tsev neeg saib cov duab

Kaum Hli Ntuj 2–8

Efexus

“Kom cov Ntseeg Ua Neeg Zoo Tag Nrho”

Koj puas pom tej yam uas sib haum ntawm tej zaj lus nyob hauv lub tuam rooj sab laj thiab Povlauj Tsab Ntawv rau cov Neeg Efexus?

Sau Ntawv txog Koj tej Kev Tshoov Siab

Thaum txoj moo zoo tab tom nrov moo ntws nyob hauv Efexus, ces cov neeg Efexus muaj “kev kub ntxhov” (Tes Hauj Lwm 19:23). Cov kws ntoo uas tau tsim tej mlom txog ib tug poj niam vaj tswv cuav xav tias Kev Ntseeg Khetos yeej yuav ua rau lawv poob nqi, thiab tsis ntev lawv “chim heev, … ces txawm muaj kev ntxhov thoob plaws hauv lub nroog Efexus” (saib Tes Hauj Lwm 19:27–29). Xav seb yuav zoo li cas yog koj yog ib tug neeg hloov siab los ntseeg txoj moo zoo tshiab nyob hauv qhov chaw no. Cov neeg Efexus twb tau mloog thiab ua raws li txoj moo zoo thaum muaj kev “ntxhov siab” (Tes Hauj Lwm 19:40), thiab Povlauj hais rau lawv tias Yexus ua rau peb nyob kaj siab lug (Efexus 2:13–14). Cov lus no, nrog nws cov lus kom peb “yuav tsum muab [peb] lub siab phem, lub siab ua nruj ua tsiv thiab lub siab heev tso pov tseg” (Efexus 4:31), yeej yog cov lus uas tsim nyog peb mloog niaj hnub no thiab. Vim cov neeg Efexus, ib yam li peb txhua tus, lawv tau “nrog tus Tswv sib raug zoo, [lawv] thiaj li … muaj zog thiab tau nws lub hwj chim uas loj kawg nkaus” (saib Efexus 6:10–13).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Efexus 1:4–11, 17–19

Vajtswv tau xaiv, los yog pom zoo rau kuv ua ntej, kom ua tej kev lav ris hauv lub ntiaj teb no.

Povlauj tau hais txog qhov uas Vajtswv tau “xaiv” Haiv Neeg Ntseeg thiab “thaum tsis tau tsim ntuj tsim teb, Vajtswv twb xub xaiv” lawv los ua Nws haiv neeg. Tiam sis, raws li Thawj Tswj Hwm Henry B. Eyring tau hais, qhov no tsis txhais tias “Vajtswv twb txiav txim siab lawm ua ntej saib Nws yuav cawm tus twg ntawm Nws cov me nyuam thiab tau muab txoj moo zoo rau lawv, ho lawv cov uas tsis tau hnov txog txoj moo zoo yog cov uas tsis tau ‘xaiv.’ … Vajtswv txoj hau kev yeej txawj hlub thiab yeej ncaj dua ntawd. Peb Leej Txiv Saum Ntuj Ceeb Tsheej yeej muaj lub siab xav sau ua ke thiab foom koob hmoov rau tag nrho Nws tsev neeg” (“Coj Vajtswv Tsev Neeg Los Sib Sau Ua Ke,” Liahona, Tsib Hlis Ntuj 2017, 20–21). Tag nrho Vajtswv cov me nyuam lees yuav txoj moo zoo thiab cov kab ke los tau vim rau qhov peb ua hauj lwm rau cov neeg tuag nyob hauv cov tuam tsev dawb huv.

Txawm yog tsis muaj leej twg uas Vajtswv twb xaiv lawm Nws yuav cawm lawv ua ntej, kev tshwm sim qhia peb tias Vajtswv twb xaiv ib txhia ntawm Nws cov me nyuam, los yog “xaiv ua ntej,” nyob hauv lub ntuj ua ntej lub neej no kom ua tej hauj lwm tseem ceeb kom thiaj muaj raws li Vajtswv tej lub hom phiaj hauv lub ntiaj teb no. Thaum koj nyeem Efexus 1 cia li xav seb koj yuav ua dab tsi kom ua raws li qhov tseeb no.

Efexus 1:10

Vajtswv yuav “sau txhua yam los ua ib ke rau Khetos ua tus thawj.”

Koj xav tias yog vim li cas peb lub caij nyoog hu ua “lub caij nyoog tso txoj cai uas muaj txhij txhua”? Koj xav tias cov lus “sau txhua yam los ua ib ke rau Khetos ua tus thawj” txhais li cas? Thaum koj xav txog tej lus no, cia li nyeem tej nqe vaj lug kub no: Efexus 4:13; 2 Nifais 30:7–8; Lus Qhuab Qhia thiab Kev Khi Lus 110:11–16; 112:30–32; 128:18–21. Tej zaum nej yuav txais kev tshoov siab kom sau ntawv piav txog tej lus no.

Kuj saib David A. Bednar, “Sau Txhua Yam Los Ua Ib Ke rau Khetos Ua tus Thawj,” Liahona, Kaum Ib Hlis Ntuj 2018, 21–24.

Efexus 2:19–22; 3:1–7; 4:11–16

Lub hauv paus ntawm lub Koom Txoos yog cov thwj tim thiab cov yaj saub, thiab Yexus Khetos yog tus ncej tas.

Raws li hais nyob hauv Efexus 2:19–22; 3:1–7; 4:11–16, vim li cas peb muaj cov yaj saub thiab cov thwj tim? Cia li xav txog tej zaj lus los ntawm cov yaj saub thiab cov thwj tim uas koj tau hnov nyob hauv lub tuam rooj sab laj. Lawv tej lus qhia ua dab tsi thiaj muaj raws li tej lub hom phiaj uas Povlauj hais txog? Piv txwv hais tias, tej lus qhia no tau pab koj li cas kom tsis txhob “raws luag qab rau ub rau no”?

Vim li cas Yexus Khetos zoo li ib lub ncej zeb tag rau lub Koom Txoos? Vim li cas Nws zoo li ib lub ncej zeb tag rau koj lub neej?

Kuj saib Tes Hauj Lwm 4:10–12.

ncej zeb tag ntawm ib lub tsev

Yexus Khetos yog lub Koom Txoos lub ncej zeb tag.

Efexus 5:21–6:4

Kev ua raws li tus Cawm Seej tus yam ntxwv yuav pab kuv tsev neeg sib raug zoo.

Thaum koj nyeem Efexus 5:21–6:4, cia li xav txog tej lus qhia nyob hauv tej nqe no uas yuav pab koj tsev neeg sib raug zoo.

Yuav tsum nco ntsoov tias Povlauj tau sau nws tej lus hauv Efexus 5:22–24 raws li tej kab lig kev cai hauv nws lub caij nyoog. Cov yaj saub thiab cov thwj tim niaj hnub no qhia tias cov txiv neej yeej tsis zoo dua li cov poj niam thiab cov niam tsev txiv tsev yuav tsum sib pab xws li nkawd “nyob sib txig” (saib “Tsev Neeg: Ib zaj Lus Tshaj Tawm rau lub Ntiaj Teb,” ChurchofJesusChrist.org). Txawm li ntawd los, koj tseem nrhiav tau tej lus qhia zoo nyob hauv Efexus 5:25–33. Piv txwv hais tias, Yexus Khetos ua li cas kom qhia tias Nws hlub Nws Haiv Neeg Ntseeg? Qhov no qhia dab tsi rau peb txog tej yam peb yuav tsum ua yog tias cov txiv tsev thiab niam tsev sib pab xws li lawv nyob sib txig? Koj kawm tej yam twg txog koj tus kheej nyob hauv tej nqe no?

Efexus 6:10–18

Vajtswv tej cuab yeej yuav pab tiv thaiv kuv kom txhob raug kev phem.

Thaum koj nyeem Efexus 6:10–18, xav seb yog vim li cas Povlauj tau hais txog txhua lub cuab yeej li ntawd. “Vajtswv tej cuab yeej” tiv thaiv koj kom txhob raug dab tsi? Koj yuav ua li cas kom muab txhua lub cuab yeej los hnav txhua hnub?

Kuj saib 2 Nifais 1:23; Lus Qhuab Qhia thiab Kev Khi Lus 27:15–18.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Efexus 1:10.Kom qhia txog nqe no, Txwj Laug David A. Bednar tau hais lus piv txwv txog ib txoj hlua (saib “Sau Txhua Yam Los Ua Ib Ke rau Khetos Ua tus Thawj”). Xav seb nej puas muab txoj hlua rau nej tsev neeg saib thiab cia lawv tuav thiab ntsuam xyuas thaum nej hais tej feem ntawm Txwj Laug Bednar zaj lus. Vajtswv ua dab tsi kom sau txhua yam los ua ib ke rau Khetos ua tus thawj? Peb tau koob hmoov twg vim muaj txoj kev sau neeg los ua ke no?

Efexus 2:4–10; 3:14–21.Caw nej tsev neeg kom qhia txog tej lub sij hawm thaum lawv tau hnov Vajtswv thiab Yexus Khetos txoj kev hlub tshua raws li hais nyob hauv tej nqe no.

Efexus 2:12–19.Tej zaum nej tsev neeg yuav nyiam siv tej hauv ncoo los sis lwm yam uas nej muaj hauv tsev kom tsa ib phab ntsa ces muab rhuav. Povlauj tau hais txog ib “phab ntsa” uas kem nruab nrab Lwm Haiv Neeg thiab cov Neeg Yudais, tiam sis muaj tej phab ntsa uas kem nruab nrab cov neeg niaj hnub no. Yexus Khetos tau ua li cas kom “rhuav” tej phab ntsa no? Nws ua dab tsi kom “coj [peb] rov los cuag Vajtswv”? (nqe 16).

Efexus 6:10–18.Tej zaum nej tsev neeg yuav xav siv tej khoom hauv tsev los ua “Vajtswv tej cuab yeej” Daim video “The Armour of God” (ChurchofJesusChrist.org) yuav pab nej tsev neeg xav txog tej cuab yeej no, thiab lawv yuav nrhiav tej lus piav txog tej no nyob hauv “The Whole Armor of God” (Friend, Rau Hli Ntuj 2016, 24–25). Txhua lub ua dab tsi kom tiv thaiv peb sab ntsuj plig? Peb yuav ua li cas kom ib leeg pab ib leeg “muab tej cuab yeej uas Vajtswv pub rau [peb] lawm los hnav” (Efexus 6:11) txhua hnub.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Cia Siab rau Xi-oos,” Cov Nkauj Qhuas Vajtswv, zaj 119.

Kev Kawm Zoo Dua Ntxiv ntawm Yus Ib Leeg

Cia tus Ntsuj Plig coj koj txoj kev kawm vaj lug kub. Cia li mloog tus Ntsuj Plig thaum Nws coj koj mus rau tej yam uas koj yuav kawm txhua hnub, tsis hais thaum twg yog ib lub ntsiab lus uas koj tsis tau xav tias koj yuav tsum kawm.

txiv neej hnav ris tsho tiv rog raws li muaj hauv Phau Tshiab

Kev muab tej cuab yeej uas Vajtswv pub rau peb lawm los hnav yuav tiv thaiv peb sab ntsuj plig.