“Rau Hli Ntuj 5–11. Yauhas 14–17: ‘Nej Yuav Tsum Muaj lub Siab Hlub Ib Yam Li Kuv,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Rau Hli Ntuj 5–11. Yauhas 14–17,” Los, Nrog Kuv Mus—Rau Ib Leeg thiab Tsev Neeg: 2023
Rooj Mov Kawg, los ntawm William Henry Margetson
Rau Hli Ntuj 5–11
Yauhas 14–17
“Nej Yuav Tsum Muaj lub Siab Hlub Ib Yam Li Kuv”
Thaum koj nyeem tus Cawm Seej tej lus qhia nyob hauv Yauhas 14–17, tus Vaj Ntsuj Plig Dawb Huv yuav pab koj paub koj yuav tsum kawm dab tsi. Sau ntawv txog tej kev tshoov siab uas koj txais.
Sau Ntawv txog Koj tej Kev Tshoov Siab
Qhov uas peb hu ua “Rooj Mov Kawg” los xyov Yexus cov thwj tim puas paub tias thawm lawv koom ua ke ua kev cai Hla Dhau, zaum ntawd puas yog zaum kawg uas lawv yuav noj mov nrog lawv tus Xib Hwb ua ntej Nws tuag. Tiam sis, Yexus “paub hais tias twb txog lub sij hawm” (Yauhas 13:1). Tsis ntev tom qab ntawd Nws yuav raug kev txom nyem hauv Khexemanes, Nws cov phooj ywg zoo yuav xyeej Nws, thiab Nws yuav tuag saum tus ntoo khaub lig. Tiam sis txawm muaj tag nrho txhua yam no, Yexus tsis tau xav txog Nws tus kheej, Nws tau tsom ntsoov rau Nws cov thwj tim. Lawv yuav tsum paub dab tsi thaum yav tom ntej? Yexus tej lus qhia nyob hauv Yauhas 14–17 qhia tias Nws xav li cas txog Nws cov thwj tim, thaum lub sij hawm ntawd thiab tam sim no. Ib yam tseeb uas Nws qhia kom nplij peb lub siab yog qhov uas Nws yeej yuav tsis tso peb tseg. Nws cog lus tias, “Yog nej ua raws li kuv tej lus, nej yuav muaj lub siab hlub ib yam li kuv” (Yauhas 15:10).
Tej lub Tswv Yim Kawm Vaj Lug Kub ntawm Yus Ib Leeg
Kuv yuav qhia Yexus Khetos tias kuv hlub Nws thaum kuv ua raws li Nws cov lus txib.
Thaum koj nyeem Yauhas 14–15, tej zaum koj yuav xav sau lub cim rau txhua lo lus hlub. Tej zaum koj yuav pom tias twb hais lo lus tej lus txib (los sis tej lus sam hwm) ntau zaus koom ua ke nrog lo lus hlub nyob hauv ob tshooj no. Koj kawm dab tsi los ntawm tus Cawm Seej tej lus qhia txog qhov uas kev hlub thiab cov lus txib? Muaj lwm lo lus thiab kab lus uas koom ua ke nrog lo lus hlub nyob hauv ob tshooj no?
Cia li xav seb tus Cawm Seej txoj kev hlub tau pab koj li cas.
Kuj saib Yauhas 13:34–35; D. Todd Christofferson, “Muaj Kuv txoj Kev Hlub Tsis Tu Tsis Tseg,” Liahona, Kaum Ib Hlis Ntuj 2016, 48–51.
Rooj mov Kawg, los ntawm Clark Kelley Price
Tus Vaj Ntsuj Plig Dawb Huv pab kuv ua raws li kuv lub hom phiaj vim kuv yog Yexus Khetos ib tug thwj tim.
Ntshe cov thwj tim nyuaj siab heev thaum lawv hnov tias lub sij hawm nrog tus Cawm Seej yuav luag tas lawm. Tej zaum lawv twb txhawj heev thaum lawv xav tias lawv yuav ua li cas thaum Nws tsis nyob. Thaum koj nyeem Yauhas 14–16, nrhiav seb tus Cawm Seej tau hais li cas kom nplij lawv lub siab. Qhov tseem ceeb, saib seb Nws qhia dab tsi rau lawv txog tus Vaj Ntsuj Plig Dawb Huv. Koj kawm dab tsi txog tus Vaj Ntsuj Plig Dawb Huv los ntawm tus Cawm Seej tej lus nyob hauv tej nqe no?
Vim li cas cov thwj tim xav tau txoj kev pab los ntawm tus Vaj Ntsuj Plig Dawb Huv no? Tus Vaj Ntsuj Plig Dawb Huv tau pab ua tej luag hauj lwm no rau koj? Xav seb koj ua tau dab tsi kom Nws lub hwj huam yuav muaj zog ntxiv hauv koj lub neej.
Kuj saib 3 Nifais 19:9; 27:20; Lus Qhuab Qhia thiab Kev Khi Lus 11:12–14; Mauxes 6:61; Michelle D. Craig, “Kev Txais Tau tus Ntsuj Plig Npaum Li Cas,” Liahona, Kaum Ib Hlis Ntuj 2019, 19–21.
Thaum kuv txuas rau ntawm Khetos, kuv yuav txi txiv zoo.
Koj xav tias kev “txuas rau ntawm [Khetos]” txhais li cas? (Yauhas 15:4). Koj muaj cov “txiv” twg uas qhia tias koj tseem txuas rau ntawm txoj hmab, uas piv rau Yexus Khetos?
Yexus Khetos tau pab daws Nws cov thwj tim.
Yexus tej lus thov Vajtswv nyob hauv Yauhas 17 los peb hu ua Nws Zaj Lus Thov Vajtswv Pab Tib Neeg. Nyob hauv Nws cov lus thov, Yexus tau thov kom pab Nws cov Thwj Tim thiab “pab cov neeg uas hnov tej lus uas lawv qhia thiab los ntseeg kuv” (Yauhas 17:20). Qhov no txhais tias Nws tau thov Vajtswv kom pab koj. Yexus tau thov kom Nws Leej Txiv muab dab tsi rau koj thiab lwm tus neeg uas ntseeg Nws? Qhov no qhia dab tsi rau koj txog Nws txoj kev xav txog koj?
Zaj lus thov no kuj qhia tej yam tseeb tseem ceeb uas nyob mus ib txhis. Koj nrhiav tau tej lus tseeb twg? Thaum koj nyeem tshooj no, xav seb koj puas sau ntawv txog tej yam uas koj kawm txog tej no:
-
Thov Vajtswv
-
Tus Cawm Seej txoj kev koom siab nrog Nws Leej Txiv
-
Tus Cawm Seej txoj kev koom siab nrog Nws cov thwj tim
-
Cov thwj tim yuav tsum ua li cas tsis txhob ua li neeg ntiaj teb
-
Lwm yam tseeb uas koj saib yog tej yam tseem ceeb
Leej Txiv Saum Ntuj Ceeb Tsheej thiab Yexus Khetos koom siab koom ntsws tag nrho.
Thaum Nws thov Vajtswv nyob hauv Yauhas 17, Yexus tau hais txog Nws txoj kev koom siab nrog Leej Txiv. Ua li cas Leej Txiv thiab Leej Tub “koom ib lub siab”? (Yauhas 17:11, 21–23). Tus Cawm Seej tau thov Vajtswv kom Nws cov thwj tim yuav “koom ib lub siab” ib yam li Nws thiab Nws Leej Txiv koom ib lub siab (Yauhas 17:22). Koj xav tias qhov no txhais li cas? Cia li xav txog cov neeg uas koj paub—piv txwv hais tias, koj tus txiv los yog tus poj niam los sis koj tsev neeg, cov neeg hauv koj pawg ntseeg, thiab cov Neeg Ntseeg Khetos. Koj yuav ua li cas kom koom ib lub siab nrog cov neeg no ib yam li Yexus koom ib lub siab nrog Leej Txiv?
Kuj saib Quentin L. Cook, “Tej Siab Sib Khi Los ntawm Kev Ncaj Ncees thiab Kev Koom Siab,” Liahona, Kaum Ib Hlis Ntuj 2020, 18–22; Sharon Eubank, “Los ntawm Kev Koom Siab Peb Thiaj Li Txais Vajtswv lub Hwj Chim,” Liahona, Kaum Ib Hlis Ntuj 2020, 55–57.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Yauhas 14:5–6.Tej zaum nej tsev neeg yuav nyiam coj nej tsev neeg ib leeg zuj zus thaum nej mus taug kev. Vim li cas Yexus yog “txoj kev”? Nws coj peb mus qhov twg?
-
Yauhas 14:26–27.Yexus txoj kev kaj siab lug thiab kev kaj siab lug li “neeg ntiaj teb muab” txawv li cas? Tej zaum koj tsev neeg yuav xav qhia thaum twg lawv tau txais kev kaj siab lug thiab kev nplij siab los ntawm tus Vaj Ntsuj Plig Dawb Huv.
-
Yauhas 15:1–8.Tej zaum yuav lom zem heev yog nej nyeem tej nqe no ze ib txoj hmab, ib tsob ntoo, los sis lwm yam tsob ntoo. Muaj li cas thaum muab ib ceg ntoo dam ntawm ib tsob ntoo? Tej zaum nej yuav xav sib tham txog qhov uas peb zoo li tej ceg ntoo thiab qhov uas kev “muaj lub siab”
-
Yauhas 15:17–27; 16:1–7.Yog vim li cas uas koj xav tias Yexus Khetos tau ceeb toom Nws cov thwj tim txog kev raug tsim txom? Niaj hnub no Yexus Khetos cov thwj tim raug tsim txom li cas? Tus Cawm Seej tej lus nyob hauv tej nqe no yuav pab peb li cas thaum peb raug tsim txom?
-
Yauhas 16:33.Yexus Khetos tau ua li cas kom kov yeej lub ntiaj teb? Nws txoj Kev Theej Txhoj tau ua li cas kom peb nyob kaj siab lug thiab muaj kev zoo siab? (kuj saib Lus Qhuab Qhia thiab Kev Khi Lus 68:6).
-
Yauhas 17:21–23.Muaj dab tsi uas yuav pab nej tsev neeg kawm koom siab ntxiv zoo li Yexus Khetos thiab Leej Txiv Saum Ntuj Ceeb Tsheej. Tej zaum nej yuav xav sib tham txog ib pawg sib tw ntaus pob thiab qhov uas lawv ua li cas kom ua tau ib lub hom phiaj. Los sis tej zaum nej yuav xav mloog ib pawg hu nkauj los sis pawg qoj nkauj thiab sib tham txog qhov uas cov kws qoj nkauj koom ua ke kom qoj nkauj zoo mloog.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “The Holy Ghost,” Children’s Songbook, 105.
Kev Qhia Zoo Dua Ntxiv
Siv tej kev kaw suab. Thaum nej qhia nej tsev neeg txog cov vaj lug kub, cia li xav seb nej puas mloog kev kaw suab txog cov vaj lug kub, uas muaj nyob ntawm ChurchofJesusChrist.org los sis nyob hauv qhov app Txoj Moo Zoo cov Ntawv. Yog nej mloog Yauhas 14–17 ces yuav muaj hwj chim heev vim tej tshooj no muaj tus Cawm Seej tej lus ntau heev.
Yexus qhia hais tias, “Kuv yog tsob hmab, nej yog cov ceg” (Yauhas 15:5).