“Xya Hli Ntuj 24–30. Tes Hauj Lwm 16–21: ‘Vajtswv Hu Peb Mus Qhia Txoj Moo Zoo,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Xya Hli Ntuj 24–30. Tes Hauj Lwm 16–21,” Los, Nrog Kuv Mus—Rau Ib Leeg thiab Tsev Neeg: 2023
Xya Hli Ntuj 24–30
Tes Hauj Lwm 16–21
“Vajtswv Hu Peb Mus Qhia Txoj Moo Zoo”
Thaum koj nyeem txog Povlauj txoj kev qhia txoj moo zoo, tej zaum tus Ntsuj Plig yuav tshoov koj lub siab kom xav txog tej yam tseem ceeb. Cia li sau ntawv txog tej kev tshoov siab no, thiab npaj ua li ntawd.
Sau Ntawv txog Koj tej Kev Tshoov Siab
Nyob hauv tus Tswv cov lus kawg uas Nws hais rau Nws cov Thwj Tim, Nws tau txib li no tias, “Yog li ntawd, nej cia li tawm mus qhia txhua haiv neeg hauv qab ntuj no, kom lawv los ua kuv cov thwj tim: Nej yuav tsum tuav Vaj Leej Txiv, Vaj Leej Tub thiab Vaj Ntsuj Plig tus Dawb Huv lub npe, muab lawv ua kev cai raus dej: thiab qhia kom lawv paub coj raws li txhua yam uas kuv tau qhia rau nej lawm” (Mathais 28:19–20). Cov Thwj Tim ntawd tsis tau mus rau tag nrho txhua haiv neeg, tiam sis Tes Hauj Lwm 16–21 qhia tias Povlauj thiab nws cov khub twb ua ntau yam heev kom txhim tsa lub Koom Txoos. Lawv tau qhia, muab neeg ua kev cai raus dej, thiab muab lub txiaj ntsim Vaj Ntsuj Plig Dawb Huv thiab. Lawv tau ua tej txuj ci tseem ceeb, tau muab ib tug txiv neej sawv hauv qhov tuag rov qab los, thiab qhia tias yuav muaj txoj Kev Tso Qhov Tseeb Tseg Loj Heev (Tes Hauj Lwm 20:7–12, 28–31). Thiab txoj hauj lwm uas lawv pib ua los cov Thwj Tim niaj hnub no tseem ua thiab, nrog rau cov thwj tim uas rau siab heev xws li koj, cov uas pab ua raws li tus Cawm Seej txib ua tej yam uas Povlauj yeej tsis paub xav. Tej zaum koj paub txog cov neeg uas tsis paub lawv Leej Txiv Saum Ntuj Ceeb Tsheej los sis Nws txoj moo zoo. Tej zaum koj tau xav tias koj tau txais kev tshoov siab kom qhia lawv txog tej yam uas koj paub txog Nws (Tes Hauj Lwm 17:16). Yog koj ua raws li Povlauj tus yam ntxwv txo hwj chim thiab ua siab loj qhia txog txoj moo zoo, tej zaum koj yuav nrhiav ib tug uas “tus Tswv qhib nws lub siab” (Tes Hauj Lwm 16:14).
Tej lub Tswv Yim Kawm Vaj Lug Kub ntawm Yus Ib Leeg
Tus Ntsuj Plig yuav coj kuv thaum kuv siv zog qhia txog txoj moo zoo.
Tus Yaj Saub Joseph Smith hais tias, “Tsis muaj leej twg uas qhia tau Txoj Moo Zoo yog tis muaj tus Vaj Ntsuj Plig Dawb Huv” (Teachings of Presidents of the Church: Joseph Smith [2007], 332). Thaum koj nyeem Tes Hauj Lwm 16–21, xav seb yog vim li cas tus Yaj Saub tej lus muaj tseeb. Xav txog tej lub sij hawm thaum tus Ntsuj Plig tau pab Povlauj thiab nws cov khub. Lawv tau txais cov koob hmoov twg thaum lawv mloog tus Ntsuj Plig lus? Thaum twg koj tau hnov tus Ntsuj Plig tej kev tshoov siab thaum koj qhia txog txoj moo zoo?
Kuv muaj peev xwm tshaj tawm txog txoj moo zoo txhua lub sij hawm.
Nyaj txhua tus xav tias yog yus raug kaw hauv lub tsev loj cuj ces yus tsis tas qhia txoj moo zoo. Tiam sis Povlauj thiab Xilas tau siv lub sij hawm no pab ib tug uas zov lub tsev loj cuj (saib Tes Hauj Lwm 16:16–34). Nyob hauv Tes Hauj Lwm 16–21, nrhiav tej lub sij hawm thaum Povlauj txaus siab hais lus tim khawv rau txhua leej txhua tus. Koj xav tias yog vim li cas nws ua siab loj thiab tsis ntshai? Koj kawm dab tsi los ntawm Povlauj tus yam ntxwv?
Muaj ntau zaj lus ntxiv txog kev qhia txoj moo zoo nyob hauv Tes Hauj Lwm 16–21. Thaum koj kawm tej tshooj no, nrhiav tej yam uas muaj nqis rau koj.
Saib Dieter F. Uchtdorf, “Cov Tub Txib txoj Hauj Lwm: Qhia tej Yam hauv Nej lub Siab,” Liahona, Tsib Hlis Ntuj 2019, 15–18.
Peb txhua tus yog Vajtswv ib tug me nyuam.
“Peb yog Vajtswv cov me tub me nyuam.”
Nyob hauv Athees, Povlauj ntsib cov neeg uas ib leeg xav txawv ib leeg thiab lawv muaj ntau txoj kev ntseeg. Lawv yeej xav hnov “tej zaj txawv txawv uas lawv tsis tau hnov dua,” thiab qhov uas Povlauj yuav hais yeej yog ib zaj tshiab (saib Tes Hauj Lwm 17:19–21). Lawv tau teev tiam ntau tus vaj tswv, tsis hais ib tug uas lawv hu ua “tus Vajtswv uas peb tsis paub” (Tes Hauj Lwm 17:23), tiam sis lawv ntseeg tias tej vaj tswv yog tej lub hwj chim, tsis yog neeg uas muaj sia nyob, thiab yeej tsis yog peb Leej Txiv. Cia li xav txog tej yam uas Povlauj tau hais kom pab lawv paub Vajtswv. Qhov uas koj yog “Vajtswv [tus] me nyuam” muaj nqis dab tsi rau koj? (Tes Hauj Lwm 17:29). Raws li koj xav, qhov uas koj yog Vajtswv ib tug me nyuam puas txawv qhov uas koj yog ib tug uas Nws tsim xwb? Koj txoj kev to taub qhov tseeb no puas hloov koj txoj kev xav txog koj tus kheej thiab xav txog lwm tus?
Yog koj tau nyob ze Povlauj thaum nws hais lus tim khawv, koj yuav qhia dab tsi rau cov Neeg Kilis puag thaum ub txog peb Leej Txiv Saum Ntuj Ceeb Tsheej? Koj puas paub leej twg uas yuav tau zoo yog tias nws mloog koj zaj lus tim khawv?
Kuj saib Loos 8:16; 1 Yauhas 5:2; “We Are the Offspring of God” (video), ChurchofJesusChrist.org.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Tes Hauj Lwm 16–21.Kom pab nej tsev neeg to taub Tes Hauj Lwm 16–21 ntxiv, tej zaum nej yuav xav kawm txog daim qhia kev nyob ntawm zaj lus no qhov kawg, nrhiav tej nroog uas Povlauj tau mus qhia txoj moo zoo nyob hauv tej tshooj no. Peb muaj tej kev pab twg hnub no kom pab qhia txoj moo zoo rau txhua haiv neeg?
Kom pab nej tsev neeg xav qhia txoj moo zoo rau lwm tus, tej zaum nej yuav xav muab ib ob daim video rau lawv saib nyob hauv feem “Sharing the Gospel” ntawm Txoj Moo Zoo cov Ntawv.
-
Tes Hauj Lwm 17:10–12; 18:24–28.Peb yuav ua li cas kom zoo li Haiv Neeg Ntseeg nyob hauv tej nqe no? Qhov uas yus “kub siab lug mloog Vajtswv txoj lus” txhais li cas? (Tes Hauj Lwm 17:11). Peb yuav ua li cas kom “paub Vajtswv txoj lus”? (Tes Hauj Lwm 18:24).
-
Tes Hauj Lwm 19:1–7.Tej nqe no yuav pab nej tsev neeg sib tham txog qhov uas kev cai raus dej thiab kev pom zoo tseem ceeb heev. Kom to taub tej lus tseeb nyob hauv Tes Hauj Lwm 19:1–7 ntxiv, tej zaum nej yuav xav sib tham txog tej yam uas siv tsis taus yog tias tsis muaj lwm yam, xws li lub xov tooj ntawm tes uas tsis muaj roj teeb. Los sis tej zaum nej yuav xav qhia lawv txog tus Yaj Saub Joseph Smith tej lus no: “Txoj kev cai raus dej tsuas yog ib nrab ntawm txoj kab ke ntawd, thiab yuav tsis muaj qab hau dab tsi li yog tias tsis ua lwm qhov ntawd—uas yog kev cai raus rau hauv tus Vaj Ntsuj Plig Dawb Huv” (Teachings: Joseph Smith, 95). Vim li cas kev cai raus dej thiaj “tsis muaj qab hau dab tsi” yog tias tsis txais lub txiaj ntsim Vaj Ntsuj Plig Dawb Huv thiab? (saib 3 Nifais 27:19–20; Mauxes 6:59–61).
-
Tes Hauj Lwm 19:18–20.Thaum nej nyeem Tes Hauj Lwm 19:18–20, seb tej khoom uas muaj nqis heev es cov neeg txaus siab tso tej khoom ntawd tseg kom thiaj li muaj txoj moo zoo (saib nqe 19). Puas muaj tej khoom los yog tej yam peb nyiam ua uas peb yuav tsum tso tseg kom thiaj li txais tau cov koob hmoov saum ntuj ceeb tsheej?
-
Tes Hauj Lwm 20:32–35.Thaum twg nej tsev neeg tau kawm qhov uas Yexus Khetos qhia tias “thaum yus pub rau luag yus zoo siab heev dua thaum yus tau luag li”? (Tes Hauj Lwm 20:35). Puas muaj leej twg uas xav tau nej tsev neeg txoj kev pab, lub sij hawm, los yog tej txiaj ntsim? Nrog nej tsev neeg, sib tham txog tej lub tswv yim thiab npaj mus pab ib tug neeg. Peb xav li cas thaum peb pab lwm tus? Vim li cas thaum yus pub rau luag yus tau koob hmoov ntau dua li thaum yus txais?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “I Am a Child of God,” Children’s Songbook, 2–3.
Kev Kawm Zoo Dua Ntxiv ntawm Yus Ib Leeg
Sau ntawv txog koj tej kev tshoov siab. “Thaum twg koj sau ntawv txog tej kev tshoov siab ntawm sab ntsuj plig, koj qhia tus Tswv tias koj saib Nws tej lus qhia rau nqi, thiab Nws yuav foom koob hmoov rau koj kom txais tau kev tshwm sim ntxiv” (Teaching in the Savior’s Way, 12; kuj saib page 30).
Tus Thwj Tim Povlauj tej tej kev mus ua tub txib.