Petus nrog Kauneli-us tham

Xya Hli Ntuj 17–23

Tes Hauj Lwm 10–15

“Vajtswv Txoj Lus Thiaj Loj Hlob thiab Nthuav Dav Zuj Zus Mus rau Txhua Qhov”

Ua tib zoo nyeem Tes Hauj Lwm 10–15, thiaj li muaj sij hawm rau tus Ntsuj Plig tshoov koj lub siab. Muaj dab tsi rau koj kawm nyob hauv tej tshooj no?

Sau Ntawv txog Koj tej Kev Tshoov Siab

Thaum Nws ua Nws txoj hauj lwm qhuab qhia hauv lub ntiaj teb, Yexus Khetos tau hais kom tib neeg hloov lawv tej kab lig kev cai thiab txoj kev ntseeg uas lawv muaj ntev tas lawm. Yeej muaj li no tom qab Nws nce mus saum ntuj lawm, thaum Nws tseem siv kev tshwm sim coj Nws lub Koom Txoos. Piv txwv hais tias, thaum Yexus ua neej Nws cov thwj tim tau qhia txoj moo zoo rau cov Neeg Yudais xwb. Tiam sis tsis ntev tom qab tus Cawm Seej tuag thiab Petus tau los ua lub Koom Txoos tus thawj coj, Yexus Khetos tau qhia rau Petus tias txog lub sij hawm rau lawv qhia txoj moo zoo rau cov neeg uas tsis yog cov Neeg Yudais. Qhov uas lawv tau qhia txoj moo zoo rau Lwm Haiv Neeg tsis ua li cas rau peb niaj hnub no, yog li ntawd peb yuav tsum kawm dab tsi los ntawm qhov no? Tej zaum peb yuav tsum kawm tias nyob hauv lub Koom Txoos puag thaum ub thiab niaj hnub no, tus Cawm Seej uas hlub peb yeej coj Nws cov thawj coj uas Nws tau xaiv lawm (saib Amaus 3:7; Lus Qhuab Qhia thiab Kev Khi Lus 1:38). Kev tshwm sim uas tsis tu tsis tseg yeej yog ib lub cim txog Yexus Khetos lub Koom Txoos tseeb. Ib yam li Petus, peb yuav tsum txaus siab lees yuav kev tshwm sim thiab ua neej raws li Vajtswv txoj lus tag nrho (Lukas 4:4), tsis hais “txhua yam uas [Nws] tau qhia los lawm, txhua yam uas Nws tab tom qhia tawm,” thiab “tej yam loj thiab tseem ceeb ntxiv” uas Nws yuav qhia tawm “hais txog Vajtswv lub Nceeg Vaj” (Tej Nqe Kev Ntseeg 1:9).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Tes Hauj Lwm 10

“Vajtswv tsis xaiv leej twg ntsej muag.”

Ntau tiam neeg, cov Neeg Yudais ntseeg tias qhov uas ib tug neeg yog “Anplaham cov xeeb ntxwv” txhais tias Vajtswv tau xaiv thiab txais tus neeg ntawd (saib Lukas 3:8). Lawv xav tias lwm tus yeej yog Lwm Haiv Neeg uas “tsis huv” thiab tsis haum Vajtswv siab. Nyob hauv Tes Hauj Lwm 10, tus Tswv tau qhia dab tsi rau Petus txog cov uas “haum Vajtswv siab”? (Tes Hauj Lwm 10:35). Muaj dab tsi hauv tshooj no uas qhia tias Kauneli-us tau haum tus Tswv lub siab? Xav seb cov lus no “Vajtswv tsis xaiv leej twg ntsej muag” txhais li cas (nqe 34; kuj saib 1 Nifais 17:35). Vim li cas koj yuav tsum paub qhov tseeb no?

Ib yam li cov Neeg Yudais uas saib tsis taus cov uas tsis yog Anplaham cov xeeb ntxwv, puas muaj tej lub sij hawm thaum koj hais lus tsis zoo los yog xav tsis zoo txog lwm tus uas tsis zoo li koj? Koj yuav ua li cas kom kov yeej txoj kev ua li no? Tej zaum koj yuav xav ua ib yam yooj yim rau ob peb hnub: Thaum twg koj nrog lwm tus sib tham, cia li xav hauv koj lub siab tias, “Tus no yog Vajtswv ib tug me nyuam.” Thaum koj ua li no, koj txoj kev xav thiab txoj kev sib tham nrog lwm tus hloov li cas?

Kuj saib 1 Xamuyees 16:7; 2 Nifais 26:13, 33; Russell M. Nelson, “Cia Vajtswv Yeej,” Liahona, Kaum Ib Hlis Ntuj 2020, 92–95; “Peter’s Revelation to Take the Gospel to the Gentiles” (video), ChurchofJesusChrist.org.

Tes Hauj Lwm 10; 11:1–18; 15

Leej Txiv Saum Ntuj Ceeb Tsheej qhia kuv ib nqe lus rau ib nqe lus los ntawm kev tshwm sim.

Thaum Petus ua yog toog pom tej yam uas hais nyob hauv Tes Hauj Lwm 10, thaum xub thawj nyuaj rau nws to taub thiab “xav tsis thoob rau tej uas nws ua yog toog pom ntawd” (nqe 17). Tiam sis tus Tswv tau qhia Petus kom to taub ntxiv thaum Petus tau thov. Thaum koj nyeem Tes Hauj Lwm 10, 11, thiab 15, saib Petus txoj kev to taub tej uas nws ua yog toog pom ntawd tau hloov. Koj puas tau thov Vajtswv kom to taub ntxiv thaum twg koj muaj lus nug?

Tes Hauj Lwm 10, 11, thiab 15 yeej muaj tej zaj lus txog thaum tus Tswv tau coj Nws cov tub qhe los ntawm kev tshwm sim. Tej zaum yuav pab koj yog koj sau ntawv txog tej yam koj kawm txog kev tshwm sim thaum koj nyeem tej tshooj no. Tus Ntsuj Plig siv tej txoj kev twg kom hais lus rau koj?

Kuj saib Phau Qhia txog Vaj Lug Kub, “Kev Tshwm Sim,” topics.ChurchofJesusChrist.org; Quentin L. Cook, “Txoj Koob Hmoov uas Yog Kev Tshwm Sim rau cov Yaj Saub uas Tsis Tu Tsis Tseg thiab Kev Tshwm Sim uas Coj Peb lub Neej,” Liahona, Tsib Hlis Ntuj 2020, 96–100; “The Jerusalem Conference” (video), ChurchofJesusChrist.org.

Tes Hauj Lwm 11:26

Kuv yog ib tug Neeg Ntseeg Khetos vim kuv ntseeg thiab ua raws li Yexus Khetos qhia.

Qhov uas peb hu ib tug neeg ua ib tug Neeg Ntseeg Khetos yog ib qho tseem ceeb? (saib Tes Hauj Lwm 11:26). Qhov uas lwm tus hais tias koj yog ib tug Neeg Ntseeg Khetos muaj nqis dab tsi rau koj? Cia li xav txog qhov uas ib lub npe tseem ceeb npaum li cas. Piv txwv hais tias, koj tsev neeg lub xeem muaj nqis dab tsi rau koj? Vim li cas lub Koom Txoos lub npe tseem ceeb rau koj? (saib Lus Qhuab Qhia thiab Kev Khi Lus 115:4). Qhov uas koj ris Yexus Khetos lub npe dhau los ntawm kev khi lus muaj nqis dab tsi rau koj? (saib Lus Qhuab Qhia thiab Kev Khi Lus 20:77).

Kuj saib Mauxiyas 5:7–15; Amas 46:13–15; 3 Nifais 27:3–8; Russell M. Nelson, “Lub Koom Txoos lub Npe uas Raug Lawm,” Liahona, Kaum Ib Hlis Ntuj 2018, 87–90.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Tes Hauj Lwm 10:17, 20.Peb puas tau hnov tus Ntsuj Plig Dawb Huv ces lwm lub sij hawm peb ua xyem xyav txog qhov uas peb tau hnov? Peb yuav hais li cas kom ib leeg pab ib leeg kov yeej peb txoj kev ua xyem xyav ntawd? (Saib Neil L. Andersen, “Kev Nco txog tej uas Txhawb Yus Sab Ntsuj Plig,” Liahona, Tsib Hlis Ntuj 2020, 18–22.)

Tes Hauj Lwm 10:34–35.Nej yuav ua li cas kom qhia nej tsev neeg tias “Vajtswv tsis xaiv leej twg ntsej muag”? (Tes Hauj Lwm 10:34). Tej zaum nej yuav xav muab daim duab txog cov neeg uas muaj kab lig kev cai txawv rau nej tsev neeg saib thaum nej nyeem tej nqe vaj lug kub no. Tej lus tseeb hauv tej nqe no yuav tsum pab peb hloov li cas? (saib, ua piv txwv, “I’ll Walk with You” [Children’s Songbook, 140–41]).

Tes Hauj Lwm 12:1–17.Tej zaum nej tsev neeg yuav xav ua yeeb yam txog Petus txoj kev raug kaw thiab cov mej zeej ntawm lub Koom Txoos txoj kev koom ua ke kom thov Vajtswv pab nws. Peb tau koob hmoov li cas thaum lwm tus tau thov Vajtswv rau peb? Puas muaj leej twg uas peb xav tias peb yuav tsum thov Vajtswv pab, xws li ib tug thawj coj ntawm lub Koom Txoos los sis ib tug uas peb hlub? Kev “kub siab lug” thov txhais li cas? (Tes Hauj Lwm 12:5; kuj saib Amas 34:27).

Petus dim lub tsev kaw

Petus Dim lub Tsev Kaw, los ntawm A. L. Noakes

Tes Hauj Lwm 14.Thaum nej nyeem tshooj no ua ke, kom nej tsev neeg ib txhia sau ntawv txog cov koob hmoov uas los rau cov thwj tim thiab cov Ntseeg hauv lub Koom Txoos. Hais kom lwm tus hauv nej tsev neeg sau ntawv txog tej kev tsim txom los sis kev sim siab uas cov thwj tim raug. Vim li cas Vajtswv cia cov neeg ncaj ncees raug tej yam nyuaj heev?

Tes Hauj Lwm 15:1–21.Tej nqe vaj lug kub no hais txog thaum cov neeg hauv lub Koom Txoos tsis xav zoo ib yam txog qhov uas cov neeg uas hloov siab los ntseeg yuav tsum ua raws li Mauxes txoj kev cai los sis tsis ua, xws li kev cai txiav. Cov Thwj Tim tau ua li cas txog qhov no? Peb kawm dab tsi los ntawm zaj no txog lub Koom Txoos cov thawj coj txoj kev coj lub Koom Txoos tes hauj lwm?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “I’ll Walk with You,” Children’s Songbook, 140–41.

Kev Qhia Zoo Dua Ntxiv

Kos ib daim duab. Cov duab yuav pab koj tsev neeg xav txog tej lus qhia thiab tej zaj dab neeg hauv cov vaj lug kub. Tej zaum nej yuav xav caw nej tsev neeg kos duab txog tej yam uas nej nyeem, xws li nyob hauv Tes Hauj Lwm 10.

Petus thiab Kauneli-us

Tej yam uas muaj los rau Petus thiab Kauneli-us qhia tias “Vajtswv tsis xaiv leej twg ntsej muag” (Tes Hauj Lwm 10:34).