Yexus nrog ib tug me nyuam yaus tham

Cuaj Hlis Ntuj 18–24

2 Kauleethaus 8–13

“Vajtswv Hlub tus uas Zoo Siab Hlo Pub rau Luag”

Yog koj sau ntawv txog tej kev tshoov siab ntawm sab ntsuj plig uas koj txais ces yuav pab koj nco qab tej yam uas koj kawm thaum koj kawm vaj lug kub. Tej zaum koj yuav xav sau ntawv hauv ib phau ceev kev kawm ntawv, sau lub cim rau hauv koj phau vaj lug kub, sau lus cim nyob hauv qhov app Txoj Moo Zoo cov Ntawv, los sis kaw suab txog koj tej kev xav.

Sau Ntawv txog Koj tej Kev Tshoov Siab

Koj yuav ua li cas yog tias koj hnov tias muaj ib pawg Neeg Ntseeg nyob lwm qhov chaw uas raug txom nyem heev? Qhov no yog qhov uas Povlauj piav rau Haiv Neeg Ntseeg nyob hauv Kauleethaus raws li sau hauv 2 Kauleethaus 8–9. Nws cia siab tias nws yuav yaum kom Haiv Neeg Ntseeg hauv Kauleethaus muab lawv tej khoom rau cov Neeg Ntseeg uas xav tau. Tiam sis Povlauj tsis thov lawv pub khoom xwb, nws tej lus kuj qhia tej yam tseeb txog kev pub rau lwm tus: “Yog li ntawd nyias yuav tsum muab raws li nyias twb xub xav tseg lawm, tsis yog yuav khuv xim los sis yus yuav yuam yus lub siab muab; rau qhov Vajtswv hlub tus uas zoo siab hlo pub rau luag” (2 Kauleethaus 9:7). Nyob hauv peb lub caij nyoog, yeej muaj Haiv Neeg Ntseeg nyob thoob plaws lub ntiaj teb uas xav tau kev pab. Tej lub sij hawm peb tsuas muaj txaus pub nyiaj yoo mov rau lawv xwb. Tiam sis lwm lub sij hawm, tej zaum peb yuav muaj cib fim pub ncaj qha rau lawv. Txawm yog peb tej kev txi zoo li cas los, yeej tsim nyog uas peb xav txog vim li cas peb pub tej yam rau lwm tus. Puas yog peb ua kev txi vim peb hlub lwm tus? Vim rau qhov, kev hlub yog qhov uas ua rau ib tug zoo siab pub rau lwm tus.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

2 Kauleethaus 8:1–15; 9:5–15

Kuv yuav zoo siab pub tej yam uas kuv muaj kom pab cov neeg pluag thiab cov uas xav tau kev pab.

Muaj neeg coob nyob thoob plaws lub ntiaj teb uas xav tau kev pab. Peb yuav ua li cas kom pab lawv? Txwj Laug Jeffrey R. Holland tau hais li no tias: “Txawm peb muaj nyiaj los sis peb pluag, peb yuav tsum ‘ua li peb ua tau’ thaum lwm tus xav tau kev pab [saib Malakaus 14:6, 8]. … [Vajtswv] yuav pab nej thiab coj nej ua siab dawb siab zoo pab lwm tus yog nej ua tib zoo xav thiab thov thiab nrhiav kom ua raws li lus txib uas Nws tau muab rau peb ntau zaus” (“Are We Not All Beggars?,” Liahona, Kaum Ib Hlis Ntuj 2014, 41).

Cia li nyeem 2 Kauleethaus 8:1–15; 9:6–15, thiab sau lus cim txog tej ntsiab cai uas Povlauj qhia txog kev saib xyuas cov neeg pluag thiab cov uas xav tau kev pab. Koj txais kev tshoov siab twg txog Povlauj tej lus ntuas? Tej zaum koj yuav xav thov Vajtswv pab coj koj mus foom koob hmoov rau lwm tus uas xav tau kev pab. Ua tib zoo sau ntawv txog tej kev tshoov siab uas koj txais thiab ua raws li tej yam ntawd.

Kuj saib Mauxiyas 4:16–27; Amas 34:27–29; Russell M. Nelson, “Txoj Lus Txib Tseem Ceeb thib Ob,” Liahona, Kaum Ib Hlis Ntuj 2019, 96–100; Henry B. Eyring, “Puas Yog txoj Kev Cai Yoo Mov uas Kuv Txaus Siab Ua Yog Li No?,” Liahona, Tsib Hlis Ntuj 2015, 22–25.

2 Kauleethaus 11:1–6, 13–15; 13:5–9

“Ua tib zoo xav thoob thoob saib [koj] puas yog [tus] uas muab siab rau ntseeg.”

Hnub no, ib yam li nyob hauv Povlauj lub caij nyoog, muaj cov uas xav coj peb mus kom “tsis muab siab npuab Yexus Khetos” (2 Kauleethaus 11:3). Yog vim li ntawd, yuav tsum ua raws nraim li Povlauj qhia tias: “Ua tib zoo xav thoob thoob saib [koj] puas yog [tus] uas muab siab rau ntseeg” (2 Kauleethaus 13:5). Tej zaum koj yuav xav pib tus txheej txheem no thaum koj xav txog qhov uas “muab siab rau ntseeg” txhais li cas? Koj ua li cas ho paub tias koj muab siab rau ntseeg? Nrhiav kom muaj cib fim xav tias koj ua zoo npaum li cas.

Thaum koj xav txog no, tej zaum koj yuav xav txog cov lus “muab siab npuab Yexus Khetos” (2 Kauleethaus 11:3). Koj tau ua li cas kom muab siab npuab Yexus Khetos thiab Nws txoj moo zoo? Koj yuav ua li cas kom koj tsis txhob raug ntxias thiaj li tsis muab siab npuab Nws? Koj nrhiav tej lus qhia twg uas pab tau koj nyob hauv 2 Kauleethaus 11:1–6, 13–15?

Xav txog cov lus no los ntawm Thawj Tswj Hwm Dieter F. Uchtdorf: “Yog tias nej xav tias txoj moo zoo tsis tshua zoo rau nej, kuv caw nej cia li nres ib pliag, saib nej lub neej, thiab ua kom yooj yim me ntsis. Tsom ntsoov rau tej lus qhuab qhia, ntsiab cai thiab kev siv txoj moo zoo uas tseem ceeb. Kuv cog lus tias Vajtswv yuav coj nej thiab foom koob hmoov kom nej muaj lub neej zoo, thiab txoj moo zoo yuav pab nej zoo dua” (“Nws Zoo Kawg Nkaus!,” Liahona, Kaum Ib Hlis Ntuj 2015, 22).

2 Kauleethaus 12:5–10

Tus Cawm Seej txoj kev tshav ntuj yeej txaus kom pab kuv muaj zog txawm kuv qaug zog los.

Peb tsis paub tias Povlauj “ib qho mob” yog dab tsi, tiam sis peb txhua tus muaj tej yam mob uas peb xav kom Vajtswv muab tshem tawm ntawm peb lub neej mus. Cia li xav txog tej yam no thaum koj nyeem 2 Kauleethaus 12:5–10, thiab xav txog tej yam uas koj kawm txog Yexus Khetos nyob hauv tej nqe no. Nyob hauv tej nqe no Povlauj qhia dab tsi txog tej kev sim siab thiab tej kev qaug zog? Qhov uas Vajtswv “pom zoo hlub koj ces txaus lawm” txhais li cas?

Kuj saib Mauxiyas 23:21–24; 24:10–15; Ethaws 12:27; Maulaunais 10:32–33.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

2 Kauleethaus 8–9.Peb kawm dab tsi hauv ob tshooj no uas ua rau peb xav pab cov neeg pluag thiab lwm tus uas xav tau? Tej zaum nov yog ib lub sij hawm zoo rau peb tsev neeg npaj mus pab lwm tus uas xav tau kev pab.

2 Kauleethaus 9:6–7.Nej tsev neeg puas paub ib tug neeg uas zoo siab muab kev pab rau lwm tus? Peb yuav ua li cas kom zoo siab thaum peb pab lwm tus? Tej zaum cov me nyuam hauv nej tsev neeg yuav xav tsim tej lub cim thiab sau hais tias “Kuv zoo siab pab lwm tus.” Ces nej muab tau tej lub cim ua nqi zog rau nej tsev neeg thaum twg nej pom lawv zoo siab pab lwm tus.

2 Kauleethaus 10:3–7.Nej yuav ua li cas kom qhia nej tsev neeg txog peb txoj kev “tawm tsam” kev phem? Nej tsev neeg puas nyiam siv rooj zaum thiab cov pam ua ib phab ntsa los yog ib lub tsev tiv thaiv? Tej zaum qhov no yuav pab nej sib tham txog qhov uas peb yuav tsum muab tej yam uas coj peb mus deb ntawm Vajtswv tso tseg thiab “coj cov neeg uas ua yeeb ncuab rau Vajtswv los mloog Yexus Khetos lus.” Peb siv tej “cuab yeej” ntawm sab ntsuj plig twg kom tswj peb tej kev xav? (saib Efexus 6:11–18).

2 Kauleethaus 11:3.Nej tsev neeg yuav ua li cas kom tsom ntsoov rau kev “muab siab npuab Yexus Khetos”?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “‘Give,’ Said the Little Stream,” Children’s Songbook, 236.

Kev Kawm Zoo Dua Ntxiv ntawm Yus Ib Leeg

Sau ntawv txog koj tej kev tshoov siab. Txwj Laug Richard G. Scott hais tias: “Kev txawj ntse uas yus muab sau cia yog kev txawj ntse uas yus siv tau thaum txog sij hawm. … [Qhov uas yus muab tej kev tshoov siab ntawm sab ntsuj plig sau cia] ua rau yus haj yam txais tau txoj kev kaj ntxiv” (“Acquiring Spiritual Knowledge,” Ensign, Kaum Ib Hlis Ntuj 1993, 88; kuj saib Teaching in the Savior’s Way, 12, 30).

cov tub hluas ntxhais hluas pab

“Yog li ntawd nyias yuav tsum muab raws li nyias twb xub xav tseg lawm, tsis yog yuav khuv xim los sis yus yuav yuam yus lub siab muab; rau qhov Vajtswv hlub tus uas zoo siab hlo pub rau luag” (2 Kauleethaus 9:7).