« 1–7 nō Mē. Luka 12–17 ; Ioane 11 : ‘E ’oa’oa ato’a tātou ; ’ua ’itea ho’i iā’u tā’u māmoe i mo’e ra’ », Mai, pe’e mai—nō te Paraimere : Faufa’a ’Āpī 2023 (2022)
« 1–7 nō Mē. Luka 12–17 ; Ioane 11 », Mai, pe’e mai—nō te Paraimere : 2023
Te tamaiti puhura,, nā Liz Lemon Swindle
1–7 nō Mē
Luka 12–17 ; Ioane 11
« E ’oa’oa ato’a tātou ; ’ua ’itea ho’i iā’u ta’u māmoe i mo’e ra »
Tai’o nā roto i te pure te Luka 12–17 ’e Ioane 11, ma te ’imi e nāhea ’oe i te tauturu i te mau tamari’i tā ’oe e ha’api’i ra, ’ia hāro’aro’a i te mau parau mau i roto i teie mau pene, ’e ’ia ’ite i te here o te Metua i te ao ra.
Tītau i te mana’o
’A fa’aha’amana’o i te mau tamari’i i te tahi mau parabole ’e te tahi mau ’ā’amu e ’itehia i roto i te Luka 12–17 ’e te Ioane 11, ’e ’a ani ia rātou ’ia fa’a’ite mai e aha tā rātou i ’ite nō ni’a i teie mau ’ā’amu.
Ha’api’i i te ha’api’ira’a tumu : Te mau tamari’i ’āpī
Tē hina’aro nei te Metua i te ao ra ’ia ho’i pauroa tāna mau tamari’i iāna ra.
’A feruri i te mau tamari’i i roto i tā ’oe piha, tae noa atu ia rātou ’aita e tae pinepine mai nei. Nāhea ’oe i te tauturu ia rātou ’ia ’ite i te here o te Metua i te ao ra ? Nāhea ’oe i te fa’auru i te tahi atu mau tamari’i ’ia tauturu mai ia ’oe ’ia haere e fārerei ia rātou mā te here ?
Te mau’ātivite e au
-
’A hōro’a i te hō’ē toata i te hō’ē tamari’i, i te tahi atu tamari’i hō’ē hōho’a nō te hō’ē māmoe, e i te tahi atu tamari’i, hō’ē hōho’a nō te tamaiti puhura (hi’o ChurchofJesusChrist.org ’aore rā te ’api ’ātivite nō teie hepetoma). ’A parau e ’itehia teie nā parabole e toru i roto i te Luka 15 ’e e ani i te mau tamari’i e tāpe’a ra i te toata ’aore rā te hōho’a ’ia fa’a’ite mai, ’ia fa’ahiti ana’e ’oe i te reira. E nehenehe ’oe e ani i te mau tamari’i ’ia fa’ati’a fa’ahou i te mau parabole i te tahi ’e te tahi ’ia au i tā rātou iho mau parau.
-
E ani i te mau tamari’i ’ia fa’a’ite mai i te hō’ē taime ’a mo’e ai hō’ē ’ohipa tā rātou. Nāhea i ’itehia ai ia rātou te reira ? ’A fa’ata’a ē, e nehenehe te ta’ata e mo’e i te pae vārua ’ia ’ore ana’e rātou e pe’e i te Metua i te ao ra. ’A fa’a’ite pāpū ē, tē hina’aro nei te Atua i te mau ta’ata tei mo’e ’ia haere mai iāna ra, ’e e tauturu tātou ia rātou.
-
E ani i te mau tamari’i ’ia feruri i te tahi mau tamari’i ’aita e haere mai nei i te Paraimere. Tauturu ia rātou ’ia fa’a’ū ’aore rā ’ia pāpa’i i te mau parau nō te ani i teie mau tamari’i ’ia haere mai i te Paraimere ’aore rā i te hō’ē ’ātivite nā te Paraimere. Nāhea atu ā e ti’a ia tātou i te tauturu i teie mau tamari’i ’ia ’ite i te here o te Metua i te ao ra nō rātou ?
E nehenehe au e fa’a’ite i tō’u here nō te Metua i te ao ra nā roto i te ha’amāuruurura’a nō tō’u mau ha’amaita’ira’a.
Nāhea te ’ā’amu o nā lepera hō’ē ’ahuru i te fa’aitoito i te mau tamari’i ’ia māuruuru ?
Te mau’ātivite e au
-
’A fa’ati’a i te ’ā’amu o nā lepera hō’ē ’ahuru tei fa’aorahia e Iesu. ’A fa’a’ite i te hōho’a e ’itehia i roto i te fa’anahora’a nō teie hepetoma i roto te Mai, pe’e mai—nō te ta’ata hō’ē ’e te ’utuāfare ’e e ani i te mau tamari’i ’ia tai’o e tae atu i te ’ahuru i ni’a i tō rātou manimani rima. I muri iho, e ani ia rātou ’ia tu’u e iva manimani i raro nō te fa’a’ite i te hō’ē lepera tei ha’amāuruuru ia Iesu. Tauturu i te mau tamari’i ’ia feruri i te hō’ē ta’ata tā rātou e nehenehe e ha’amāuruuru nō te hō’ē ’ohipa maita’i ’e te faufa’a.
-
’A ani i te tamari’i tāta’itahi ’ia ha’uti mai i te hō’ē mea tā rātou i māuruuru ’e e ani i te toe’a o te mau tamari’i ’ia ’imi mai e aha te reira mea. E ani i te mau tamari’i ’ia fa’a’ite mai i te mau rāve’a e ti’a ai ia tātou ’ia fa’a’ite i te Metua i te ao ra ē, tē māuruuru nei tātou nō tō tātou mau ha’amaita’ira’a.
Tē ti’aturi nei tātou ē, e Tamaiti Iesu nā te Atua.
Nā ō atu ra Mareta, te tuahine o Lazaro, ia Iesu : « ’Ua fa’aro’o vau ē, ’o ’oe te Mesia, te Tamaiti a te Atua » (Ioane 11:27). E ha’apūai te ’ā’amu o Maria, Mareta, ’e o Lazaro i te ’itera’a pāpū o te mau tamari’i nō Iesu Mesia.
Te mau’ātivite e au
-
’A fa’ati’a poto noa i te ’ā’amu nō Iesu i te fa’ati’ara’a ia Lazaro mai te pohe mai (hi’o ato’a « Pene 43 : ’Ua fa’aho’i fa’ahou mai Iesu ia Lazaro i te ora », i roto Te mau ’ā’amu o te Faufa’a ’Āpī, 107–9, ’aore rā, te video e tano i ni’a ChurchofJesusChrist.org). E fa’a’ite i te mau tamari’i i te hō’ē ’āma’a tei pohe ’e hō’ē rā’au ora, ’e e ani ia rātou tei hea tei pohe ’e tei hea e ora ra. ’A fa’a’ite i tō ’oe ’itera’a pāpū ē nō te mana o Iesu Mesia, e ti’afa’ahou mai te feiā tei pohe, ’e e ora e a muri noa atu.
-
’A tauturu i te mau tamari’i ’ia tāmau ’ā’au i te pereota tā Iesu i parau atu ia Mareta : « Tei iā’u te ti’afa’ahoura’a ’e te ora » (Ioane 11:25). ’A fa’ata’a ē nō te ti’afa’ahoura’a o te Fa’aora, e ’ite fa’ahou tātou i tei herehia e tātou tei pohe.
Ha’api’i i te ha’api’ira’a tumu : Te mau tamari’i pa’ari a’e
E nehenehe au e tauturu ia Iesu ’ia ’itehia mai tāna māmoe i mo’e.
’Ua mātau tātou pā’āto’a i te hō’ē ta’ata mai te māmoe mo’e ra te huru, te moni mo’e, ’aore rā te tamaiti puhura i roto i te mau parabole a te Fa’aora. ’A feruri nāhea e ti’a ai ia ’oe ’ia fa’auru i te mau tamari’i ’ia toro i te rima i teie mau ta’ata ma te here.
Te mau ’ātivite e au
-
’A tauturu i te mau tamari’i ’ia tai’o i te parabole nō te māmoe tei mo’e, ’aore rā, te parabole nō te moni i mo’e, e ’itehia i roto te Luka 15:1–10,’e ’ia fa’a’ite mai e aha tā rātou i ’apo mai.
-
’A pāpa’i i teie mau i’oa i ni’a i te tapura ’ere’ere : metua tane, tamaiti matahiapo, ’e tamaiti ’āpī. ’A fa’a’ite te video « The Prodigal Son [Te tamaiti puhura] » (ChurchofJesusChrist.org) ’e ’a fa’afa’aea i te tahi taime, ’ia ti’a i te mau tamari’i ’ia pāpa’i i ni’a i te tāpura ’ere’ere te tahi mau mana’o o te mau ta’ata i tāpurahia. E aha te mana’o o te Metua i te ao ra ’e o Iesu nō te feiā tei hara ?
-
E ani i te hō’ē tamari’i ’ia haere i rāpae i te piha, ’a huna ai te tahi atu mau tamari’i i te hō’ē toata ’aore rā i te hō’ē māmoe papie. E ani i te tamari’i ’ia ho’i mai ’e ’ia ’imi mai i te toata ’aore rā i te māmoe papie. E aha te tahi mau rāve’a e nehenehe ai te ta’ata e « mo’e » mai te moni ’aore rā te māmoe ? E ani i te mau tamari’i ʼia faʼaʼite mai i te mau rāveʼa e nehenehe ai rātou ’ia toro i te rima ia rātou. ’A hīmene ’e te mau tamari’i hō’ē hīmene mai te « Auē te aroha rahi ’o te tīa’i māmoe » (Te mau Hīmene, N°133), ’e ’a fa’a’ite pāpū i te ’oa’oa e roa’a ’ia ho’i ana’e mai te ta’ata i te Atua ra.
-
’A fa’ata’a ē, ’ua fa’a’ohipa Iesu i te māmoe mo’e, te moni mo’e, ’e te tamaiti puhura nō te fa’ahōho’a i te ta’ata tei « mo’e » nō te mea, ’aita rātou i fāri’i i te mau ha’amaita’ira’a o te ’evanelia. E ani i te mau tamari’i ’ia feruri i te mau ta’ata tā rātou i mātau ’o tei ’ore i fāri’i i teie mau ha’amaita’ira’a i roto i tō rātou orara’a. E aha te ti’a ia rātou ’ia rave nō te tauturu i teie mau ta’ata ’ia ’ite i te here o te Metua i te ao ra nō rātou ?
Te tīa’i māmoe maita’i, nā Yongsung Kim
E nehenehe au e fa’a’ite i tō’u here nō te Metua i te ao ra nā roto i te māuruurura’a nō tō’u mau ha’amaita’ira’a.
E riro te ’ā’amu o nā ’ahuru lepera ’ei rāve’a maita’i nō te fa’auru i te mau tamari’i ’ia fa’a’ite i te māuruuru i te Metua i te ao ra nō tō rātou mau ha’amaita’ira’a.
Te mau’ātivite e au
-
’A tai’o ’āmui i te ’ā’amu o nā ’ahuru lepera. E mea nāhea te lepera tei ha’amāuruuru i te ha’amaita’ihia nō tōna ’ā’au mehara ? Nō te aha e mea faufa’a ’ia ha’amāuruuru i te Atua nō tō tātou mau ha’amaita’ira’a ?
-
E ani i te mau tamari’i ’ia tāpura mai i te mau mea tā rātou i māuruuru, ma te ha’amata nā ni’a i te reta tāta’itahi o tō rātou i’oa.
-
E ani i te mau tamari’i ’ia pāpa’i i te mau parau ha’amāuruuru i te Metua i te ao ra nō te mau ha’amaita’ira’a tāna i hōro’a mai ia rātou. E nehenehe rātou e fa’atārere i te mau nota pāpa’i i pīha’i iho i tō rātou ro’i nō te fa’aha’amana’o ia rātou, ’ia fa’a’ite i te ’ā’au mehara ’ia pure ana’e rātou.
Tē ti’aturi nei tātou ē, e Tamaiti Iesu nā te Atua.
Nāhea ’oe i te fa’a’ohipa i te ’ā’amu o Maria, Mareta ’e o Lazaro nō te tauturu i te mau tamari’i ’ia ’ite, mai ia Mareta ē, ’o Iesu « te Mesia, te Tamaiti a te Atua » ? (Ioane 11:27).
Te mau ’ātivite e au
-
Pāpa’i i ni’a i te tāpura ’ere’ere te tahi mau fa’ahitira’a parau a te mau ta’ata i roto i te Ioane 11. E ani i te mau tamari’i ’ia hi’o mai nā vai i parau i te fa’ahitira’a parau tāta’itahi, ’e e ani ia rātou ’ia ’imi mai Ioane 11 nō te hi’o i tā rātou mau pāhonora’a. E aha tō rātou mana’o ’āhiri ē, ’o rātou Iesu, Mareta, Maria ’aore rā Lazaro ? Nāhea te ti’aturira’a ia Iesu i te tauturu ia tātou, ’ia ’oto ana’e ’aore rā ’ia ri’ari’a ana’e tātou ?
-
’A tai’o i te ’itera’a pāpū o Mareta, e ’itehia i roto te Ioane 11:20–27. E ani i te mau tamari’i ’ia ’imi mai i te mau ta’o ’e te mau pereota e fa’a’ite nei ē, e fa’aro’o tō Mareta ia Iesu Mesia. E aha tā tātou e rave nō te fāri’i i te fa’aro’o iāna ?
-
’A tauturu i te mau tamari’i ia tāmau ’ā’au te Ioane 11:25. ’A fa’ata’a ē e ti’afa’ahou te ta’ata ato’a, terā rā te feiā parauti’a ana’e te fāri’i i te ora mure ’e ’ia ora fa’ahou i pīha’i iho i te Metua i te ao ra ’e ia Iesu Mesia.
Fa’aitoito i te ha’api’ira’a i te fare
’A hōro’a i te tahi ’api parau i te mau tamari’i ra ’o tā rātou e fa’a’ohipa nō te pāpa’i ’aore rā, nō te pāpa’i hōho’a i te mau mea tā rātou i māuruuru i te roara’a o te hepetoma.
Ha’amaita’i i tā tātou ha’api’ira’a
Te fa’ahiti-fa’ahou-noa-ra’a ’o te hō’ē ïa tāviri nō te ha’api’ira’a mai. E fāna’o te mau tamari’i i te fa’aro’ora’a i te hō’ē parau tumu o te ’evanelia ’aore rā, i te ravera’a i te hō’ē ’ātivite hau atu i te hō’ē taime. Tāmata i te rave fa’ahou i te mau ’ātivite i ravehia nā roto i te mau ravera’a rau.