Yexus Khetos

Cuaj Hlis Ntuj 11–17

2 Kauleethaus 1–7

“Nrog Vajtswv Sib Raug Zoo”

Thaum koj kawm Povlauj tej tsab ntawv rau cov Neeg Kauleethaus, cia li sau ntawv txog tej ntsiab cai ntawm txoj moo zoo uas koj nrhiav thiab xav seb koj yuav ua raws li tej no nyob hauv koj lub neej.

Sau Ntawv txog Koj tej Kev Tshoov Siab

Tej lub sij hawm, thaum yus yog ib tug thawj coj hauv lub Koom Txoos, yus yuav tsum hais tej yam uas nyuaj heev. Qhov no muaj tseeb nyob hauv Povlauj lub caij nyoog ib yam thiab. Zoo li ib tsab ntawv uas Povlauj sau rau Haiv Neeg Ntseeg nyob hauv Kauleethaus tau qhuab ntuas lawv thiab ua rau lawv tu siab. Nyob hauv tsab ntawv ntawd uas tam sim no yog 2 Kauleethaus, nws tau sim piav vim li cas nws sau tej lus ntuas li ntawd: “Thaum kuv sau tsab ntawv ntawd tuaj rau nej, kuv nyuaj siab, ntxhov siab thiab los kuv kua muag kawg li; tsis yog kuv txhob txwm ua kom nej nyuaj siab, tiam sis yog kuv xav kom nej paub hais tias kuv hlub nej heev” (2 Kauleethaus 2:4). Thaum ib tug thawj coj qhuab ntuas koj, yeej yuav pab koj yog koj paub tias nws hlub koj ib yam li Yexus Khetos hlub. Thiab thaum tsis paub li ntawd, yog tias peb txaus siab saib lwm tus muaj kev hlub li Povlauj muaj, ces yuav yooj yim rau peb teb thaum twg ua rau peb tu siab. Ib yam li Txwj Laug Jeffrey R. Holland hais tias, “Ua siab zoo nyiaj tib neeg tej kev qaug zog—nej tej kev qaug zog thiab cov uas ua hauj lwm nrog nej hauv lub Koom Txoos uas yog txiv neej thiab poj niam uas ua siab dawb pub lawv tej sij hawm. Tsuas yog Nws Tib Leeg Tub uas zoo tag nrho xwb, Vajtswv tsuas siv tau cov neeg tsis zoo tag nrho xwb” (“Lord, I Believe,” Liahona, Tsib Hlis Ntuj 2013, 94).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

2 Kauleethaus 1:3–7; 4:6–10, 17–18; 7:4–7

Tej kev sim siab yog cov koob hmoov.

Vim Povlauj raug txom nyem ntau heev hauv nws lub neej, peb thiaj paub yog vim li cas nws sau ntawv ntau txog qhov uas vim li cas peb raug kev txom nyem thiab cov koob hmoov uas los ntawm qhov ntawd. Thaum koj nyeem 2 Kauleethaus 1:3–7; 4:6–10, 17–18; 7:4–7, cia li xav txog qhov uas yog vim li cas tej kev sim siab yog cov koob hmoov thiab. Piv txwv hais tias, tej zaum koj yuav xav txog qhov uas Vajtswv ua li cas “txhawb peb lub zog thaum peb raug txhua yam kev nyuaj siab, kom peb thiaj txhawb tau lwm tus lub zog thaum lawv raug tej kev nyuaj siab” (2 Kauleethaus 1:4). Los sis tej zaum koj yuav xav txog qhov uas Yexus Khetos txoj kev kaj “ci tuaj rau hauv [koj] lub siab,” tsis hais thaum koj raug kev “nyuaj siab” thiab “kawg tswv yim” (2 Kauleethaus 4:6, 8).

Kuj saib Mauxiyas 24:13–17; Henry B. Eyring, “Raug Sim thiab Txhuam,” Liahona, Kaum Ib Hlis Ntuj 2020, 96–99; Phau Qhia txog Vaj Lug Kub, “Nyuaj Siab,” topics.ChurchofJesusChrist.org.

2 Kauleethaus 2:5–11

Kev zam txim yog ib txoj koob hmoov uas kuv muaj peev xwm pub rau lwm tus thiab txais.

Peb tsis paub ntau txog tus txiv neej uas Povlauj hais txog nyob hauv 2 Kauleethaus 2:5–11—tsuas paub tias nws twb tau ua txhaum (saib nqe 5–6) thiab Povlauj xav kom Haiv Neeg Ntseeg zam txim pub rau nws (saib nqe 7–8). Vim li cas tej lub sij hawm peb tsis “ua tib zoo hais rau [ib tug neeg uas ua rau peb tu siab] hais tias [peb] hlub nws”? (nqe 8). Qhov uas peb tsis kam zam txim pub rau lwm tus ua li cas yog ib qho tsis zoo rau lawv thiab peb tus kheej? (saib nqe 7, 10–11). Qhov uas peb tsis kam zam txim pub rau lwm tus ua li cas “kom Dab Ntxwg Nyoog thiaj ntxias … tau peb”? (nqe 11).

Kuj saib Lus Qhuab Qhia thiab Kev Khi Lus 64:9–11.

2 Kauleethaus 5:14–21

Dhau los ntawm Yexus Khetos txoj Kev Theej Txhoj, kuv yuav rov qab nrog Vajtswv sib raug zoo.

Povlauj paub ntau tshaj txhua tus hais tias kev “ua neeg tshiab” zoo li cas (2 Kauleethaus 5:17). Nws yog ib tug uas tsim txom cov Neeg Ntseeg Khetos ua ntej tiam sis nws los ua ib tug neeg uas tsis ntshai tiv thaiv kev ntseeg Yexus Khetos. Thaum koj nyeem 2 Kauleethaus 5:14–21, cia li xav txog tej lus nug xws li no: Kev sib raug zoo txhais li cas? Qhov uas peb rov qab nrog Vajtswv sib raug zoo txhais li cas? Xav txog tej yam uas ua rau koj tsis nrog Vajtswv sib raug zoo. Koj yuav tsum ua dab tsi kom thiaj li nrog Nws sib raug zoo tag nrho? Tus Cawm Seej ua dab tsi kom muaj li ntawd?

Tej zaum tsim nyog koj xav txog qhov uas cov lus “Yexus Khetos cov tub txib” uas ua “Vajtswv … txoj hauj lwm uas mus coj neeg los nrog Vajtswv sib raug zoo” txhais li cas (nqe 18, 20). Koj kawm dab tsi ntxiv los ntawm Txwj Laug Jeffrey R. Holland zaj lus “Txhawb Pab Los ntawm Kev Rov Qab Sib Raug Zoo”? (Liahona, Kaum Ib Hlis Ntuj 2018, 77–79).

Kuj saib 2 Nifais 10:23–25.

2 Kauleethaus 7:8–11

Qhov uas Vajtswv cia peb tu siab ua rau peb hloov siab lees txim.

Peb yeej tsis xav tias kev tu siab yog ib qho zoo, tiam sis Povlauj hais tias “qhov uas Vajtswv cia peb tu siab” (2 Kauleethaus 7:10) yeej yog ib qho tseem ceeb ntawm kev hloov siab lees txim. Xav seb koj kawm dab tsi txog qhov uas Vajtswv cia peb tu siab los ntawm tej lus no: 2 Kauleethaus 7:8–11; Amas 36:16–21; Maumoos 2:11–15; thiab Muam Michelle D. Craig zaj lus “Kev Txhawj Xeeb uas Zoo” (Liahona, Kaum Ib Hlis Ntuj 2018, 52–55). Thaum twg Vajtswv tau cia koj tu siab, thiab qhov no tau ua li cas rau koj lub neej?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

2 Kauleethaus 3:1–3.Nej tsev neeg puas tau hais kom lwm tus sau ib daim ntawv pom zoo rau lawv, xws li ua thaum yuav ua hauj lwm los yog thov mus kawm ntawv? Thov lawv hais txog lub sij hawm no. Povlauj qhia tias Haiv Neeg Ntseeg lub neej yeej zoo li tej tsab ntawv pom zoo rau Yexus Khetos txoj moo zoo, “tsab ntawv no tsis yog nws muab kua mem sau, tiam sis yog nws muab Vajtswv tus uas muaj sia nyob tus Ntsuj Plig sau.” Thaum koj nyeem 2 Kauleethaus 3:1–3 ua ke, sib tham txog qhov uas peb txoj kev coj yam ntxwv yeej zoo li tej tsab ntawv “kom txhua tus paub thiab tau nyeem ntag,” uas qhia tias txoj moo zoo muaj tseeb thiab muaj nqis heev. Tej zaum txhua tus hauv nej tsev neeg yuav xav sau ib tsab ntawv uas piav tias lwm tus hauv nej tsev neeg twb tau coj yam ntxwv zoo ua Yexus Khetos ib tug thwj tim. Ces lawv nyeem tau lawv tej tsab ntawv rau nej tsev neeg los sis muab rau tus uas lawv twb hais txog. Vim li cas peb yuav tsum to taub tias “Yexus Khetos yog tus sau tsab ntawv” ntawm peb lub neej?

2 Kauleethaus 5:6–7.Qhov hais tias peb kawm mus kev raws li kev ntseeg, tsis yog raws li peb pom txhais li cas? Peb ua dab tsi kom qhia tias peb ntseeg tus Cawm Seej txawm yog peb tsis pom Nws?

2 Kauleethaus 5:17.Nej tsev neeg puas muaj peev xwm xav txog tej kab uas muaj hauv lub ntiaj teb no uas hloov ntau heev thiab los ua tej yam tshiab? (saib daim duab ntawm zaj lus no qhov kawg). Yexus Khetos txoj moo zoo ua rau peb hloov li cas?

2 Kauleethaus 6:1–10.Raws li 2 Kauleethaus 6:1–10 hais, kev ua “Vajtswv cov tub txib” txhais li cas? (nqe 4). Vajtswv cov tub txib muaj tej cwj pwm dab tsi?

2 Kauleethaus 6:14–18.Peb yuav ua li cas kom ua raws li Povlauj tej lus hais kom “tso plhuav [cov tsis ncaj ncees] tseg mus nyob rau ib cag,” tiam sis tseem hlub txhua tus nyob ib puag ncig peb?

Yog xav tau tswv yim ntxiv txog kev qhia cov me nyuam, saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Help Me, Dear Father,” Children’s Songbook, 99.

Kev Qhia Zoo Dua Ntxiv

Cia li siv ib yam khoom qhia. Tej lub ntsiab cai ntawm txoj moo zoo, xws li txoj Kev Theej Txhoj, yeej nyuaj to taub. Xav seb koj puas siv cov duab los sis tej khoom uas yuav pab koj tsev neeg to taub tej ntsiab cai uas koj kawm hauv cov vaj lug kub.

tus kab ntsig, plhaub kab, thiab npuj npaim

Thaum peb hloov siab los ntseeg Yexus Khetos txoj moo zoo, peb yeej hloov loj heev, Povlauj thiaj li hais tias peb los ua ib tug “neeg tshiab” (2 Kauleethaus 5:17).