me nyuam yaj zaum saum cov nyom

Kaum Ob Hlis Ntuj 4–10

Tshwm Sim 1–5

“Tus Me Nyuam Yaj Tau Koob Meej Mus Ib Txhis Li”

Xav seb koj puas sau tej lus nug txog tej yam koj nyeem nyob hauv phau Tshwm Sim. Ces koj nrhiav tau tej lus teb los yog nrog koj tsev neeg sib tham los sis nrog cov neeg hauv tej chav kawm hauv lub Koom Txoos tham txog tej no.

Sau Ntawv txog Koj tej Kev Tshoov Siab

Puas nyuaj rau koj hais rau lwm tus txog tej yam uas koj tau hnov thaum muaj ib lub sij hawm uas tus Vaj Ntsuj Plig Dawb Huv nyob? Cov lus uas peb siv txhua hnub yeej tsis txaus kom piav txog tej kev xav thiab tej kev tshoov siab ntawm sab ntsuj plig. Tej zaum yog vim li no Yauhas thiaj li tau siv tej lub cim thiab tej lus piav kom qhia txog nws txoj kev tshwm sim. Nws tsis tau hais tias nws pom Yexus Khetos xwb, tiam sis kom pab peb to taub txog lub sij hawm ntawd, nws piav txog tus Cawm Seej li no hais tias: “Nws lub qhov muag ci ib yam li nplaim taws,” “Muaj ib rab ntaj ob sab ntse tawm hauv nws qhov ncauj tuaj,” thiab “Nws lub ntsej muag ci ib yam li lub hnub ci thaum tav su” (Tshwm Sim 1:14–16). Thaum koj nyeem phau Tshwm Sim, nrhiav seb Yauhas xav kom koj kawm thiab paub dab tsi, txawm yog koj tsis to taub txhua lub cim los yog. Vim li cas nws yuav muab lub Koom Txoos tej pawg ntseeg piv rau tej ncej txawb teeb, muab Dab Ntxwg Nyoog piv rau ib tug zaj, thiab Yexus Khetos piv rau ib tug me nyuam yaj? Koj tsis tas to taub txhua lub cim nyob hauv Tshwm Sim kom thiaj li to to taub tej lub ntsiab tseem ceeb, xws li lub ntsiab tseem ceeb tshaj plaws: Yexus Khetos thiab cov uas coj raws li Nws yuav kov yeej tib neeg thiab Dab Ntxwg Nyoog tej nceeg vaj.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Yauhas txoj kev ua yog toog qhia txog Leej Txiv Saum Ntuj Ceeb Tsheej txoj hau kev cawm Nws cov me nyuam dim.

Phau Tshwm Sim yeej nyuaj to taub, tiam sis tsis txhob poob siab. Tej zaum Yauhas cov lus cog tseg yuav pab koj xav sim to taub ntxiv: “Cov uas nyeem tau koob hmoov, thiab cov uas hnov thiab to taub tej lus ntawm zaj uas qhia tej yuav muaj los yav tom ntej no, thiab ceev tej yam uas tau muab sau cia nyob hauv, vim lub sij hawm tus Tswv los twb ze lawm.” (Joseph Smith Kev Txhais, Tshwm Sim 1:3 [nyob hauv phau Npaivnpaum cov ntawv ntxiv tom kawg], ntxiv qhov uas ntawv qaij).

Ib txoj kev kawm phau Tshwm Sim yog kev nrhiav kev sib txuas rau txoj hau kev cawm seej. Tej zaum tej ntsiab lus no yuav pab koj:

• Tshooj 5 thiab 12 piav txog tej xwm txheej nyob hauv lub neej ua ntej yug los.

• Tshooj 6–11, 13–14, 16–19 piav txog lub neej no thiab tej xwm txheej hauv lub ntiaj teb zaj keeb kwm.

• Tshooj 2–3, 15, 20–22 piav txog Kev Txiav Txim Zaum Kawg thiab lub yeeb koob uas cov neeg rau siab ntseeg mam li txais tau.

Thaum koj nyeem, nug koj tus kheej tias, “Qhov no qhia dab tsi rau kuv txog Vajtswv txoj hau kev? Vajtswv tau pab kuv li cas kom kuv kov yeej kev phem thiab rov qab mus cuag Nws? Nws cog lus tias cov rau siab ntseeg yuav txais dab tsi?”

Tej zaum yuav pab koj yog koj paub tias Lus Qhuab Qhia thiab Kev Khi Lus 77 piav txog tej lub cim nyob hauv Tshwm Sim. Tsis tas li ntawd xwb, Joseph Smith Kev Txhais piav txog tej nqe lus nyob hauv Tshwm Sim, yog li ntawd saib tej lub cim nram qab thiab phau Npaivnpaum cov ntawv ntxiv tom kawg thiab.

Kuj saib Phau Qhia txog Vaj Lug Kub, “Yauhas,” “Yauhas txoj Kev Tshwm Sim.”

Tshwm Sim 1

Yexus Khetos yog Vajtswv Leej Tub uas Muaj Txoj Sia Nyob.

Tshooj ib ntawm phau Tshwm Sim piav txog Yauhas txoj kev ua yog toog pom Yexus Khetos. Tej zaum koj yuav xav sau ntawv txog txhua yam uas tshooj no hais txog Yexus Khetos, tsis hais Nws yog leej twg, Nws ua dab tsi rau peb, thiab Nws zoo li cas.

Koj yuav kawm tej yam los ntawm tej lub cim. Xav txog qhov uas tus Tswv xav qhia dab tsi rau koj txog Nws tus kheej los ntawm tej lub cim no. Piv txwv hais tias, tus Cawm Seej hu Nws tus kheej ua “tus uas nyob nim no thiab yog tus uas ib txwm nyob thaum ub los lawm” thiab yog “lub hauv paus thiab yog lub ntsis.” Koj xav tias yog vim li cas tej npe no tseem ceeb? Tej lub npe no qhia dab tsi rau koj txog tus Cawm Seej?

Tshwm Sim 2–3

Yexus Khetos paub kuv thiab yuav pab kuv kov yeej kuv tej teeb meem.

Tus Cawm Seej tej lus nyob hauv Tshwm Sim 2–3 qhia tias Nws to taub tej xwm txheej thiab tej teeb meem uas txhua ceg ntseeg ntawm lub Koom Txoos muaj nyob hauv Yauhas lub caij nyoog. Nws tau qhuas tej uas Haiv Neeg Ntseeg ua thiab tau ceeb toom lawv txog tej yam uas lawv yuav tsum hloov thiab. Koj kawm dab tsi los ntawm tus Cawm Seej tej lus qhuas thiab tej lus ceeb toom?

Tus Cawm Seej kuj to taub tej yam uas koj tau ua lawm thiab tej yam uas nyuaj rau koj ua, thiab Nws xav pab koj. Cia li nyeem txog tej lus cog tseg uas Nws cog lus rau cov uas kov yeej. Koj xav li cas txog tej lus cog tseg no? Tus Tswv xav kom koj kov yeej dab tsi? Koj yuav ua li cas kom txais tau Nws txoj kev pab?

Tshwm Sim 4–5

Tsuas yog Yexus Khetos tib leeg xwb muaj hwj chim ua kom muaj raws li Leej Txiv Saum Ntuj Ceeb Tsheej txoj hau kev.

Koj kawm dab tsi txog Leej Txiv Saum Ntuj Ceeb Tsheej los ntawm Tshwm Sim 4 thiab txog Yexus Khetos los ntawm Tshwm Sim 5? Xav seb yuav zoo li thaum peb txhua tus paub tias Yexus Khetos (tus “Me Nyuam Yaj”) yuav ua kom muaj raws li Leej Txiv Saum Ntuj Ceeb Tsheej txoj hau kev (tus Cawm Seej yuav “nthuav thooj ntawv, thiab … tev xya lub hom thawj” [Tshwm Sim 5:5]). Vim li cas Yexus Khetos yog tib tug uas ua taus li no? Koj yuav ua li cas kom qhia tias koj ntseeg Nws yog koj tus Cawm Seej?

Kuj saib Yauj 38:4–7; Lus Qhuab Qhia thiab Kev Khi Lus 77:1–7.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Tshwm Sim 1:20.Vim li cas Yexus tau muab Nws lub Koom Txoos piv rau tej ncej uas txawb teeb? (saib Mathais 5:14–16). Hu ib zaj nkauj txog qhov uas peb yuav tsum ua zoo li lub teeb ntawm tus ncej uas txawb teeb, xws li “Shine On” (Children’s Songbook, 144).

Tshwm Sim 2–3.Cia li xav tias Yauhas yuav hais lus rau nej tsev neeg xws li thaum nws hais lus hauv lub koom txoos thaum lub sij hawm nws ua neej nyob. Nws yuav hais rau nej tias muaj dab tsi uas ua zoo? Nej yuav tsum kho dab tsi kom zoo?

Tshwm Sim 3:15–16.Tom qab nej nyeem tej nqe no, tej zaum nej tsev neeg yuav xav haus ib co kua uas tsis kub tsis txias uas yeej zoo dua yog tias cov kua ntawd kub los sis txias. Qhov uas yus tsis kub tsis txias ntawm sab ntsuj plig txhais li cas?

Tshwm Sim 3:20.Muab ib daim duab txog tus Cawm Seej khob qhov rooj (saib zaj lus no qhov kawg) thaum nej tsev neeg nyeem Tshwm Sim 3:20. Vim li cas Yexus Khetos khob qhov rooj es nws tsis nkag los hauv xwb? Tej zaum nej tsev neeg yuav nyiam khob ib lub qhov rooj. Ces lwm tus hauv nej tsev neeg yuav hais tias muaj ib txoj kev rau peb “qhib qhov rooj” rau tus Cawm Seej thiab cia tus neeg los haud. Yuav zoo li cas yog tias peb muaj tus Cawm Seej nyob hauv peb lub tsev?

Tshwm Sim 4:10–11.Kev pe hawm Leej Txiv Saum Ntuj Ceeb Tsheej txhais li cas? Peb paub dab tsi txog Nws uas ua rau peb xav pe hawm Nws?

Tshwm Sim 5:6, 12–13.Vim li cas nws hu Yexus Khetos ua tus “Me Nyuam Yaj”? Lub npe no qhia dab tsi rau peb txog Nws?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Yexus Tau Yug Los Ua Me Nyuam,” Cov Nkauj Qhuas Vajtswv, zaj 85.

Kev Qhia Zoo Dua Ntxiv

Yaum kom lawv nug tej yam. Tej lus nug qhia tias koj tsev neeg npaj siab kawm thiab qhia koj tias lawv xav li cas txog tej yam uas koj qhia lawv. Cia li qhia koj tsev neeg kom paub nrhiav tej lus teb nyob hauv cov vaj lug kub. (Saib Teaching in the Savior’s Way, 21.)

Khetos khob qhov rooj

Cia Nws Los, los ntawm Greg K. Olsen