“Yim Hli Ntuj 21–27. 1 Kauleethaus 1–7: ‘Koom Ua Ib lub Siab,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Yim Hli Ntuj 21–27. 1 Kauleethaus 1–7,” Los, Nrog Kuv Mus—Rau Ib Leeg thiab Tsev Neeg: 2023
Corinth, Southern Greece, the Forum and Civic Center, kev kos duab los ntawm Balage Balogh/www.ArchaeologyIllustrated.com
Yim Hli Ntuj 21–27
1 Kauleethaus 1–7
“Koom Ua Ib lub Siab”
Sau ntawv txog tej kev tshoov siab uas koj txais thaum koj nyeem 1 Kauleethaus 1–7. Tej zaum tej kev tshoov siab no yuav kom koj kawm ib lub tswv yim ntxiv, los sis qhia lwm tus txog ib yam uas koj tau kawm, los sis hloov tej yam hauv koj lub neej.
Sau Ntawv txog Koj tej Kev Tshoov Siab
Thaum Povlauj siv sij hawm nyob hauv Kauleethaus, “muaj ntau leej uas nyob hauv lub nroog Kauleethaus hnov Povlauj qhia, lawv txawm los ntseeg thiab ua kev cai raus dej” (Tes Hauj Lwm 18:8). Yog li ntawd yeej nyuaj rau Povlauj hnov hais tias, ob peb xyoos tom qab ntawd xwb, twb muaj tej kev “ua pab ua pawg” thiab “kev sib cav sib ceg” ntawm cov Neeg Ntseeg hauv Kauleethaus thiab thaum nws tsis nyob lawv pib ua raws li “neeg ntiaj teb lub tswv yim” (1 Kauleethaus 1:10–11, 20). Yog li ntawd, Povlauj tau sau tsab ntawv no uas peb hu ua 1 Kauleethaus. Phau no muaj cov lus qhuab qhia ntau heev, tiam sis, Povlauj poob siab uas Haiv Neeg Ntseeg tsis tau npaj siab txais tag nrho cov lus qhuab qhia uas nws xav qhia lawv. Nws hais tias, “Cov kwv tij, kuv tsis qhia nej li uas kuv qhia cov uas twb muaj Vaj Ntsuj Plig kav lawv lub siab lawm; kuv qhia nej ib yam li nej tseem yog neeg ntiaj teb” (1 Kauleethaus 3:1–3). Thaum peb npaj siab nyeem Povlauj tej lus, tej zaum yuav tsim nyog yog peb ntsuas seb peb puas npaj siab txais qhov tseeb—tsis hais peb txoj kev txaus siab mloog tus Ntsuj Plig lus thiab siv zog koom ua ib lub siab nrog peb tsev neeg, peb Haiv Neeg Ntseeg, thiab Vajtswv.
Tej lub Tswv Yim Kawm Vaj Lug Kub ntawm Yus Ib Leeg
Cov meej hauv Yexus Khetos lub Koom Txoos siv zog kom koom ua ib lub siab.
Peb tsis paub tag nrho vim li cas Haiv Neeg Ntseeg hauv Kauleethaus tsis koom siab, tiam sis peb yeej paub tias yog vim li cas peb tsis koom ua ib lub siab nrog cov uas txheeb ze peb. Cia li xav txog ib tug neeg hauv koj lub neej uas tej zaum yuav tau koob hmoov los ntawm kev koom siab; ces nrhiav tej yam uas Povlauj qhia nyob hauv 1 Kauleethaus 1:10–17; 3:1–11 hais txog qhov uas Haiv Neeg Ntseeg hauv Kauleethaus tsis koom siab koom ntsws. Koj yuav kawm tej lub tswv yim twg txog qhov uas yuav tsum ua dab tsi kom koom siab koom ntsws nrog lwm tus?
Kuj saib Mauxiyas 18:21; 4 Nifais 1:15–17; Lus Qhuab Qhia thiab Kev Khi Lus 38:23–27; 105:1–5; Phau Qhia txog Vaj Lug Kub, “Koom Siab,” topics.ChurchofJesusChrist.org.
Xwv kom ua Vajtswv txoj hauj lwm, kuv xav tau Vajtswv lub tswv yim.
Txawm yog ib yam zoo yog peb nrhiav tswv yim, tsis hais peb nrhiav qhov twg los xij (saib 2 Nifais 9:29; Lus Qhuab Qhia thiab Kev Khi Lus 88:118), Povlauj tau ceeb toom ntau heev txog tib neeg lub tswv yim uas ua yuam kev, uas nws hu ua “neeg ntiaj teb lub tswv yim.” Thaum koj nyeem 1 Kauleethaus 1:17–25, xav txog qhov uas cov lus no txhais li cas. Koj xav tias Povlauj hais dab tsi thaum nws hais “Vajtswv lub tswv yim”? Vim li cas peb xav tau Vajtswv lub tswv yim kom ua raws li Vajtswv txoj hauj lwm?
Thaum koj siv zog ua raws li koj tej kev lav ris ua Vajtswv tej hauj lwm, koj puas tau “qaug zog thiab ntshai ua ib ce tshee hnyo” ib yam li Povlauj thaum nws qhia Haiv Neeg Ntseeg hauv Kauleethaus? (1 Kauleethaus 2:3). Koj kawm dab tsi nyob hauv 1 Kauleethaus 2:1–5 uas pab koj ua siab loj? Cia xav hais tias koj yuav ua li cas kom qhia tias koj tso siab rau “Vajtswv lub hwj chim” ntau tshaj koj mloog “neeg ntiaj teb lub tswv yim.”
Kuj saib Lus Qhuab Qhia thiab Kev Khi Lus 1:17–28.
Kuv xav tau tus Vaj Ntsuj Plig Dawb Huv kom to taub tej yam uas Vajtswv xav.
Yog koj xav kawm ib yam xws li kev kho tsheb los yog kev ua tsev li puag thaum ub, ces koj yuav ua li cas? Raws li 1 Kauleethaus 2:9–16 qhia, qhov uas koj kawm “tej yam uas Vajtswv xav” txawv li cas ntawm tej yam uas neeg ntiaj teb xav? Vim li cas peb yuav tsum muaj tus Vaj Ntsuj Plig Dawb Huv kom to taub tej yam uas Vajtswv xav? Tom qab koj nyeem tej nqe no, koj xav tias koj yuav tsum ua dab tsi kom to taub tej yam ntawm sab ntsuj plig ntxiv? Povlauj tej lus yuav ua li cas kom pab ib tug neeg uas tsis paub tseeb txog nws zaj lus tim khawv?
Kuv lub cev yeej dawb ceev.
Cov neeg hauv Kauleethaus xav tias kev coj tsis dawb huv los yeej tsim nyog thiab lawv lub cev los tau tsim kom thiaj li xis nyob. Los yog hais tias, Kauleethaus yeej tsis txawv ntawm lub ntiaj teb niaj hnub nim no. Povlauj xav qhia dab tsi nyob hauv 1 Kauleethaus 6:13–20 uas yuav pab koj piav rau lwm tus tias yog vim li cas koj xav ua neej raws li kev cai coj dawb huv.
Ib yam li Povlauj, Muam Wendy W. Nelson tau hais kom cov Neeg Ntseeg ua raws li kev cai coj dawb huv; saib nws zaj lus “Love and Marriage” (kev sib ntsib hawm Vajtswv rau cov neeg hluas thoob ntiaj teb, Ib Hlis Ntuj 8, 2017, broadcasts.ChurchofJesusChrist.org). Raws li Muam Nelson hais, peb tau koob hmoov twg thaum peb ua raws li tus Tswv tej kev cai txog kev hlub thiab kev pw ua ke?
Povlauj puas tau qhia tias yuav zoo dua yog tias yus tsis tau yuav poj niam?
Muaj ob peb nqe nyob hauv 1 Kauleethaus 7 uas ua rau peb xav tias txawm yog yuav pub yus yuav poj niam los yuav txiv, kev tsis txhob sib yuav thiab tsis txhob sib deev los yeej zoo dua. Tiam sis, Joseph Smith Kev Txhais, 1 Kauleethaus 7:29–33 (nyob hauv phau Npaivnpaum cov ntawv ntxiv tom kawg) pab peb to taub tias Povlauj hais txog cov uas yog cov tub txib, es nws qhia tias lawv yeej ua tau hauj lwm rau Vajtswv zoo dua yog tias lawv tsis tau yuav poj niam thaum lawv ua tub txib. Tus Tswv tau qhia rau peb dhau los ntawm Nws cov tub qhe, tsis hais Povlauj los yog, hais tias kev sib yuav yeej yog ib feem ntawm Nws txoj hau kev mus ib txhis thiab ib yam uas yuav tsum ua kom txais kev tsa nto (saib 1 Kauleethaus 11:11; Lus Qhuab Qhia thiab Kev Khi Lus 131:1–4).
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
1 Kauleethaus 1:10–17; 3:1–11.Thaum nej tsev neeg nyeem tej nqe no, caw lawv nrhiav ib lub tswv yim uas yuav pab nej koom siab ntxiv.
-
1 Kauleethaus 3:1–2.Tej zaum nej yuav nyiam nyeem tej nqe no thaum nej haus mis nyuj thiab noj nqaij. Tej zaum nej yuav xav muab qhov uas cov me nyuam mos liab loj hlob tuaj los ua cov laus piv rau qhov uas peb loj hlob tuaj ntawm sab ntsuj plig.
-
1 Kauleethaus 3:4–9.Povlauj tau muab nws txoj kev ua tub txib piv rau kev cog noob. Qhov piv txwv no qhia dab tsi rau peb txog kev qhia txoj moo zoo rau lwm tus?
-
1 Kauleethaus 6:19–20.Tej zaum kev muab peb lub cev piv rau lub tuam tsev, ib yam li Povlauj qhia, yog ib txoj kev zoo kom qhia tias peb lub cev yeej dawb ceev. Tej zaum nej yuav xav muab daim duab txog cov tuam tsev rau sawv daws saib, xws li cov tuam tsev uas muaj hauv zaj lus no. Vim li cas cov tuam tsev dawb ceev? Vim li cas peb lub cev yeej zoo li lub tuam tsev? Peb yuav ua li cas kom ua zoo rau peb lub cev zoo ib yam li ib lub tuam tsev? (Kuj saib phau tshwj xeeb ntawm phau Liahona thaum lub Yim Hli Ntuj 2020 txog kev coj dawb huv.)
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “The Lord Gave Me a Temple,” Children’s Songbook, 153.
Kev Kawm Zoo Dua Ntxiv ntawm Yus Ib Leeg
Ua siab ntev rau koj tus kheej. Povlauj qhia tias yuav tsum haus mis ua ntej noj nqaij thaum peb kawm txog txoj moo zoo (saib 1 Kauleethaus 3:1–2). Yog tias nyuaj rau koj to taub tej lus qhuab qhia tam sim no, ua siab ntev. Cia li cia siab tias koj yuav nrhiav tej lus teb thaum koj muaj kev ntseeg thiab rau siab kawm.
Povlauj tau muab peb lub cev piv rau lub tuam tsev txoj kev dawb ceev. Pib ntawm sab laug mus raws li lub moos tig: Lub Tuam Tsev Tijuana Mexico, lub Tuam Tsev Taipei Taiwan, lub Tuam Tsev Tegucigalpa Honduras, lub Tuam Tsev Houston Texas.