“Yim Hli Ntuj 28–Cuaj Hlis Ntuj 3. 1 Kauleethaus 8–13: ‘Nej Yog Yexus Khetos lub Cev,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Yim Hli Ntuj 28–Cuaj Hlis Ntuj 3. 1 Kauleethaus 8–13,” Los, Nrog Kuv Mus—Rau Ib Leeg thiab Tsev Neeg: 2023
Yim Hli Ntuj 28–Cuaj Hlis Ntuj 3
1 Kauleethaus 8–13
“Nej Yog Yexus Khetos lub Cev”
Thaum koj thov Vajtswv thiab nyeem 1 Kauleethaus 8–13, tus Vaj Ntsuj Plig Dawb Huv yuav hais lus ntxhi rau koj (saib 1 Vaj Ntxwv 19:11–12). Qhov uas koj sau ntawv txog tej kev tshoov siab no yuav pab koj nco txog koj tej kev xav thaum koj tau kawm vaj lug kub.
Sau Ntawv txog Koj tej Kev Tshoov Siab
Nyob hauv Povlauj lub caij nyoog, Kauleethaus yog ib lub nroog uas pauv khoom ntau thiab muaj neeg tuaj hauv txhua qhov chaw lub Nceeg Vaj Loos tuaj. Vim muaj kab lig kev cai thiab tej kev teev ntuj ntau heev nyob hauv lub nroog, ua nyuaj rau lub Koom Txoos cov mej zeej nyob hauv Kauleethaus koom ua ib lub siab, yog li ntawd Povlauj xav pab lawv koom siab koom ntsws ntseeg Yexus Khetos. Txoj kev koob siab no tsis yog kom muaj kev thaj yeeb xwb, Povlauj tsis tau hais kom lawv ua siab ntev nyiaj taus tej yam uas lwm tus ua xwb. Nws tau qhia tias thaum yus koom Yexus Khetos lub Koom Txoos, “peb sawv daws puav leej koom tib lub cev,” thiab yuav tsum muaj txhua yam ntawm peb lub cev (1 Kauleethaus 12:13). Thaum ib tug mej zeej poob mus, ces zoo li yus tsis muaj ib txhais tes los sis txhais ko taw, ces yus lub cev tsis muaj zog npaum li qub. Thaum ib tug mej zeej raug txom nyem, peb yuav tsum pab nws nyuaj siab thiab ua tej yam kom nplij nws lub siab. Thaum peb koom ua ib lub siab li no, ces tej yam uas tsis zoo ib yam yog tej uas peb xav tau, vim yog tsis muaj cov mej zeej uas nyias muaj nyias tej txiaj ntsim thiab tej txuj ci, ces lub cev yuav tsis txawj ua ntau yam. Yog li ntawd, txawm koj xav tias lub Koom Txoos yeej zoo nkaus li yog koj lub tsev los sis koj xav seb koj puas tsim nyog koom ua ke, Povlauj zaj lus rau koj qhia tias kev ua ib lub siab tsis yog txhais hais tias txhua tus zoo ib yam. Koj xav tau koj Haiv Neeg Ntseeg, thiab koj Haiv Neeg Ntseeg xav tau koj.
Tej lub Tswv Yim Kawm Vaj Lug Kub ntawm Yus Ib Leeg
Vajtswv npaj ib txoj kev rau peb dim kev ntxias.
Tej yam uas tshwm sim los ntawm sab ntsuj plig, tsis hais tej txuj ci tseem ceeb, tsis ua rau peb kom tsis txhob raug kev ntxias uas “sawv daws raug” (1 Kauleethaus 10:13). Tej zaum yog vim li no Povlauj thiaj li sau ntawv txog qhov uas cov Neeg Ixayees nyob hauv Mauxes lub caij nyoog raug kev ntxias ntau, txawm yog lawv twb pom tej txuj ci tseem ceeb ntau heev (saib Khiav Dim 13:21; 14:13–31). Thaum koj nyeem 1 Kauleethaus 10:1–13, tej lus ceeb toom txog cov Ixayees zaj puas yog tej yam uas tsim nyog koj yuav ua? Leej Txiv Saum Ntuj Ceeb Tsheej tau npaj tej yam twg rau koj “dim” kev ntxias? (kuj saib Amas 13:27–30; 3 Nifais 18:18–19).
1 Kauleethaus 10:16–17; 11:16–30
Kev txais lub cim nco txog pab peb koom ua ib lub siab vim peb yog cov mej zeej hauv Yexus Khetos lub Koom Txoos.
Txawm yog kev txais lub cim nco txog yog ib txoj kev cog lus ntawm koj thiab tus Tswv, qhov no kuj yog ib lub sij hawm uas koj koom ua ke nrog lwm tus. Yuav luag txhua lub sij hawm peb txais lub cim nco txog nyob ua ke, peb yog ib pawg Neeg Ntseeg. Cia li nyeem qhov uas Povlauj qhia txog kev txais cim nco txog, thiab xav txog qhov uas txoj kab ke dawb ceev yuav pab “coob leej” los ua “ib lub cev” los ntawm Khetos (1 Kauleethaus 10:17). Qhov uas koj txais lub cim nco txog ua li cas pab koj koom siab nrog Yexus Khetos thiab lwm tus ntseeg? Tej nqe no puas hloov koj tej kev xav txog lub cim nco txog thiab koj txoj kev npaj txais lub cim nco txog?
Nyob hauv Vajtswv txoj hau kev, cov txiv neej thiab cov poj niam ib leeg xav tau ib leeg.
Nyob hauv 1 Kauleethaus 11:4–15, Povlauj tau hais txog tej kab lig kev cai uas peb tsis ua niaj hnub no. Tiam sis, Povlauj tau qhia ib qho tseeb tseem ceeb uas yeej nyob mus ib txhis, nyob hauv nqe 11. Koj xav tias nqe no txhais li cas, thiab vim li cas nqe no tseem ceeb? Txwj Laug David A. Bednar qhia hais tias, “Tus txiv neej thiab tus poj niam ib leeg yuav tsum txhawb nqa, foom koob hmoov, thiab pab ib leeg” (“Peb Ntseeg Kev Coj Dawb Huv,” Liahona, Tsib Hlis Ntuj 2013, 42). Yuav tsum siv qhov tseeb no li cas nyob hauv kev sib yuav? Yuav tsum siv qhov tseeb no li cas thaum peb ua hauj lwm hauv lub Koom Txoos?
Kuj saib Jean B. Bingham, “Sib Koom Tes ua Vajtswv txoj Hauj Lwm,” Liahona, Tsib Hlis Ntuj 2020, 60–63.
Tej txiaj ntsim ntawm sab ntsuj plig los Leej Txiv Saum Ntuj Ceeb Tsheej pub kom Nws txhua tus cov me nyuam tau koob hmoov.
Tej txiaj ntsim ntawm sab ntsuj plig nyob hauv 1 Kauleethaus 12–13 tsis yog txhua lub txiaj ntsim uas peb txais tau. Tiam sis yeej yog ib qho zoo rau koj nyeem thaum koj kawm thiab xav txog tej txiaj ntsim ntawm sab ntsuj plig uas Leej Txiv Saum Ntuj Ceeb Tsheej tau foom pub rau koj. Zaj lus txog “Txiaj Ntsim ntawm Sab Ntsuj Plig” nyob hauv Phau Qhia txog Vaj Lug Kub (topics.ChurchofJesusChrist.org) tej zaum yuav pab koj to taub txog tej txiaj ntsim no zoo dua. Thaum koj nyeem tej txiaj ntsim uas Povlauj sau txog, tej zaum koj yuav xav sau ntxiv txog tej yam uas koj pom lwm tus muaj, koj muaj, los sis cov neeg hauv cov vaj lug kub muaj. Yog tias koj muaj tus yaws suab txoj koob hmoov lawm, tej zaum zaj ntawd yuav hais txog koj tej txiaj ntsim ntawm sab ntsuj plig. Tej txiaj ntsim no pab koj li cas kom foom koob hmoov rau lwm tus? Xav seb koj yuav ua li cas kom “nrhiav tej txiaj ntsim uas tseem ceeb tshaj plaws” (1 Kauleethaus 12:31).
Kuj saib 1 Kauleethaus 14; Maulaunais 10:8–21, 30; Lus Qhuab Qhia thiab Kev Khi Lus 46:8–26; Tej Nqe Kev Ntseeg 1:7.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
1 Kauleethaus 9:24–27.Vim Povlauj tau hais lus piv txwv tias kev ua raws li txoj moo zoo yeej zoo li yus sib tw khiav, tej zaum nej yuav xav kom nej tsev neeg sib tw khiav kom kawm txog qhov no. Muab ib lub kaus mom rau txhua tus uas khiav txog qhov kawg, thiab sib tham txog qhov uas txhua tus uas rau siab coj raws li Yexus Khetos hauv lub neej no yuav yeej lub nqi zog uas “nyob mus ib txhis” (1 Kauleethaus 9:25; kuj saib 2 Timautes 4:7–8). Ib tug neeg uas khiav yuav tsum npaj li cas kom sib tw khiav? Peb yuav tsum ua li cas kom npaj mus cuag Leej Txiv Saum Ntuj Ceeb Tsheej?
Povlauj tau muab kev ua neej raws li txoj moo zoo piv rau kev sib tw khiav
-
1 Kauleethaus 12:1–11.Tom qab nej nyeem tej nqe no ua ke, muab txhua tus ib daim ntawv uas twb sau lub npe ntawm ib tug hauv nej tsev neeg rau saud. Hais kom txhua tus sau ntawv txog tej txiaj ntsim sab ntsuj plig uas tus neeg ntawd muaj. Tej zaum nej yuav xav xa cov ntawv ib tug rau ib tug mus txog thaum txhua tus twb muaj sij hawm sau ntawv txog txhua tus hauv nej tsev neeg tej txiaj ntsim.
-
1 Kauleethaus 12:3.Vim li cas yuav tsum muaj tus Vaj Ntsuj Plig Dawb Huv kom paub tseeb tias muaj Yexus Khetos tiag? Peb yuav ua li cas kom caw tus Vaj Ntsuj Plig Dawb Huv ntxiv dag zog rau peb zaj lus tim khawv txog Nws?
-
1 Kauleethaus 12:12–27.Povlauj zaj lus piv txwv txog ib lub cev tej zaum yog ib txoj kev zoo kom sib tham txog kev koom ua ib lub siab hauv nej tsev neeg. Piv txwv hais tias, tej zaum nej tsev neeg yuav xav kos duab txog ib lub cev uas muaj qhov muag los sis pob ntseg xwb (saib nqe 17). Tej nqe no qhia dab tsi rau peb txog peb txoj kev sib raug zoo nrog peb tsev neeg?
-
1 Kauleethaus 13:4–8.Tej zaum Povlauj txoj kev qhia txog txoj kev hlub yuav ua ib zaj paj lug zoo rau nej tsev neeg. Hais kom txhua tus hauv nej tsev neeg kawm ib nqe lus nyob hauv nqe 4–8 ces lawv yuav siv tej tus yam ntxwv thiab tej zaj los ntawm lawv lub neej qhia rau nej tias nqe lus ntawd muaj lub ntsiab dab tsi. Tus Cawm Seej coj yam ntxwv li cas txog txhua tus cwj pwm no? Tej zaum nej yuav xav kos duab ua ke txog txhua kab lus no thiab muab dai nyob rau hauv nej lub tsev. Cia li muaj tswv yim!
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Ib Leeg Hlub Ib Leeg,” Cov Nkauj Qhuas Vajtswv, zaj 145.
Kev Qhia Zoo Dua Ntxiv
Tso ib nqe vaj lug kub rau koj tsev neeg saib. Xaiv ib nqe vaj lug kub uas muaj nqis rau koj, thiab tso rau ib qho chaw uas koj tsev neeg yuav pheej saib. Hais kom txhua tus hauv koj tsev neeg ib leeg zuj zus xaiv ib nqe vaj lug kub kom tso rau saib.
“Thaum peb muab lub ncuav los ntais noj twb yog peb qhia hais tias, peb koom Yexus Khetos lub cev. Tsuas muaj tib lub ncuav xwb, txawm yog peb muaj coob leej los peb sawv daws koom ib lub cev, rau qhov peb noj tib lub ncuav xwb” (1 Kauleethaus 10:16–17).