“Kaum Ib Hlis Ntuj 27–Kaum Ob Hlis Ntuj 3. 1–3 Yauhas; Yudas: ‘Vajtswv Yog tus uas Muaj Kev Hlub,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Kaum Ib Hlis Ntuj 27–Kaum Ob Hlis Ntuj 3. 1–3 Yauhas; Yudas,” Los, Nrog Kuv Mus—Rau Ib Leeg thiab Tsev Neeg: 2023
Kev Hlub Zoo Tag Nrho, los ntawm Del Parson
Kaum Ib Hlis Ntuj 27–Kaum Ob Hlis Ntuj 3
1–3 Yauhas; Yudas
“Vajtswv Yog tus uas Muaj Kev Hlub”
Thaum koj nyeem Yauhas thiab Yudas tej tsab ntawv, cia li nrhiav kev tshoov siab txog qhov uas koj yuav tsum ua li cas kom qhia tias koj hlub Vajtswv. Cia li sau ntawv txog tej kev tshoov siab no thiab ua raws li tej ntawd.
Sau Ntawv txog Koj tej Kev Tshoov Siab
Thaum Yauhas thiab Yudas tau sau nkawd tej tsab ntawv, cov lus qhuab qhia cuav twb tau ua rau Haiv Neeg Ntseeg coob tso qhov tseeb tseg lawm. Muaj ib co xib hwb cuav uas xav tias Yexus Khetos tsis tau “los yug ua neeg” (saib, ua piv txwv, 1 Yauhas 4:1–3; 2 Yauhas 1:7). Ib tug thawj coj hauv lub Koom Txoos yuav tsum ua li cas thaum muaj xwm txheej zoo li no? Tus Thwj Tim Yauhas tau teb thaum nws hais lus tim khawv txog tus Cawm Seej: “Peb sau zaj uas hais txog txoj lus uas cawm neeg txoj sia qhia rau nej paub; txoj lus ntawd yeej nyob puag thaum chiv keeb los lawm. Peb hnov nws tej lus, peb qhov muag pom nws thiab peb txhais tes tau tuav nws lawm” (Joseph Smith Kev Txhais, 1 Yauhas 1:1 [nyob hauv 1 Yauhas 1:1, lub cim nram qab a]). Ces Yauhas tau qhia txog kev hlub: qhov uas Vajtswv hlub peb thiab peb yuav tsum hlub Nws thiab hlub tag nrho Nws cov me nyuam. Vim Yauhas twb tau pom li ntawd thiab. Nws tau paub txog tus Cawm Seej txoj kev hlub (saib Yauhas 13:23; 20:2), thiab nws xav kom Haiv Neeg Ntseeg paub txog txoj kev hlub ntawd. Yauhas zaj lus tim khawv thiab tej lus qhia txog kev hlub los peb yeej xav tau niaj hnub no thiab, thaum tib neeg tsis tshua ntseeg Yexus Khetos thiab muaj tej lus qhia cuav ntau heev. Kev nyeem Yauhas tej tsab ntawv yuav pab peb ua siab loj nyiaj mus kom dhau tej kev tsim txom, vim “tus uas muaj kev hlub lawm tsis tas nws yuav ntshai, rau qhov txoj kev hlub uas zoo kawg nkaus yuav tshem tau txoj kev ntshai tawm” (1 Yauhas 4:18).
Tej lub Tswv Yim Kawm Vaj Lug Kub ntawm Yus Ib Leeg
Vajtswv yog txoj kev kaj, thiab Vajtswv yog txoj kev hlub.
Yog koj yuav xaiv ib los sis ob lo lus piav txog Vajtswv, ces koj yuav xaiv ob lo lus twg? Nyob hauv nws tej tsab ntawv, Yauhas pheej siv tej lus “txoj kev kaj” thiab “kev hlub” (saib, ua piv txwv, 1 Yauhas 1:5; 2:8–11; 3:16, 23–24; 4:7–21). Thaum koj nyeem Yauhas thawj ob tsab ntawv, cia li xav txog tej yam uas Yauhas hais txog tus Cawm Seej txoj kev kaj thiab kev hlub. Piv txwv hais tias, xav txog tej yam uas Yauhas kawm los ntawm Yexus tej lus qhia nyob hauv Yauhas 3:16–17; 12:35–36, 46; 15:9–14; 19:25–27. Koj puas pom tej yam uas zoo ib yam nyob hauv tej lus qhia no thiab tej uas 1 Yauhas qhia txog Vajtswv txoj kev kaj thiab txoj kev hlub? Tej yam twg hauv koj lub neej tau qhia koj txog qhov uas Vajtswv yog txoj kev kaj thiab txoj kev hlub?
“Yog peb ib leeg hlub ib leeg Vajtswv yeej nrog peb sib raug zoo.”
Koj kuj yuav nyeem tej lus xws li “nrog” thiab “raws li” uas hais ntau nyob hauv Yauhas tej tsab ntawv. Nrhiav tej lus no thaum koj nyeem 1 Yauhas 2–4 thiab 2 Yauhas. Koj xav tias kev “ua raws li” Vajtswv thiab Nws cov lus qhuab qhia txhais li cas? (saib 2 Yauhas 1:9). Kom Vajtswv nrog koj “sib raug zoo” puas muaj nqis rau koj?
Kuv muaj peev xwm hloov los ua neeg zoo li Yexus Khetos.
Tej lub sij hawm koj puas xav tias lub hom phiaj los ua neeg zoo li Yexus Khetos yeej nyuaj dhau? Cia li xav txog Yauhas tej lus no: “Cov me nyuam, nej yuav tsum cia Yexus Khetos kav nej lub neej; yog nej ua li ntawd thaum txog hnub uas nws rov qab los, nej thiab peb thiaj li yuav tsis ntshai, thiab … peb yuav tsis txaj muag rau nws” (1 Yauhas 2:28; 3:2). Koj nyeem dab tsi nyob hauv 1 Yauhas 2:24–3:3 uas ua rau koj ua siab loj thiab nplij koj lub siab vim koj yog Yexus Khetos ib tug thwj tim? Thaum koj kawm Yauhas tej tsab ntawv, nrhiav lwm lub ntsiab cai los sis tej lus qhia uas yuav pab koj los ua neeg zoo li Yexus Khetos.
Kuj saib Maulaunais 7:48; Lus Qhuab Qhia thiab Kev Khi Lus 88:67–68; Scott D. Whiting, “Kev Hloov Ua Neeg Zoo Li Nws,” Liahona, Kaum Ib Hlis Ntuj 2020, 12–14.
Puas yog “tsis muaj neeg … uas tau pom Vajtswv li”?
Joseph Smith Kev Txhais, 1 Yauhas 4:12 qhia meej tias “yeej tsis tau muaj leej twg pom Vajtswv ib zaug twg li, tsuas yog cov uas ntseeg xwb” (nyob hauv 1 Yauhas 4:12, lub cim nram qab a; kuj saib Yauhas 6:46; 3 Yauhas 1:11). Cov vaj lug kub hais txog ob peb lub sij hawm thaum Vajtswv Leej Txiv tau tshwm sim rau cov neeg uas rau siab ntseeg (saib Tshwm Sim 4; kuj saib Tes Hauj Lwm 7:55–56; 1 Nifais 1:8; Lus Qhuab Qhia thiab Kev Khi Lus 76:23; Joseph Smith—Keeb Kwm 1:16–17).
Thaum kuv muab siab rau ntseeg Yexus Khetos thiab kuv yug dua tshiab, kuv yuav kov yeej lub ntiaj teb.
Thaum koj nyeem 1 Yauhas 5, nrhiav tej yam uas peb yuav tsum ua kom kov yeej lub ntiaj teb thiab tau txoj sia nyob mus ib txhis. Kev kov yeej lub ntiaj teb yuav zoo li cas nyob hauv koj lub neej? Tej zaum koj kuj yuav xav nrhiav tej lub tswv yim nyob hauv Neil L. Andersen zaj lus “Kov Yeej lub Ntiaj Teb” (Liahona, Tsib Hlis Ntuj 2017, 58–62).
“Nej yuav tsum muab siab rau ntseeg heev zuj zus ntxiv.”
Yudas 1:10–19 qhia dab tsi rau koj txog cov uas tawm tsam Vajtswv thiab Nws txoj hauj lwm? Koj kawm dab tsi los ntawm nqe 20–25 txog txoj kev txhawb koj txoj kev ntseeg Yexus Khetos kom muaj zog?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
1 Yauhas 2:8–11.Kom pab nej tsev neeg xav txog Yauhas cov lus qhia, koom ua ke hauv ib chav tsis qhib teeb kom nej paub tias mus kev “ib yam li tus uas maub mus hmo ntuj” thiab mus kev “nyob hauv qhov pom kev” txawv li cas. Yog vim li cas kev ntxub ua rau peb mus kev ib yam li tus uas maub mus ho ntuj thiab dawm taw? Vim li cas kev sib hlub uas rau peb pom kev?
-
1 Yauhas 3:21–22.Muaj dab tsi hauv tej nqe no uas ua rau peb tso siab rau Vajtswv ntxiv thiab paub Nws yuav teb peb tej lus thov?
Kev ua raws li Vajtswv cov lus txib pab peb kov yeej lub ntiaj teb.
-
1 Yauhas 5:2–3.Puas muaj tej lus txib uas peb xav tias ua nyuaj rau peb coj? Peb txoj kev hlub Vajtswv puas hloov peb txoj kev xav txog Nws cov lus txib?
-
3 Yauhas 1:4.Kev “ua neej raws li qhov tseeb” txhais li cas? Tej zaum nej yuav xav siv sij hawm no qhia nej tsev neeg tias nej tau pom lawv ua neej raws li qhov tseeb thiab sib tham txog qhov uas vim li cas lawv ua li no ua rau nej muaj kev xyiv fab. Tej zaum nej tsev neeg yuav nyiam sau ntawv los sis kos duab txog tej lus tseeb uas lawv tau kawm saum tej hneev taw uas txiav ntawv ua thiab siv kom pua ib txoj kev rau nej tsev neeg mus kev ua ke.
-
Yudas 1:3–4.Puas muaj tej xwm txheej ceev ntawm sab ntsuj plig uas tau “nyiag kev tuaj” hauv peb lub neej thiab peb tsev neeg? (Yudas 1:4). Peb yuav ua li cas kom coj raws li Yudas tej lus “tsis txhob pub leej twg rhuav txoj kev ntseeg” thiab tiv thaiv kom txhob raug tej xwm txheej no? (Yudas 1:3). Peb yuav ua li cas kom “thov Vajtswv niaj hnub foom koob hmoov rau [peb tsev neeg], hlub [peb] thiab pab kom [peb] tau zoo nyob kaj siab lug”? (Yudas 1:2).
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Where Love Is,” Children’s Songbook, 138–39.
Kev Kawm Zoo Dua Ntxiv ntawm Yus Ib Leeg
Nrhiav tau Vajtswv txoj kev hlub. Thawj Tswj Hwm M. Russell Ballard tau qhia hais tias, “Txoj moo zoo yog ib txoj moo zoo ntawm kev hlub—kev hlub Vajtswv thiab kev hlub lwm tus” (“God’s Love for His Children,” Ensign, Tsib Hlis Ntuj 1988, 59). Thaum koj nyeem cov vaj lug kub, cia li sau lub cim txog tej yam uas qhia tias Vajtswv hlub koj.
Nrog Kuv Mus Kev, los ntawm Greg K. Olsen