peb tug poj niam taug kev nyob ze lub tuam tsev

Kaum Hli Ntuj 23–29

1 thiab 2 Timautes; Titus; Filemaus

“Ua Koj lub Neej rau cov Ntseeg Xyaum”

Tej lub sij hawm yuav pab koj kawm vaj lug kub thaum koj muaj ob peb lo lus nug hauv koj lub siab. Cia li thov tus Ntsuj Plig coj koj mus rau tej lus teb cov lus nug no thaum koj kawm, thiab sau ntawv txog tej kev tshoov siab uas koj txais tau.

Sau Ntawv txog Koj tej Kev Tshoov Siab

Nyob hauv tej tsab ntawv uas Povlauj sau rau Timautes, Titus, thiab Filemaus, peb pom tias tus Tswv tus tub qhe xav li cas hauv nws lub siab. Tsis zoo li Povlauj tej tsab ntawv uas nws sau rau tej pawg ntseeg, tej tsab ntawv no yog sau rau tib neeg—Povlauj cov phooj ywg thiab cov kwv luag uas ua Vajtswv txoj hauj lwm—thiab thaum yus nyeem ces zoo li yus mloog ob tug neeg sib tham. Peb nyeem txog Povlauj tej lus txhawb nqa Timautes thiab Titus, ob tug thawj coj ntawm ob pawg ntseeg, kom pab nkawd ua hauj lwm hauv lub Koom Txoos. Peb nyeem txog nws txoj kev yaum kom nws tus phooj ywg Filemaus rov qab sib raug zoo nrog ib tug Neeg Ntseeg thiab ua rau nws zoo li nws yog ib tug kwv tij hauv txoj moo zoo. Povlauj tej lus los tsis tau hais rau peb ncaj qha, thiab tej zaum nws tsis tau xav tias neeg coob mam li nyeem. Tiam sis nyob hauv tej tsab ntawv no peb txais tau tej lus ntuas thiab tej lus txhawb nqa, txawm yog peb ua hauj lwm dab tsi rau Yexus Khetos los xij.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Timautes thiab Titus yog leej twg?

Timautes thiab Titus tau ua hauj lwm nrog Povlauj thaum nws mus hla teb chaws qhia txoj moo zoo. Thaum nkawd ua hauj lwm, Povlauj tau tso siab rau nkawd. Tom qab ntawd tus Tswv tau hu Timautes los ua lub Koom Txoos tus thawj coj nyob hauv Efexus, thiab Titus tau los ua tus thawj coj nyob hauv Keletes. Nyob hauv ob tsab ntawv no, Povlauj tau qhia Timautes thiab Titus thiab hais lus txhawb nqa nkawd hais txog nkawd tej kev lav ris, uas yog kev qhia txoj moo zoo thiab hu cov txiv neej los ua npisov.

Kuj saib Bible Dictionary, “Povlauj tej Tsab Ntawv,” “Timautes,” “Titus.”

ob tug tub txib hais nrog ib tug txiv neej sib tham

“Koj tsis txhob pub leej twg thuam hais tias koj tseem hluas, tiam sis koj yuav tsum ua koj lub neej rau cov ntseeg xyaum” (1 Timautes 4:12).

1 Timautes 4:10–16

“Ua koj lub neej rau cov ntseeg xyaum.”

Timautes yog ib tug tub hluas, tiam sis Povlauj paub tias nws yuav ua ib tug thawj coj hauv lub Koom Txoos txawm yog nws tseem hluas. Povlauj tau hais lus ntuas li cas rau Timautes nyob hauv 1 Timautes 4:10–16? Tej lus ntuas no yuav pab koj li cas kom coj lwm tus rau tus Cawm Seej thiab nws txoj moo zoo?

Kuj saib Amas 17:11.

2 Timautes

“Rau qhov tus Ntsuj Plig uas Vajtswv pub rau peb yeej xav kom peb [tsis txhob muaj lub siab ntshai], vim nws yuav ua hauj lwm rau hauv peb lub siab kom peb muaj hwj chim, kom muaj lub siab hlub lwm tus, thiab kom peb paub tswj peb lub siab.”

Tib neeg xav tias 2 Timautes yog tsab ntawv kawg uas Povlauj sau, thiab zoo li nws twb paub tias nws tshuav sij hawm tsis ntau nyob hauv lub ntiaj teb no (saib 2 Timautes 4:6–8). Koj xav tias Timautes xav li cas, vim nws paub tias tsis ntev nws yuav tsis muaj nws tus thawj coj thiab tus uas qhia nws? Povlauj tau hais li cas kom txhawb nqa nws? Tej zaum koj yuav xav nyeem thaum koj xav txog tej yam uas nyuaj rau koj thiab tej yam uas koj ntshai. Muaj tej zaj lus twg txog kev cia siab thiab kev txhawb nqa uas tus Tswv xav kom koj paub nyob hauv 2 Timautes?

Kuj saib Kelly R. Johnson, “Lub Hwj Chim uas Kav Ib Txhis,” Liahona, Kaum Ib Hlis Ntuj 2020, 112–14.

2 Timautes 3

Kev ua raws li txoj moo zoo yeej pab peb nyob nyab xeeb kom txhob raug tej xwm txheej ntawm sab ntsuj plig nyob hauv hnub nyoog kawg.

Peb nyob hauv “lub sij hawm uas ntiaj teb yuav kawg” raws li Povlauj hais, thiab “muaj kev ntxhov siab heev” (2 Timautes 3:1). Thaum koj nyeem 2 Timautes 3, sau ntawv txog tej kev ntxhov siab hauv hnub nyoog kawg uas Povlauj hais (kuj saib 1 Timautes 4:1–3):

Koj puas txawj xav txog tej yam hauv lub ntiaj teb niaj hnub no uas yog tej kev ntxhov siab li no—los sis nyob hauv koj lub neej? Tej kev ntxhov siab no, zoo li cov neeg nyob hauv nqe 6, puas “pheej mus hauv [koj lub] tsev, mus ntxias [koj]”? Koj kawm dab tsi nyob hauv 2 Timautes 3, thiab nyob hauv lwm tsab ntawv no, uas yuav pab koj thiab koj tsev neeg nyob nyab xeeb kom tsis txhob raug tej kev ntxhov siab ntawm sab ntsuj plig no? (saib, ua piv txwv, 1 Timautes 1:3–11; 2 Timautes 2:15–16; Titus 2:1–8).

Filemaus yog leej twg?

Filemaus yog ib tug Neeg Ntseeg uas Povlauj tau pab hloov siab los ntseeg. Filemaus muaj ib tug qhev hu ua Auneximus, uas twb dim Loos mus. Nyob ntawd Auneximus tau ntsib Povlauj thiab hloov siab los ntseeg txoj moo zoo. Povlauj tau xa Auneximus rov qab mus rau Filemaus thiab sau ib tsab ntawv kom yaum Filemaus “tsis txhob suav hais tias, [Auneximus] yog ib tug tub txib xwb, nim no nws tsim txiaj dua ib tug tub txib, nws los ua koj ib tug kwv” (Filemaus 1:16).

Filemaus

Yexus Khetos cov thwj tim ib leeg ua zoo rau ib leeg zoo li lawv yog cov kwv tij thiab cov muam.

Thaum koj nyeem Povlauj tsab ntawv rau Filemaus, xav seb koj yuav ua li cas kom ua raws li nws tej lus qhia thiaj li yuav nrog lwm tus sib raug zoo. Tsim nyog koj yuav xav txog tej lus nug nram qab no:

• Nqe 1–7: Tej lo lus xws li “nrog wb ua tib txoj hauj lwm” thiab “tus uas ua Yexus Khetos ib tug tub rog ib yam li wb” qhia dab tsi rau koj txog Haiv Neeg Ntseeg txoj kev sib raug zoo? Thaum twg koj tau ib tug kwv tij los sis muam uas ntseeg Khetos tau “ua rau [koj] zoo siab kawg li”?

• Nqe 8–16: Cov lus “kom ua raws li hais” thiab “thov” txawv li cas? Vim li cas Povlauj tau xaiv kom thov Filemaus es tsis hais kom ua raws li [nws] qhia? Povlauj tau xav tias yuav zoo li cas thaum xa Auneximus rov qab mus rau Filemaus?

• Nqe 16: Kev “ua koj ib tug kwv [los sis ib tug muam], rau qhov nws ntseeg Yexus Khetos lawm” txhais li cas? Koj puas paub leej twg uas koj yuav tsum xav li no txog nws?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

1 Timautes 2:9–10.Qhov uas peb “ua hauj lwm zoo pab lwm tus” txhais li cas? Peb tsev neeg yuav ua hauj lwm zoo twg rau lwm tus lub lim tiam no? Tej zaum nej yuav xav hu ib zaj nkauj txog kev ua hauj lwm zoo, xws li “Kuv Puas Tau Ua Zoo Hnub No?” (Cov Nkauj Qhuas Vajtswv, zaj 101).

1 Timautes 4:12.Xwv kom pab nej tsev neeg xav “ua [nej] lub neej rau cov ntseeg xyaum,” xav seb puas caw lawv kos duab txog cov neeg uas tau coj yam txwv zoo rau lawv xyaum. Cov neeg no tau pab peb li cas kom coj raws li Yexus Khetos? Thawj Tswj Hwm Thomas S. Monson zaj lus “Ua ib tug Yam Ntxwv thiab Ib txoj Kev Kaj” (Liahona, Kaum Ib Hlis Ntuj 2015, 86–88) yuav muab tswv yim rau nej txog kev coj yam ntxwv rau lwm tus.

1 Timautes 6:7–12.Vim li cas koj xav tias “qhov uas neeg ntshaw nyiaj txiag yog ib qho uas ua rau neeg ua txhua yam phem”? Muaj tej xwm txheej twg thaum peb tsom ntsoov rau peb cov nyiaj txiag los sis peb tej khoom? Peb yuav tsum ua li cas kom thiaj li txaus siab saib cov koob hmoov uas peb muaj lawm?

2 Timautes 3:14–17.Raws li tej nqe no qhia, cov uas paub thiab kawm cov vaj lug kub yuav tau koob hmoov twg? Tej zaum nej tsev neeg yuav nyiam qhia txog tej nqe vaj lug kub uas lawv xav tias muaj nqis heev.

Filemaus 1:17–21.Povlauj txaus siab ua dab tsi rau Auneximus? Vim li cas qhov no yeej zoo li qhov uas tus Cawm Seej txaus siab ua rau peb? (kuj saib 1 Timautes 2:5–6; Lus Qhuab Qhia thiab Kev Khi Lus 45:3–5). Peb yuav tsum ua dab tsi kom coj raws li Povlauj thiab tus Cawm Seej tus yam ntxwv?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Shine On,” Children’s Songbook, 144.

Kev Qhia Zoo Dua Ntxiv

Qhia cov lus qhuab qhia uas meej thiab yooj yim. Txoj moo zoo yeej zoo nkauj vim yog ib qho yooj yim (saib Lus Qhuab Qhia thiab Kev Khi Lus 133:57). Koj tsis tas ua kom koj tsev neeg muaj kev lom zem thaum koj qhia lawv, tiam sis cia li siv zog kom qhia tej lus qhuab qhia dawb huv thiab yooj yim xwb (saib 1 Timautes 1:3–7).

ob tug me nyuam kawm vaj lug kub

“Koj yeej paub hais tias txij thaum koj tseem yau, koj yeej kawm Vajtswv Txoj Lus los lawm. Vajtswv Txoj Lus pab tau kom tus uas kawm muaj tswv yim; thiab yog nws los ntseeg Yexus Khetos, nws yuav dim nws lub txim” (2 Timautes 3:15).