim Povlauj hais tias yog kev siab hlub (saib 1 Kauleethaus 13). Tsis tau muaj lwm lub sij hawm uas pom li no ntau tshaj thaum ob peb teev ntawm tus Cawm Seej lub neej hauv lub ntiaj teb no. Nws txoj kev nyob twj hwm thaum lwm tus liam Nws tsis yog qhia tias Nws “tsis chim sai” (1 Kauleethaus 13:5). Qhov uas Nws txaus siab ywj rau kev nplawm, kev thuam, thiab kev ntsia saum ntoo khaub lig—thiab tsis siv Nws lub hwj chim kom tsis txhob raug tej yam no—yeej qhia tias Nws “tiv taus ntev” thiab tiv tag nrho txhua yam (1 Kauleethaus 13:4, 7). Nws txoj kev hlub Nws niam thiab Nws txoj kev muaj siab hlub tshua cov uas muab Nws ntsia saum ntoo khaub lig—tsis hais thaum Nws raug txom nyem loj tshaj plaws—qhia tias Nws “tsis qia dub” (1 Kauleethaus 13:5). Thaum lub sij hawm kawg Nws nyob hauv lub ntiaj teb no ua ntej Nws tuag, Yexus tau ua li Nws ib txwm ua thaum Nws qhia peb. Kev sib hlub yeej yog “txoj kev hlub dawb paug ntawm Khetos” (Maulaunais 7:47).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 27; Malakaus 15; Lukas 23; Yauhas 19

Yexus Khetos txoj kev txaus siab kom raug txom nyem qhia tias Nws hlub Leej Txiv thiab hlub peb txhua tus.

Txawm yog tus Cawm Seej muaj hwj chim hu “cov tim tswv coob” los pab Nws (Mathais 26:53), Nws tau xaiv kom tiv taus tej kev hais plaub uas tsis ncaj, raug thuam phem heev, thiab raug mob uas sab kawg nkaus. Vim li cas Nws tau ua li no? Nifais tau ua tim khawv tias yog vim Nws “txoj kev hlub thiab nws txoj kev ua siab ntev rau noob neej” (1 Nifais 19:9).

Khetos kwv tus ntoo khaub lig

“Thiab muab Yexus tus ntoo khaub lig rau Yexus kwv, … mus txog ntawm … Khaulakhauthas” (Yauhas 19:17).

Tej zaum koj yuav xav pib kawm txog tus Cawm Seej lub sij hawm kawg hauv lub ntiaj teb no thaum koj nyeem 1 Nifais 19:9. Nyob hauv Mathais 27; Malakaus 15; Lukas 23; thiab Yauhas 19 koj puas nrhiav tau txhua yam uas Nifais hais tias Yexus yuav raug?

• “[Lawv] txiav txim hais tias nws tsis muaj nuj nqis”

• “Lawv … muab nws nplawm”

• “Lawv muab nws ntaus”

• “Lawv nto qaub ncaug rau nws”

Tej nqe twg pab koj paub txog tus Cawm Seej “txoj kev hlub” rau koj? Koj xav li cas ntxiv thaum koj nyeem tej zaj lus no? Xav seb koj puas sau ntawv los sis qhia rau lwm tus.

Kuj saib “Jesus Is Condemned before Pilate” thiab “Jesus Is Scourged and Crucified” (ob daim video), ChurchofJesusChrist.org.

Mathais 27:27–49, 54; Malakaus 15:16–32; Lukas 23:11, 35–39; Yauhas 19:1–5

Kev thuam yeej hloov tsis taus qhov tseeb.

Yexus raug luag thaum thaum Nws ua Nws txoj hauj lwm qhuab qhia, tiam sis thaum Nws raug nplawm thiab raug ntsia saum ntoo khaub lig ntshe luag thuam Nws ntau heev. Tiam sis kev thaum li no yeej hloov tsis taus qhov tseeb; Yexus yog Vajtswv Leej Tub. Thaum koj nyeem txog qhov uas luag thuam Yexus, cia li xav txog qhov uas tib neeg thuam thiab tawm tsam Nws txoj hauj lwm niaj hnub no. Koj kawm dab tsi txog kev tiv taus kev tsim txom? Koj xav li cas txog tus tub rog tej lus nyob hauv Mathais 27:54?

Mathais 27:46; Malakaus 15:34

Yexus raug txom nyem nyob Nws ib leeg kuv thiaj li tsis tas raug ib yam.

Thaum lub sij hawm nyuaj siab heev nyob saum ntoo khaub lig, Yexus, tus uas yeej ib txwm tso siab rau Nws Leej Txiv Saum Ntuj Ceeb Tsheej, xav tias Leej Txiv tau tso Nws tseg. Thaum koj nyeem txog qhov no tej zaum koj yuav xav txog tej lub sij hawm thaum koj nyob deb ntawm Vajtswv. Tej zaum koj yuav xav txog qhov uas tus Cawm Seej theej koj lub txhoj saum tus ntoo khaub lig yuav pab koj tsis nyob deb npaum li ntawd ntxiv. Ib yam li Txwj Laug Jeffrey R. Holland ua tim khawv tias, “Vim Yexus tau taug ib txoj kev ntev heev nyob Nws ib leeg xwb, peb tsis tas ua li ntawd. … Nyob pem roob Khaulakhauthas Nws tshaj tawm qhov tseeb tias peb yeej yuav tsis raug tso tseg los yog tsis muaj leej twg pab peb, txawm yog tej lub sij hawm peb yuav xav tias zoo li ntawd” (“None Were with Him,” Liahona, Tsib Hlis Ntuj 2009, 88). Xav seb tus Cawm Seej yuav pab li cas kom koj tsis txhob kho siab thaum koj nyeem Txwj Laug Holland zaj lus ntxiv.

Lukas 23:34

Tus Cawm Seej coj yam ntxwv txog kev zam txim rau peb xyaum.

Koj xav li cas thaum koj nyeem tus Cawm Seej tej lus nyob hauv Lukas 23:34? (saib tej lub tswv yim uas muaj nyob hauv Joseph Smith Kev Txhais nyob hauv lub cim nram qab c). Hais txog tus Cawm Seej tej lus, Thawj Tswj Hwm Henry B. Eyring qhia tias: “peb yuav tsum zam txim rau lwm tus thiab tsis txhob ntxub cov neeg uas ua rau peb tu siab. Tus Cawm Seej tau coj yam ntxwv rau peb xyaum thaum Nws nyob saum tus ntoo khaub lig. … Peb tsis paub tias cov uas ua rau peb tu siab muaj lub siab zoo li cas” (“That We May Be One,” Ensign, Tsib Hlis Ntuj 1998, 68). Nqe no yuav pab koj li cas yog tias nyuaj rau koj zam txim pub ib tug neeg?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 27; Malakaus 15; Lukas 23; Yauhas 19.Xwv kom pab nej tsev neeg kawm txog tej xwm txheej uas nyob hauv tej tshooj no, tej zaum nej yuav xav qhia lawv txog “Tshooj 52: The Trials of Jesus” thiab “Tshooj 53: Jesus Is Crucified” (nyob hauv New Testament Stories, 133–38, los sis cov video nyob ntawm ChurchofJesusChrist.org). Los sis nej saib tau cov video txog tej xwm txheej no ua ke: “Jesus Is Condemned before Pilate” thiab “Jesus Is Scourged and Crucified” (ChurchofJesusChrist.org). Tej zaum nej yuav xav caw cov me nyuam rov qab hais tej dab neeg no. Nej tsev neeg qhia tau tias nej xav li cas txog tus Cawm Seej vim rau qhov Nws tau raug txom nyem kom theej peb.

Mathais 27:11–26; Malakaus 15:1–15; Lukas 23:12–25; Yauhas 19:1–16.Vim li cas Philaj tau xa Yexus raug ntsia saum ntoo khaub lig, txawm yog nws paub tias Yexus tsis muaj txim hlo li los yog? Peb kawm dab tsi los ntawm Philaj txog qhov uas peb yuav tsum ua raws li qhov yog? Tej zaum yuav pab nej tsev neeg yog nej ua yeeb yam txog tej lub sij hawm thaum nej yuav tsum ua qhov yog.

Mathais 27:46; Lukas 23:34, 43, 46; Yauhas 19:26–28, 30.Tej zaum nej yuav xav hais kom txhua tus hauv nej tsev neeg nyeem ib kab lus uas tus Cawm Seej tau hais thaum Nws raug ntsia saum ntoo khaub lig, raws li muaj hauv tej nqe no. Thov kom lawv qhia tias lawv kawm dab tsi los ntawm tej lus no txog tus Cawm Seej thiab Nws ntiag tug hauj lwm.

Malakaus 15:39.Nej zaj lus tim khawv tias Yexus yog “Vajtswv Leej Tub” puas muaj zog ntxiv thaum nej nyeem txog Kev Muab Yexus Ntsia Saum Ntoo Khaub Lig?

Yauhas 19:25–27.Peb kawm dab tsi los ntawm tej nqe no txog qhov uas peb yuav ua li cas kom hlub thiab txhawb nqa peb tsev neeg?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Saum Ntoo Khaub Lig Nyob Pem lub Roob,” Cov Nkauj Qhuas Vajtswv, zaj 81.

Kev Qhia Zoo Dua Ntxiv

Coj yam ntxwv raws li tus Cawm Seej lub neej. “Yog ib qho zoo thaum peb kawm raws li tus Cawm Seej qhia—tej txheej txheem uas Nws siv thiab tej yam uas Nws tau hais. Tiam sis tus Cawm Seej lub hwj chim qhia thiab txhawb nqa lwm tus twb los ntawm Nws txoj kev ua neej thiab qhov uas Nws yog ib tug neeg zoo li cas. Yog koj rau siab sim ua neej ib yam li Yexus Khetos, ces koj haj yam yuav txawj qhia zoo li Nws” (Teaching in the Savior’s Way, 13).

Khetos raug ntsia saum ntoo khaub lig

Khetos Raug Ntsia Saum Ntoo Khaub Lig, los ntawm Carl Heinrich Bloch