Povlauj hauv tsev kaw

Xya Hli Ntuj 31–Yim Hli Ntuj 6

Tes Hauj Lwm 22–28

“Ib tug Tub Txib thiab Ib tug Tim Khawv”

Tej kev tshoov siab los ntawm tus Vaj Ntsuj Plig Dawb Huv los yeej hais yau yau thiab tej lub sij hawm nyob ib me pliag xwb. Yog koj sau ntawv txog koj tej kev tshoov siab ces koj yuav muaj cib fim xav txog tej ntawd. Thaum koj nyeem Tes Hauj Lwm 22–28, cia li sau ntawv txog koj tej kev xav, thiab siv sij hawm xav txog tej ntawd ntxiv.

Sau Ntawv txog Koj tej Kev Tshoov Siab

Thawj Tswj Hwm Thomas S. Monson tau cog lus tias, “Thaum peb ua tus Tswv tej hauj lwm, … ces peb tsim nyog txais tus Tswv txoj kev pab” (“To Learn, to Do, to Be,” Liahona, Kaum Ib Hlis Ntuj 2008, 62). Tiam sis peb yeej tsis tsim nyog kom muaj ib txoj kev du lug thiab tau raws li peb lub siab xav txhua lub sij hawm. Yog peb xav paub li no tiag, peb kawm tau txog tus Thwj Tim Povlauj xwb. Tus Cawm Seej tau txib nws “qhia [Nws] zaj rau Lwm Haiv Neeg, rau cov vaj ntxwv thiab rau cov Ixayees” (Tes Hauj Lwm 9:15). Nyob hauv Tes Hauj Lwm tshooj 22–28, Povlauj raug ntau yam teeb meem thaum nws ua raws li tus Tswv tau txib nws ua—raug saw hlau khi, raug kaw, raug ntaus, lub nkoj tsoo pob zeb, thiab cov nab tom. Tiam sis “tus Tswv los sawv ntawm Povlauj ib sab thiab hais rau Povlauj hais tias, Koj tsis txhob ntshai, Povlauj” (Tes Hauj Lwm 23:11). Povlauj lub neej yeej tshoov peb lub siab kom nco qab tias tus Tswv txoj kev hu kom “tshaj [Nws] txoj moo zoo nrog lub suab xyiv fab” kuj muaj kev cog lus tias: “Nej cia li zoo siab thiab xyiv fab, vim kuv nrog nraim nej nyob” (Lus Qhuab Qhia thiab Kev Khi Lus 29:4–5; kuj saib Mathais 28:19–20).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Tes Hauj Lwm 22:1–21; 26:1–29

Yexus Khetos cov thwj tim ua siab loj hais lus tim khawv.

Thaum Povlauj hais lus tim khawv nyob hauv Tes Hauj Lwm 22 thiab 26, nws raug kaw hauv tsev loj cuj thaum cov tub rog Loos ntes nws. Cov neeg uas nws hais lus rau yeej muaj hwj chim rau txim rau nws kom tuag. Tiam sis nws xaiv kom ua siab loj ua tim khawv txog Yexus Khetos thiab “lub suab saum ntuj” (Tes Hauj Lwm 26:19) uas nws tau txais. Muaj dab tsi uas tshoov koj lub siab txog nws tej lus? Cia li xav txog tej lub cib fim uas koj muaj kom hais lus tim khawv. Piv txwv hais tias, koj cov phooj ywg puas paub tias koj xav li cas txog Yexus Khetos? Los yog thaum twg yog zaum kawg uas koj qhia koj tsev neeg txog lub sij hawm thaum koj paub tias txoj moo zoo muaj tseeb?

Thaum Joseph Smith raug luag thuam vim nws hais txog nws Thawj Zaug Ua Yog Toog, nws txais kev tshoov siab vim Povlauj tau ua tim khawv txog nws txoj kev ua yog toog (saib Joseph Smith—Keeb Kwm 1:24–25). Koj yuav hais li cas kom hais txog lub ntsiab ntawm qhov uas Joseph Smith kawm los ntawm Povlauj? Koj kawm dab tsi los ntawm ob tug tim khawv txog Yexus Khetos?

Kuj saib Neil L. Andersen, “Peb Hais txog Khetos,” Liahona, Kaum Ib Hlis Ntuj 2020, 88–91.

Tes Hauj Lwm 23:10–11; 27:13–25, 40–44

Tus Tswv nrog nraim cov uas siv zog ua hauj lwm pab Nws.

Ib yam li peb kawm los ntawm Povlauj txoj kev mus qhuab qhia, tej yam nyuaj hauv peb lub neej tsis yog ib lub cim uas qhia tias Vajtswv tsis pom zoo rau peb los yog tsis pom zoo rau peb tej hauj lwm. Muaj tseeb tiag, tej lub sij hawm yog thaum peb raug tej yam nyuaj uas peb hnov Nws txoj kev txhawb nqa muaj zog tshaj plaws. Tej zaum koj yuav nyiam xav txog tej yam uas koj tau nyeem txog Povlauj txoj kev mus qhuab qhia thiab sau tej yam uas nws raug (saib, ua piv txwv, Tes Hauj Lwm 14:19–20; 16:19–27; 21:31–34; 23:10–11; 27:13–25, 40–44). Tus Tswv tau ua li cas kom nrog nraim nws nyob? Nws tau ua li cas kom nrog nraim koj?

Tes Hauj Lwm 24:24–27; 26:1–3, 24–29; 27

Yeej muaj kev kaj siab lug thiab kev nyab xeeb thaum peb ua raws li Vajtswv cov tub qhe tej lus.

Thaum nws ua hauj lwm qhuab qhia, Povlauj tau ua tim khawv txog Yexus Khetos thiab Nws txoj moo zoo. Neeg coob tau ntseeg, tiam sis tsis yog txhua leej txhua tus. Thaum koj nyeem Tes Hauj Lwm 24:24–27 thiab Tes Hauj Lwm 26:1–3, 24–29, nrhiav tej lus uas qhia tias cov thawj coj Loos uas nyob hauv Yudais no tau xav li cas txog Povlauj tej lus qhia:

• Felis

• Fexatus

• Vaj Ntxwv Akipas

Thaum caij nkoj mus rau Loos kom Xixas rau txim rau nws, Povlauj hais tias lub nkoj “yuav puas tsuaj tas huv tib si” thiab cov neeg yuav “muaj kev txhawj kev ntshai heev” (Tes Hauj Lwm 27:10). Nyeem tshooj 27 thiaj li paub tias cov uas nrog Povlauj caij nkoj tau xav li cas txog nws tej lus ceeb toom. Puas muaj tej yam uas koj kawm tau los ntawm zaj lus no?

Koj puas tau xav zoo li cov neeg no thaum twg koj tau hnov lub Koom Txoos cov thawj coj tej lus qhia? Yuav raug dab tsi thaum twg yus xav zoo li no? Koj kawm dab tsi los ntawm tej zaj no txog qhov uas yuav tsum ua raws li tus Tswv hais dhau los ntawm Nws cov tub qhe?

Kuj saib 2 Nifais 33:1–2; D. Todd Christofferson, “Lub Suab Ceeb Toom,” Liahona, Tsib Hlis Ntuj 2017, 108–11; “Follow the Living Prophet,” Teachings of Presidents of the Church: Ezra Taft Benson (2014), 147–55.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Tes Hauj Lwm 24:16.Ua ntej nws hloov siab los ntseeg, Povlauj twb ua ntau yam ua txhaum Vajtswv txoj lus. Tiam sis vim nws kam hloov siab lees txim, nws thiaj li hais tias, “Yog li ntawd, kuv thiaj muab siab rau ua kom haum Vajtswv siab thiab haum neeg siab” (kuj saib Lus Qhuab Qhia thiab Kev Khi Lus 135:4–5). Peb yuav ua li cas kom haum Vajtswv siab thiab haum neeg siab?

Tes Hauj Lwm 26:16–18.Nyob hauv tej nqe no, tus Tswv tau hais kom Povlauj ua dab tsi? Peb muaj tej cib fim twg kom ua ib yam li ntawd?

Tes Hauj Lwm 28:1–9.Puas muaj leej twg nyob hauv nej tsev neeg uas nyiam nab? Tej zaum nej yuav xav thov tus neeg ntawd los sis lwm tus neeg nyob hauv nej tsev neeg hais dab neeg uas nyob hauv Tes Hauj Lwm 28:1–9. Tej zaum nej cov me nyuam yuav nyiam kos duab txog cov dab neeg no los sis ua yeeb yam txog cov no. Peb kawm dab tsi los ntawm tej zaj no? Tej zaum ib zaj lus uas peb kawm yog qhov uas tus Tswv ua raws li Nws tau cog lus rau Nws cov tub qhe. Piv txwv hais tias, nej muab tau tej lus cog tseg nyob hauv Malakaus 16:18 piv rau tej uas tau muaj los rau Povlauj. Nej kuj nrhiav tau ib zaj lus hauv lub tuam rooj sab laj thaum tus Tswv ib tug tub qhe tau cog lus rau nej—tej zaum nrhiav ib cov lus cog tseg uas muaj nqis rau nej tsev neeg—thiab muab tso rau sawv daws saib hauv nej tsev. Peb yuav ua li cas kom qhia tias peb ntseeg tias yuav muaj raws li cov lus cog tseg no?

nab muaj taug

Vajtswv pov hwm Povlauj thaum ib tug nab muaj taug tom nws.

Tes Hauj Lwm 28:22–24.Ib yam li lub Koom Txoos nyob hauv Povlauj lub caij nyoog, niaj hnub no muaj neeg uas hais lus tawm tsam lub Koom Txoos vim lawv “ntxub” heev. Thaum tib neeg tau hais lus tawm tsam tus Cawm Seej thiab Nws lub Koom Txoos, Povlauj tau hais li cas? Peb kawm dab tsi los ntawm Povlauj lub neej?

Yog xav tau tswv yim ntxiv txog kev qhia cov me nyuam, saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Kuv Paub Yexus Tseem Muaj txoj Sia,” Cov Nkauj Qhuas Vajtswv, zaj 53.

Kev Qhia Zoo Dua Ntxiv

Tsom ntsoov rau tej lub ntsiab cai uas yuav foom koob hmoov rau nej tsev neeg. Thaum koj kawm cov vaj lug kub, nug koj tus kheej tias, “Kuv nrhiav dab tsi nyob no uas yuav muaj nqis heev rau kuv tsev neeg?” (Saib Teaching in the Savior’s Way, 17.)

Povlauj hais lus tim khawv rau Vaj Ntxwv Akipas

Povlauj hais lus tim khawv rau Vaj Ntxwv Akipas. Rau Siab Ntso Ua Raws Li zaj Lus Tim Khawv txog Yexus, los ntawm Daniel A. Lewis