“Cuaj Hlis Ntuj 25–Kaum Hli Ntuj 1. Kalatias: ‘Cia tus Vaj Ntsuj Plig Kav Nej lub Neej,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Cuaj Hlis Ntuj 25–Kaum Hli Ntuj 1. Kalatias,” Los, Nrog Kuv Mus—Rau Ib Leeg thiab Tsev Neeg: 2023
Tus Cawm Seej uas sawv rov los tau mus xyuas Povlauj nyob hauv lub tsev kaw (saib Tes Hauj Lwm 23:11). Yexus Khetos yeej muaj hwj chim cawm peb dim “kev ua qhev” (Kalatias 5:1).
Cuaj Hlis Ntuj 25–Kaum Hli Ntuj 1
Kalatias
“Cia tus Vaj Ntsuj Plig Kav Nej lub Neej”
Thaum koj nyeem phau Kalatias, cia li sau ntawv txog tej kev tshoov siab uas koj txais. Yog koj ua li ntawd ces yuav pab koj nco ntsoov thiab xav txog tej ntawd thaum yav tom ntej.
Sau Ntawv txog Koj tej Kev Tshoov Siab
Yexus Khetos txoj moo zoo tso peb dim kev ua qhev ntawm sab ntsuj plig. Tiam sis tej lub sij hawm tib neeg uas tau paub txog kev ywj pheej uas los ntawm txoj moo zoo twb tau tso tseg thiab “xav rov qab mus ua dab qhev dua” (Kalatias 4:9). Haiv Neeg Ntseeg hauv Kalatias twb tab tom ua li no—lawv tab tom tig mus tsis xav yuav kev ywj pheej uas Yexus Khetos tau muab rau lawv (saib Kalatias 1:6). Povlauj Tsab Ntawv rau cov Neeg Kalatias rau siab hais kom lawv rov qab los rau “kev ywj pheej [ntawm] Yexus Khetos [uas] twb tso peb cov uas ua qhev dim lawm” (Kalatias 5:1). Peb kuj yuav tsum hnov thiab ua raws li txoj kev hu no vim rau qhov txawm muaj xwm txheej ntau yam los, peb yeej yuav tsum xaiv kev ywj pheej los sis kev ua qhev. Raws li Povlauj qhia, tsis yog peb yuav tsum mloog txoj kev hu peb kom muaj kev ywj pheej (Kalatias 5:13); peb kuj yuav tsum muab siab rau “kev ywj pheej” (Kalatias 5:1) thaum peb tso siab rau Yexus Khetos.
Tej lub Tswv Yim Kawm Vaj Lug Kub ntawm Yus Ib Leeg
Yexus Khetos txoj kev cai ua rau kuv muaj kev ywj pheej.
Povlauj tau sau ntawv rau Haiv Neeg Ntseeg hauv lub nroog Kalatias thaum nws kawm tias lawv raug ntxias lawv ntseeg tej lus qhia cuav (saib Kalatias 1:6–9). Ib qhov uas lawv ntseeg yog qhov uas yog lawv xav tau kev cawm seej, Lwm Haiv Neeg uas tau ntseeg txoj moo zoo yuav tsum ua kev cai txiav thiab ua raws li Mauxes txoj kev cai (saib Kalatias 2). Povlauj tau hu cov kab lig kev cai no ua kev “ua qhev” (Kalatias 5:1). Thaum koj nyeem Povlauj tej lus ntuas cov neeg Kalatias, nrhiav seb muaj tej ntsiab cai twg kom pab koj to taub tias kev ywj pheej tiag tiag yog dab tsi. Tej zaum koj yuav xav txog tej kab lig kev cai cuav los sis lwm yam uas yuam koj ua qhev nyob hauv koj lub neej. Puas muaj dab tsi uas tab kaum koj kom tsis txhob muaj kev ywj pheej uas los ntawm txoj moo zoo? Yexus Khetos thiab Nws txoj moo zoo tau pab li cas kom koj muaj “kev ywj pheej” (Kalatias 5:1).
Kuj saib 2 Nifais 2:27; 9:10–12.
Kuv txais tau Anplaham cov koob hmoov ua qub txeeg qub teg.
Ib txhia ntawm Haiv Neeg Ntseeg hauv Kalatias txhawj heev vim lawv tsis yog Anplaham cov xeeb ntxwv tiag tiag, lawv thiaj li yuav tsis txais cov koob hmoov uas tus Tswv cog lus rau Anplaham, tsis hais kev tsa nto los yog. Raws li Kalatias 3:7–9, 13–14, 27–29 qhia, peb yuav tsum ua dab tsi kom ua “Anplaham tus xeeb ntxwv”?
Kom kawm txog cov koob hmoov uas tau cog lus rau Anplaham thiab cov koob hmoov uas peb txais tau ua peb qub txeeg qub teg vim peb yog nws cov xeeb ntxwv, saib Phau Qhia txog Vaj Lug Kub, “Kev Khi Lus ntawm Anplaham,” topics.ChurchofJesusChrist.org. Vim li cas Anplaham cov koob hmoov tseem ceeb rau koj?
Anplaham tau muaj Yexus Khetos txoj moo zoo.
Tus Yaj Saub Joseph Smith piav hais tias: “Peb ntseeg yuam kev tsis tau li coob leej hais tias cov neeg thaum ub hauv txhua lub caij nyoog tsis paub txog lub ntuj ceeb tsheej txoj hau kev no, vim hais tias txhua tus neeg uas tau kev cawm seej, twb tau kev cawm seej dhau los ntawm lub hwj chim ntawm txoj kev txhiv dim, twb muaj li ntawd rau cov uas yug los ua ntej Yexus thiab cov tom qab tib si. … Anplaham tau ua kev txi, thiab li ntawd los xij, twb tau qhia Txoj Moo Zoo rau nws” (“The Elders of the Church in Kirtland to Their Brethren Abroad,” The Evening and the Morning Star, Peb Hlis Ntuj 1834, 143, JosephSmithPapers.org). Vim li cas koj xav tias Haiv Neeg Ntseeg nyob hauv Povlauj lub caij nyoog yuav tsum paub tias Anplaham thiab cov yaj saub puag thaum ub tau muaj Yexus Khetos txoj moo zoo? Vim li cas koj yuav tsum paub qhov no? (Saib Hilamas 8:13–20; Mauxes 5:58–59; 6:50–66.)
Kuj saib Teachings of Presidents of the Church: Joseph Smith (2007), 45–56.
Yog kuv “cia tus Vaj Ntsuj Plig kav [kuv] lub neej,” kuv yuav txais cov txiv uas los ntawm tus Ntsuj Plig.
Kev kawm tej nqe vaj lug kub no yuav pab koj paub thaum twg koj cia tus Vaj Ntsuj Plig kav koj lub neej. Koj puas txais tau cov txiv ntawm tus Ntsuj Plig uas hais nyob hauv nqe 22–23? Puas muaj lwm yam ntxiv, los yog cov txiv, uas los ntawm kev mloog tus Ntsuj Plig uas koj pom? Cia li xav txog tej yam koj yuav tsum ua kom muaj cov txiv no ntxiv. Qhov uas koj cia siab rau cov txiv no puas pab koj sib raug zoo nrog lwm tus hauv koj lub neej?
Kuv yuav tsum nrhiav cov txiv ntawm tus Ntsuj Plig hauv kuv lub neej.
Yog koj sim ua kom tus Ntsuj Plig kav koj lub neej tiam sis zoo li koj tseem tsis txais tau cov txiv uas Vajtswv cog lus tias koj yuav txais, cia li nyeem Kalatias 6:7–10. Koj xav tias tus Tswv xav qhia dab tsi rau koj los ntawm tej nqe vaj lug kub no?
Kuj saib Amas 32:28, 41–43; Lus Qhuab Qhia thiab Kev Khi Lus 64:32–34.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Kalatias 3:11.Cov lus “tus uas ntseeg … thiaj tau txoj sia” txhais li cas? Peb tsev neeg puas ua raws li peb txoj kev ntseeg?
-
Kalatias 4:1–7.Tej zaum nej yuav xav qhia Kalatias 4 thaum nej sib tham txog qhov uas ib tug vaj ntxwv cov tub qhe thiab nws cov me nyuam txawv li cas. Tus vaj ntxwv muab cib fim los yog koob hmoov twg rau nws cov me nyuam uas nws tsis muab rau nws cov tub qhe? Cia li xav txog qhov no thaum nej nyeem nqe 1–7 ua ke. Tej nqe no qhia dab tsi rau peb txog peb txoj kev txheeb ze Leej Txiv Saum Ntuj Ceeb Tsheej?
-
Kalatias 5:16–26.Xav seb nej puas sib tham txog “tej uas neeg lub siab nyiam ua” thiab tej uas “tus Vaj Ntsuj Plig ua rau neeg muaj lub siab” zoo li cas. Xwv kom pab muaj kev lom zem thaum nej sib tham, tej zaum nej tsev neeg yuav nyiam muab ntawv lo rau cov txiv uas Povlauj tau siv kom piav txog tej uas los ntawm tus Ntsuj Plig. Ces txhua tus hauv nej tsev neeg xaiv tau ib lub txiv, qhia txog lo lus ntawd, ces hais txog ib tug neeg uas coj yam ntxwv txog lo lus ntawd. Ces nej tsev neeg tham tau txog tej yam nej ua tau kom caw tus Ntsuj Plig los rau hauv nej lub tsev thiab muaj tej yam no. Tom qab nej sib tham txog qhov no, ces tej zaum nej yuav noj cov txiv ua ke.
-
Kalatias 6:1–2.Tej lub sij hawm yuav muaj ib tug neeg hauv nej tsev neeg uas “ua txhaum.” Nej nrhiav tej lus qhia twg nyob hauv Kalatias 6:1–2 txog qhov uas nej yuav tsum ua li cas thaum muaj xwm txheej zoo li no?
-
Kalatias 6:7–10.Yog nej tsev neeg tau cog ib yam dab tsi ua ke, tej zaum nej yuav xav siv lub sij hawm ntawd kom piav txog lub ntsiab cai “txhua tus nyias yuav tau sau raws li tej uas nyias tseb” (nqe 7). Los sis nej nug tau nej tsev neeg txog cov zaug los sis cov txiv ntoo uas lawv nyiaj tshaj thiab sib tham seb yuav tsum ua dab tsi kom tu cov zaub kom loj tuaj. (Saib daim duab ntawm zaj lus no qhov kawg.) Tej zaum nej yuav xav sib tham txog cov koob hmoov uas nej tsev neeg xav txais thiab yuav ua li cas kom nej “sau” cov koob hmoov ntawd.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Qhia Kuv Los Ua Raws Li Vajtswv Txoj Lus,” Cov Nkauj Qhuas Vajtswv, zaj 140.
Kev Qhia Zoo Dua Ntxiv
Pab koj tsev neeg muab cov vaj lug kub piv rau lawv tus kheej. Nifais hais tias, “Kuv tau muab tag nrho tej vaj lug kub coj los piv rau peb, kom thiaj muaj nqis rau peb thiab kom peb kawm tau” (1 Nifais 19:23). Kom pab koj tsev neeg ua li no, tej zaum koj yuav xav caw lawv xav txog tej lub sij hawm thaum lawv tau hnov tus Vaj Ntsuj Plig Dawb Huv li muaj nyob hauv Kalatias 5:22–23. (Saib Teaching in the Savior’s Way, 21.)
Povlauj tau qhia tias thaum peb cia tus Vaj Ntsuj Plig Dawb Huv kav peb lub neej, ces peb yuav muaj tej yam uas tus Ntsuj Plig pub.