“Kaum Hli Ntuj 30–Kaum Ib Hlis Ntuj 5. Henplais 1–6: ‘Yexus Khetos, “tus uas Pub Txoj Sia Ntev Dhawv Mus Ib Txhis,”’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Kaum Hli Ntuj 30–Kaum Ib Hlis Ntuj 5. Henplais 1–6,” Los, Nrog Kuv Mus—Rau Ib Leeg thiab Tsev Neeg: 2023
Nkile-as cov Tshuaj, los ntawm Annie Henrie
Kaum Hli Ntuj 30–Kaum Ib Hlis Ntuj 5
Henplais 1–6
Yexus Khetos, “tus uas Pub Txoj Sia Ntev Dhawv Mus Ib Txhis”
Qhov uas koj sau ntawv txog tej kev tshoov siab uas koj txais yuav pab koj paub tias tus Vaj Ntsuj Plig Dawb Huv xav qhia dab tsi rau koj. Yog koj ua raws li tej kev tshoov siab ntawd ces koj qhia tias koj ntseeg tiag.
Sau Ntawv txog Koj tej Kev Tshoov Siab
Peb txhua tus yuav tsum tso ib yam dab tsi tseg kom thiaj li txais tau Yexus Khetos txoj moo zoo—tej cwj pwm tsis zoo, tej kev ntseeg tsis yog, tej yam phem, los sis lwm yam. Lwm Haiv Neeg nyob hauv lub Koom Txoos puag thaum ub mas thaum lawv hloov siab los ntseeg lawv yuav tsum tso lawv tej vaj tswv cuav pov tseg. Rau cov Neeg Henplais (los sis Neeg Yudais), kev hloov siab los ntseeg, yeej nyuaj zog. Vim hais tias, lawv txoj kev ntseeg thiab kab lig kev cai yeej ib txwm muaj cag los ntawm kev teev tiam tus Vajtswv uas muaj tseeb thiab Nws cov yaj saub tej lus qhia, pib puag thaum ub. Tiam sis cov Thwj Tim qhia tias Yexus Khetos tau muab Mauxes txoj kev cai tiav lawm thiab muaj ib txoj kev cai siab dua rau cov ntseeg ua. Qhov uas cov Henplais ntseeg Khetos puas txhais tias lawv yuav tsum tso lawv tej kev ntseeg dhau los thiab tej keeb kwm thaum ub pov tseg? Tsab Ntawv rau cov Henplais xav teb tej lus nug no thaum qhia tias Mauxes txoj kev cai, cov yaj saub, thiab cov kab ke yeej tseem ceeb, tiam sis Yexus Khetos yog tus uas tseem ceeb tshaj (saib Henplais 1:1–4; 3:1–6; 7:23–28). Muaj tseeb tiag, tej yam no ua tim khawv txog Khetos qhia tias Nws yog Vajtswv Leej Tub thiab yog tus Mexiyas uas Vajtswv cog lus rau cov Neeg Yudais tias Nws yuav los.
Kev hloov siab los ntseeg, thaum ub thiab niaj hnub no, txhais tias peb muab siab npuab Yexus Khetos thiab nco txog Nws txhua lub sij hawm nyob hauv peb lub neej. Qhov no txhais tias peb tuav nkaus qhov tseeb thiab muab tej yam uas tab kaum peb tso tseg, vim Nws yog “tus uas pub txoj sia ntev dhawv mus ib txhis rau txhua tus uas mloog nws lus” (Henplais 5:9).
Tej lub Tswv Yim Kawm Vaj Lug Kub ntawm Yus Ib Leeg
Leej twg yog tus uas sau Tsab Ntawv rau cov Henplais?
Ib co kws tshawb fawb tsis paub tseeb Povlauj puas tau sau Tsab Ntawv rau cov Henplais. Cov lus uas twb siv hauv phau Henplais yeej tsis zoo li Povlauj lwm tsab ntawv, thiab cov ntawv qub tshaj plaws tsis tau qhia tias leej twg yog tus uas sau. Tiam sis, vim tias tej lub tswv yim uas hais nyob hauv phau Henplais yeej muaj lub ntsiab zoo li Povlauj tej lus qhia, Tsoom Haiv Neeg Ntseeg hauv Hnub Nyoog Kawg, raws li lwm txoj kev teev ntuj ntseeg Khetos, yeej ib txwm tau pom zoo tias nyaj Povlauj tau pab sau tsab ntawv no.
Kuj saib Bible Dictionary, “Pauline Epistles.”
Yexus Khetos muaj “hwv xyeej” ib yam li Leej Txiv Saum Ntuj Ceeb Tsheej.
Ua nyuaj rau cov Neeg Yudais ntseeg tias Yexus Khetos yog Vajtswv Leej Tub. Cia li saib Tsab Ntawv rau cov Henplais ua tim khawv txog Nws. Piv txwv hais tias, thaum koj nyeem thawj tsib tshooj, tej zaum koj yuav xav sau ntawv txog Yexus Khetos tej lub npe, lub luag hauj lwm, tej cwj pwm, thiab tej hauj lwm uas muaj nyob haud. Tej no qhia dab tsi rau koj txog tus Cawm Seej? Tej no qhia dab tsi rau koj txog Leej Txiv Saum Ntuj Ceeb Tsheej?
Cov lus los ntawm Txwj Laug Jeffrey R. Holland puas pab tau koj to taub tej lus qhia nyob hauv tej tshooj no? “Yexus … tau los kom tib neeg xav zoo txog Vajtswv thiab thov kom lawv hlub Leej Txiv Saum Ntuj Ceeb Tsheej ib yam li Nws yeej ib txwm thiab yeej yuav hlub lawv. … Yog li ntawd, kev pub rau cov tshaib plab noj, kev kho cov neeg mob, kev rau txim rau cov uas muaj lub siab dag, thov kom tib neeg ntseeg—tej no yog Khetos tau qhia kev rau peb mus cuag Leej Txiv” (“The Grandeur of God,” Liahona, Kaum Ib Hlis Ntuj 2003, 72).
Henplais 2:9–18; 4:12–16; 5:7–8
Yexus Khetos tau raug tag nrho kev txom nyem Nws thiaj li yuav to taub thiab pab kuv thaum kuv raug txom nyem.
Koj puas xav tias koj yuav yuav muaj cuab kav “zaum saum [vaj ntxwv lub rooj zaum]” thiab thov kom Nws zam txim rau koj? (Henplais 4:16). Muaj ib zaj lus nyob hauv Tsab Ntawv rau cov Henplais uas qhia tias txawm peb ua txhaum thiab muaj kev qaug zog, Vajtswv los yeej mam li txais yuav peb thiab Nws txoj kev tshav ntuj los Nws yuav pub rau peb. Koj kawm dab tsi nyob hauv Henplais 2:9–18; 4:12–16; 5:7–8 uas pab koj paub tseeb tias Yexus Khetos yuav pab koj thaum koj muaj teeb meem hauv lub ntiaj teb no? Xav seb koj puas sau ntawv hauv ib phau ceev xwm txheej txog koj tej kev xav tias tus Cawm Seej tau ua dab tsi rau koj.
Kuj saib Mauxiyas 3:7–11; Amas 7:11–13; 34; Mathais S. Holland, “Lub Txiaj Ntsim Zoo Nkauj Heev ntawm Leej Tub,” Liahona, Kaum Ib Hlis Ntuj 2020, 45–47.
Yuav muab Vajtswv cov koob hmoov rau cov uas “tsis txhob tawv ncauj.”
Thaum nws rov qab hais dab neeg txog cov Ixayees puag thaum ub, Povlauj xav yaum kom cov Neeg Yudais tsis txhob ua raws li qhov txhaum uas lawv poj koob yawm txwv ua—lawv xyeej Vajtswv cov koob hmoov vim lawv tsis ntseeg. (Koj nyeem tau zaj dab neeg uas Povlauj hais txog nyob hauv Teev Npe 14:1–12, 26–35.)
Xav seb yuav siv Henplais 3:7–4:11 li cas hauv koj lub neej. Kom ua li no, tej zaum tsim nyog xav txog tej lus nug zoo li no:
-
Cov Neeg Ixayees tau ua li cas kom ua rau tus Tswv chim? (saib Henplais 3:8–11). Yuav raug dab tsi yog tias yus muaj ib lub siab tawv?
-
Thaum twg kuv tau cia kuv lub siab tawv tawv? Puas muaj tej koob hmoov twg uas Vajtswv xav pub rau kuv tiam sis kuv tsis txais vim tias kuv tsis muaj kev ntseeg txaus?
-
Kuv yuav ua li cas kom muaj ib lub siab mos muag thiab ib lub siab uas xav ua zoo? (saib Ethaws 4:15; Paj Lug 3:5–6; Amas 5:14–15).
Kuj saib 1 Nifais 2:16; 15:6–11; Yakhauj 1:7–8; Amas 12:33–36; Neill F. Marriott, “Muab Peb tej Siab rau Vajtswv,” Liahona, Kaum Ib Hlis Ntuj 2015, 30–32.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Henplais 1:8–9.Yexus tau ua li cas kom qhia tias Nws nyiam kev ncaj ncees thiab ntxub kev ua phem? Yog peb muaj tej kev xav tsis ncaj ncees, ces peb yuav ua li cas kom hloov tej kev xav ntawd?
-
Henplais 2:1–4.Nej puas txawj xav txog ib zaj lus uas siv khoom kom pab nej tsev neeg to taub tias kev tuav nkaus txoj moo zoo tej lus tseeb “uas peb tau hnov los lawm” txhais li cas? Tej zaum nej yuav xav siv ib qho khoom uas nyuaj tuav kom qhia zaj lus no. Vim li cas peb txoj kev txhawb peb zaj lus tim khawv lub zog yeej zoo li kev tuav qhov khoom no? Peb yuav ua li cas kom tej “uas peb tau hnov los lawm” yuav tsis poob mus? (nqe 1).
-
Henplais 2:9–10.Xwv kom paub tias cov lus “tus thawj tub rog ntawm lawv txoj kev cawm seej” txhais li cas, tej zaum nej yuav xav sib tham txog qhov uas ib tug thawj tub rog ua dab tsi. Kev cawm seej txhais li cas? Vim li cas Yexus Khetos yeej zoo li ib tug thawj tub rog uas coj peb thiab coj peb dim peb lub txim?
-
Henplais 5:1–5.Tej nqe no yuav pab nej sib tham txog qhov uas Vajtswv hu ib tug neeg dhau los ntawm tus uas muaj txoj cai txhais li cas? Peb yuav kawm dab tsi los ntawm Yexus Khetos tus yam ntxwv txog kev txais thiab ua peb tej hauj lwm uas Vajtswv hu kom peb ua?
“Tsis muaj leej twg yuav muaj cuab kav tsa nws ua tus Pov Thawj Hlob, tsuas yog Vajtswv pom zoo tsa tus twg tus ntawd thiaj tau ua, ib yam li Vajtswv pom zoo tsa Aloos ua tus Pov Thawj Hlob” (Henplais 5:4). Mauxes Hu Aloos Los Ua tus Pov Thawj, los ntawm Harry Anderson
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Tus Tswv Nyob Nrog Nraim Kuv,” Cov Nkauj Qhuas Vajtswv, naj npawb 36.
Kev Kawm Zoo Dua Ntxiv ntawm Yus Ib Leeg
Sim ua tej yam uas sib zoo li qub. Tsis txhob siv ib txoj kev kawm vaj lug kub xwb, tiam sis xav txog lwm txoj kev uas koj yuav siv kom kawm tau. Yog xav tau tswv yim ntxiv, saib “Tej lub Tswv Yim Pab Koj Kawm Vaj Lug Kub” nyob ntawm qhov pib phau no.
Txoj Kev Kaj ntawm lub Ntiaj Teb, los ntawm Walter Rane