neeg coob nyob ntawm ntug dej thiab ua kev cai raus dej

Hnub Peetekos, los ntawm Sidney King

Xya Hli Ntuj 3–9

Tes Hauj Lwm 1–5

“Nej Yuav Ua Tim Khawv Qhia Kuv Zaj”

Thaum koj kawm Tes Hauj Lwm 1–5, tus Vaj Ntsuj Plig Dawb Huv yuav tshoov koj lub siab kom pab koj nrhiav qhov tseeb uas muaj nqis rau koj lub neej. Cia li sau ntawv txog tej nqe uas tshoov koj lub siab, thiab nrhiav cib fim kom qhia tej yam uas koj kawm.

Sau Ntawv txog Koj tej Kev Tshoov Siab

Koj puas tau xav seb Petus xav li cas thaum nws nrog lwm tus Thwj Tim “tseem tab tom ntsia ntsoov Yexus mus saum ntuj” rau Nws Leej Txiv? (Tes Hauj Lwm 1:10). Lub Koom Txoos uas Vajtswv Leej Tub tau tsa los tam sim no Petus yuav tsum saib xyuas. Txoj hauj lwm kom “qhia txhua haiv neeg” yeej nyob ntawm nws lawm (Mathais 28:19). Tiam sis yog nws xav tias nws zoo tsis txaus los sis nws ntshai, peb tsis pom li ntawd nyob hauv phau Tes Hauj Lwm. Tiam sis peb pom tias muaj neeg uas tsis ntshai hais lus tim khawv thiab hloov siab los ntseeg, tej txuj ci tseem ceeb, kev tshwm sim ntawm sab ntsuj plig, thiab lub Koom Txoos tau loj tuaj. Lub Koom Txoos no tseem yog tus Cawm Seej lub, Nws tseem yog tus uas coj. Muaj tseeb tiag, tej zaum peb hu phau cov Thwj Tim Tes Hauj Lwm ua Yexus Khetos Tes Hauj Lwm uas ua dhau los ntawm Nws cov Thwj Tim. Tus Ntsuj Plig tau coj Petus mus, nws thiaj li tsis yog tus neeg nuv ntse uas tsis tau kawm dab tsi zoo li thaum Yexus nrhiav nws nyob ntawm ntug dej Hiav Txwv Kalilais. Nws kuj tsis yog tus txiv neej uas nyuaj siab kawg vim ob peb lim tiam ua ntej nws quaj heev vim nws tau hais tias nws tsis paub Yexus ntawm Naxales.

Nyob hauv phau Tes Hauj Lwm, koj yuav nyeem tej zaj lus txog Yexus Khetos thiab Nws txoj moo zoo. Koj kuj yuav pom tias txoj moo zoo muaj hwj chim hloov tib neeg lub siab—tsis hais koj tus kheej—kom los ua cov thwj tim raws li Vajtswv pom tias lawv muaj peev xwm ua.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Tes Hauj Lwm 1:1–8, 15–26; 2:1–42; 4:1–13, 31–33

Yexus Khetos coj Nws lub Koom Txoos dhau los ntawm tus Vaj Ntsuj Plig Dawb Huv.

Phau Tes Hauj Lwm yog cov Thwj Tim tej kev ua hauj lwm kom txhim tsa Yexus Khetos lub Koom Txoos tom qab tus Cawm Seej tau Nce Mus Saum Ntuj. Txawm yog Yexus Khetos tsis nyob hauv lub ntiaj teb no lawm, Nws tau coj lub Koom Txoos dhau los ntawm kev tshwm sim ntawm tus Vaj Ntsuj Plig Dawb Huv. Cia li xav seb tus Vaj Ntsuj Plig Dawb Huv tau coj cov thawj coj tshiab ntawm Yexus Khetos lub Koom Txoos thaum koj nyeem tej zaj lus no: Tes Hauj Lwm 1:1–8, 15–26; 2:1–42; 4:1–13, 31–33.

Vim peb yog cov mej zeej ntawm Khetos lub Koom Txoos hnub no, peb txhua tus muaj kev lav ris koom tes ua Nws txoj hauj lwm cawm seej thiab kev tsa nto—ua raws li Yexus Khetos txoj moo zoo, saib xyuas cov uas xav tau, caw lwm tus los cuag Khetos, thiab pab tsev neeg koom ua ke mus ib txhis li (saib General Handbook, 1.2). Koj kawm dab tsi los ntawm cov Thwj Tim puag thaum ub no txog qhov uas koj tso siab tau rau tus Vaj Ntsuj Plig Dawb Huv kom coj koj txoj hau kev?

Kuj saib Phau Qhia txog Vaj Lug Kub, “Vaj Ntsuj Plig Dawb Huv.”

Tes Hauj Lwm 2:36–47; 3:12–21

Cov ntsiab cai thiab cov kab ke ntawm txoj moo zoo pab kuv los cuag Khetos.

Puas muaj dab tsi uas “chob [koj] lub siab” ib yam li cov neeg Yudais thaum txog hnub Peetekos? (Tes Hauj Lwm 2:37). Tej zaum koj tau ua ib yam uas koj khuv xim, los sis koj tau xav hloov koj lub neej xwb. Koj yuav tsum ua li cas thaum koj xav li no? Petus tej lus qhia rau cov Neeg Yudais nyob hauv Tes Hauj Lwm 2:38. Cia li saib qhov uas thawj cov ntsiab cai thiab cov kab ke ntawm txoj moo zoo (xws li kev ntseeg, kev hloov siab lees txim, kev cai raus dej, thiab kev txais lub txiaj ntsim Vaj Ntsuj Plig Dawb Huv—los yog Yexus Khetos cov lus qhuab qhia) tau pab cov neeg hloov siab los ntseeg no, raws li hais nyob hauv Tes Hauj Lwm 2:37–47.

Tej zaum koj twb ua kev cai raus dej lawm thiab tau txais lub txiaj ntsim Vaj Ntsuj Plig Dawb Huv, yog li ntawd koj tseem ua li cas kom ua raws li Yexus Khetos cov lus qhuab qhia? Cia li xav txog Txwj Laug Dale G. Renlund tej lus no: “Peb yuav rais los ua neeg zoo tag nrho thaum peb … muaj kev ntseeg [Khetos], hloov siab lees txim, txais lub cim nco txog kom rov qab khi lus thiab txais cov koob hmoov ntawm kev cai raus dej, thiab txais tus Vaj Ntsuj Plig Dawb Huv los ua peb tus khub txhua lub sij hawm. Thaum peb ua li no, peb rais los ua neeg zoo li Khetos ntxiv thiab nyiaj mus txog thaum kawg” (“Haiv Neeg Ntseeg Yeej Meem Sim,” Liahona, Tsib Hlis Ntuj 2015, 56).

Tes Hauj Lwm 3:19–21

Kev “tau zoo nyob kaj siab lug” thiab kev muab “ib puas tsav yam hloov dua tshiab tas huv tib si” txhais li cas?

Lub caij nyoog thaum peb “tau zoo nyob kaj siab lug” hais txog lub caij Milenias, thaum Yexus Khetos yuav rov qab los nyob hauv lub ntiaj teb. Lub sij hawm thaum muab “ib puas tsav yam hloov dua tshiab tas huv tib si” hais txog kev muab txoj moo zoo Txum Tim Rov Qab Los, uas npaj lub ntiaj teb rau lub caij Milenias.

Tes Hauj Lwm 3; 4:1–31; 5:12–42

Yexus Khetos cov thwj tim muaj hwj chim ua tej txuj ci tseem ceeb los ntawm Nws lub npe.

Tus neeg tuag cev xav kom cov uas tuaj rau lub tuam tsev pub nyiaj rau nws. Tiam sis tus Tswv cov tub qhe yeej muab ntau ntxiv rau nws. Thaum koj nyeem Tes Hauj Lwm 3; 4:1–31 thiab 5:12–42, xav seb qhov txuj ci tseem ceeb ntawd tau ua li cas rau cov neeg no:

• Tus txiv neej tuag ceg

• Petus thiab Yauhas

• Cov neeg uas pom li no nyob ntawm lub tuam tsev

• Cov pov thawj hlob thiab cov thawj coj

• Lwm tus Neeg Ntseeg

Petus kho ib tug txiv neej

Kuv Yuav Muab Yam uas Kuv Muaj rau Koj, los ntawm Walter Rane

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Tes Hauj Lwm 1:21–26.Kev nyeem Tes Hauj Lwm 1:21–26 yuav pab nej tsev neeg sib tham txog cov koob hmoov uas los ntawm qhov uas muaj cov Thwj Tim nyob hauv lub ntiaj teb niaj hnub no. Tej zaum nej tsev neeg yuav xav qhia tias lawv tau ua li cas kom paub tias Vajtswv tau hu cov thwj tim thiab cov yaj saub uas muaj niaj hnub no. Vim li cas peb yuav tsum paub li no?

Tes Hauj Lwm 2:37.Cov lus “chob lawv lub siab” txhais li cas? Thaum twg peb tau hnov ib yam zoo li no? Vim li cas peb yuav tsum hais tias, “Peb yuav ua li cas?” thaum muaj dab tsi chob peb lub siab li ntawd?

Tes Hauj Lwm 3:1–10.Tej zaum nej tsev neeg yuav nyiam ua yeeb yam txog zaj no. Los sis nej saib tau daim video “Peter and John Heal a Man Crippled Since Birth” (ChurchofJesusChrist.org). Tus txiv neej nyob ntawm lub tuam tsev tau koob hmoov li cas kom tsis zoo li nws tau xav? Peb puas tau pom Leej Txiv Saum Ntuj Ceeb Tsheej cov koob hmoov los rau peb kom tsis zoo li peb tau xav?

Tes Hauj Lwm 3:12–26; 4:1–21; 5:12–42.Nej xav li cas txog Petus thiab Yauhas txoj kev rau siab ntseeg? (kuj saib daim video “Peter Preaches and Is Arrested” nyob ntawm ChurchofJesusChrist.org). Peb yuav ua li cas kom ua siab loj hais lus tim khawv txog tus Yexus Khetos? Xav seb nej puas pab cov me nyuam yaus xyaum hais lus tim khawv.

Tes Hauj Lwm 4:31–5:4.Peb yuav ua li cas kom pab peb tsev neeg, pawg ntseeg, los sis zej zog hloov los ua neeg zoo li piav nyob hauv Tes Hauj Lwm 4:31–37? Cov lus “puav leej koom ua ib lub siab” txhais li cas? Tej lub sij hawm peb ua li cas kom muab “ib txhia khaws cia”? Vim li cas thaum peb ua li no ces zoo li peb “dag Vajtswv”? (Tes Hauj Lwm 5:2, 4). Kev ua siab tsis ncaj ua dab tsi rau peb sab ntsuj plig?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Cia tus Ntsuj Plig Dawb Huv Coj,” Cov Nkauj Qhuas Vajtswv, zaj 58.

Kev Qhia Zoo Dua Ntxiv

Xaiv ib lub ntsiab lus. Cia koj tsev neeg ib leeg zuj zus xaiv ib lub ntsiab lus los ntawm Tes Hauj Lwm 1–5 uas yuav kawm ua ke.

Cov thwj tim ncig ob tug tim tswv uas taw tes saum ntuj

Kev Nce Saum Ntuj, los ntawm Harry Anderson