“Yim Hli Ntuj 7–13. Loos 1–6: ‘Vajtswv lub Hwj Chim uas Cawm Tau Txhua Tus uas Ntseeg Dim,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Yim Hli Ntuj 7–13. Loos 1–6,” Los, Nrog Kuv Mus—Rau Ib Leeg thiab Tsev Neeg: 2023
Yim Hli Ntuj 7–13
Loos 1–6
“Vajtswv lub Hwj Chim uas Cawm Tau Txhua Tus uas Ntseeg Dim”
Qhov uas koj sau ntawv txog tej kev tshoov siab yuav pab koj nco ntsoov tej yam uas tus Ntsuj Plig qhia rau koj. Xav seb koj puas sau ntawv txog koj tej kev xav txog tej kev tshoov siab no.
Sau Ntawv txog Koj tej Kev Tshoov Siab
Thaum Povlauj tau sau nws tsab ntawv rau cov mej zeej hauv Loos, uas yog ib pawg neeg Yudais thiab Lwm Haiv Neeg, Yexus Khetos lub Koom Txoos twb loj tuaj lawm tsis yog ib pawg ntseeg me me los ntawm Kalilais xwb. 20 xyoo tom qab tus Cawm Seej tau sawv rov los, muaj tej pawg ntseeg Khetos nyob txhua qhov chaw uas cov Thwj Tim mus tau—tsis hais lub nroog Loos los yog, uas yog lub tuam nroog ntawm ib lub teb chaws uas muaj hwj chim heev. Tiam sis, lub Koom Txoos tsis loj npaum li lub nceeg vaj Loos, ntshe lub Koom Txoos tseem me me heev thiab raug tsim txom ntau. Yog li ntawd, ib txhia yuav “txaj muag qhia [Yexus Khetos] txoj moo zoo”—tiam sis, Povlauj yeej tsis txaj muag li. Nws yeej ua tim khawv txog lub hwj chim tseeb ntawd, “Vajtswv lub hwj chim uas cawm tau txhua tus uas ntseeg dim,” yeej muaj nyob hauv Yexus Khetos txoj moo zoo (Loos 1:16).
Tej lub Tswv Yim Kawm Vaj Lug Kub ntawm Yus Ib Leeg
Tej Tsab Ntawv yog dab tsi, thiab vim li cas tau tso li ntawd nyob hauv phau Npaivnpaum?
Tej Tsab Ntawv yog tsab ntawv uas lub Koom Txoos cov thawj coj tau sau rau cov Neeg Ntseeg nyob hauv ntau qhov chaw. Tus Thwj Tim Povlauj yog tus uas sau tej tsab ntawv feem ntau nyob hauv Phau Tshiab—pib ntawm phau Loos mus txog phau Henplais. Nws tej tsab ntawv los twb tso haud raws li qhov ntev, tsuas yog phau Henplais. Txawm yog phau Loos yog thawj tsab ntawv nyob hauv Phau Tshiab, tsab ntawv no los Povlauj twb sau thaum yuav luag hla teb chaws tas lawm.
“Tus uas ua lub neej ncaj ncees yog tus uas ntseeg.”
Tej zaum tej lub ntsiab no yuav pab koj to taub Tsab Ntawv rau cov Neeg Loos ntxiv:
-
Txoj kev cai.Thaum Povlauj sau ntawv txog “txoj kev cai,” nws hais txog Mauxes txoj kev cai. Lo lus “tej hauj lwm” nyob hauv Povlauj cov ntawv hais txog tej yam yuav tsum ua kom ua raws li Mauxes txoj kev cai. Xav seb Mauxes txoj kev cai thiab tej hauj lwm uas yuav tsum ua raws li Mauxes txoj kev cai yeej txawv ntawm txoj kev cai ntseeg raws li piav nyob hauv Loos 3:23–31.
-
Kev cai txiav, tsis tau ua kev cai txiav.Puag thaum ub, kev cai txiav yog ib lub cim txog txoj kev khi lus uas Vajtswv khi nrog Anplaham. Povlauj tau siv lo lus “kev cai txiav” kom hais txog cov Neeg Yudais (cov neeg khi lus) thiab “tsis tau ua kev cai txiav” kom hais txog Lwm Haiv Neeg. Xav seb Loos 2:25–29 qhia dab tsi txog kev ua Vajtswv cov neeg khi lus. Nco qab tias kev cai txiav tsis yog ib lub cim txog Vajtswv txoj kev khi lus rau Nws cov neeg (saib Tes Hauj Lwm 15:23–29).
-
Ncaj ncees, zam tximCov lus no yeej hais txog kev zam txim rau tej kev txhaum. Thaum peb los neeg ncaj ncees, peb txais kev zam txim, thiab dim lub txim rau peb tej kev txhaum. Thaum koj saib tej lus no, cia li kawm txog qhov uas Povlauj qhia tias dab tsi ua rau peb txais tau kev zam txim (kuj saib Phau Qhia txog Vaj Lug Kub, “Tsis Muaj Txim,” scriptures.ChurchofJesusChrist.org; D. Todd Christofferson, “Justification and Sanctification,” Ensign, Rau Hli Ntuj 2001, 18–25). Nyob hauv phau Loos, tej lus xws li “ncaj ncees” yeej zoo ib yam li nws hais “tsis muaj txim” thiab “zam txim.”
-
Kev tshav ntuj.Kev tshav ntuj yog “Vajtswv txoj kev pab los sis txhawb nqa, uas muab dhau los ntawm Yexus Khetos txoj kev hlub tshua.” Yog vim muaj tus Tswv txoj kev tshav ntuj, txhua tus neeg yuav sawv rov los thiab tsis txawj tuag. Tsis tas li ntawd, “kev tshav ntuj yog ib lub hwj chim uas cia txiv neej thiab poj niam txais tau txoj sia nyob mus ib txhis thiab kev tsa nto tom qab lawv tau sim ua kom tas zog.” Tsis yog peb khwv txaus kom tau kev tshav ntuj; tiam sis, yog kev tshav ntuj uas pab peb “txais tau dag zog thiab [yog] kev pab ua tej yam zoo uas [peb] yuav tsis muaj hwj chim [ua] tau” (Phau Qhia txog Vaj Lug Kub, “Kev Tshav Ntuj”; kuj saib 2 Nifais 25:23; Dieter F. Uchtdorf, “Lub Txiaj Ntsim Tshav Ntuj,” Liahona, Tsib Hlis Ntuj 2015, 107–10; Brad Wilcox, “His Grace Is Sufficient,” Liahona, Cuaj Hlis Ntuj 2013, 43–45). Thaum koj nyeem phau Loos, sau ntawv txog tej yam uas koj kawm txog tus cawm Seej txo kev tshav ntuj.
Tej yam kuv ua yuav tsum pab txhawb nqa kuv txoj kev hloov siab los ntseeg.
Ib txhia ntawm cov Neeg Yudais uas Ntseeg Khetos nyob hauv Loos ntseeg tias tej kab ke ntawm Mauxes txoj kev cai ua rau lawv txais kev cawm seej. Tej zaum koj xav tias qhov no tsis yog ib qho teeb meem vim peb tsis ua raws li Mauxes txoj kev cai ntxiv li lawm. Tiam sis thaum koj nyeem Povlauj tej lus, qhov tseem ceeb yog Loos 2:17–29, cia li xav txog koj txoj kev ua neej raws li txoj moo zoo. Tej kab ke uas koj ua, xws li kev txais lub cim nco txog los sis kev mus rau lub tuam tsev, tej no puas pab txhawb nqa koj txoj kev hloov siab los ntseeg Yexus Khetos? (saib Amas 25:15–16). Puas muaj dab tsi uas koj hloov tau thaum ua cov kab ke no kom yuav pab koj hloov siab ntxiv?
Kuj saib Dallin H. Oaks, “The Challenge to Become,” Ensign, Kaum Ib Hlis Ntuj 2000, 32–34.
Los ntawm Yexus Khetos, kuv yuav txais kev zam txim.
Tej zaum ib txhia neeg yuav poob siab thaum Povlauj hais tias, “Yeej tsis muaj ib tug neeg ncaj ncees hlo li” (Loos 3:10). Tiam sis kuj muaj tej lus uas ua rau peb cia siab heev nyob hauv phau Loos. Nrhiav tej lus no nyob hauv tshooj 3 thiab 5, thiab xav txog qhov uas yog vim li cas thaum peb nco qab tias “txhua tus puav leej ua txhaum thiab tu ncua Vajtswv lub hwj chim lawm” (Loos 3:23) yog ib qho tseem ceeb kom peb “zoo siab thiab cia siab hais tias, peb yuav tau Vajtswv lub hwj chim uas ci ntsa iab” (Loos 5:2).
Yexus Khetos caw kuv kom ua “lub neej tshiab.”
Povlauj tau qhia tias Yexus Khetos txoj moo zoo yuav tsum hloov peb txoj kev ua neej. Tej lus twg nyob hauv Loos 6 piav txog qhov uas tus Cawm Seej tau pab koj ua “lub neej tshiab”? (nqe 4).
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Loos 1:16–17.Peb yuav ua li cas kom qhia tias peb “tsis txaj muag qhia [Yexus Khetos] txoj moo zoo li”?
-
Loos 3:23–28.Thaum nej nyeem tej nqe no, tej zaum nej yuav xav sib tham txog qhov uas peb yeej yuav tsis muaj peev xwm khwv txaus kom tau Vajtswv txoj kev tshav ntuj thiab peb yuav tsum lees txais Nws txoj kev tshav ntuj xwb. Thaum twg peb tau hnov Vajtswv txoj kev tshav ntuj? Peb yuav tsum ua li cas kom txais tag nrho?
-
Loos 5:3–5.Peb tau raug tej kev txom nyem twg? Kev raug txom nyem li no puas tau pab peb ua siab ntev, kawm, thiab muaj kev cia siab?
-
Loos 6:3–6.Povlauj tau hais li cas hauv tej nqe no txog qhov uas kev cai raus dej yog ib lub cim? Tej zaum nej tsev neeg yuav xav mus saib ib tug ua kev cai raus dej. Los sis tej zaum ib tug hauv koj tsev neeg yuav nyiam muab duab los saib los sis hais dab neeg txog lub sij hawm thaum nws ua kev cai raus dej. Qhov uas peb ua raws li peb tej kev khi lus thaum peb ua kev cai raus dej pab peb li cas kom ua “lub neej tshiab”?
Kev cai raus dej yog ib lub cim txog ib lub neej tshiab ua Yexus Khetos ib tug thwj tim.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “When I Am Baptized,” Children’s Songbook, 103.
Kev Kawm Zoo Dua Ntxiv ntawm Yus Ib Leeg
Nug tej yam thaum koj kawm. Thaum koj kawm vaj lug kub, tej zaum yuav ua rau koj xav txog tej lus nug. Cia li xav txog tej lus nug no thiab nrhiav tej lus teb. Piv txwv hais tias, nyob hauv Loos 1–6 tej zaum koj yuav xav nrhiav tej lus teb rau lo lus nug “Txoj kev hlub yog dab tsi?”
Tsis Txhob Ntshai, los ntawm Greg K. Olsen