Khetos thiab cov thwj tim nyob hauv Khexemanes

Koog Ntoo Khexemanes, los ntawm Derek Hegsted

Rau Hli Ntuj 12–18

Lukas 22; Yauhas 18

“Tsis Txhob Ua Raws Li Kuv lub Siab Nyiam, Tiam Sis Ua Raws Li Koj lub Siab Nyiam Xwb”

Cia li siv sij hawm ntev me ntsis nyeem Lukas 22 thiab Yauhas 18 lub lim tiam no. Xav txog thiab thov Vajtswv txog tej yam uas koj nyeem. Yog koj ua li no ces tus Ntsuj Plig yuav muaj cib fim ua tim khawv rau koj lub siab tias cov vaj lug kub muaj tseeb.

Sau Ntawv txog Koj tej Kev Tshoov Siab

Tsuas muaj peb tug neeg uas pom Yexus Khetos txoj kev raug txom nyem nyob hauv lub Vaj Khexemanes—es lawv twb tsaug zog ntau thaum ntawd. Nyob hauv lub vaj thiab saum tus ntoo khaub lig, Yexus tau ris txhua leej txhua tus tej kev txhaum, kev mob, thiab kev txom nyem, tiam sis tsis muaj leej twg paub tias Nws tau ua li ntawd. Tej yam uas tseem ceeb mus ib txhis li yeej dhau mus es neeg ntiaj teb tsis tshua quav ntsej. Tiam sis Vajtswv Nws Leej Txiv twb paub lawm. Nws tau hnov Nws Leej Tub uas rau siab ntseeg thov: “Txiv, yog koj pom zoo, thov koj muab lub khob no tshem ntawm kuv mus. Txawm yog li cas los koj tsis txhob ua raws li kuv lub siab nyiam, tiam sis ua raws li koj lub siab nyiam xwb. Muaj ib tug tim tswv ceeb tsheej tshwm los rau Yexus pom thiab txhawb Yexus lub zog” (Lukas 22:42–43). Txawm peb tsis nyob ntawd pom Yexus txoj kev tsis xav txog Nws tus kheej thiab txoj kev ywj rau Leej Txiv lub siab nyiam, peb yeej ua tim khawv txog Yexus Khetos txoj Kev Theej Txhoj. Txhua lub sij hawm peb hloov siab lees txim thiab txais kev zam txim rau peb tej kev txhaum, txhua zaus peb txais tau tus Cawm Seej lub hwj chim uas txhawb nqa peb, peb ua tim khawv txog qhov uas tau muaj los nyob hauv lub Vaj Khexemanes.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lukas 22:31–34, 54–62; Yauhas 18:17–27

Kev hloov siab los ntseeg yeej yog ib tug txheej txheem.

Cia li xav txog tej lub sij hawm thaum Petus nrog tus Cawm Seej nyob—tej txuj ci tseem ceeb uas nws pom thiab cov lus qhuab qhia uas nws tau kawm. Ces vim li cas tus Cawm Seej yuav hais lus rau Petus hais tias, “Thaum koj los [hloov siab los ntseeg], koj yuav tsum txhawb koj cov kwv tij zog”? (Lukas 22:32; ntxiv qhov uas ntawv qaij). Thaum koj xav txog qhov no, tej zaum yuav pab koj yog koj xav txog qhov uas Txwj Laug David A. Bednar qhia tias yus muaj ib zaj lus tim khawv yeej tsis zoo ib yam li yus tau hloov siab los ntseeg tiag tiag (saib “Hloov Siab Los Ntseeg tus Tswv,” Liahona, Kaum Ib Hlis Ntuj 2012, 106–9).

Thaum koj nyeem txog tej yam uas muaj los rau Petus nyob hauv Lukas 22:31–34, 54–62 (kuj saib Yauhas 18:17–27), cia li xav txog koj txoj kev hloov siab los ntseeg. Koj puas tau xav tias koj rau siab heev, ib yam li Petus, es koj “txaus siab nrog [tus Cawm Seej] raug kaw rau hauv tsev loj cuj thiab tuag nrog [Nws]”? (Lukas 22:33). Vim li cas tej lub sij hawm peb tej kev xav li no ploj mus? Yeej muaj cib fim txhua hnub kom xyeej los sis ua tim khawv txog tus Cawm Seej; koj yuav ua dab tsi kom ua tim khawv txog Nws txhua hnub? Koj kawm dab tsi ntxiv txog tej yam uas muaj los rau Petus?

Thaum koj nyeem ntxiv nyob hauv Phau Tshiab, cia li saib thaum twg muaj pov thawj txog Petus txoj kev hloov siab los ntseeg. Saib tej yam uas Nws ua raws li tus Tswv txib kom “txhawb [nws] cov kwv tij zog” thiab (Lukas 22:32; saib Tes Hauj Lwm 3–4).

Kuj saib Malakaus 14:27–31.

Lukas 22:39–46

Tus Cawm Seej raug txom nyem rau kuv nyob hauv Khexemanes.

Thawj Tswj Hwm Russell M. Nelson tau hais kom peb “siv sij hawm kawm txog tus Cawm Seej thiab Nws txoj kev theej txhoj” (“Txais Tau Yexus Khetos lub Hwj Chim rau Hauv Peb lub Neej,” Liahona, Tsib Hlis Ntuj 2017, 40).

Cia li xav seb koj yuav ua li cas kom ua raws li Thawj Tswj Hwm Nelson tej lus. Tej zaum koj yuav xav thov Vajtswv xav txog tus Cawm Seej txoj kev raug txom nyem hauv Khexemanes, raws li piav hauv tej nqe no, thiab sau ntawv txog tej lus nug uas koj xav txog.

Yog xav kawm ntxiv txog tus Cawm Seej thiab Nws txoj Kev Theej Txhoj, sim nrhiav hauv lwm nqe vaj lug kub kom teb tej lus nug li no:

• Vim li cas yuav tsum muaj tus Cawm Seej txoj Kev Theej Txhoj? (Saib 2 Nifais 2:5–10, 17–26; 9:5–26; Amas 34:8–16; 42:9–26.)

• Tus Cawm Seej raug dab tsi thaum Nws raug txom nyem? (Saib Yaxayas 53:3–5; Mauxiyas 3:7; Amas 7:11–13; Lus Qhuab Qhia thiab Kev Khi Lus 19:16–19.)

• Yexus Khetos txoj kev raug txom nyem pab kuv li cas? (Saib Yauhas 10:10–11; Henplais 4:14–16; 1 Yauhas 1:7; Amas 34:31; Maulaunais 10:32–33; Dallin H. Oaks, “Yexus Khetos txoj Kev Theej Txhoj Ua Kom Muaj Zog,” Liahona, Kaum Ib Hlis Ntuj 2015, 61–64.)

• Tej lus nug ntxiv uas kuv muaj:

Thaum koj kawm txog Khexemanes, tej zaum koj yuav xav paub tias Khexemanes yog ib lub vaj rau cov ntoo txiv roj thiab muaj ib qhov chaw tsuam txiv roj, uas siv kom tsuam txiv roj kom tau roj siv rau tej lub teeb thiab noj thiab kho mob (saib Lukas 10:34). Ua li cas tus txheej txheem tsuam txiv roj yog ib lub cim txog tej yam uas tus Cawm Seej ua rau peb nyob hauv Khexemanes? Yog koj xav kawm txog qhov no, cia li saib Txwj Laug D. Todd Christofferson zaj lus “Muaj Kuv txoj Kev Hlub Tsis Tu Tsis Tseg” (Liahona, Kaum Ib Hlis Ntuj 2016, 50–51).

Kuj saib Mathais 26:36–46; Malakaus 14:32–42.

Yauhas 18:28–38

Tus Cawm Seej “lub teb chaws tsis yog lub ntiaj teb no.”

Vim nws yog ib tug thawj coj, Pooti-us Philaj yeej paub txog lub hwj chim thiab tej teb chaws ntawm lub ntiaj teb no. Tiam sis Yexus hais txog ib lub teb chaws uas txawv heev. Xav txog tej yam uas koj tau nyeem txog tus Cawm Seej lub neej, koj pom tias uas yog pov thawj txog qhov uas Nws “lub teb chaws tsis yog lub ntiaj teb no”? (Yauhas 18:36). Vim li cas koj yuav tsum paub qhov no? Koj xav li cas txog Yexus tej lus rau Philaj?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lukas 22:31–32.Petus tau xav li cas thaum Yexus tau thov Vajtswv pab nws thiab nws txoj kev ntseeg? Peb yuav thov Vajtswv pab leej twg kom nws “muab siab rau ntseeg”? (nqe 32).

Lukas 22:39–46.Kev kawm txog tus Cawm Seej txoj kev raug txom nyem hauv Khexemanes yog ib lub sij hawm dawb ceev rau nej tsev neeg. Xav seb nej yuav ua li cas kom muaj tus Ntsuj Plig thaum nej kawm Lukas 22:39–46. Tej nej yuav xav hu nkauj ua ke hu tej zaj nkauj qhuas Vajtswv uas nej tsev neeg nyiam txog tus Cawm Seej. Tej zaum nej yuav xav saib daim duab los yog saib video xws li “The Savior Suffers in Gethsemane” (ChurchofJesusChrist.org). Thaum nej nyeem tej nqe no, tej zaum nej tsev neeg yuav xav hais tej nqe uas muaj nqis rau lawv—xws li ib nqe uas pab lawv hnov tus Cawm Seej txoj kev hlub (kuj saib Mathais 26:36–46; Malakaus 14:32–42). Tej zaum nej kuj yuav xav caw lawv hais lus tim khawv txog Yexus Khetos thiab Nws txoj Kev Theej Txhoj.

Lukas 22:42.Tej zaum nej tsev neeg yuav nyiam hais txog tej lub sij hawm thaum lawv tau kawm hais tias, “Tsis txhob ua raws li kuv lub siab nyiam, tiam sis ua raws li koj lub siab nyiam xwb.”

Lukas 22:50–51; Yauhas 18:10–11.Peb kawm dab tso txog Yexus los ntawm tej nqe no?

Yexus Khetos kho tus tub qhe pob ntseg

Tsum Li Ntawd, los ntawm Walter Rane

Yauhas 18:37–38.Peb yuav teb li cas yog Philaj nug peb tias “Qhov tseeb yog dab tsi?” (nqe 38). Yog xav tau tswv yim, saib Yauhas 8:32; Lus Qhuab Qhia thiab Kev Khi Lus 84:45; 93:23–28; thiab “Kev Tseeb Yog Dab Tsi?,” Cov Nkauj Qhuas Vajtswv, zaj 126.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Kuv Zoo Siab Yexus Hlub Kuv,” Cov Nkauj Qhuas Vajtswv, zaj 82.

Kev Kawm Zoo Dua Ntxiv ntawm Yus Ib Leeg

Kawm cov yaj saub thiab cov tim thawj tej lus hauv hnub nyoog kawg no. Cia li nyeem txog tej yam uas cov yaj saub thiab cov tim thawj hauv hnub nyoog kawg tau qhia txog tej yam tseeb uas koj nrhiav tau hauv cov vaj lug kub. Piv txwv hais tias, nyob hauv phau Liahona uas muaj tej zaj lus los ntawm lub tuam rooj sab laj uas nyuam qhuav muaj tas los, tej zaum koj yuav xav nrhiav hauv phiaj qhia ntsiab lus rau “Kev Theej Txhoj” (saib Teaching in the Savior’s Way, 21).

Yexus Khetos hauv lub Vaj Khexemanes

Tsis Txhob Ua Raws Li Kuv lub Siab Nyiam, los ntawm Walter Rane.