“Xya Hli Ntuj 10–16. Tes Hauj Lwm 6–9: ‘Koj Xav Kom Kuv Ua Dab Tsi?,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Xya Hli Ntuj 10–16. Tes Hauj Lwm 6–9,” Los, Nrog Kuv Mus—Rau Ib Leeg thiab Tsev Neeg: 2023
Kev Hloov Siab Los Ntseeg Thaum Mus rau Damaxes, los ntawm Michelangelo Merisi da Caravaggio
Xya Hli Ntuj 10–16
Tes Hauj Lwm 6–9
“Koj Xav Kom Kuv Ua Dab Tsi?”
Pib nyeem Tes Hauj Lwm 6–9. Tej lub tswv yim nyob hauv zaj no yuav pab koj kawm txog tej ntsiab cai tseem ceeb hauv tej tshooj no, txawm yog koj yuav nrhiav tau lwm yam thaum koj kawm ntawm koj tus kheej.
Sau Ntawv txog Koj tej Kev Tshoov Siab
Yog tias muaj ib tug neeg uas tib neeg xav tias nws yuav tsis hloov siab los ntseeg, nyaj tus ntawd yog Xaulus—ib tug Falixais uas neeg paub tias nws tsim txom cov uas ntseeg Yexus Khetos. Yog li ntawd thaum tus Tswv qhia ib tug thwj tim hu ua Ananias nrhiav Xaulus thiab foom koob hmoov rau nws, ces yooj yim rau peb to taub vim li cas Ananias tsis tshua xav mus. Ananias hais tias, “Tus Tswv, muaj ntau leej qhia rau kuv hais tias tus txiv neej ntawd ua phem heev rau cov ntseeg” (Tes Hauj Lwm 9:13). Tiam sis tus Tswv paub Xaulus lub siab thiab tej yam nws muaj peev xwm ua, thiab tus Tswv yeej muaj ib txoj hauj lwm rau Xaulus ua: “Kuv twb xaiv nws los ua kuv tes hauj lwm lawm. Nws yuav mus qhia kuv zaj rau lwm Haiv Neeg, rau cov vaj ntxwv thiab rau cov Ixayees” (Tes Hauj Lwm 9:15). Yog li ntawd Ananias mloog lus, thiab thaum nws nrhiav tau tus neeg uas tau tsim txom cov ntseeg no lawm, nws hu Xaulus ua “Tij Laug Xaulus” (Tes Hauj Lwm 9:17). Yog tias Xaulus tau hloov siab tag nrho thiab Ananias tau ua siab dawb txais tos nws, ces vim li cas peb yuav saib lwm tus zoo li lawv tsis muaj peev xwm hloov—tsis hais saib peb tus kheej los yog?
Tej lub Tswv Yim Kawm Vaj Lug Kub ntawm Yus Ib Leeg
Kuv yuav tsum muaj ib lub siab uas “haum Vajtswv siab.”
Yeej yuav tsum muaj cov thwj tim ua hauj lwm hauv lub koom txoos uas loj tuaj zuj zus. Raws li hais nyob hauv phau Tes Hauj Lwm 6:1–5, Pawg Kaum Ob tug Thwj Tim nrhiav tib neeg zoo li cas uas yuav nrog lawv ua hauj lwm? Thaum koj nyeem Tes Hauj Lwm 6–8, xav seb lawv nrhiav neeg zoo li cas xws li Xatefanaus thiab Filis. Tseem muaj yam dab tsi nyob hauv Ximoos uas yuav tsum hloov, thiab peb kawm dab tsi los ntawm nws txog kev muaj ib lub siab uas kam hloov.
Puas muaj dab tsi uas koj xav tias koj yuav tsum ua kom “haum Vajtswv siab”? (Tes Hauj Lwm 8:21–22). Qhov uas koj hloov siab li no yuav ua rau koj tau cov koob hmoov twg thaum koj ua hauj lwm rau Vajtswv?
Kev tawm tsam tus Vaj Ntsuj Plig Dawb Huv yuav ua rau tib neeg xyeej tus Cawm Seej thiab Nws cov tub qhe.
Cov neeg Yudais cov thawj coj lav ris kev npaj cov neeg rau tus Mexiyas txoj kev los. Tiam sis lawv tsis tau paub tus Mexiyas thiab lawv xyeej Nws. Vim li cas muaj li no? Tej zaum Xatefanaus tej lus yuav teb qhov no: “Nej niaj zaug tawm tsam tus Vaj Ntsuj Plig Dawb Huv” (Tes Hauj Lwm 7:51). Qhov uas yus tawm tsam tus Vaj Ntsuj Plig Dawb Huv txhais li cas? Vim li cas tus uas tawm tsam tus Vaj Ntsuj Plig Dawb Huv ntshe yuav xyeej tus Cawm Seej thiab Nws cov tub qhe?
Thaum koj nyeem Tes Hauj Lwm 6–7, nrhiav lwm zaj lus uas Xatefanaus qhia rau cov Neeg Yudais. Nws ceeb toom txog tej yam twg? Koj puas xav tias koj muaj ib lub siab zoo li nws hais? Xatefanaus tej lus qhia dab tsi rau koj txog tej yam uas yuav muaj los ntawm kev tawm tsam tus Vaj Ntsuj Plig Dawb Huv? Koj yuav ua li cas kom muaj ib lub siab uas kam txais tau tus Vaj Ntsuj Plig Dawb Huv tej kev tshoov siab hauv koj lub neej?
Kuj saib “The Martyrdom of Stephen” (video), ChurchofJesusChrist.org.
Tus Vaj Ntsuj Plig Dawb Huv yuav pab kuv coj lwm tus los cuag Yexus Khetos.
Koj kawm dab tsi txog kev qhia txoj moo zoo los ntawm zaj lus nyob hauv Tes Hauj Lwm 8:26–39? Tus Vaj Ntsuj Plig Dawb Huv tau ua li cas kom pab Filis? Kev qhia txoj moo zoo rau lwm tus puas zoo li koj coj neeg mus rau ib qho chaw? (saib Tes Hauj Lwm 8:31).
Txwj Laug Ulisses Soares hais tias zaj no “yeej ua rau peb nco txog Vajtswv tej lus txib uas Nws hais rau peb txhua tus kom peb xav kawm ntawv thiab kom peb ib leeg qhia ib leeg txog Yexus Khetos txoj moo zoo. … Tej lub sij hawm peb zoo li tus neeg Ethi-aupias—peb xav tau ib tug xib hwb uas muaj siab ntseeg thiab txais kev tshoov siab; thiab tej lub sij hawm peb zoo li Filis—peb yuav tsum qhia thiab txhawb nqa lwm tus txoj kev hloov siab los ntseeg” (“Kuv Yuav Ua Li Cas To Taub?,” Liahona, Tsib Hlis Ntuj 2019, 6) Xav seb koj puas nyeem Txwj Laug Soares zaj lus thiab xav txog qhov uas tus Vaj Ntsuj Plig Dawb Huv yuav ua li cas kom pab koj kawm zoo dua thiab qhia txog txoj moo zoo ntxiv.
Thaum kuv ua raws li tus Tswv lub siab nyiam, ces kuv yuav ua ib tug cuab yeej hauv Nws txhais tes.
Zoo li Xaulus tau hloov siab los ntseeg sai sai heev, zoo li ib hnub nws muab cov Neeg Ntseeg Khetos kaw hauv lub tsev rau txim ces hnub tom qab ntawd nws qhia txog Yexus Khetos nyob hauv tej tsev teev ntuj. Thaum koj nyeem nws zaj lus, cia li xav seb yog vim li cas nws kam hloov siab tag nrho. (Kom nyeem txog Xaulus zaj lus piav txog nws txoj kev hloov siab los ntseeg, saib Tes Hauj Lwm 22:1–16 thiab 26:9–18. Cia li paub hais tias nyob hauv tej zaj no, Xaulus lub npe yog Povlauj [saib Tes Hauj Lwm 13:9].)
Xaulus txoj kev hloov siab los ntseeg yeej txawv heev—tib neeg coob mas lawv txoj kev hloov siab los ntseeg yeej ntev dua—tiam sis puas muaj dab tsi uas koj kawm tau los ntawm Xaulus txog kev hloov siab los ntseeg? Koj kawm dab tsi los ntawm txoj kev uas Ananias thiab lwm tus thwj tim xav txog Xaulus txoj kev hloov siab los ntseeg? Koj yuav ua li cas kom siv tej lus qhia no hauv koj lub neej? Tej zaum koj yuav xav thov Vajtswv, ib yam li Xaulus, hais tias “Koj xav kom kuv ua dab tsi?”
Thaum koj nyeem Tes Hauj Lwm 9:36–42, xav seb vim li cas Tanpithas yog ib tug cuab yeej hauv Vajtswv txhais tes. Koj txais kev tshoov siab twg txog nws tus yam ntxwv?
Kuj saib Dieter F. Uchtdorf, “Waiting on the Road to Damascus,” Liahona, Tsib Hlis Ntuj 2011, 70–77; “The Road to Damascus” (video), ChurchofJesusChrist.org.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Tes Hauj Lwm 6:8; 7:51–60.Muab tej zaj lus txog Xatefanaus nyob hauv Tes Hauj Lwm 6:8 thiab Tes Hauj Lwm 7:51–60 piv rau tej zaj lus txog tus Cawm Seej nyob hauv Lukas 23:1–46. Xatefanaus tau ua li cas kom coj raws li tus Cawm Seej tus yam ntxwv?
-
Tes Hauj Lwm 7:51–60.Tus Vaj Ntsuj Plig Dawb Huv tau foom koob hmoov li cas rau Xatefanaus thaum Xatefanaus raug tsim txom? Thaum twg peb tau txais dag zog los ntawm tus Vaj Ntsuj Plig Dawb Huv thaum muaj xwm txheej nyuaj heev?
-
Tes Hauj Lwm 9:5.Cov neeg thaum ub twb siv ib rab hmuv thaum lawv ntiab cov tsiaj mus. Cov tsiaj tau tuam thaum raug chob, uas ua rau rab hmuv mus tob rau hauv tus tsiaj cov tawv nqaij ntxiv. Tej lub sij hawm qhov piv txwv no puas hais txog peb? Peb yuav tsum ua li cas kom lees yuav tus Tswv cov lus qhuab ntuas?
Tanpithas Koj Cia Li Sawv, los ntawm Sandy Freckleton Gagon
-
Tes Hauj Lwm 9:32–43.Xav seb puas caw nej tsev neeg kos duab txog tej zaj lus nyob hauv Tes Hauj Lwm 9:32–43. Peb kawm dab tsi txog kev ua thwj tim los ntawm tej zaj lus no? Ib tug neeg uas “niaj hnub ua zoo” ib yam li Tanpithas, yuav ua li cas kom pab lwm tus ntseeg tus Tswv? (saib Tes Hauj Lwm 9:36; “Chapter 60: Petus Brings Tabitha Back to Life” (in Phau Tshiab cov Dab Neeg, 156–57, los sis daim video nyob hauv ChurchofJesusChrist.org).
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Kuv Yuav Mloog Koj txoj Lus,” Cov Nkauj Qhuas Vajtswv, zaj 125.
Kev Kawm Zoo Dua Ntxiv ntawm Yus Ib Leeg
Cia li ua neej raws li cov vaj lug kub qhia. Thaum koj nyeem, cia li xav seb tej dab neeg thiab tej lus qhia hauv vaj lug kub los yuav siv li cas hauv koj lub neej. Piv txwv hais tias, koj yuav muaj cib fim twg pab lwm tus, xws li Tanpithas ua nyob hauv Tes Hauj Lwm 9:36–39?
“Thaum lawv tab tom muab pob zeb ntaus Xatefanaus, Xatefanaus thov Vajtswv hais tias, Tswv Yexus, thov koj coj kuv tus ntsuj plig mus nrog koj nyob!” (Joseph Smith Kev Txhais, Tes Hauj Lwm 7:59 [nyob hauv Tes Hauj Lwm 7:59, lub cim nram qab c]).