“Kaum Ib Hlis Ntuj 20–26. 1 and 2 Petus: ‘Nej Thiaj Zoo Siab Kawg Nkaus Tsis Pom Qab Yuav Piav Li,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Kaum Ib Hlis Ntuj 20–26. 1 thiab 2 Petus,” Los, Nrog Kuv Mus—Rau Ib Leeg thiab Tsev Neeg: 2023
Yexus Khetos Qhia hauv lub Ntuj Ntsuj Plig, los ntawm Robert T. Barrett
Kaum Ib Hlis Ntuj 20–26
1 thiab 2 Petus
“Nej Thiaj Zoo Siab Kawg Nkaus Tsis Pom Qab Yuav Piav Li”
Thaum koj nyeem Petus tej Tsab Ntawv, tej zaum koj yuav txais tau tej kev tshoov siab. Cia li sau ntawv txog tej ntawd sai sai thaum “tus Ntsuj Plig puv npo” (Lus Qhuab Qhia thiab Kev Khi Lus 76:80) koj thiaj li yuav sau tej yam uas Vajtswv qhia koj.
Sau Ntawv txog Koj tej Kev Tshoov Siab
Tsis ntev tom qab Nws Sawv Rov Los, tus Cawm Seej tau qhia txog tej yam uas yuav muaj los yav tom ntej uas ua rau Petus ntxhov siab. Nws hais tias Petus yuav raug tua tuag rau nws txoj kev ntseeg, es “Yexus hais li ntawd yog Yexus hais tias Petus yuav tuag li cas thiaj ua rau Vajtswv tau koob meej” (Yauhas 21:18–19). Ntau xyoo tom qab ntawd, thaum Petus sau nws tej tsab ntawv, nws paub tias lub sij hawm nws yuav raug tua tuag yeej nyob ze: “Tshuav tsis ntev kuv yuav tso kuv lub cev uas txawj tuag no tseg raws li peb tus Tswv Yexus Khetos twb qhia tseeb rau kuv lawm” (2 Petus 1:14). Tiam sis Petus tej lus tsis muaj kev ntshai los sis kev xav txog qhov phem xwb. Nws tau qhia Haiv Neeg Ntseeg kom lawv “yuav tsum zoo siab,” txawm yog lawv “yuav raug kev txom nyem nyuaj siab ib nyuag ntu.” Nws tau ntuas lawv kom nco txog qhov uas “Vajtswv sim saib nej muab siab rau ntseeg npaum li cas” kom “thaum txog hnub uas Yexus Khetos los Vajtswv yuav qhuas nej thiab nej yuav tau ntsej muag” thiab lawv yuav “dim [lawv] lub txim” (1 Petus 1:6–7, 9). Petus txoj kev ntseeg yeej tau nplij Haiv Neeg Ntseeg thaum ub lub siab, ib yam li nws nplij Haiv Neeg Ntseeg niaj hnub no lub siab, cov uas “raug kev tsim txom ib yam li Yexus Khetos twb raug los lawm, [es] thaum sawv daws pom nws lub hwj chim uas ci ntsa iab, [peb] yuav zoo siab kawg nkaus li” (1 Petus 4:13).
Tej lub Tswv Yim Kawm Vaj Lug Kub ntawm Yus Ib Leeg
1 Petus 1:3–9; 2:19–24; 3:14–17; 4:12–19
Kuv muaj tau kev xyiv fab thaum kuv raug kev sim siab thiab kev txom nyem.
Lub sij hawm tom qab Yexus Khetos raug Ntsia Saum Ntoo Khaub Lig yeej tsis yog ib lub sij hawm yooj yim ua ib tug Neeg Ntseeg Khetos, thiab Petus thawj tsab ntawv hais li ntawd. Nyob hauv thawj plaub tshooj, koj yuav pom tej lus uas piav txog tej yam nyuaj xws li: nyuaj siab, kev ntxias, ua siab ntev nyiaj, kev tsim txom, thiab kev txom nyem (saib 1 Petus 1:6; 2:19; 4:12–13). Tiam sis koj kuj yuav pom tej lus uas piav txog kev xyiv fab—tej zaum koj yuav xav sau ntawv txog tej lo lus no. Piv txwv hais tias, thaum koj nyeem 1 Petus 1:3–9; 2:19–24; 3:14–17; and 4:12–19, muaj dab tsi uas pab koj cia siab tias koj yuav muaj kev xyiv fab tsis hais thaum koj raug xwm txheej nyuaj heev los yog?
Tej zaum koj kuj yuav xav nyeem Thawj Tswj Hwm Russell M. Nelson zaj lus “Kev Xyiv Fab thiab Kev Nyiaj Kom Dhau ntawm Sab Ntsuj Plig” (Liahona, Kaum Ib Hlis Ntuj 2016, 81–84) thiab nrhiav tej yam uas Petus qhia thiab Thawj Tswj Hwm Nelson qhia uas zoo ib yam. Vim li cas txoj hau kev cawm seej thiab Yexus Khetos txoj moo zoo ua rau koj muaj kev xyiv fab?
Kuj saib Ricardo P. Giménez, “Kev Nrhiav Tau Chaw Tiv Thaiv Thaum Muaj Nag Xob Nag Cua hauv lub Neej No,” Liahona, Tsib Hlis Ntuj 2020, 101–3.
Cov neeg hauv lub ntuj ntsuj plig qhia txoj moo zoo rau cov tuag kom lawv raug txiav txim raws li kev ncaj ncees.
Muaj ib hnub txhua tus neeg yuav sawv ntawm lub rooj txiav txim thiab “lawv cov ntawd nyias yuav tsum qhia nyias lub neej rau [tus uas] yuav txiav txim rau cov neeg ciaj thiab cov neeg tuag” (1 Petus 4:5). Vajtswv yuav txiav txim txhua tus neeg raws li kev ncaj ncees thaum lawv nyias muaj nyias cib fim to taub thiab ua raws li txoj moo zoo? Cia li saib tias cov lus qhuab qhia uas Petus qhia nyob hauv 1 Petus 3:18–20; 4:6 pab teb lus nug no. Tej nqe no ua li cas kom txhawb koj txoj kev ntseeg Vajtswv txoj kev ncaj thiab kev txim lij?
Kom paub txog cov lus qhuab qhia no ntxiv, cia li kawm Lus Qhuab Qhia thiab Kev Khi Lus 138, uas yog ib zaj lus tshwm sim uas Thawj Tswj Hwm Joseph F. Smith txais thaum nws xav txog Petus tej lus. Thawj Tswj Hwm Smith tau kawm dab tsi ntxiv thiab?
Kuj saib Gospel Topics, “Baptisms for the Dead,” topics.ChurchofJesusChrist.org.
Los ntawm Yexus Khetos lub hwj chim, kuv yuav kawm ntxiv txog kuv tej cwj pwm los saum ntuj los.
Koj puas xav tias koj yeej yuav tsis los ua neeg zoo li Yexus Khetos thiab muaj Nws tej cwj pwm? Txwj Laug Robert D. Hales tau hais li no txog qhov uas peb yuav ua li cas kom muaj Khetos tej cwj pwm: “Tus Cawm Seej tej cwj pwm … yeej yog tej yam uas ntos ua ke, ib tug ntxiv rau ib tug, es ib tug txhawb nqa ib tug. Los yog hais tias, yog peb coj raws li ib tug cwj pwm zoo li Khetos tiag tiag ces peb yeej yuav coj raws li tej cwj pwm ntxiv. Thaum ib tug cwj pwm muaj zog tuaj, ces lwm tus cwj pwm kuj muaj zog tuaj” (“Kev Hloov Los Ua tus Pab Coj ntawm Peb tus Tswv Yexus Khetos,” Liahona, Tsib Hlis Ntuj 2017, 46).
Txhua tus cwj pwm ntawm Yexus Khetos uas peb kawm yuav pab peb muab ib daim paj ntaub ntos ua ke, qhov uas piv txog peb txoj kev ua Nws cov thwj tim.
Thaum koj nyeem 2 Petus 1:1–11, cia li xav txog tej cwj pwm uas los saum ntuj los nyob hauv tej nqe no. Raws li koj tau kawm lawm, ua li cas tej no “ntos ua ke,” xws li Txwj Laug Hales piav? Tej cwj pwm ua li cas kom nyias ua lub hauv paus rau nyias? Koj kawm dab tsi ntxiv los ntawm tej nqe no txog tus txheej txheem ua neeg zoo li Yexus Khetos?
Tej zaum koj kuj yuav xav txog qhov uas “Vajtswv cog lus tseg hais tias nws yuav muab nws txoj koob hmoov uas zoo kawg nkaus rau peb” uas yog Nws Haiv Neeg Ntseeg—tsis hais koj los yog (2 Petus 1:4). Txwj Laug David A. Bednar zaj lus “Tej Kev Cog Lus Zoo Kawg Nkaus uas Muaj Nqis” (Liahona, Kaum Ib Hlis Ntuj 2017, 90–93) yuav pab koj to taub tias cov lus cog tseg no yog dab tsi thiab yuav tsum ua li cas kom txais tau.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
1 Petus 2:5–10.Thaum nej nyeem tej nqe no nrog nej tsev neeg, xav seb puas siv cov pob zeb kom pab nej tsev neeg xav txog Petus tej lus qhia tias tus Cawm Seej yog peb “lub ncej zeb tag.” Ua li cas peb zoo li “cov pob zeb” uas Vajtswv siv kom txhim tsa Nws lub nceeg vaj? Peb kawm dab tsi los ntawm Petus txog tus Cawm Seej thiab peb lub luag hauj lwm hauv Nws lub nceeg vaj? Petus zaj lus rau nej tsev neeg yog dab tsi?
-
1 Petus 3:8–17.Peb yuav ua li cas kom “npaj tos txhua lub sij hawm yog thaum twg muaj neeg nug” peb kom tes cov uas xav paub txog peb txoj kev ntseeg? Tej zaum nej tsev neeg yuav nyiam ua yeeb yam txog tej lub sij hawm thaum ib tug neeg nug nej txog txoj moo zoo.
-
1 Petus 3:18–20; 4:6.Nej tsev neeg yuav ua li cas kom paub nej cov poj koob yawm txwv ntxiv? Tej zaum nej yuav xav ua koob tsheej txog nej cov poj koob yawm txwv uas tau tso lub ntiaj teb no tseg lawm hnub yug thaum nej npaj zaub mov uas lawv nyiam tshaj, saib daim duab, los sis hais dab neeg los ntawm lawv lub neej. Yog tias ua tau, tej zaum nej yuav xav npaj ua kab ke rau nej cov poj koob yawm txwv nyob hauv lub tuam tsev (yog xav tau kev pab, mus xyuas FamilySearch.org).
-
2 Petus 1:16–21.Nyob hauv tej nqe no, Petus tau hais rau Haiv Neeg Ntseeg txog lub sij hawm nws nyob saum lub Roob Hloov Hlo (kuj saib Mathais 17:1–9). Peb kawm dab tsi los ntawm tej nqe no txog cov yaj saub tej lus qhia? (kuj saib Lus Qhuab Qhia thiab Kev Khi Lus 1:38). Muaj dab tsi uas pab peb ua siab loj ua raws li tus yaj saub niaj hnub no?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Family History—I Am Doing It,” Children’s Songbook, 94.
Kev Qhia Zoo Dua Ntxiv
“Ua tib zoo npaj txhua lub sij hawm.” Tej lub sij hawm qhia hauv tsev los ntshe yuav ploj mus sai heev, yog li ntawd yuav tsum siv sij hawm thaum twg muaj cib fim qhia. Koj yuav ua li cas kom “npaj txhua lub sij hawm” qhia koj tsev neeg txog txoj moo zoo thiab qhia txog koj txoj kev “cia siab” (1 Petus 3:15) thaum twg koj muaj sij hawm qhia? (Saib Teaching in the Savior’s Way, 16.)
Txawm yog Petus raug kev tsim txom thiab kev tawm tsam, nws yeej ruaj khov ua tim khawv txog Yexus Khetos.