ta’ata i ni’a i te tumu rā’au ’a ha’afātata atu ai Iesu

Zacchaeus in the Sycamore Tree [Zakaio i ni’a i te tumu sūkāmino], nā James Tissot

15–21 nō Mē

Mataio 21–23 ; Mareko 11 ; Luka 19–20 ; Ioane 12

« ’A hi’o na, tē haere mai ra tō Ari’i »

Hou ’a tai’o ai i te mau mana’o i roto i teie arata’i ha’api’ira’a, e tai’o i te Mataio 21–23 ; te Mareko 11 ; te Luka 19–20 ; ’e te Ioane 12. E tāpa’opa’o i te mau mana’o e tae mai ’o tā ’outou e nehenehe e fa’a’ite i tō ’outou ’utuāfare ’aore rā i roto i te mau piha ha’api’ira’a i te fare purera’a.

Pāpa’i i te mau mana’o e tae mai

’Ua po’ia te Fa’aora i muri iho i tōna tere mai Betania i Ierusalema, ’e ’ua mana’o ’oia e noa’a mai tāna mā’a i ni’a i te tumu rā’au suke tāna e ’ite ra i te ātea. I te fātatara’a rā Iesu i te tumu rā’au, ’aita e mā’a hotu tō ni’a iho (hi’o Mataio 21:17–20 ; Mareko 11:12–14, 20). E nehenehe e parau ē, ’ua hōho’a te rā’au suke i te feiā fa’atere vaha rua (hypocrite) i Ierusalema : tā rātou mau ha’api’ira’a māoaoa ’e tō rātou hōho’a rāpae huru mo’a, ’aita ïa i riro ’ei mā’a pae vārua. Mai te huru ē, tē ha’apa’o ra te mau pharisea ’e te mau pāpa’i parau i te mau fa’auera’a e rave rahi, ’ua mo’e rā ia rātou nā fa’auera’a rahi roa e piti : here i te Atua ’e here i tō ta’ata tupu mai ia ’oe iho (hi’o Mataio 22:34–40 ; 23:23).

I te tahi pae, e rave rahi ta’ata e ha’amata ra i te ’ite i te mā’a maita’i i roto i te mau ha’api’ira’a a Iesu. I te taera’a ’oia i Ierusalema, ’ua maeva rātou iāna ma te ’āma’a nō ni’a mai i te mau tumu rā’au tei vauvauhia nā raro i ni’a i tōna haere’a, ma te ha’apoupou ē, ’āria ho’i ’ua tupu te parau tohu tahito ra : « ’A hi’o na, tē haere mai ra tō Ari’i » (Zekaria 9:9). ’Ia tai’o ’outou i teie hepetoma, e feruri i te mau hotu a te mau ha’api’ira’a a te Fa’aora ’e a tāna tusia tāra’ehara i roto i tō ’outou orara’a, ’e nā reira ato’a, nāhea ’outou e hotu ai ’e ’ia « rahi roa atu ra ïa te hotu » (Ioane 12:24).

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Luka 19:1–10

’Aita te Fatu e ha’avā nei nā ni’a i te hōho’a rāpae, nā ni’a rā i te mau hina’aro o te ’ā’au.

I te tau o Iesu, e rave rahi ta’ata tei mana’o ē, e mea punu te mau telona, te mau ta’ata putu tute, ’e tē ’eiā ra rātou i te ta’ata. ’E nō reira, nō te mea ’o Zakaio te telona rahi ’e te ta’ata tao’a rahi ho’i, ’ua rahi atu ā terā mana’o i ni’a iāna. ’Ua hi’o rā Iesu i te ’ā’au o Zakaio. E aha tā te Luka 19:1–10 e parau ra nō ni’a i te ’ā’au o Zakaio ? E nehenehe paha e tāpa’o i te mau parau i roto i teie mau ’īrava nō ni’a i te mau mea tā Zakaio i rave ’ei fa’a’itera’a i tōna pūpūra’a iāna i te Fa’aora. E aha te mau hina’aro o tō ’oe ’ā’au ? E aha tā ’oe e rave ra nō te ’imi i te Fa’aora, mai tā Zakaio i rave ?

Hi’o ato’a Te Ha’api’ira’a Tumu ’e te mau Fafaura’a 137:9.

Mataio 23 ; Luka 20:45–47

Tē fa’ahapa nei Iesu i te feiā vaha rua.

Te huru o te Fa’aora i ni’a i te mau pāpa’i parau ’e te mau pharisea, e mea ta’a ’ē roa ïa tōna huru i ni’a ia Zakaio. Mai tā te peresideni Dieter F. Uchtdorf i fa’ata’a : « Terā rā, ’ua ti’a [Iesu] i ni’a ma te riri tano i te [feiā vaha rua] mai te mau pāpa’i parau, te mau pharisea ’e te mau sadukea―’o rātou tei tāmata i te fa’a’ite i te hōho’a parauti’a ’ia roa’a ia rātou te ’āruera’a, te mana ’e te tao’a o te ao nei, ’a tāmau noa ai i te hāmani ’ino i te feiā tei tītauhia ia rātou ’ia ha’amaita’i » (« Nō ni’a i te rirora’a i tō tātou huru mau », Liahona, Mē 2015, 81).

I roto i te Mataio 23, e rave rahi fa’ahōho’ara’a tā te Fa’aora i fa’a’ohipa nō te huru vaha rua. E nehenehe e fa’a’ū ’aore rā e tāpura i teie mau fa’ahōho’ara’a ma te tāpa’o ato’a i tā te reira e ha’api’i nei nō ni’a i te huru vaha rua. E aha te ta’a-’ē-ra’a i rotopū i te huru vaha rua ’e te paruparu ta’ata tā tātou pā’āto’a e fa’aruru nei ’a tāmata ai i te ora i te ’evanelia ? E aha te fa’aurura’a i tae mai nō te mea e taui maoti te mau ha’api’ira’a a te Fa’aora ?

Mataio 21:1–11 ; Mareko 11:1–11 ; Luka 19:29–44 ; Ioane 12:1–8, 12–16

’O Iesu Mesia tō’u ari’i.

I tō Iesu taera’a i Ierusalema tau mahana noa nā mua a’e ’oia i rave ai i tāna tāra’ehara, ’ua fa’a’ite mai te feiā tei hi’o iāna ’ei Ari’i nō rātou, i tā rātou ha’amorira’a iāna nā roto i te fa’atāhinura’a iāna, te vauvaura’a i te ’ahu ’e te mau ’āma’a tāmara i ni’a i tōna tere i roto ia Ierusalema, ’e ma te tuō ato’a i tā rātou ’āruera’a. E feruri nāhea te mau ’ohipa i muri nei e fa’ahōhonu ai i tō ’oe hāro’aro’a i te mau ’ohipa i tupu ’e i ha’amata ho’i i te hepetoma hope’a o te orara’a o te Fa’aora.

• Te hō’ē hi’ora’a tahito nō te fa’atāhinura’a ari’i : 2 Ari’i 9:1–6, 13

• Te hō’ē tohura’a tahito nō te tomora’a hanahana : Zekaria 9:9

• Te aura’a nō te ta’o hosana : « Hosana » i roto i te Arata’i nō te mau pāpa’ira’a mo’a (scriptures.ChurchofJesusChrist.org)

• Te mau parau tohu nō ni’a i te huru te Fa’aora e ho’i fa’ahou mai : Apokalupo 7:9–10

Nāhea ’oe e fa’ahanahana ai ’e e fāri’i ai i te Fa’aora ’ei Fatu nō ’oe ’e ’ei Ari’i ?

Hi’o ato’a Gerrit W. Gong, « Hosana ’e Haleluia—Iesu Mesia ora : te pū nō te Fa’aho’i-fa’ahou-ra’a ’e te Pāsa », Liahona, Mē 2020, 52–55 ; « The Lord’s Triumphal Entry into Jerusalem [Te tomora’a hanahana a te Fatu i Ierusalema] » (video), ChurchofJesusChrist.org.

Mataio 22:34–40

Nā fa’auera’a rahi roa e piti, ’o te herera’a ïa i te Atua ’e te herera’a ia vetahi ’ē mai iā’u iho nei.

Mai te peu noa atu e tae mai te mana’o ha’aparuparu ’a tūtava noa ai ’oe i te pe’e ia Iesu Mesia, e nehenehe te mau parau a te Fa’aora i te ha’api’i ture i roto i te Mataio 22 e tauturu ia ’oe ’ia fa’a’ōhie ’e ’ia rōtahi i tō ’oe ti’ara’a pipi. Teie te tahi rāve’a nō te rave i te reira : E ha’amau i te hō’ē tāpura nō te rahira’a o te mau fa’auera’a a te Fatu. E aha te tū’atira’a o te mau fa’auera’a ato’a i ni’a i tā ’oe tāpura, ’e nā fa’auera’a rahi roa e piti ? E nāhea te rōtahira’a i ni’a i nā fa’auera’a rahi roa e piti i te tauturu ia ’oe ’ia ha’apa’o i te tahi atu mau fa’auera’a ?

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 21:12–14.E aha tā te mau parau ’e te mau ’ohipa a Iesu i roto i te Mataio 21:12–14 e fa’a’ite nei nō ni’a i tōna mana’o nō ni’a i te hiero ? E nāhea tātou i te fa’a’ite i tō tātou mana’o nō ni’a i te hiero ? E aha tā tātou e nehenehe e « tīahi […] i rāpae » (’īrava 12) i tō tātou orara’a nō te fa’ariro rahi atu ā i tō tātou fare mai te hiero te huru ? E nehenehe e hīmene i te hō’ē hīmene nō ni’a i te hiero, mai te hīmene « Oh, j’aime voir le temple » (Chants pour les enfants, 99).

Mataio 21:28–32.E aha te mau ha’api’ira’a i roto i te parabole nō te ta’ata ’e tāna e piti tamaiti ’o tē nehenehe e tauturu i tō ’outou ’utuāfare ? ’Ei hi’ora’a, e nehenehe tā ’outou e fa’a’ohipa i terā ’ā’amu nō te paraparau i te faufa’a rahi nō te ha’apa’o mau i te parau ’e te tātarahapara’a mau. Pēnei a’e e nehenehe tā te ’utuāfare e pāpa’i i te hō’ē ’ā’amu nō te ha’uti ta’ata ora i te parabole, ’e ’ia fa’a’ohu rātou i te ta’ata tā rātou e ha’uti.

Mataio 22:15–22 ; Luka 20:21–26.E au paha te mau tamari’i ’ia hāmani i te moni pa’ari ha’avare ma te « hōho’a ’e te parau » nō Iesu i ni’a iho. E nehenehe rātou e pāpa’i i ni’a i te tua o te moni pa’ari i te tahi mau mea « tā te Atua ra » (Mataio 22:21) ’o tā tātou e nehenehe e hōro’a iāna. E nehenehe ato’a ’outou e paraparau nō ni’a i te aura’a e tu’u i te « hōho’a ’e te parau » nō te Fa’aora i ni’a ia tātou (Mataio 22:20 ; hi’o ato’a Mosia 5:8 ; Alama 5:14).

Ioane 12:1–8.’Ua nāhea Maria i te fa’a’itera’a i tōna here nō te Fa’aora ? E nāhea tātou i te fa’a’ite i tō tātou here iāna ?

e vahine e horoi ra i te ’āvae o Iesu i tōna rouru

Washing Jesus’s Feet [Te horoira’a i te ’āvae o Iesu], nā Brian Call

Ioane 12:42–43.E aha te tahi mau fa’ahope’ara’a pae sōtiare e nehenehe e fa’a’ōtohe ia tātou i te paraura’a ’aore rā i te pa’epa’era’a i tō tātou ti’aturira’a i te Mesia ? Nō te tahi mau hi’ora’a ta’ata tei ’ore i ’ōtohe i mua i te nene’ira’a sōtiare, hi’o Daniela 1:3–20 ; 3 ; 6 ; Ioane 7:45–53 ; 9:1–38 ; ’e Mosia 17:1–4. Nāhea tātou e fa’atura ai ia vetahi ’ē ’ia parau mai rātou, ’aore rā ’ia pa’epa’e mai rātou i tō rātou mau ti’aturira’a pae fa’aro’o ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « ’A ’oa’oa na, e Ari’i te Fatu ! », Te mau hīmene, N°29.

Ha’amaita’i i tā tātou ha’api’ira’a

Fa’a’ohipa i te mau hōho’a pēni ’ia tāu’a mai te mau melo o te ’utuāfare. « Tei roto i te Buka hōho’a nō te ’evanelia ’e te Vaira’a buka ’evanelia i ni’a i te ChurchofJesusChrist.org e rave rahi hōho’a ’e te video ’o tē nehenehe e tauturu i [tō ’outou ’utuāfare] ’ia hi’o mata atu i te mau mana’o ’aore rā te mau ’ohipa i tupu » (Ha’api’ira’a mai tā te Fa’aora, 22).

te tomora’a hanahana o te Mesia

Triumphal Entry [Tomora’a hanahana], nā Walter Rane