“Kaum Ib Hlis Ntuj 6–12. Henplais 7–13: ‘Tus Pov Thawj Hlob Saib Xyuas Ib Puas Tsav Yam Zoo,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Kaum Ib Hlis Ntuj 6–12. Henplais 7–13,” Los, Nrog Kuv Mus—Rau Ib Leeg thiab Tsev Neeg: 2023
Mekhixedes Foom Koob Hmoov rau Anplas, los ntawm Walter Rane. Tus kos duab pub dawb
Kaum Ib Hlis Ntuj 6–12
Henplais 7–13
“Tus Pov Thawj Hlob Saib Xyuas Ib Puas Tsav Yam Zoo”
Thaum koj nyeem Henplais 7–13, tej zaum koj yuav txais tej kev tshoov siab los ntawm tus Vaj Ntsuj Plig Dawb Huv. Xav seb koj yuav sau ntawv li cas txog tej yam no; piv txwv hais tias, tej zaum koj yuav xav sau nyob rau hauv zaj no, nyob hauv phau vaj lug kub, los sis hauv ib phau ceev xwm txheej.
Sau Ntawv txog Koj tej Kev Tshoov Siab
Tej lub sij hawm Haiv Neeg Ntseeg uas rau siab ntseeg yuav raug luag thuam thiab tsim txom ua rau lawv nyuaj siab heev (saib Henplais 10:32–38). Povlauj paub tias cov Neeg Yudais uas coj Kev Ntseeg Khetos lawm twb raug kev tsim txom heev vim yog los ntawm lawv txoj kev ntseeg tshiab. Kom yaum lawv ua raws nraim li lawv zaj lus tim khawv, nws hais rau lawv txog cov neeg rau siab ntseeg coob los ntawm lawv zaj keeb kwm: Anpes, Enauj, Nau-as, Anplaham, Xalas, Yauxej, Mauxes—“neeg coob coob … ua tim khawv” tias muaj Vajtswv cov lus cog tseg tiag tiag thiab yeej muaj nqis yog peb tos ntsoov (saib Henplais 11; 12:1). Kab lig kev cai no yeej yog koj li thiab. Yeej yog ib caj ceg ntawm kev ntseeg uas ua rau txhua tus koom ua ke cov uas “ntsia ntsoov Yexus tus uas yog peb lub hauv paus kev ntseeg thiab ua kom peb kev ntseeg tiav” (Henplais 12:2). Vim muaj Yexus Khetos, thaum twg kev tsim txom ua rau peb xav “thim rov qab lawm,” peb yuav xav “peb cia li muaj nplooj siab dawb paug los cuag Vajtswv thiab cia siab ntsoov rau nws ” (Henplais 10:22, 38). Rau peb, ib yam li cov Neeg ntseeg puag thaum ub, Yexus Khetos yog peb “tus Pov Thawj Hlob saib xyuas ib puas tsav yam zoo uas nim no twb muaj lawm” (Henplais 9:11).
Tej lub Tswv Yim Kawm Vaj Lug Kub ntawm Yus Ib Leeg
Lub Pov Thawj Hwj Mekhixedes pab kuv los cuag Yexus Khetos.
Tau ntev lawm cov Neeg Yudais tau siv lub Pov Thawj Hwj Levis, los yog lub Pov Thawj Hwj Aloos. Tiam sis thaum muaj Yexus Khetos txoj moo zoo tag nrho ces twb muab lub Pov Thawj Hwj Mekhixedes txum tim rov qab los, uas muaj cov koob hmoov loj tshaj plaws. Koj kawm dab tsi txog lub Pov Thawj Hwj Mekhixedes los ntawm Henplais 7? Nco ntsoov txog lub hom phiaj ntawm tsab ntawv no—ib yam li tag nrho cov vaj lug kub—yog kom muaj kev ntseeg Yexus Khetos, yog li ntawd tej zaum koj yuav xav sau lus cim txog tej nqe uas ua tim khawv txog Nws.
Nov yog tej lus tseeb uas tej zaum koj yuav nrhiav tau:
-
Joseph Smith Kev Txhais, Henplais 7:3, 21: Cov uas muaj lub Pov Thawj Hwj Mekhixedes los ua neeg “zoo li Vajtswv Leej Tub” thiab yog “[cov] pov thawj txij no mus tas ib txhis”
-
Henplais 7:11: Lub Pov Thawj Hwj Levis tsis pab kom tib neeg “zoo tag nrho” yog li ntawd lub Pov Thawj Hwj Mekhixedes twb tau pauv qhov chaw (saib Lus Qhuab Qhia thiab Kev Khi Lus 84:18–22).
-
Henplais 7:20–21: Peb txais lub Pov Thawj Hwj Mekhixedes los ntawm “kev lav lus thiab kev khi lus” (saib Lus Qhuab Qhia thiab Kev Khi Lus 84:33–44).
Koj txais cov koob hmoov twg los ntawm lub Pov Thawj Hwj Mekhixedes thiab “cov kab ke ntawd”? (Lus Qhuab Qhia thiab Kev Khi Lus 84:20). Lub Pov Thawj Hwj Mekhixedes tau pab koj li cas kom los cuag Khetos?
Kuj saib Amas 13:1–13; Lus Qhuab Qhia thiab Kev Khi Lus 121:36–46; Phau Qhia txog Vaj Lug Kub, “Pov Thawj Hwj Mekhixedes,” scriptures.ChurchofJesusChrist.org; Phau Qhia txog Vaj Lug Kub, “Mekhixedes,” scriptures.ChurchofJesusChrist.org; Russell M. Nelson, “Tej Nqi Zog ntawm Sab Ntsuj Plig,” Liahona, Kaum Ib Hlis Ntuj 2019, 76–79; Dallin H. Oaks, “Lub Pov Thawj Hwj Mekhixedes thiab cov Yawm Sij,” Liahona, Tsib Hlis Ntuj 2020, 69–72.
Cov kab ke puag thaum ub thiab cov kab ke uas muaj niaj hnub no yeej yog lub cim txog Yexus Khetos.
Cov uas tau nyeem tsab ntawv rau cov neeg Henplais puag thaum ub tau paub zoo txog lub tuam tsev ntaub thiab cov kab ke uas Povlauj piav txog. Tiam sis ib txhia tsis tau paub tias lub hom phiaj ntawm cov kab ke no yog kom qhia txog Yexus Khetos txoj kev txi theej txhoj.
Puag thaum ub, txog hnub hu ua Hnub Theej Txhoj, ib tug pov thawj hlob twb nkag hauv qhov chaw dawb huv tshaj plaws nyob hauv lub tuam tsev Yeluxalees thiab tau muab ib tug ntshis los yog tus yaj txi kom theej Ixayees kev txhaum.
Thaum kom nyeem txog Povlauj tej lus piav txog cov kab ke no, nrhiav tej lub cim thiab tej lus qhia uas pab koj to taub tus Cawm Seej ntiag tug hauj lwm kom theej peb lub txhoj.
Cov kab ke uas peb ua niaj hnub no yeej tsis zoo ib yam li cov kab ke hauv Povlauj lub caij nyoog, tiam sis lub hom phiaj yeej zoo ib yam. Cov kab ke uas peb ua niaj hnub no puas ua tim khawv txog Yexus Khetos?
Yog koj xav kawm ntxiv txog cov Neeg Yudais cov kab ke puag thaum ub thiab tej lub cim txog cov kab ke ntawd, saib ob daim video “The Tabernacle” thiab “Sacrifice and Sacrament” (ChurchofJesusChrist.org).
Yuav tsum tso siab rau Vajtswv tej lus cog tseg kom thiaj li muaj kev ntseeg.
Yog tias leej twg tau hais kom koj qhia tias kev ntseeg yog dab tsi, ces koj yuav hais li cas? Muam Anne C. Pingree tau siv tej lus los ntawm Henplais 11 kom qhia tias kev ntseeg yog dab tsi: “Yog kev txawj cia siab rau tej lus cog tseg uas yus pom yuav muaj ‘yav tom ntej’ tiam sis tej zaum yuav tsis txais hauv lub neej no” (“Seeing the Promises Afar Off,” Liahona, Kaum Ib Hlis Ntuj 2003, 14).
Xav seb koj puas sau ntsiab lus txog kev ntseeg thaum koj xav txog tej lub tswv yim nyob hauv Henplais 11. Tshooj no qhia dab tsi rau koj txog kev ntseeg los ntawm cov neeg tus yam ntxwv? (Kuj saib Ethaws 12:6–22.)
Koj pom tej lus cog tseg twg uas yuav txais thaum “yav tom ntej”? Koj yuav ua li cas kom qhia tus Tswv tias koj “cia siab [rau tej lus cog tseg ntawd] thiab zoo siab tos”? (Henplais 11:13).
Kuj saib Amas 32:21, 26–43; Jeffrey R. Holland, “.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Henplais 10:32–36.Tej zaum nej yuav xav caw nej tsev neeg hais txog tej lub sij hawm thaum qhov tseeb tau ua rau lawv xav tias lawv “nyob hauv qhov kaj.” Tej yam no yuav pab peb li cas kom “tsis txhob poob siab” thaum peb raug kev sim siab los sis kev ua xyem xyav?
-
Henplais 11.Nej yuav ua li cas kom pab nej tsev neeg kawm los ntawm cov neeg rau siab ntseg uas hais txog nyob hauv Henplais 11? Tej zaum yuav lom zem heev yog nej ua yeeb yam txog cov neeg no ib txhia. Nej nyeem tau txog tej dab neeg no nyob hauv Phau Qub cov Dab Neeg. Los sis tej zaum nej tsev neeg yuav xav sib tham txog cov neeg rau siab ntseeg uas nej paub—tsis hais cov poj koob yawm txwv, lub Koom Txoos cov thawj coj, thiab cov mej zeej hauv nej zej zog. Tej zaum nej yuav xav hu ib zaj nkauj txog kev ntseeg, xws li “Faith” (Children’s Songbook, 96).
-
Henplais 12:2.Raws li nqe no hais, vim li cas Yexus txaus siab nyiaj txoj kev mob thiab kev txom nyem saum tus ntoo khaub lig? Qhov no qhia dab tsi rau peb txog txoj kev nyiaj peb tej kev sim siab? Thawj Tswj Hwm Russell M. Nelson tau qhia tswv yim txog nqe no nyob hauv nws zaj lus “Kev Xyiv Fab thiab Kev Nyiaj Kom Dhau ntawm Sab Ntsuj Plig” (Liahona, Kaum Ib Hlis Ntuj 2016, 81–84).
-
Henplais 12:5–11.Vim li cas tus Tswv qhuab ntuas peb? Peb kawm dab tsi hauv tej nqe no txog qhov uas tus Tswv xav li cas txog kev qhuab ntuas? Tej nqe no puas hloov peb txoj kev qhuab ntuas lwm tus los sis hloov qhov uas peb xav li cas thaum lwm tus qhuab ntuas peb?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Faith,” Children’s Songbook, 96–97.
Kev Qhia Zoo Dua Ntxiv
Siv cov nkauj caw tus Ntsuj Plig los kawm cov lus qhuab qhia. Thawj Pawg Thawj Tswj Hwm hais tias, “Cov nkauj muaj hwj chim loj kawg nkaus rau kev pab [peb] sab ntsuj plig loj hlob tuaj” (“Thawj Pawg Thawj Tswj Hwm Lus Cev,” Cov Nkauj Qhuas Vajtswv, x). Tej zaum ib zaj nkauj txog kev ntseeg, xws li “Tso Siab Ruaj Nrees Rau Kev Ntseeg” (Cov Nkauj Qhuas Vajtswv, zaj 118), yuav pab koj tsev neeg sib tham txog Henplais 11.
Tej lub cim thiab cov kab ke ntawm lub tuam tsev puag thaum ub tau qhia txog Yexus Khetos lub luag hauj lwm.