Yexus hais lus rau Petus nyob ntawm ntug dej hiav txwv

Yug Kuv Pab Yaj, los ntawm Kamille Corry

Rau Hli Ntuj 26–Xya Hli Ntuj 2

Mathais 28; Malakaus 16; Lukas 24; Yauhas 20–21

“Nws Twb Sawv Lawm”

Thov Vajtswv thaum koj nyeem Mathais 28; Malakaus 16; Lukas 24; thiab Yauhas 20–21, es xav txog kev xyiv fab uas koj muaj vim Yexus Khetos tau Sawv Rov Los. Leej twg yuav tau koob hmoov thaum lawv mloog koj zaj lus tim khawv txog qhov no?

Sau Ntawv txog Koj tej Kev Tshoov Siab

Tej zaum neeg coob tau xav tias thaum Yexus los ntawm Naxales tau tuag ces yeej yog ib tug neeg tas sim neej xwb. Tus no puas yog tus txiv neej uas tsa Laxalus sawv hauv qhov tuag rov qab los? Nws puas pheej dim cov Falixais thaum lawv hais tias lawv yuav ua phem rau Nws? Nws twb qhia tias Nws muaj hwj chim kho cov dig muag, cov neeg mob ruas, thiab cov uas tuag tes tuag taw. Cov cua thiab cov hiav txwv tau mloog Nws lus. Tiam sis Nws raug ntsia saum ntoo khaub lig, thiab hais tias, “Tiav lawm lauj” (Yauhas 19:30). Ntshe ib co neeg xav tsis thoob thaum luag hais lus thuam hais tias “Nws cawm tau lwm tus, tiam sis nws cawm tsis tau nws [tus khee]” (Mathais 27:42). Tiam sis peb paub tias Yexus txoj kev tuag yeej tsis yog qhov kawg. Peb paub tias lub ntxa nyob twj ywm rau ib chim xwb thiab Yexus Khetos txoj hauj lwm cawm seej yeej pib xwb. Hnub no nws tsis nyob ntawm “cov tuag” tiam sis nws nrog cov uas muaj sia nyob (Lukas 24:5). Nws tej lus qhia yeej yuav nrov ncha mus, vim Nws cov thwj tim yuav qhia txoj moo zoo nyob hauv txhua lub teb chaws, ntseeg Nws txoj kev cog lus tias Nws yuav “nrog nraim [lawv] mus txog hnub uas lub ntiaj teb no kawg.” (Mathais 28:19–20).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 28; Malakaus 16; Lukas 24; Yauhas 20

Yexus Khetos sawv rov los.

Nyob hauv tej nqe no, koj yuav nyeem txog ib qho xwm txheej tseem ceeb tshaj plaws hauv tib neeg zaj liv xwm: Yexus Khetos txoj Kev Sawv Rov Los. Thaum koj nyeem, cia li xav tias cov neeg uas pom Nws txoj Kev Sawv Rov Los xav li cas. Koj kawm dab tsi los ntawm lawv tej zaj lus tim khawv?

Koj xav li cas thaum koj nyeem txog tus Cawm Seej txoj Kev Sawv Rov Los? Xav seb qhov no tau hloov koj lub neej li cas, koj tej kev txheeb ze, koj txoj kev ntseeg Khetos, thiab koj txoj kev ntseeg lwm yam tseeb ntawm txoj moo zoo.

Kuj saib Phau Qhia txog Vaj Lug Kub, “Sawv Rov Los.”

Lukas 24:13–35

Kuv thov tau tus Cawm Seej kom “nyob nrog nraim [kuv].”

Thaum koj nyeem txog ob tug thwj tim uas tau ntsib tus Cawm Seej uas sawv rov los, cia li nrhiav tej yam ntxwv txog koj txoj kev coj raws li Yexus Khetos. Koj yuav ua li cas kom taug kev nrog Nws mus thiab caw Nws los nyob ntev zog me ntsis? (Lukas 24:29). Koj ua li cas thiaj li paub tias Nws nrog nraim koj nyob hauv lub neej no? Tus Vaj Ntsuj Plig Dawb Huv tau ua li cas kom ua tim khawv txog qhov uas Yexus Khetos yog ib tug Vajtswv.

Kuj saib “Nyob Nrog Nraim Kuv; Twb Tsaus Ntuj Lawm,” “Nyob Nrog Nraim Kuv!,” Cov Nkauj Qhuas Vajtswv, zaj 70–71.

Lukas 24:36–43; Yauhas 20

Kev sawv rov los yog qhov uas tus ntsuj plig rov qab los nyob nrog nraim lub cev.

Tej zaj lus txog Yexus Khetos txoj Kev Sawv Rov Los yuav pab koj to taub tias kev sawv rov los yog dab tsi. For example, what truths do you find nyob hauv Lukas 24:36–43 thiab Yauhas 20 txog lub cev uas sawv rov los lawm? Koj kawm tau lwm nqe vaj lug kub txog kev sawv rov los, xws li 1 Kauleethaus 15:35–44; Filipis 3:20–21; 3 Nifais 11:13–15; Lus Qhuab Qhia thiab Kev Khi Lus 88:27–31; 110:2–3; 130:1, 22.

Yauhas 20:19–29

“Tus uas tsis tau pom kuv tiam sis nws ntseeg, tus ntawd tau koob hmoov.”

Ib txhia neeg xav zoo li Thaumas, uas hais tias, “Yog kuv tsis pom … , mas kuv yeej tsis ntseeg li” (Yauhas 20:25). Koj xav li cas, vim li cas kev ntseeg thaum yus tsis pom yog ib txoj koob hmoov? (saib Yauhas 20:29). Xav seb koj tau koob hmoov li cas vim koj ntseeg tej yam uas koj tsis pom. Muaj dab tsi uas txhawb nqa koj txoj kev ntseeg tus Cawm Seej thaum koj tsis pom Nws? Koj yuav ua li cas kom txhawb koj txoj kev ntseeg “tej yam uas peb tsis pom tiam sis muaj tseeb”? (saib Amas 32:16–21; Ethaws 12:6). Xav seb koj puas sau ntawv hauv ib phau ceev xwm txheej txog tej lub sij hawm uas pab koj ntseeg Yexus Khetos, los sis muab faib rau lwm tus.

Yauhas 21:1–17

Tus Cawm Seej caw kuv yug Nws pab yaj.

Tej zaum koj yuav xav muab tus Cawm Seej tej kev sib tham nrog Nws cov thwj tim nyob hauv Yauhas 21 piv rau thawj zaug uas Nws txib lawv tso lawv tej vas rau hauv dej, raws li sau hauv Lukas 5:1–11. Muaj tej yam twg uas zoo ib yam thiab tej yam twg sib txawv? Koj kawm dab tsi txog kev ua thwj tim?

Xav seb koj yuav ua li cas kom siv tus Cawm Seej tej lus hais rau Petus nyob hauv Yauhas 21:15–17. Puas muaj dab tsi uas tab kaum koj txoj kev mus txhawb pab tus Tswv pab yaj? Koj yuav hais li cas yog tias tus Tswv nug koj tias, “Koj puas hlub kuv?” Xav seb koj yuav ua li cas kom qhia tias koj hlub tus Tswv.

Kuj saib 1 Petus 5:2–4, 8; Jeffrey R. Holland, “The First Great Commandment,” Liahona, Kaum Ib Hlis Ntuj 2012, 83–85.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lukas 24:5–6.Thawj Tswj Hwm Thomas S. Monson tau hais txog Lukas 24:5–6 hais tias, “Tsis muaj tej lus twg uas muaj nqis tshaj tej lus no” (“He Is Risen!,” Liahona, Tsib Hlis Ntuj 2010, 89). Tej lus no muaj nqis dab tsi rau nej tsev neeg?

Mathais 28; Malakaus 16; Lukas 24; Yauhas 20–21.Thaum nej tsev neeg nyeem tej tshooj no, xav txog cov neeg uas nrog Yexus thaum hauv txhua zaj. Ua piv txwv tias, nej xav li cas txog cov neeg uas tau mus xyuas tus Cawm Seej lub ntxa? Nej kawm dab tsi los ntawm cov Thwj Tim tej lus los sis tej yam lawv ua los yog los ntawm ob tug thwj tim uas taug kev mus rau Ema-us?

Xav seb nej puas xav hu nkauj ua ke “Did Jesus Really Live Again?” (Children’s Songbook, 64). Sib tham txog ib tug neeg uas nej tsev neeg paub tias tau tuag lawm, thiab sib tham txog qhov uas tej lus tseeb hauv zaj nkauj no nplij peb lub siab.

Yexus nrog ob tug txiv neej mus ntawm ib txoj kev

Txoj Kev Mus rau Ema-us, los ntawm Wendy Keller

Mathais 28:16–20; Malakaus 16:14–20; Lukas 24:44–53.Nyob hauv tej nqe no, Yexus hais kom Nws cov Thwj Tim ua dab tsi? Peb yuav ua li cas kom ua txoj hauj lwm no? Nej tsev neeg qhia tau txog tej lub sij hawm thaum lawv paub tias “tus Tswv nrog lawv ua hauj lwm” kom muaj raws li Nws tej hom phiaj (Malakaus 16:20).

Yauhas 21:15–17.Xav seb nej puas nyeem tej nqe no thaum nej noj ua ke. Tej zaum qhov no yuav pab nej to taub tus Cawm Seej tej lus hais kom “yug kuv pab yaj.” Raws li Yexus tau qhia txog cov yaj nyob hauv Phau Tshiab (saib, ua piv txwv, Mathais 9:35–36; 10:5–6; 25:31–46; Lukas 15:4–7; Yauhas 10:1–16), vim li cas kev yug Nws pab yaj yog ib txoj kev zoo kom piav txog kev pab Vajtswv cov me nyuam? Qhov piv txwv no qhia dab tsi rau peb txog qhov uas Leej Txiv Saum Ntuj Ceeb Tsheej thiab Yexus xav li cas txog peb?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Did Jesus Really Live Again?,” Children’s Songbook, 64.

Kev Kawm Zoo Dua Ntxiv ntawm Yus Ib Leeg

Siv cov nkauj caw tus Ntsuj Plig los kawm cov lus qhuab qhia. Kev mloog los sis hu nkauj tej zaj nkauj qhuas Vajtswv xws li “Nws Sawv Rov Los!” (Cov Nkauj Qhuas Vajtswv, zaj 86) yuav pab tus Ntsuj Plig los pab koj kawm txog tus Cawm Seej txoj Kev Sawv Rov Los.

Tus poj niam pom Khetos uas sawv rov los lawm

Tus Khetos uas Sawv Rov Los, los ntawm Walter Rane