“Kaum Ob Hlis Ntuj 18–24. Christmas: ‘Txoj Moo Zoo uas Yog Txoj Kev Zoo Siab Kawg Nkaus,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)

“Kaum Ob Hlis Ntuj 18–24. Christmas,” Los, Nrog Kuv Mus—Rau Ib Leeg thiab Tsev Neeg: 2023

Daim Duab

me nyuam mos liab

Me Nyuam Yaj, los ntawm Jenedy Paige

Kaum Ob Hlis Ntuj 18–24

Christmas

“Txoj Moo Zoo uas Yog Txoj Kev Zoo Siab Kawg Nkaus”

Xav seb yog vim li cas yog koj xav txog tus Cawm Seej txoj kev yug los thiab ntiag tug hauj lwm ces yuav ua rau koj muaj kev kaj siab lug thiab hnov txoj kev dawb ceev ntawm lub caij Christmas no.

Sau Ntawv txog Koj tej Kev Tshoov Siab

Vim li cas ib tug me nyuam mos liab txoj kev yug los ua rau tib neeg zoo siab kawg? Tej zaum yog vim ib tug me nyuam mos liab yog ib lub cim txog kev cia siab. Ib tug me nyuam mos liab uas yuav loj hlob tuaj yeej ua rau peb xav txog qhov uas tus me nyuam yuav muaj lub neej zoo li cas thiab xav seb nws yuav ua tej yam zoo twg. Qhov no yeej muaj tseeb thaum Vajtswv Leej Tub, Yexus Khetos, tau yug los. Yeej tsis tau muaj neeg cia siab rau ib tug me nyuam npaum li sawv daws cia siab rau Yexus, thiab yeej tsis tau muaj ib tug uas yuav muaj peev xwm npaum li Nws.

Thaum ib tug tim tswv caw cov neeg yug yaj nrhiav ib tug me nyuam mos liab hauv ib lub dab nyuj, nws kuj hais lus txog tus me nyuam ntawd. Yog ib zaj lus txog kev cia siab—cia siab hais tias tus me nyuam mos liab tau los rau hauv lub ntiaj teb kom ua ib lub luag hauj lwm dawb ceev. Cov neeg yug yaj tau qhia “zaj uas tus tim tswv … qhia rau lawv … [thiab] txhua tus uas hnov zaj uas cov yug yaj hais ntawd, sawv daws xav tsis thoob li. [Tiam sis] Maivliag khaws tej lus ntawd thiab xav ntsoov rau nruab siab” (Lukas 2:17–19). Tej zaum koj yuav xav coj raws li Maivliag tus yam ntxwv hauv lub caij Christmas no: kom xav hauv koj lub siab txog tej yam uas koj tau kawm txog tus Cawm Seej xyoo no. Nws tau ua li cas kom ua Nws ntiag tug hauj lwm txhiv tib neeg dim hauv tej uas koj tau nyeem? Thiab qhov tseem ceeb tshaj, Nws ntiag tug hauj lwm puas tau hloov koj lub neej? Ces tej zaum yuav ua rau koj xav coj raws li cov neeg yug yaj tus yam ntxwv: koj yuav ua dab tsi kom qhia tias Yexus Khetos tau ua li cas rau koj?

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 1:18–25; 2:1–12; Lukas 1:26–38; 2:1–20

Yexus Khetos tau nqis los kom yug los rau hauv lub ntiaj teb nrog peb sawv daws.

Txawm yog koj tau nyeem los sis hnov zaj dab neeg txog Yexus Khetos txoj kev yug los ntau zaus lawm los, zaum no kawm txog zaj no thiab xav txog qhov no: “Christmas yeej tsis yog kev ua koob tsheej txog qhov uas muaj li cas thaum Yexus yug los rau hauv lub ntiaj teb xwb tiam sis yog qhov uas peb paub Nws yog leej twg—peb tus Tswv thiab tus Cawm Seej Yexus Khetos—thiab vim li cas Nws los.” (Craig C. Christensen, “The Fulness of the Story of Christmas” [Thawj Pawg Thawj Tswj Hwm kev sib ntsib hawm Vajtswv thaum lub caij Christmas, Kaum Ob Hlis Ntuj 4, 2016], broadcasts.ChurchofJesusChrist.org).

Koj paub dab tsi txog Yexus Khetos ua ntej Nws yug los? (saib, ua piv txwv, Yauhas 17:5; Mauxiyas 3:5; Lus Qhuab Qhia thiab Kev Khi Lus 76:13–14, 20–24; Mauxes 4:2). Kev txawj ntse no puas hloov koj txoj kev xav thaum koj nyeem txog Nws txoj kev yug los?

Vim li cas Yexus Khetos tau los rau hauv lub ntiaj teb? (saib, ua piv txwv, Lukas 4:16–21; Yauhas 3:16–17; 3 Nifais 27:13–16; Lus Qhuab Qhia thiab Kev Khi Lus 20:20–28). Qhov uas koj paub li no puas hloov koj txoj kev xav txog tus Cawm Seej? Qhov no puas hloov koj txoj kev ua neej?

Kuj saib 2 Kauleethaus 8:9; Henplais 2:7–18; 1 Nifais 11:13–33; Amas 7:10–13; “The Nativity” (video), ChurchofJesusChrist.org.

1 Kauleethaus 15:21–26; Kaulauxais 1:12–22; 1 Petus 2:21–25

Yexus Khetos tau ua Nws ntiag tug hauj lwm tiav thiab tau qhib kev rau kuv txais txoj sia nyob mus ib txhis ua kuv qub txeeg qub teg.

Txawm yog muaj tej txuj ci tseem ceeb ntau thaum Yexus Khetos yug los, Nws yeej yuav zoo ib yam li lwm tus me nyuam yog tias Nws tsis tau ua tej hauj lwm zoo kawg nkaus thaum nws loj hlob tuaj. Raws li Thawj Tswj Hwm Gordon B. Hinckley hais tias, “Tus me nyuam Yexus ntawm Npelehees yeej yog ib tug me nyuam mos liab zoo li lwm tus xwb yog tias Nws tsis yog tus Khetos ntawm Khexemanes thiab Khaulakhauthas, thiab yog tsis muaj txoj Kev Sawv Rov Los.” (“The Wondrous and True Story of Christmas,” Ensign, Kaum Ob Hlis Ntuj 2000, 5).

Nyob hauv Phau Tshiab muaj puav pheej ntau txog tus Cawm Seej ntiag tug hauj lwm thiab Nws txoj kev hlub lwm tus. Qhov no ua rau koj xav txog tej zaj lus twg? Tej zaum koj yuav xav rov qab saib phau no los yog koj phau kawm vaj lug kub thiab rov qab nyeem txog tej kev tshoov siab uas koj tau sau cia. Tej zaum koj kuj yuav xav nyeem 1 Kauleethaus 15:21–26; Kaulauxais 1:12–22; 1 Petus 2:21–25 thiab xav txog qhov uas tus Cawm Seej thiab Nws txoj hauj lwm tau foom koob hmoov rau koj lub neej. Koj xav tias koj yuav tsum hloov dab tsi hauv koj lub neej? Koj yuav ua li cas kom txais tus Cawm Seej lub hwj chim?

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 1:18–25; 2:1–12; Lukas 1:26–38; 2:1–20.Nej yuav ua li cas kom ua koob tsheej txog Yexus Khetos nrog nej tsev neeg? Nov yog ob peb lub tswv yim, los sis nej tawm tswv yim rau nej tus kheej thiab los tau:

Nyeem los yog ua yeeb yam txog Yexus Hnub Yug ua ke.
Saib daim video “The Christ Child” (ChurchofJesusChrist.org).
Nyeem tej yam nyob hauv pawg “Yexus Khetos” nyob hauv Txoj Moo Zoo cov Ntawv, qhov tseem ceeb yog nyob hauv feem hu ua “His Birth (Christmas).”
Saib Thawj Pawg Thawj Tswj Hwm kev sib ntsib hawm Vajtswv hauv lub caij Christmas (broadcasts.ChurchofJesusChrist.org).
Hu tej zaj nkauj Christmas ua ke, los sis xaiv cov neeg zej zog los sis phooj ywg thiab mus xyuas lawv thiab hu nkauj rau lawv mloog (saib Cov Nkauj Qhuas Vajtswv, zaj 88–96).
Mus pab lwm tus.
Thov nej tsev neeg nrhiav tej yam hauv zaj dab neeg txog Yexus Hnub Yug uas pab lawv muaj tswv yim txog tej yam lawv tsim tau kom lawv nco txog Yexus Khetos.

1 Kauleethaus 15:21–26; Kaulauxais 1:12–22; 1 Petus 2:21–25.Vim li cas peb zoo siab uas Yexus Khetos tau yug los? Nws tau muab tej txiaj ntsim twg rau peb? Peb yuav ua li cas kom qhia Nws tias peb ris Nws txiaj? Tej zaum nej tsev neeg yuav xav hu ib zaj nkauj uas qhia txog Nws ntiag tug hauj lwm, xws li “He Sent His Son” (Children’s Songbook, 34–35).

“Tus Khetos uas Muaj txoj Sia Nyob: Cov Tim Thawj tej Lus Tim Khawv.”Yog nej xav pab nej tsev neeg tsom ntsoov rau tus Cawm Seej hauv lub caij Christmas, tej zaum nej yuav xav nyeem thiab kawm ua ke txog “Tus Khetos uas Muaj txoj Sia Nyob: Cov Thwj Tim tej Lus Tim Khawv” (ChurchofJesusChrist.org). Tej zaum nej yuav xav cim ntsoov tej nqe los ntawm “Tus Khetos uas Muaj txoj Sia Nyob” los sis nyeem tej lus piav txog tus Cawm Seej nyob hauv Phau Tshiab uas txhawb nqa zaj lus no. Los yog nej caw tau txhua tus sau nws zaj lus tim khawv txog Yexus Khetos thiab, yog tias nej txais kev tshoov siab, nyeem rau nej tsev neeg.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Once within a Lowly Stable,” Children’s Songbook, 41.

Kev Kawm Zoo Dua Ntxiv ntawm Yus Ib Leeg

Nrhiav Yexus Khetos Cov vaj lug kub qhia peb tias txhua yam ua tim khawv txog Yexus Khetos (saib Mauxes 6:62–63), yog li ntawd peb yuav tsum nrhiav Nws nyob hauv txhua yam. Thaum koj nyeem cov vaj lug kub, xav seb koj puas sau lub cim rau tej nqe uas qhia txog Nws. Siv sij hawm ua ntej txog hnub Christmas kom nrhiav tej yam nyob ib puag ncig koj uas ua tim khawv txog Yexus Khetos.