Yexus Khetos ntsib cov neeg thaum Nws Los Zaum Ob

Lub Nroog Mus Ib Txhis, los ntawm Keith Larson

Kaum Ob Hlis Ntuj 25–31

Tshwm Sim 15–22

“Kuv Yuav Ua Txhua Tus uas Kov Yeej Lawm tus Vajtswv”

Tej lub sij hawm qhov uas tab kaum peb txoj kev kawm yog qhov uas peb xav tias peb tsis tas kawm—peb paub lawm. Thaum koj nyeem cov vaj lug kub, cia li qhib siab rau tej yam uas tus Tswv xav qhia rau koj.

Sau Ntawv txog Koj tej Kev Tshoov Siab

Nyaj nej nco qab tias, phau Tshwm Sim pib thaum tus Cawm Seej hais tias Nws yog qhov chiv keeb thiab qhov kawg (Tshwm Sim 1:8). Ces muaj lus yuav luag zoo ib yam thaum kawg: “Kuv yog lub hauv paus thiab lub ntsis” (Tshwm Sim 22:13). Tiam sis qhov no txhais li cas? Lub hauv paus thiab lub ntsis ntawm dab tsi? Phau Tshwm Sim yeej muaj hwj chim ua tim khawv tias Yexus Khetos yog qhov chiv keeb thiab qhov kawg ntawm ib puas tsav yam—tag nrho cov neeg thoob plaws thiab kev cawm seej. Nws yog “tus Me Nyuam Yaj raug muab tua li npaj puag thaum ntuj tsim teb raug los” (Tshwm Sim 13:8). Thiab Nws yog tus Vaj Ntxwv ntawm cov vaj ntxwv uas ua rau kev pham, kev tu siab, thiab kev tuag tu nrho thiab qhib kev rau “ib lub ntuj tshiab thiab ib lub ntiaj teb tshiab” (Tshwm Sim 21:1).

Tiam sis ua ntej lub ntuj thiab lub ntiaj teb tshiab no, muaj ntau yam rau peb kov yeej: kev mob kev nkees, kev tsov kev rog, kev phem kev qias nyob qhov txhia chaw—tag nrho tej no los phau Tshwm Sim piav txog. Tiam sis Yexus Khetos nrog nraim peb nyob hauv lub caij nyoog no thiab. Nws yog “lub hnub uas ci thaum kaj ntug” uas ci thaum tsaus ntuj kom cog lus tias tsis ntev ces kaj ntug txoog (Tshwm Sim 22:16). Thiab lub sij hawm ntawd yeej los tsis ntev saum no. Nws yuav los. Txawm Nws caw peb hais tias, “Los cuag kuv” (Mathais 11:28), Nws kuj los cuag peb. Nws hais tias, “Kuv los sai sai no.” Thiab nrog kev cia siab thiab kev ntseeg uas yeej dawb huv vim peb tau raug tsim txom hauv hnub nyoog kawg no, peb teb hais tias, “Thov kom muaj raws li ntawd, Tswv Yexus, thov koj cia li los” (Tshwm Sim 22:20).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Tshwm Sim 16–18; 21–22

Tus Tswv hais kom kuv khiav ntawm Npanpiloos mus thiab txais “lub nroog dawb huv” los ua kuv qub txeeg qub teg.

Tom qab Yauhas pom kev puas tsuaj thiab kev tsim txom hauv hnub nyoog kawg, nws tau pom yuav muaj ib hnub uas zoo li qhov uas tus Tswv hais tias “Nim no kuv yuav tsim dua ib puas tsav yam tshiab” (Tshwm Sim 21:5). Ib txoj kev to taub qhov no yog muab Yauhas zaj lus piav txog Npanpiloos, uas yog lub cim txog kev ua li neeg ntiaj teb thiab kev phem (saib Tshwm Sim 16–18), piv rau nws zaj lus piav txog Yeluxalees tshiab, uas yog lub cim txog lub yeeb koob xilethi-aus thaum nyob hauv Vajtswv lub xub ntiag (saib Tshwm Sim 21–22). Tej zaum daim nram qab no yuav pab koj:

Npanpiloos	Yeluxalees Tshiab
Npanpiloos Tshwm Sim 16:3–6	Yeluxalees Tshiab Tshwm Sim 21:6; 22:1–2, 17
Npanpiloos Tshwm Sim16:10; 18:23	Yeluxalees Tshiab Tshwm Sim 21:23–24; 22:5
Npanpiloos Tshwm Sim 17:1–5	Yeluxalees Tshiab Tshwm Sim 21:2
Npanpiloos Tshwm Sim 18:11, 15	Yeluxalees Tshiab Tshwm Sim 21:4
Npanpiloos Tshwm Sim 18:12–14	Yeluxalees Tshiab Tshwm Sim 21:18–21; 22:1–2

Koj pom dab tsi sib txawv thiab?

Tej zaum koj xav paub seb qhov uas koj “tawm ntawm” Npanpiloos txhais li cas (Tshwm Sim 18:4). Koj kawm dab tsi nyob hauv Tshwm Sim 21–22 uas tshoov koj lub siab ua li ntawd?

Yexus nrog cov neeg uas nyob hauv qhov kaj ntawm Nws sab tes xis thiab cov neeg nyob hauv tsuas ntuj uas nyob hauv qhov tsaus ntuj

Kev Txiav Txim Zaum Kawg, los ntawm John Scott

Tshwm Sim 20:12–15; 21:1–4

Vajtswv yuav txiav txim rau Nws cov me nyuam raws li tej uas sau hauv phau ntawv txheeb txoj sia.

Xav seb ib tug kws sau ntawv hais tias nws mam li sau ib phau ntawv txog koj lub neej. Koj yuav xav kom nws sau ntawv txog tej yam twg? Yog koj paub tias nws kuj yuav sau ntawv txog tej yam koj yuav ua thaum yav tom ntej, koj puas ua neej tsis zoo li qub? Xav txog qhov no thaum koj nyeem Tshwm Sim 20:12–15. Koj cia siab tias luag yuav sau dab tsi txog koj hauv phau ntawv txheeb txoj sia? Koj yuav piav tias tus Cawm Seej muaj hauj lwm twg nyob hauv koj phau ntawv txheeb txoj sia? Raws li koj xav, vim li cas yuav tsum hu phau no ua “tus Me Nyuam Yaj phau txheeb txoj sia”? (Tshwm Sim 21:27).

Yog tias koj tsis txaus siab xav txog qhov uas koj yuav sawv ntawm Vajtswv lub xub ntiag thiab Nws yuav txiav txim rau koj, ces tej zaum koj yuav xav nyeem Tshwm Sim 21:1–4. Hais txog tej nqe no, Txwj Laug Dieter F. Uchtdorf tau hais tias:

“Hnub Txiav Txim no yuav yog ib hnub uas muaj kev hlub tshua thiab kev hlub ntau—ib lub hnub thaum tej siab ntais rhe yuav rov qab kaj, thaum tej kua muag nyuaj siab yuav pauv mus ua kua muag zoo siab, thaum txhua yam yuav kho kom zoo tag nrho. Muaj tseeb tiag, yeej yuav muaj kev tu siab vim yog tej kev txhaum. Muaj tseeb tiag, yuav muaj kev khuv xim thiab kev nyuaj siab ntau vim yog peb tej kev txhaum, peb tej kev ua ruam, thiab peb tej kev tawv ncauj uas ua rau peb xiam tej cib fim kom tau ib lub neej yav tom ntej uas zoo kawg.

“Tiam sis kuv tso siab hais tias tsis yog peb yuav txaus siab rau Vajtswv txoj kev txiav txim xwb; tiam sis peb kuj yuav xav tsis thoob thiab zoo siab vim yog nws txoj kev tshav ntuj, kev hlub tshua, kev ua siab zoo, thiab kev hlub rau peb, Nws cov me nyuam” (“Auj Peb tus Vajtswv txoj Hau Kev Tseem Ceeb Kawg!,” Liahona, Kaum Ib Hlis Ntuj 2016, 21).

Tej lus tseeb no puas hloov koj txoj kev xav txog Kev Txiv Txim Zaum Kawg? Tej lub tseeb no puas ua rau koj xav hloov koj lub neej?

Kuj saib Bible Dictionary, “Book of life.”

Tshwm Sim 22:18–19

Tej nqe no puas hais tias tsis muaj cov vaj lug kub ntxiv tsuas yog muaj phau Npaivnpaum xwb?

Ib txhia neeg tau hais tias Tshwm Sim 22:18–19 qhia tias yuav tsum xyeej Phau Ntawv Maumoos thiab lwm phau vaj lug kub hauv hnub nyoog kawg no. Koj yuav nrhiav tau lus teb rau qhov no nyob hauv Txwj Laug Jeffrey R. Holland zaj lus “My Words … Never Cease” (Liahona, Tsib Hlis Ntuj 2008, 91–94).

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Tshwm Sim 15:2–4.Thaum nej tsev neeg sib tham txog tej nqe no, tej nqe uas hais txog “Mauxes zaj nkauj” thiab “tus Me Nyuam Yaj zaj nkauj,” tej zaum nej yuav xav nyeem Mauxes zaj nkauj nyob hauv Khiav Dim 15:1–19, nrog lwm zaj nkauj uas muaj nyob hauv cov vaj lug kub, xws li Lus Qhuab Qhia thiab Kev Khi Lus 84:98–102. Vim li cas cov uas “tawm tsam yeej tus tsiaj” (Tshwm Sim 15:2) yuav xav hu tej zaj nkauj zoo li no? Tej zaum nej tsev neeg yuav xav hu ib zaj nkauj qhuas Vajtswv.

Tshwm Sim 19:7–9.Tej zaum nej yuav xav saib daim duab txog kev sib yuav los ntawm nej tsev neeg zaj keeb kwm los yog sib tham txog lub sij hawm thaum nej tsev neeg tau ua koob tsheej thaum ob tug neeg sib yuav. Vim li cas kev sib yuav yog ib qho piv txwv zoo rau tus Tswv txoj kev khi lus nrog Nws lub Koom Txoos? (Kuj saib Mathais 22:1–14.)

Tshwm Sim 20:2–3.Nqe vaj lug kub 1 Nifais 22:26 pab peb li cas kom to taub tias kev muab Dab Ntxwg Nyoog “khi” yuav zoo li cas?

Tshwm Sim 22:1–4.Cov lus hais tias yuav muaj tus Cawm Seej lub npe “nias rau ntawm [peb] lub hauv pliaj” txhais li cas? (Tshwm Sim 22:4; kuj saib Khiav Dim 28:36–38; Mauxiyas 5:7–9; Amas 5:14; Maulaunais 4:3; Lus Qhuab Qhia thiab Kev Khi Lus 109:22; David A. Bednar, “Honorably Hold a Name and a Standing,” Liahona, Tsib Hlis Ntuj 2009, 97–100).

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “When He Comes Again,” Children’s Songbook, 82–83.

Kev Qhia Zoo Dua Ntxiv

Rov qab nug txog tej yam uas nej caw nej tsev neeg ua. “Thaum nej rov qab nug txog tej yam uas nej caw nej tsev neeg ua, nej qhia nej tsev neeg tias nej hlub lawv thiab qhia vim li cas txoj moo zoo pab lawv tau koob hmoov. Nej kuj muab cib fim rau lawv qhia txog lawv lub neej” (Teaching in the Savior’s Way, 35).

Yexus Khetos caij nees los saum ntuj los thaum Nws Los Zaum Ob

Yexus Khetos hnav thav ntxwv xim liab thaum caij nees dawb.