ob tug ntxhais txib nrog ib tug tub hluas tham

Kaum Hli Ntuj 16–22

1 thiab 2 Thexalaunikes

“Tej uas Nej Ntseeg Lawm, Tseem Tshuav Qee Yam uas Nej Tsis Tau Paub Tseeb”

Yog peb tsis sau ntawv txog tej kev tshoov siab uas tus Ntsuj Plig qhia rau peb, tej zaum peb yuav tsis nco qab. Tus Ntsuj Plig hais kom koj sau ntawv txog dab tsi thaum koj nyeem 1 thiab 2 Thexalaunikes?

Sau Ntawv txog Koj tej Kev Tshoov Siab

Nyob hauv lub nroog Thexalaunikes, luag liam Povlauj thiab Xilas hais tias nkawd “ua rau tej neeg uas nyob txhua qhov ntxhov” (Tes Hauj Lwm 17:6). Nkawd txoj kev qhuab qhia ua rau ib txhia cov thawj coj hauv cov Neeg Yudais chim siab heev, thiab cov thawj coj no tau ua rau cov neeg ntxhov heev (saib Tes Hauj Lwm 17:1–10). Yog li ntawd, muaj neeg hais kom Povlauj thiab Xilas tawm hauv Thexalaunikes mus. Povlauj txhawj txog cov ntseeg tshiab hauv Thexalaunikes thiab lawv txoj kev raug tsim txom, tiam sis nws tuaj tsis tau xyuas lawv. Nws sau hais tias, “Kuv ua tsis taus siab ntev lawm, kuv thiaj txib Timautes tuaj saib nej, saib nej puas tseem muab siab rau ntseeg.” Povlauj tus pab cuam Timautes, tus uas tau ua hauj lwm hauv Thexalaunikes, tau “los qhia rau [nws] hais tias, [lawv] tseem muab siab rau ntseeg thiab sib hlub” (1 Thexalaunikes 3:5–6). Muaj tseeb tiag, Haiv Neeg Ntseeg hauv Thexalaunikes tau coj yam ntxwv rau cov ntseeg tag nrho (1 Thexalaunikes 1:7), thiab xov xwm txog lawv txoj kev ntseeg twb nto moo lug rau tej nroog hauv lwm lub teb chaws. Cia li xav txog qhov uas Povlauj zoo siab thiab kaj siab npaum li cas vim nws tej hauj lwm nyob hauv lawv “muaj nqis heev” (1 Thexalaunikes 2:1). Tiam sis Povlauj paub tias kev rau siab ntseeg thaum yav tas los yeej tsis txaus rau peb txoj kev nyiaj kom dhau rau yav tom ntej, thiab nws ceev faj txog cov xib hwb cuav lub hwj huam nyob hauv Haiv Neeg Ntseeg no (saib 2 Thexalaunikes 2:2–3). Nws zaj lus rau lawv, thiab rau peb, yog kom peb “ib tug yuav tsum hlub ib tug heev dua” vim rau qhov “tseem tshuav qee yam uas [peb] tsis tau paub tseeb” (saib 1 Thexalaunikes 3:10; 4:10).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

1 Thexalaunikes 1–2

Yexus Khetos cov thwj tim puav leej ib leeg pab ib leeg vim lawv ncaj ncees thiab sib hlub.

Nyob hauv 1 Thexalaunikes, Povlauj tej lus qhia tias ib tug neeg uas rau siab ua hauj lwm pab Vajtswv cov me nyuam yuav txhawj thiab muaj kev zoo siab heev. Qhov tseem ceeb yog nyob hauv thawj ob tshooj ntawm 1 Thexalaunikes, koj yuav nrhiav tau tej lus uas piav txog tej cwj pwm thiab tej yam uas tus Tswv ib tug thwj tim yuav ua. Piv txwv hais tias, koj yuav kawm dab tsi los ntawm 1 Thexalaunikes 1:5–8; 2:1–13 txog kev ua hauj lwm rau tus Tswv?

Cia li xav txog koj tej cib fim kom pab Vajtswv thiab Nws cov me nyuam. Koj nrhiav tau dab tsi hauv ob tshooj no uas tshoov koj lub siab txog koj txoj hauj lwm pab lwm tus? Raws li tej yam uas koj nrhiav tau, nug koj tus kheej tej yam xws li “Kuv puas coj yam ntxwv txog tej yam uas kuv paub lawm?” (saib 1 Thexalaunikes 1:7).

1 Thexalaunikes 3:7–13; 4:1–12

“Ib tug txawj hlub ib tug heev dua yav tas los lawm.”

Povlauj zoo siab kawg vim Haiv Neeg Ntseeg hauv Thexalaunikes rau siab ntseeg (saib 1 Thexalaunikes 3:7–9). Tiam sis nws kuj xav kom lawv rau siab ntseeg “zoo dua yav tas los lawm thiab” (1 Thexalaunikes 4:1). Thaum koj nyeem 1 Thexalaunikes 3:7–13; 4:1–12, xav txog tej yam uas koj ua tau kom koj sab ntsuj plig muaj zog “zoo dua yav tas los lawm thiab” (1 Thexalaunikes 4:10). Piv txwv hais tias, saib Povlauj siv tej lus xws li “zoo kawg nkaus” thiab “dawb huv.” Koj kawm dab tsi los ntawm Povlauj tej lus txog qhov uas cov lus no txhais li cas? Tus Cawm Seej pab tau koj li cas txog kev ua neeg dawb huv ntxiv?

Kuj saib Phau Qhia txog Vaj Lug Kub, “Dawb Huv,” “Kev Hloov Ua Dawb Huv,” scriptures.ChurchofJesusChrist.org.

1 Thexalaunikes 4:16–18; 5:1–10; 2 Thexalaunikes 1:4–10

Yog kuv rau siab ntseeg, thiab saib ntsoov, ces kuv yuav tau npaj rau tus Cawm Seej txoj Kev Los Zaum Ob.

Nyob hauv 1 Thexalaunikes 5:1–10, Povlauj tau siv ob peb zaj lus piv txwv kom qhia txog lub sij hawm thaum Yexus yuav rov los nyob hauv lub ntiaj teb. Thaum koj kawm txog tej zaj lus piv txwv no, xav seb koj puas sau tej kev tshoov siab uas koj txais txog Yexus Khetos txoj Kev Los Zaum Ob:

• “Tub sab tuaj hmo ntuj”:

• “Tus poj niam uas mob plab yuav yug me nyuam”:

• Lwm zaj lus piv txwv uas koj nrhiav:

Koj kawm tej lus tseeb ntxiv twg los ntawm 1 Thexalaunikes 4:16–18; 5:1–10; 2 Thexalaunikes 1:4–10? Koj txais kev tshoov siab kom saib thiab npaj dab tsi rau tus Cawm Seej txoj kev los?

Kuj saib D. Todd Christofferson, “Npaj rau tus Tswv txoj Kev Rov Qab Los,” Liahona, Tsib Hlis Ntuj 2019, 81–84.

2 Thexalaunikes 2

Cov yaj saub tau hais tias yuav muaj ib txoj kev tso qhov tseeb tseg ua ntej Yexus Khetos txoj Kev Los Zaum Ob.

Vim lawv raug tsim txom heev zuj zus, cov Neeg Ntseeg hauv Thexalaunikes ntseeg tias tsis ntev tom ntej yuav txog lub sij hawm rau tus Cawm Seej txoj Kev Los Zaum Ob. Tiam sis Povlauj paub tias ua ntej Yexus yuav rov los hauv lub ntiaj teb no yuav muaj ib txoj kev tso qhov tseeb tseg—ib txoj kev ntxeev siab los sis kev “tawm tsam” qhov tseeb los sis kev poob mus (saib 2 Thexalaunikes 2:1–4). Tej zaum koj yuav to taub txog txoj Kev Tso Qhov Tseeb Tseg ntxiv—thiab ua Vajtswv tsaug txog Kev Muab txoj Moo Zoo Txum Tim Rov Qab Los—yog koj xav txog tej yam no:

• Tej nqe vaj lug kub uas qhia tias yuav muaj Kev Tso Qhov Tseeb Tseg: Yaxayas 24:5; Amaus 8:11–12; Mathais 24:4–14; 2 Timautes 4:3–4

• Tej nqe vaj lug kub uas qhia tias twb pib txoj Kev Tso Qhov Tseeb Tseg nyob hauv Povlauj lub caij nyoog: Tes Hauj Lwm 20:28–30; Kalatias 1:6–7; 1 Timautes 1:5–7

• Tej yam uas cov neeg kho Kev Ntseeg Khetos kom zoo li qub hais txog lub sij hawm Tso Qhov Tseeb Tseg Loj Heev:

  Martin Luther: “Kuv tsuas xav kho lub Koom Txoos kom zoo li qub raws nraim li hais nyob hauv cov Vaj Lug Kub Dawb Huv. … Kuv tsuas hais tias nyob hauv cov uas tsim nyog yuav muab ceev cia los tsis muaj Kev Ntseeg Khetos ntxiv li lawm” (nyob hauv E. G. Schweibert, Luther and His Times: The Reformation from a New Perspective [1950], 590).

  Roger Williams: “Kev tso qhov tseeb tseg … twb ua rau txhua yam lwj tas lawm thiaj li yuav tsis muaj dab tsi kho tau mus txog thaum Yexus Khetos txib cov thwj tim tshiab kom rov qab txhim tsa tej lub koom txoos (nyob hauv Philip Schaff, The Creeds of Christendom [1877], 851).

Kuj saib 2 Nifais 28; Phau Qhia txog Vaj Lug Kub, “Tso Qhov Tseeb Tseg,” topics.ChurchofJesusChrist.org.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

1 Thexalaunikes 3:9–13.Koj xav li cas txog qhov uas Povlauj hlub nws cov phooj ywg? Peb yuav ua li cas kom “ib tug txawj hlub ib tug heev dua yav tas los lawm”? (nqe 12).

1 Thexalaunikes 4:13–18.Tej lus twg hauv tej nqe no txog txoj Kev Sawv Rov Los nplij nej lub siab?

1 Thexalaunikes 5:14–25.Thaum nej nyeem Povlauj tej lus ntuas nyob hauv 1 Thexalaunikes 5:14–25, hais kom txhua tus hauv nej tsev neeg nrhiav ib kab lus uas nej tsev neeg yuav nyiam nco txog. Xav txog tej yam nej ua tau kom pom tau cov lus no nyob hauv nej lub tsev thiaj li yuav nco ntsoov. Piv txwv hais tias, tej zaum txhua tus neeg yuav xav nrhiav los yog kos duab txog kab lus uas nws tau xaiv lawm.

2 Thexalaunikes 3:13.Peb puas xav tias peb “dhuav ua tej hauj lwm zoo”—vim tej zaum peb txhawj xeeb dhau thaum peb sim ua ib tug thwj tim? Muaj dab tsi uas pab tau peb thaum peb xav li no? (Saib Kalatias 6:9; Lus Qhuab Qhia thiab Kev Khi Lus 64:33.) Yuav uas li cas kom ib leeg txhawb nqa ib leeg thaum muaj li no?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “I’m Trying to Be like Jesus,” Children’s Songbook, 78–79.

Kev Kawm Zoo Dua Ntxiv ntawm Yus Ib Leeg

Nrhiav kev kom txais kev tshwm sim txhua hnub. “Feem ntau peb txais kev tshwm sim ‘ib nqe lus ntxiv rau ib nqe lus’ (2 Nifais 28:30), tsis yog peb txais tag nrho nyob rau ib lub sij hawm xwb. … Tsis txhob xav tias kev kawm txoj moo zoo yog ib yam uas koj yuav tsum teem sij hawm ua xwb tiam sis yog cia li xav tias yog ib yam uas koj ua tas li” (saib Teaching in the Savior’s Way, 12).

Khetos nyob saum huab

Tus Khetos uas Sawv Rov Los, los ntawm Robert T. Barrett