Zakaio i ni’a i te tumu rā’au, nā James Tissot

15–21 nō Mē

Mataio 21–23 ; Mareko 11 ; Luka 19–20 ; Ioane 12

« Inaha, tē haere mai na tō ari’i ia ’oe na »

’A tai’o ai ’oe i te Mataio 21–23 ; Mareko 11 ; Luka 19–20 ; ’e Ioane 12, ’a ha’apa’o maita’i i te mau mana’o tā ’oe e fāri’i nā ’ō mai i te Vārua Maita’i ra. ’A hi’o « Te pāhonora’a i te mau hina’aro o te mau tamari’i ’āpī » i te ’ōmuara’a o teie buka, nō te mau mea e ha’amana’o ’a ha’api’i ai ’oe i teie mau parau tumu.

Tītau i te mana’o

’A fa’a’ite i te hōho’a nō roto mai te fa’anahora’a nō teie hepetoma i roto te Mai, pe’e mai—nō te ta’ata hō’ē ’e te ’utuāfare, ’e e ani i te mau tamari’i ’ia fa’a’ite mai e aha tā rātou i ’ite nō ni’a i te ’ohipa tei tupu i roto i te hōho’a.

Ha’api’i i te ha’api’ira’a tumu : Te mau tamari’i ’āpī

Luka 19:1–10

’Ua ’ite te Metua i te ao ra e ’o Iesu iā’u mā tō’u i’oa.

’A tai’o ai ’oe i te ’āparaura’a i rotopū i te Fa’aora ’e ’o Zakaio, e aha te poro’i tā ’oe i ’ite mai ’o tē ha’amaita’i i te mau tamari’i tā ’oe e ha’api’i ra ?

Te mau ’ātivite e au

• E fa’a’ite i te hō’ē hōho’a nō Zakaio i ni’a i te tumu Sukamino (i roto i teie fa’anahora’a ’aore rā te ChurchofJesusChrist.org). ’A tauturu i te mau tamari’i ’ia ’ite mai ia Zakaio ’e ’ia parau i tōna i’oa. ’A fa’atupu i te tahi mau ’ohipa tā te mau tamari’i e rave, ’a fa’ati’a ai ’oe i te ’ā’amu o Zakaio ’e o Iesu—’ei hi’ora’a, te ti’ara’a i ni’a i tō rātou manimani ’āvae nō te hi’o nā ni’a a’e i te naho’a ta’ata, ’aore rā, e fa’ahua e ta’uma ra i ni’a i te tumu rā’au. ’A fa’ata’a ē, ’ua ’ite atu te Fa’aora ia Zakaio ’e ’ua pi’i atu ra iāna i tōna i’oa. ’A fa’a’ite pāpū ē, ’ua ’ite ato’a te Fa’aora i te tamari’i tāta’itahi ’e i tō rātou i’oa.

• ’A hōpoi mai i roto i te piha ha’api’ira’a i te hō’ē vaira’a hōho’a ’aita e hōho’a tō roto, ’aore rā, ’a hāmani hō’ē i te papie. E ani i te tamari’i tāta’itahi ’ia tāpe’a te tahi i muri mai i te tahi i te vaira’a hōho’a i mua i tōna mata, ’a parau ai te toe’a o te piha ha’api’ira’a « ’ua ’ite te Metua i te ao ra ’e ’o Iesu ia [te i’oa o te tamari’i] ».

• E hīmene ’āmui i te hō’ē hīmene nō ni’a i te here o te Metua i te ao ra, mai te « Je suis enfant de Dieu ».(Chants pour les enfants, 2–3). Tauturu i te mau tamari’i ’ia fa’aro’o i te mau mea e tauturu ia rātou ’ia ’ite, ’ua here te Metua i te ao ra ia rātou.

Mataio 21:12–14

E vāhi mo’a te hiero.

E tauturu te fa’aturara’a o Iesu nō te hiero, mai tei fa’ata’ahia mai i roto i teie mau īrava, i te mau tamari’i tā ’oe e ha’api’i ra ’ia hāro’aro’a ē, e vāhi mo’a te hiero.

Te mau ’ātivite e au

• ’A fa’a’ite i te hōho’a Iesu e tāmā ra i te hiero (Buka hōho’a ’Evanelia, N°51), ’e ’a fa’ati’a i te ’ā’amu tei pāpa’ihia i roto te Mataio 21:12–14. Tauturu i te mau tamari’i ’ia ’imi mai i te moni ’e te mau animala i roto i te hōho’a. I muri iho, e ’āparau nō te aha te Fa’aora i hina’aro ai ’ia haere ’ē te feiā aufau moni ’e te feiā ho’o animala i rāpae i te hiero.

• ’A fa’a’ite i te mau hōho’a o te hiero (’ei hi’ora’a, ’a hi’o Buka hōho’a ’Evanelia, N°117–19), ’e e ani i te mau tamari’i ’ia fa’a’ite mai e aha tā rātou e fāri’i ’ia hi’o ana’e rātou i te hō’ē hiero. ’Ia fa’ata’a atu ’oe ē, te hiero o te hō’ē ïa vāhi i reira tātou e haere ai nō te rave i te mau fafaura’a ’e te Atua, nō te ’imi mai i te mau pāhonora’a i te mau pure, ’e nō te ’ite tei pīha’i iho tātou i te Atua. E tauturu i te mau tamari’i ’ia ’ite mai i te mau ha’aputapūra’a o te Vārua Maita’i, e parau ra ia rātou ē e vāhi ta’a ’ē te hiero. E ani i te mau tamari’i ’ia rave mai te huru ra ē tei roto rātou i te hiero. ’Ei hi’ora’a, e nehenehe rātou e paraparau marū noa ’e e pārahi ma te tura.

• ’A hīmene ’āmui i te hō’ē hīmene nō ni’a i te hiero, mai te « Oh, j’aime voir le temple » (Chants pour les enfants,°99), ’e e ani i te mau tamari’i ’ia ha’amau i te hō’ē ’ōpuara’a nō te haere i roto i te hiero i te hō’ē mahana.

Te hiero o te fare ïa o te Fatu.

Mataio 21:28–32

E nehenehe au ’ia ha’apa’o.

Tē hina’aro nei te Metua i te ao ra ’ia ha’apa’o tātou. ’Ua riro te parabole nō nā tamaiti e piti ’ei rāve’a nō te ha’api’i i te faufa’a ’ia ha’apa’o.

Te mau ’ātivite e au

• ’A pāpa’i hōho’a i nā tamaiti e piti i ni’a i te tāpura, ’e e fa’a’ohipa i te mau hōho’a pāpa’i ’a fa’ati’a ai ’oe i te parabole i roto te Mataio 21:28–32. ’O vai te tamaiti tei rave i te ’ohipa maita’i i te hope’a ? E ani i te mau tamari’i ’ia fa’ahiti mai i te mau mea tā rātou e rave nō te riro ’ei tamari’i ha’apa’o i te fare. E vaiiho ia rātou ’ia pāpa’i hōho’a ia rātou iho e rave ra i te hō’ē o te reira mau ’ohipa.

• ’A ani i te mau tamari’i ’ia fa’a’ite mai i te mau mea i tupu ia rātou, i tō rātou ha’apa’ora’a i te parau a tō rātou metua. E mea nāhea rātou i te ha’amaita’ira’ahia nō tō rātou ha’apa’ora’a ?

Ha’api’i i te ha’api’ira’a tumu : Te mau tamari’i pa’ari a’e

Luka 19:1–10

’A ’imi ai au i te Fa’aora, e ’itehia ’oia iā’u.

E nehenehe ’oe e fa’a’ohipa i te ’ā’amu o Zakaio nō te tauturu i te mau tamari’i ’ia feruri i te mau mea e ti’a ia rātou ’ia rave nō te ha’afātata atu i te Fa’aora.

Te mau ’ātivite e au

• ’A tai’o te Luka 19:1–10, ma te fa’afa’aea ri’i i ni’a i te tahi mau ’īrava nō te ’āparau e aha tā te mau ’īrava e fa’a’ite nei nō ni’a ia Zakaio. E aha tā Zakaio i rave nō te ’ite atu ia Iesu ? Nāhea ’oia i te pāhonora’a atu ’a ani mai ai Iesu iāna ’ia pou mai i raro i te tumu rā’au ? E ani i te tamari’i tāta’itahi ’ia fa’a’ite mai hō’ē tumu nō te aha rātou e hina’aro ai e hi’o ia Iesu. Mai te mea e haere mai te Fa’aora i tō tātou fenua, e aha tā tātou e rave nō te fa’aineine ia tātou ?

• E ani i te mau tamari’i ’ia feruri i te mau ta’ata tā rātou i ’ite, tē ’imi ra i te Fa’aora mai ia Zakaio. E ani i te mau tamari’i e aha tā rātou e rave nō te tauturu i te hō’ē ta’ata ’ē, ’ia ha’api’i mai nō ni’a i te Fa’aora.

• E ani i te mau tamari’i ’ia fa’a’ite mai i te mau ’itera’a ’a ’ite ai rātou ē, ’ua ’ite maita’i te Metua i te ao ra ’e ’o Iesu Mesia ia rātou ’e ’ua here ia rātou.

Mataio 21:12–14

E vāhi mo’a te hiero ’o tā’u e ti’a ’ia fa’atura.

Nāhea te ’ā’amu o te Fa’aora i te tāmāra’a i te hiero i te tauturu ia ’oe ’ia ha’api’i i te mau tamari’i nō ni’a i te mo’ara’a o te mau hiero ?

Te mau ’ātivite e au

• E ani i te mau tamari’i ’ia tai’o i te Mataio 21:12–14. ’A fa’a’ite i te hōho’a Iesu e tāmā ra i te hiero (Buka hōho’a ’Evanelia, N°51), ’e ’a ani ia rātou e aha te ’īrava e fa’a’itehia ra i roto i te hōho’a.

• E ani i te mau tamari’i ’ia fa’a’ite mai e aha tā rātou e fāri’i ’ia haere ana’e rātou i roto i te hiero, ’ia haere e māta’ita’i i te ’āua o te hiero, ’aore rā ’ia hi’o i te mau hōho’a o te mau hiero. E aha te mea e tauturu ia rātou ’ia ’ite ē, e vāhi mo’a te hiero ? E nehenehe ’oe e fa’a’ite i te mau tamari’i nō te aha ’oe i here ai i te hiero. Nō te aha e mea mo’a te reira nō ’oe ?

• E ani i te hō’ē ’aore rā hau atu feiā ’āpī, ’ia haere mai i roto i te piha ha’api’ira’a ’e ’ia paraparau mai e mea nāhea tō rātou fa’aineinera’a nō te tomo i roto i te hiero. Mai te mea ’ua haere na rātou i te hiero, e ani ia rātou ’ia fa’a’ite mai e aha tā rātou i fāri’i ’a tae ai rātou i reira.

• E tāpūpū piriapu i te hōho’a o te hō’ē hiero, ’e ’a hōro’a hō’ē tuha’a i te tamari’i tāta’itahi. E ani i te mau tamari’i ’ia pāpa’i i muri i tā rātou tuha’a piriapu, hō’ē ’ohipa tā rātou e nehenehe e rave nō te fa’aineine nō te tomo i roto i te hiero. ’A fa’a’ite ai te tamari’i tāta’itahi i te hō’ē mana’o, ’a tu’u i tāna tuha’a i ni’a i te piriapu.

• I ni’a i te tāpura ’ere’ere, ’a pāpa’i i teie i muri nei : E nehenehe au e tauturu ’ia fa’aineine nō te tāvini i roto i te hiero. E ani i te mau tamāri’i ’ia hōro’a mai i te mau rāve’a nō te fa’ahope i teie pereota. Teie te tahi mau mana’o « Te ha’apa’ora’a i tā’u mau fafaura’a nō te bāpetizora’a » ’aore rā « Te Vārua Maita’i ».

Mataio 23:25–28

Tē hina’aro nei Iesu ’ia riro vau ’ei ta’ata parauti’a i roto i tā’u mau ’ohipa ’e tō’u mau hina’aro.

’Ua ha’api’i Iesu i te mau pāpa’i ture ’e i te mau Pharisea i te faufa’a ’ia ora mau i te ’evanelia—’eiaha noa e fa’ahua ’ia vai parauti’a. E aha te mea e tauturu i te mau tamari’i ’ia māramarama i teie parau mau ?

Te mau ’ātivite e au

• ’A tai’o ai ’oe te Mataio 23:25–28 ’e te mau tamari’i, ’a feruri e fa’a’ite i teie tātarara’a o te ha’avarevare nō roto mai i te Arata’i nō te mau pāpa’ira’a mo’a : « E ta’ata e fa’ahua ta’ata fa’aro’o, ’aita nei ho’i ». Nō te aha e mea ’ino ’ia riro ’ei ta’ata ha’avarevare ?

• ’A fa’a’ite i te mau tamari’i i te hō’ē hāpaina e mea mā i rāpae’au, ’e e mea repo i roto, nō te tauturu i te fa’ahōho’ara’a i te fa’ataipera’a i roto te Mataio 23:25. Nāhea tātou i te ha’apāpū ē, e mea mā tātou ’e te vi’ivi’i ’ore i roto ?

Fa’aitoito i te ha’api’ira’a i te fare

Tauturu i te mau tamari’i ’ia feruri i te hō’ē mea tā rātou i ha’api’i mai i roto i te piha ha’api’ira’a ’o tā rātou e nehenehe e fa’a’ite atu i tō rātou ’utuāfare.

Ha’amaita’iraʼa i tā tātou ha’api’ira’a

Pāturu i te mau metua o te mau tamari’i. « ’O te mau metua te mau ’orometua ha’api’i ’evanelia faufa’a rahi roa a’e nō tā rātou mau tamari’i—tei ia rātou ra te hōpoi’a tumu ’e te mana rahi roa a’e nō te fa’auru i tā rātou mau tamari’i (hi’o Deuteronomi 6:6-7). ’A ha’api’i ai ’outou i te mau tamari’i i te fare purera’a, ’a ’imi nā roto i te pure i te mau rāve’a nō te pāturu i tō rātou mau metua i roto i tō rātou ti’ara’a faufa’a rahi » (Ha’api’ira’a mai tā te Fa’aora,,°25).