tus hluas ntxuav ib phab ntsa

Kaum Ib Hlis Ntuj 13–19

Yakaunpaus

“Ua Raws Li Txoj Lus, Tsis Yog cov uas Hnov tej Lus Xwb”

Thaum koj nyeem Yakaunpaus Tsab Ntawv, tsom ntsoov rau tej kab lus uas koj xav tias yog tej lus tseem ceeb. Koj puas txais kev tshoov siab kom “ua” raws li tej lus no? (Yakaunpaus 1:22).

Sau Ntawv txog Koj tej Kev Tshoov Siab

Tej lub sij hawm ib nqe vaj lug kub yuav hloov lub ntiaj teb tag nrho. Yakaunpaus 1:5 yeej yog cov lus ntuas yooj yim—yog koj tsis muaj tswv yim, cia li thov Vajtswv. Tiam sis thaum Joseph Smith muaj 14 xyoos es nws nyeem nqe vaj lug kub ntawd, “zoo li nqe vaj lug kub no tau nkag muaj hwj chim heev los mus rau txhua txoj kev xav ntawm [nws] lub siab” (Joseph Smith—Keeb Kwm 1:12). Vim nws txais kev tshoov siab li ntawd, Joseph tau ua raws li Yakaunpaus tej lus qhia thiab tau thov Vajtswv kom muaj tswv yim. Thiab Vajtswv twb tau ua siab dawb pub tswv yim rau nws, vim Joseph tau ua yog toog pom qhov tseem ceeb tshaj plaws nyob hauv tib neeg zaj keeb kwm—yog Thawj Zaug Ua Yog Toog. Txoj kev ua yog toog no tau hloov Joseph lub neej thiab ua rau nws muab Yexus Khetos lub Koom Txoos txum tim rov qab los rau hauv lub ntiaj teb no. Peb txhua tus tau koob hmoov vim Joseph Smith tau nyeem thiab ua raws li Yakaunpaus 1:5.

Koj yuav kawm dab tsi thaum koj nyeem Yakaunpaus Tsab Ntawv? Tej zaum ob peb nqe vaj lug kub yuav hloov koj los sis ib tug uas koj hlub lub neej. Tej zaum koj yuav nrhiav tej lus qhia koj thaum koj xav ua koj ntiag tug hauj lwm hauv lub neej no. Tej zaum koj yuav xav hais lus zoo los sis ua siab ntev zog. Tej zaum koj yuav txais kev tshoov siab kom ua raws nraim li koj txoj kev ntseeg. Txawm yog li cas los xij, cia tej lus no “nkag … los mus rau txhua txoj kev xav ntawm [koj] lub siab.” Ces thaum koj muaj lub siab mos siab muag “khaws Vajtswv tej lus” hauv koj lub siab, cia li ua raws li Vajtswv txoj lus, tsis yog ua cov mloog xwb (saib Yakaunpaus 1:21–22).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Yakaunpaus yog leej twg?

Neeg coob ntseeg tias tus uas sau Yakaunpaus Tsab Ntawv yog Maivliag ib tug tub, Yexus Khetos niam, yog li ntawd nws yog tus Cawm Seej tus kwv uas koom niam. Twb hais txog Yakaunpaus nyob hauv Mathais 13:55; Malakaus 6:3; Tes Hauj Lwm 12:17; 15:13; 21:18; thiab Kalatias 1:19; 2:9. Cov vaj lug kub hais tias Yakaunpaus yog ib tug thawj coj ntawm lub Koom Txoos nyob hauv Yeluxalees thiab tau hu nws ua ib tug Thwj Tim (saib Kalatias 1:19).

Yakaunpaus 1:2–4; 5:7–11

Kev ua siab ntev nyiaj mus pab yus ua neeg zoo tag nrho.

Tom qab koj nyeem Yakaunpaus 1:2–4; 5:7–11, koj xav tias Yakaunpaus hais li cas txog kev ua siab ntev? Tej zaum yuav pab koj yog koj xav txog qhov uas Txwj Laug Jeremy R. Jaggi tsev neeg tau kawm txog kev ua siab ntev los ntawm tej nqe no (saib “Cia Li Ua Siab Ntev Mus Li Tsis Txhob Tso Tseg, thiab Suav Tag Nrho Ua Kev Xyiv Fab!,” Liahona, Kaum Ib Hlis Ntuj 2020, 99–101). Kev “ua siab ntev mus li tsis txhob tso tseg” yog dab tsi? (Yakaunpaus 1:4). Koj yuav ua li cas kom qhia tus Tswv tias koj txaus siab ua siab ntev?

Yakaunpaus 1:3–8, 21–25; 2:14–26; 4:17

Yuav tsum siv zog thaum muaj kev ntseeg.

Koj yuav ua li cas kom paub tias koj muaj kev ntseeg Yexus Khetos? Vim li cas koj tej hauj lwm qhia txog txoj kev ntseeg Vajtswv? Xav txog tej lus nug no thaum koj kawm Yakaunpaus tej lus qhia txog kev ntseeg. Tej zaum koj yuav xav nyeem txog Anplaham thiab Lahaj, ob tug neeg uas Yakaunpaus hais txog (saib Chiv Keeb 22:1–12; Yausuas 2). Nkawd tau ua li cas kom qhia tias nkawd ntseeg Vajtswv?

Tej zaum kev nyeem Yakaunpaus 1:3–8, 21–25; 2:14–26; 4:17 yuav pab koj xav txog tej yam koj ua tau kom siv zog ua raws li txoj lus. Sau ntawv txog tej kev tshoov siab uas koj txais, thiab npaj ua raws li tej ntawd.

Kuj saib Amas 34:27–29; 3 Nifais 27:21.

Anplaham thov Vajtswv nraum nws lub tsev ntaub

“Anplaham ntseeg Vajtswv, thiab twb yog vim Anplaham ntseeg, Vajtswv thiaj suav hais tias nws yog tus uas ncaj ncees” (Yakaunpaus 2:23). Anplaham hauv Tiaj Nrag ntawm Males, los ntawm Grant Romney Clawson

Yakaunpaus 1:26; 3:1–18

Tej lus uas kuv hais yeej muaj hwj chim ua rau lwm tus tu siab los sis foom koob hmoov rau lawv.

Los ntawm tej lus uas Yakaunpaus siv nyob hauv nws tsab ntawv, tej lus uas nws sau ntau yog hais txog kev hais lus. Xav seb koj puas sau ntawv txog txhua yam uas Yakaunpaus piav txog tus nplaig los sis lub qhov ncauj. Txhua daim duab qhia dab tsi txog tej lus uas peb hais? Xav txog ib yam dab tsi uas koj ua tau kom foom koob hmoov rau lwm tus (saib Lus Qhuab Qhia thiab Kev Khi Lus 108:7).

Yakaunpaus 2:1–9

Vim kuv yog Yexus Khetos ib tug thwj tim, kuv yuav tsum hlub txhua tus neeg, tsis hais lawv raug xwm txheej li cas los yog.

Yakaunpaus tau ceeb toom Haiv Neeg Ntseeg kom lawv tsis txhob hlub cov nplua nuj thiab ntxub cov pluag, tiam sis Nws tej lus ceeb toom kuj pab tau peb kov yeej tej kev xaiv ntsej muag. Thaum koj thov Vajtswv thiab kawm Yakaunpaus 2:1–9, xav seb koj xav li cas hauv koj lub siab thiab mloog tus Vaj Ntsuj Plig Dawb Huv tej kev tshoov siab. Tej zaum yuav pab koj yog koj muab tej lus pauv hauv tej nqe vaj lug kub no, xws li “ib tug txom nyem hnav tsoos tsho khaub khaub hlab” (nqe 2), es siv tej lus uas piav txog ib tug uas tej zaum koj raug ntxias kom txiav txim tsis ncaj. Koj puas xav tias koj yuav tsum hloov tej yam uas koj ua rau lwm tus?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Yakaunpaus 1:5.Tom qab nej nyeem Yakaunpaus 1:5, tej zaum nej tsev neeg yuav xav sau ntsiab lus txog Thawj Zaug Ua Yog toog (saib Joseph Smith—Keeb Kwm 1:8–20) los sis saib daim video “Ask of God: Joseph Smith’s First Vision” (ChurchofJesusChrist.org). Caw nej tsev neeg hais lus tim khawv txog tus Yaj Saub Joseph Smith thiab tej lub sij hawm thaum Leej Txiv Saum Ntuj Ceeb Tsheej tau teb lawv tej lus thov.

Yakaunpaus 1:26–27.Xav seb puas saib daim video “True Christianity” (ChurchofJesusChrist.org). Ces cia li nyeem Yakaunpaus txoj kev qhia tias “txoj kev cai zoo” yog dab tsi nyob hauv Yakaunpaus 1:26–27, thiab sib tham txog tej yam nej tsev neeg yuav ua kom teev ntuj zoo ntxiv.

Yakaunpaus 3.Yakaunpaus 3 muaj ntau yam uas tej zaum yuav pab nej siv tej khoom qhia kom nej tsev neeg hais lus zoo rau lwm tus. Piv txwv hais tias, tej zaum nej yuav xav rauv taws ua ke thiab sib tham txog qhov uas ib lo lus me me tsis zoo yuav tsim ib qho teeb meem loj (saib nqe 5–6). Los sis nej yuav xav muab dab tsi qaub heev tso rau hauv ib yam khoom qab zig—xws li muab kua txiv qaub nchuav hauv ib lub hub rau zib ntab. Qhov no yuav pab nej sib tham txog kev siv tej lus qab zig thiab tej lus uas txhawb nqa lwm tus (saib nqe 9–14).

Yakaunpaus 4:5–8.Vim li cas peb yuav tsum “los nyob ze Vajtswv” (Yakaunpaus 4:8) thaum peb raug kev ntxias?

Yakaunpaus 5:14–16.Thawj Tswj Hwm Dallin H. Oaks tau qhia tias “cov niam tsev txiv tsev yuav tsum yaum kom lawv tsev neeg xav tau koob hmoov pov thawj hwj ntxiv” (“Tej Hwj Chim ntawm lub Pov Thawj Hwj,” Liahona, Tsib Hlis Ntuj 2018, 67). Tej zaum yog nej nyeem Yakaunpaus 5:14–16 thiab hais txog tej lub sij hawm thaum nej tau txais koob hmoov pov thawj hwj ces nej tsev neeg yuav xav thov kom tau koob hmoov thaum lawv mob los sis xav tau dag zog ntawm sab ntsuj plig.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Suggested hymn: “Kuv Puas Tau Ua Zoo Hnub No?,” Cov Nkauj Qhuas Vajtswv, zaj 101.

Kev Kawm Zoo Dua Ntxiv ntawm Yus Ib Leeg

Cia li ua raws li koj kawm. Thaum koj kawm vaj lug kub, cia li mloog tus Ntsuj Plig tej kev tshoov siab txog tej yam uas koj ua tau kom ua neej raws li tej lus qhia ntawd. Cia li cog lus tias koj yuav ua raws li tej kev tshoov siab no thiab ua raws li txoj moo zoo ntxiv. (Saib Teaching in the Savior’s Way, 35.)

Joseph Smith nyeem phau Npaivnpaum

Yakaunpaus tej lus ntuas kom “thov Vajtswv” (Yakaunpaus 1:5) tau tshoov Joseph Smith lub siab kom nrhiav tswv yim los ntawm Vajtswv. Daim duab los ntawm Christina Smith.