murume ari mumuti apo Jesu paanosvika

Zacchaeus in the Sycamore Tree (Zakeo ari muMumuti weSikamore; by James Tissot

Chivabvu 15–21

Mateo 21–23; Marko 11; Ruka 19–20; Johane 12

“Tarira, Mambo Wako Unovuya”

Usati waverenga pfungwa dziri muchidzidzo chino, verenga Mateo 21–23; Marko 11; Ruka 19–20; uye Johane 12. Nyora manzwiro aunokwanisa kugoverena nemhuri yako kana mukirasi yako yeChechi.

Nyora Pasi Manzwiro Ako

Muponesi aiva nenzara mushure mukufamba rwendo rwokubva kuBetania kuenda kuJerusarema, uye muti womuonde waionekwa nechokure wairatidzika samanyuko ezvokudya. Asi apo Jesu paakasvika pamuti, Akawana kuti waiva usina zvibereko (ona Mateo 21:17–20; Marko 11:12–14, 20). Neimwe nzira, muti womuonde waiva wakafanana navatungamiri vechitendero muJerusarema vaiva vanyengeri: dzidziso dzavo dzisina maturo uye zviratidzo zvokunze zvoutsvene zvaiva zvisingapi zvokudya kumweya. VaFarise uye navanyori vairatidzika kuchengeta mirairo mizhinji asi vachisiya mirairo mikurusa miviri: kuda Mwari uye kuda wokwako sezvaunozvida iwe (ona Mateo 22:34–40.; 23:23).

Mukusiyana nazvo, vanhu vakawanda vakanga vatanga kuona misimboti yakanaka mudzidziso dzaJesu. Apo paAkasvika kuJerusarema, vakaMutambira namatavi aiva achekwa kubva mumiti kuitira kuti vagadzire nzira Yake, vachifara kuti pokupedzisira, sokutaura kwaiva kwaita huporofita hwechinyakare kuti “Mambo Wako Unovuya” Zekaria 9:9). Apo paunoverenga vhiki ino, funga pamusoro pezvibereko zvedzidziso uye kuzvipira kweMuponesi muupenyu hwako uye kuti ungakwanisa sei “kubereka zvibereko zvizhinji” (Johane 12:24).

mufananidzo wekunzvera kwako wega

Mazano eKunzvera Magwaro Matsvene Kwako Wega

Ruka 19:1–10

Ishe havatongi maererano namaratidzikiro okunze asi nezvido zvomwoyo.

Mumazuva aJesu, vanhu vakawanda vakafunga kuti vateresi, kana kuti vaunganidzi vemutero, vaiva vasina kutendeka uye kuti vaiba kubva kuvanhu. Saka nokuda kwokuti Zakeo, mukuru wavateresi, waiva mupfumi, angangova aitonyanya kufungidzirwa. Asi Jesu akatarisa pamwoyo waZakeo. Chii chinoratidzwa muna Ruka 19:1–10 pamusoro pemwoyo waZakeo? Ungangocherechedza mashoko ari mundima idzi ayo anotsanangura izvo Zakeo zvaakaita kuratidza kuzvipira kwake kuMuponesi. Ndezvipi zvido zvemwoyo wako? Chii chatiri kuita kutsvaka Muponesi, sezvakaita Zakeo?

Onawo Dzidziso neZvibvumirano 137:9.

Mateo 23; Ruka 20:45–47

Jesu anoshora hunyengeri.

Hurukuro yeMuponesi nevanyori uye navaFarise ine musiyano unonakidza kuhurukuro yake naZakeo. Sokutsanangura kwakaita Mutungamiri Dieter F. Uchtdorf, “[Jesu] akasimuka muhasha dzakarurama achipikisa vanyengeri vakaita savanyori, vaFarise, uye navaSaduse—avo vakaedza kuratidzika sevaiva vakarurama kuitira kuti vawane rumbidzo, simba rokukwezva, uye upfumi hwenyika, ivo nguva yese iyi vachidzvinyirira vanhu avo vavaifanira kunge vachiropafadza” (“On Being Genuine,” Liahona, Chivabvu 2015, 81).

Muna Mateo 23, Muponesi akashandisa madimikira akati wandei kutsanangura hunyengeri. Funga pamusoro pekumaka kana kudorongodza madimikira aya uye nokucheredza izvo zvaanodzidzisa pamusoro pehunyengeri. Ndeupi musiyano pakati pohunyengeri uye noutera hwavanhu izvo zvatinosangana nazvo tose apo patinoedza kurarama vhangeri? Chii chaunokurudzirwa kuita zvakasiyana nokuda kwedzidziso dzeMuponesi?

Onawo Nhungamiro kuMagwaro “Munyengeri.”

Mateo 21:1–11; Marko 11:1–11; Ruka 19:29–44; Johane 12:1–8, 12–16

Jesu Kristu ndiye Mambo wangu.

Apo Jesu paakasvika kuJerusarema mazuva mashomanana asati azadzikisa Rudzikinuro Rwake, avo vakaMuziva saMambo wavo vakaratidza kuzvipira kwavo nokuMuzodza, vachiwaridza mbatya nematavi emichindwe, nemunzira Make yokupinda muJerusarema, uye vachidaidzira rumbidzo. Funga kuti zvinyorwa zvinotevera zvinokwanisa kudzamisa nzwisiso yako yezviitiko izvi sei, izvo zvakatanga muvhiki yokupedzisira yeupenyu hweMuponesi.

• Muenzaniso wechinyakare wekuzodza mambo: 2 Madzimambo 9:1–6, 13

• Huporofita hwechinyakare hwekupinda nemhemberero yorukundo: Zekaria 9:9

• Zvinorehwa neshoko rinoti hosana: “Hosana” muNhungamiro kuMagwaro Matsvene (scriptures.ChurchofJesusChrist.org)

• Huporofita pamusoro pokuti Muponesi anozouya zvakare sei Zvakazarurwa 7:9–12

Ungakwanise sei kukudza nokugamuchira Muponesi saIshe naMambo wako?

­.

Mateo 22:34–40

Mirairo mikuru miviri ndeye kuda Mwari uye nokuda vamwe sezvandinozvida ini.

Kana ukazombonzwa kukurirwa apo paunoedza kutevera Jesu Kristu, mashoko eMuponesi kugweta muna Mateo 22 anokwanisa kukubatsira kurerutsa uye nokunangisa hudzidzi hwako. Heino imwe nzira yokuita izvi: Ita mudorongodzwa wemirairo yaIshe yakati wandei. Chinyorwa choga choga chiri pamudorongodzwa wako chinoenderana sei nemirairo mikuru miviri? Kunangisa pamitemo mikuru miviri kungazokwanisa kukubatsira sei kuchengeta mimwe yacho?

mufananidzo wekunzvera kwemhuri

Mazano ekuNzvera Magwaro Matsvene kweMhuri uye eNguva yeMhuri Pamba Manheru

Mateo 21:12–14.Mashoko uye nezviito zvaJesu muna Mateo 21:12–14 anoratidza sei manzwiro aAiita pamusoro petemberi? Tinoratidza sei manzwiro edu pamusoro petemberi? Chii chatinokwanisa “kubudisa” (ndima 12) kubva muupenyu hwedu kuitira kuti tiite kuti dzimba dzedu dzinyanye kuva setemberi? Funga nezve kuimba rumbo pamusoro petemberi, sezvakaita, “Ishe Vakandipa Temberi” (Nziyo nedzeVana Vadiki, 120).

Mateo 21:28–32.Idzidziso dzipi dzinobva murungano rwomufananidzo rwemurume aiva navanakomana vaviri dzingangobatsira mhuri yako? Semuenzaniso, munokwanisa kushandisa nyaya yacho kukurukura kukosha kweruteerero nerutendeuko rwechokwadi. Pamwe mhuri yenyu inokwanisa kunyora chinyorwa chokuitisa mutambo werungano rwomufananidzo rwacho uye motora zvijano kuita zvikamu zvakasiyana mumutambo wacho.

Mateo 22:15–22; Marko 20:21–26.Vana vangangonakidzwa nekugadzira mari yendarama yekunyepedzera ine “mufananidzo norunyoro” zvaJesu pairi. Vanokwanisa kunyora kuseri kwemari yendarama yacho zvimwe “zvezvinhu zvaMwari” (Mateo 22:21) izvo zvatinokwanisa kuVapa. Mungangotaurawo pamusoro pezvazvinoreva kuva “nemufananidzo nerunyoro” zveMuponesi patiri (Mateo 22:20; onawo Mosaya 5:8; Aruma 5:14).

Johane 12:1–8.Maria akaratidza sei rudo rwake rweMuponesi? Tinoratidza sei rudo rwedu kwaAri?

mudzimai achipukuta tsoka dzaJesu nevhudzi rake?

Washing Jesusʼs Feet (Kugeza Tsoka dzaJesu), by Brian Call

Johane 12:42-43.Ndeapi mafungiro namanzwiro avanhu ayo dzimwe nguva anotidzivirira kubva mukutaura kana kurwira tendero dzedu muna Kristu? Kuti uwane mienzaniso yavanhu avo vakaramba kukurirwa nemanikidzo dzavanhu, ona Danieri 1:3–20; 3; 6; Johane 7:45–53; 9:1–38; uye Mosaya 17 1–4. Tingakwanisa sei kuratidza ruremekedzo kuna vamwe apo pavanotaura kana kudzivirira izvo zvavanotenda muzvitendero zvavo?

Kuti uwane mamwe mazano ekudzidzisa vana, ona chirongwa chevhiki ino chiri muHuyai, Munditevere—Bhuku reVana Vadiki.

­

Kunatsurudza Kudzidzisa Kwedu

Shandisa mifananidzo yokudhirowa kuita hurukuro nenhengo dzemhuri. “Bhuku reMifananidzo yeVhangeri uye Gospel Media Library pawebhusaiti ChurchofJesusChrist.org zvine mifananidzo nemavhidhiyo mazhinji izvo zvinokwanisa kubatsira [mhuri yenyu] kuona mazano kana zviitiko” (Teaching in the Savior’s Way, 22).

Kupinda nemhemberero yorukundo kwaKristu

Triumphal Entry, [Kupinda neMhemberero yoRukundo], naWalter Rane