qhov seem ntawm lub nroog Loos puag thaum ub

Yim Hli Ntuj 14–20

Loos 7–16

“Nej Yuav Tsum Ua Zoo, Nej Thiaj Kov Yeej txoj Kev Phem”

Tsuas muaj chaw sau ntawv txog ob peb lub ntsiab cai ntawm txoj moo zoo nyob hauv Loos 7–16 nyob hauv zaj no, yog li ntawd tsis txhob xav tias yuav tsum kawm tej yam no xwb. Cia li tsom ntsoov rau tej kev tshoov siab uas koj txais thaum koj kawm vaj lug kub.

Sau Ntawv txog Koj tej Kev Tshoov Siab

Thaum nws sau nws tsab ntawv rau cov Neeg Loos, Povlauj hu cov mej zeej ntawm lub Koom Txoos ua “cov uas Vajtswv hlub” cov uas “Vajtswv hu los ua nws haiv neeg lawm.” Nws hais tias lawv “tej neeg thoob qab ntuj hnov hais tias [lawv] yog cov uas muab siab rau ntseeg” (Loos 1:7–8). Txawm yog Povlauj sau ntawv ntau kom kho tej lub tswv yim tsis tseeb thiab tej kev coj yam ntxwv uas ua yuam kev los, nws kuj xav qhia cov Neeg Ntseeg Khetos tshiab no tias lawv yog Haiv Neeg Ntseeg uas Vajtswv hlub. Nws tej lus ntuas no yeej pab peb txhua tus uas nyuaj rau peb paub txog Vajtswv txoj kev hlub thiab cov uas xav tias lawv yeej ua tsis taus ib tug Neeg Ntseeg. Povlauj tau txo hwj chim lees hais tias tej lub sij hawm nws xav tias nws yog ib tug “nyuaj siab ua luaj li” (Loos 7:24), tiam sis Yexus Khetos txoj moo zoo tau muab hwj chim rau nws kov yeej kev txhaum (saib Joseph Smith Kev Txhais, Loos 7:22–27 [nyob hauv phau Npaivnpaum cov ntawv ntxiv tom kawg]). Nrog lub hwj chim ntawd, tus Cawm Seej lub hwj chim txhiv dim, peb yuav “kov yeej txoj kev phem”—kev phem hauv lub ntiaj teb thiab kev phem nyob hauv peb tus kheej—thaum peb “ua zoo” (Loos 12:21).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Loos 7–8

Cov uas mloog tus Ntsuj Plig lus yuav “txais tej uas Vajtswv npaj tseg rau Yexus Khetos lawm.”

Tom qab koj ua “lub neej tshiab” thaum koj ua kev cai raus dej (Loos 6:4), tej zaum koj tau xav zoo li Povlauj piav txog nyob hauv Loos 7—lub “siab tawm tsam” ntawm tus neeg ntiaj teb thiab koj tej kev xav ua zoo (Loos 7:23). Tiam sis Povlauj kuj hais txog kev cia siab nyob hauv Loos 8:23–25. Koj nrhiav tau dab tsi hauv tshooj 8 uas qhia tias vim li cas yuav muaj kev cia siab li no? Tej zaum koj yuav xav nrhiav cov koob hmoov uas muaj thaum “Vajtswv tus Ntsuj Plig nyob hauv nej lub siab” (Loos 8:9). Koj yuav ua li cas kom muaj tus Vaj Ntsuj Plig Dawb Huv koom ua ke nrog koj nyob hauv koj lub neej?

Loos 8:16–39

Lub txiaj ntsim uas yog lub yeeb koob mus ib txhis li yuav kov yeej kuv tej kev sim siab hauv lub ntiaj teb no.

Ob peb xyoos tom qab Povlauj sau tsab ntawv no, Haiv Neeg Ntseeg nyob hauv Loos raug tsim txom phem heev. Koj kawm dab tsi nyob hauv Loos 8:16–39 uas tej zaum tau pab cov Neeg Ntseeg no thaum lawv raug tsim txom? Tej lus no puas muaj nqis rau koj thiab pab koj kov yeej tej kev sim siab uas koj muaj tam sim no?

Nrhiav tej yam uas muab tej nqe no txuas rau tej lus qhia los ntawm Muam Linda S. Reeves: “Kuv yeej tsis to taub hais tias yog vim li cas peb thiaj li muaj ntau yam kev nyuaj siab, tab sis, cov viv ncaus, kuv xav hais tias lub nqi zog zoo heev nyob mus ib txhis, yeej zoo tshaj qhov uas peb pom tau ces hnub uas yuav muaj nqi zog, ntshe peb yuav hais rau peb Leej Txiv uas muaj lub siab mos siab muag thiab hlub peb heev hais tias, ‘Es peb yuav tsum ua li ntawd xwb?’ Kuv ntseeg tau tias yog peb nco ntsoov thiab pom tau txhua hnub tias peb Leej Txiv Saum Ntuj Ceeb Tsheej thiab peb tus Cawm Seej hlub peb npaum li cas, ces peb yuav kam ua txhua yam uas Nkawd hais kom peb ua kom peb thiaj li tau rov qab mus rau ntawm Nkawd xub ntiag dua. Yeej yuav tsis ua li cas, yog hais tias thaum kawg, es tej kev nyuaj siab ntawd yuav yog tej uas ua rau peb muaj sia nyob mus ib txhis thiab rau tsa nto rau hauv Vajtswv lub nceeg vaj nrog peb Leej Txiv thiab tus Cawm Seej?” (“Ua Neej Tsim Nyog Txais Peb tej Koob Hmoov uas Cog Lus Tseg,” Liahona, Kaum Ib Hlis Ntuj 2015, 11). Txiav txim siab tias koj yuav ua li cas kom “nco ntsoov thiab pom tau txhua hnub” txog Vajtswv txoj kev hlub koj.

Loos 8:29–30; 9–11

Povlauj xav li cas thaum nws hais tej lus xws li “muab tshwj,” “xaiv,” thiab “paub ua ntej”?

Povlauj tau siv tej lus no xws li “muab tshwj,” “xaiv,” thiab “paub ua ntej” kom qhia tias ua ntej lub neej no, Vajtswv tau xaiv ib txhia ntawm Nws cov neeg los koom ua ke nrog Ixayees, Nws cov neeg khi lus. Qhov no txhais hais tias lawv yuav txais cov koob hmoov thiab tej kev lav ris kom foom koob hmoov rau tag nrho cov neeg nyob hauv lub ntiaj teb (saib Phau Qhia txog Vaj Lug Kub, “Xaiv,” scriptures.ChurchofJesusChrist.org). Tiam sis, Povlauj qhia nyob hauv Loos 9–11 hais tias tag nrho Vajtswv cov me nyuam yuav muaj cib fim los ua Nws cov neeg khi lus, thiab peb txhua tus txais txoj sia mus ib txhis los ntawm ib txoj kev xwb—los ntawm kev ntseeg Yexus Khetos thiab kev ua raws li Nws cov lus txib.

Kuj saib Efexus 1:3–4; 1 Petus 1:2; Amas 13:1–5.

Loos 12–16

Povlauj caw kuv los ua ib tug Neeg Ntseeg tiag thiab ib tug uas coj raws li Yexus Khetos.

Tsib tshooj kawg hauv phau Loos muaj tej lus qhia ntau txog kev ua neej raws li ib tug Neeg Ntseeg. Ib txoj kev kawm txog tej lus qhia no yog kev nrhiav tej lub ntsiab uas Povlauj rov qab hais. Koj yuav hais li cas yog koj hais ntsiab lus txog Povlauj tej lus qhia?

Tej zaum koj yuav tsis muaj peev xwm ua txhua yam nws qhia tam sim no, tiam sis tus Ntsuj Plig yuav pab koj nrhiav tau ib los sis ob lub ntsiab cai uas koj muaj peev xwm pib ua hnub no. Qhia tias koj xav ua dab tsi thaum koj thov Leej Txiv Saum Ntuj Ceeb Tsheej , thiab thov kom Nws pab koj.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Loos 8:31–39.Peb nrhiav dab tsi nyob hauv Loos 8:31–39 uas qhia tias Leej Txiv Saum Ntuj Ceeb Tsheej thiab Yexus xav li cas txog peb? Thaum twg peb tau hnov Vajtswv txoj kev hlub?

Kom qhia txog nqe 38–39, tej zaum nej tsev neeg yuav xav nrhiav tej yam uas yeej cais tsis taus, xws li peb thiab Vajtswv txoj kev hlub.

txiv tsev thiab tus ntxhais seev cev

Txwj Laug Wilford W. Andersen tau qhia tias, “Cov nkauj ntawm txoj moo zoo yog kev xyiv fab uas los ntawm tus Vaj Ntsuj Plig Dawb Huv.”

Loos 9:31–32.Txwj Laug Wilford W. Andersen zaj lus “Cov Nkauj ntawm Txoj Moo Zoo” (Liahona, Tsib Hlis Ntuj 2015, 54–56; kuj saib daim video nyob ntawm ChurchofJesusChrist.org) pab tau nej kawm txog tej yam uas Povlauj qhia txog kev cai, tej hauj lwm, thiab kev ntseeg. Tom qab nej sib tham txog nws zaj lus, tej zaum nej tsev neeg yuav nyiam seev cev thaum muaj cov nkauj thiab thaum tsis muaj cov nkauj mloog. Kev ntseeg yuav pab li cas kom paub txog kev xyiv fab ntawm txoj moo zoo?

Loos 10:17.Muab cov ntawv lo rau ob peb khob dej thiab sau tej lus uas pab peb txais Vajtswv txoj lus (xws li cov vaj lug kub, kev tshwm sim, thiab lub tuam rooj sab laj). Sib tham seb vim li cas Vajtswv txoj lus ua rau peb txoj kev ntseeg loj tuaj thaum nej nchuav cov dej rau hauv ib lub hub uas muaj ntawv lo rau hais tias “Kev Ntseeg.”

Loos 12.Qhov uas peb “muab [peb] lub cev fij rau Vajtswv kom dawb huv thiab haum Vajtswv siab” txhais li cas? (nqe 1).

Loos 14:13–21.Tej zaum nej tsev neeg yuav nyiam kawm txog Povlauj tej lus qhia txog kev txiav txim thiab kev sib cav sib ceg txog tej yam uas nyias xav nyias xwb. Tej zaum nej yuav nyiam sib tham txog tej yam nej ua tau thaum lwm tus neeg, tsis hais nej tsev neeg, xaiv tej yam uas tsis yog raws li nej nyiam. Peb yuav ua li cas kom “muab siab rau ua tej uas yuav ua rau sawv daws nyob sib haum xeeb”? (nqe 19).

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “I Feel My Savior’s Love,” Children’s Songbook, 74–75.

Kev Qhia Zoo Dua Ntxiv

Cia cov me nyuam siv lawv txoj kev txawj tsim tej yam. “Thaum nej caw nej cov me nyuam tsim ib yam uas qhia txog ib lub ntsiab cai ntawm txoj moo zoo, nej yuav pab lawv to taub lub ntsiab cai zoo dua ntxiv. … Cia lawv ua, kos duab, pleev xim, sau ntawv, thiab tsim tej yam” (Teaching in the Savior’s Way, 25).

Khetos uas xyab tes

Nrog Nraim Kuv Nyob, los ntawm Del Parson